རེབ་གོང་དམེ་ཤུལ་པ་གུ་རུ་ཚེ་རིང་གིས་གླིང་བུ་སྣ་ཁག་གསུམ་ལ་འབུད་ཁྲིད་སྟོན་དང་ཁྱད་ཆོས་ལ་འགྲེལ་བཤད་བྱེད་པ།

གུ་རུ་ནི་མདོ་སྨད་རེབ་གོང་གསེར་མོ་ལྗོངས་ཀྱི་ནང་ཚན་དམེ་ཤུལ་སྡེ་བའི་ནོར་མགོ་ཚོ་བའི་མི་ཡིན་པ་དང་། ད་ལོ་དགུང་ལོ་ལྔ་བཅུ་ལྷག་གི་ནང་དུ་ཡོད། ཁོང་ཆུང་དུས་ནས་སློབ་གྲྭ་འགྲིམས་མྱོང་བ་དང་སློབ་མཐར་ཕྱིན་རྗེས་ཕྱིར་ཕ་ཡུལ་དུ་ལོག་སྟེ་ས་གནས་སྲིད་གཞུང་གི་སྡེ་རུ་བྱ་བ་བསྒྲུབས། ཁོང་ཉིད་ཆུང་དུས་ནས་བོད་ཀྱི་གཏམ་བཤད་རིག་གནས་དང་ས་གནས་ལོ་རྒྱུས། དམངས་ཁྲོད་སྒྱུ་རྩལ་སོགས་ཀྱི་རིགས་ལ་ཤིན་ཏུ་སྤྲོ་བ་དང་། རྗེས་སུ་སྲིད་གཞུང་བྱ་བའི་ཞོར་དུ་རང་གི་བུ་ཆུང་བསྐལ་བཟང་ཚེ་བརྟན་དང་ལྷན་དུ་དམེ་ཤུལ་སྡེ་བའི་ལོ་རྒྱུས་ཀྱི་དཔེ་ཆ་བརྩམས་ཏེ་མཚོ་སྔོན་མི་རིགས་དཔེ་སྐྲུན་ཁང་ནས་དཔར་དུ་བསྐྲུན། ཁོང་ནི་རེབ་གོང་རྫོང་ཐོག་ཏུ་བཞུགས་པ་དང་ཁ་ལྕེ་ཤིན་ཏུ་བདེ་ཞིང་ཁ་མཚར་སོགས་ཤིན་ཏུ་མཁས་པས། རེབ་གོང་རྫོང་ཐོག་ནས་བསྒྲུབས་པའི་གཉེན་སྟོན་གྱི་མཛད་སྒོ་ཆེ་ཕྲ་ཐམས་ཅད་ལ་གདན་འདྲེན་ཞུ་བཞིན་ཡོད་པ་དང་། གཉེན་སྟོན་མང་པོ་ཞིག་ལ་རང་རེའི་བོད་ཀྱི་སྲོལ་རྒྱུན་ལྟར་རྩ་འཛུགས་དང་མགོ་འཛིན་བྱས་ཏེ་རང་རེའི་བོད་ཀྱི་རིག་གནས་མི་ཉམས་གོང་སྤེལ་གྱི་ཕྱོགས་ལ་ཧུར་བརྩོན་བྱེད་མུས་སུ་བཞུགས་པ་ཞིག་ཡིན། བརྙན་ཐུང་འདིར་ཁོང་གིས་བོད་ཀྱི་གླིང་བུའི་སྐོར་མདོར་བསྡུས་ཤིག་ངོ་སྤྲོད་བྱས་ཡོད་པ་དང་། ཁོང་གིས་གླིང་བུ་དང་མི་རིགས་གཞན་གྱི་རོལ་ཆས་འགའ་སྤྱད་དེ་དངོས་སུ་འཁྲབ་སྟོན་ཐུང་ངུ་ཞིག་ཀྱང་བྱས་ཡོད་དོ། །