རྒྱ་ལུ་ནི་མདོ་སྨད་རེབ་གོང་གསེར་མོ་ལྗོངས་ཀྱི་ནང་ཚན་རོང་འབྲོག་ཚོ་ལྔའི་ཡ་ཀྱལ། མགར་རྩེ་ཆུ་ཅ་སྡེ་བའི་མི་ཡིན་པ་དང་། ད་ལོ་དགུང་ལོ་དྲུག་བཅུ་ལྷག་གི་ནང་དུ་ཡོད། ཁོང་ནི་རུ་སྡེ་འདིར་སྐད་གྲགས་ཆེས་ཆེ་བའི་མག་ལྕུགས་བཅངས་མཁན་ཞིག་ཡིན། མག་ལྕུག་ཟེར་བ་ནི་མདོ་སྨད་ཀྱི་འབྲོག་ཁུལ་དུ་དར་ཁྱབ་ཆེ་བའི་སྲོལ་རྒྱུན་གྱི་གོམས་སྲོལ་ཞིག་ཡིན་པ་དང་། སྐྱེས་པ་སུ་ཞིག་གཉེན་སྒྲིག་བྱེད་སྐབས་སུ་ངེས་པར་བརྒྱུད་དགོས་པའི་ཆོ་ག་ཞིག་ཀྱང་ཡིན། དེ་ཡང་གཉེན་སྒྲིག་ཉིན་མོར་སྡེ་བ་ཚོ་བའི་ནང་གི་མི་བསམ་ཤེས་ཁ་བདེ་ཞིག་གིས་མག་པ་གསར་བར་དར་ཚོན་སྣ་ལྔའི་སྐེ་རགས་བཅིངས་དགོས་པ་དང་། སྐེ་རགས་བཅིངས་སྐབས་ཐོག་མར་མག་པ་གསར་བར་ཁ་གཡེང་འབོད་པ་དང་། དེ་ནས་རིམ་པ་བཞིན་སྐེ་རགས་ཀྱི་ཁ་མདོག་དང་མདུད་པ་རྒྱག་སྟངས་སོགས་ནས་བརྩམས་ཏེ་རེ་རེའི་མཚོན་དོན་དང་འབྱུང་ཁུངས་སོགས་གསལ་བོར་བརྗོད་པ་རེད། བརྙན་ཐུང་འདིར་ཁོང་གིས་གསུངས་པའི་བཤད་པ་ཞིག་དང་མག་ལྕུགས་བཅངས་སྐབས་ཀྱི་གཏམ་བཤད་སོགས་ཡོད། དེ་ཡང་ཁོང་གིས་གསུངས་པའི་བཤད་པ་ནི་མི་གཞན་གྱི་བཤད་པ་དང་མི་མཚུངས་པར། ལོ་རྒྱུས་ཀྱི་གོ་རིམ་གསལ་ཞིང་འབྲེལ་ཆགས་པ། བོད་སྤྱིའི་ལོ་རྒྱུས་ཐད་ནས་གནའ་མིའི་ངག་རྒྱུན་རིམ་པར་བརྒྱུད་པ་ཞིག་དང་། བཤད་པ་དེར་དང་པོར་བོད་ཀྱི་བཙན་པོ་རིམ་བྱོན་གྱི་ལོ་རྒྱུས་རིམ་པར་འདུས་ཤིང་། དེ་ནས་མདོ་སྨད་ཀྱི་ལོ་རྒྱུས། དེ་ནས་རེབ་གོང་ཡུལ་གྱི་ལོ་རྒྱུས། དེ་ནས་རིམ་པ་བཞིན་མགར་རྩེ་ཚོ་བཅོ་བརྒྱད་ཀྱི་ལོ་རྒྱུས་དང་འབྲེལ་ཏེ་ཆུ་ཅ་སྡེ་བའི་ལོ་རྒྱུས་བརྗོད་ཡོད་པ་དང་། དེ་ནས་ཆུ་ཅ་སྡེ་བའི་ཡུལ་ལྷ་གཞི་བདག་དང་ནང་ཚོ་བའི་མཐུན་སྒྲིལ་སོགས་ཀྱི་སྐོར་ཡང་འདུ་བ་ཞིག་གོ །