26 Sep 2012
29 min 19 sec
Video Overview
Creators:
Unknown
At the Repgong Tamshé Seminar, Guru Tsering from Meshül sincerely thanked the young people for convening such a vital seminar. As mentioned by the other speakers, he stressed that he is also concerned about the decline of traditional culture and customs, particularly with the traditional wedding ceremony customs that are dissipating, including the clothes worn and the songs that are played. Additionally, he pointed out changes in traditional cultures such as offering rituals, children’s songs, and dances among others that are slowly declining in the city. He also said that it is everyone’s responsibility to preserve and protect them.
རེབ་གོང་གཏམ་བཤད་བགྲོ་གླེང་ཚོགས་འདུའི་ཐོག་དམེ་ཤུལ་སྡེ་བའི་གུ་རུ་ཚེ་རིང་གིས་གཞོན་སྐྱེས་རེ་འགས་སྐབས་སུ་བབས་པའི་ཚོགས་འདུ་འདི་འདྲ་ཞིག་བསྐོང་བར་བཀའ་དྲིན་ཆེ་ཞུས་པ་དང་། ཁོང་གིས་ཀྱང་དམངས་ཁྲོད་རིག་གནས་སྤྱི་དང་། སྒོས་སུ་གཉེན་སྟོན་གྱི་བརྒྱུད་རིམ་དང་རྣམ་པ་སོགས་སྲོལ་རྒྱུན་གྱི་ཁྱད་ཆོས་མང་བོ་ཞིག་ཉམས་རྒུད་དུ་འགྲོ་དང་འགྲོ་བཞིན་ཡོད་པ་དེ་དང་། ཐ་ན་ལྭ་བ་གྱོན་སྟངས་དང་གླུ་ལེན་གར་རྩེ་སོགས་སྲོལ་རྒྱུན་དང་མི་མཐུན་པ་སོགས་དམིགས་སུ་བགར་ནས་བཤད་སོང་། གཞན་ཡང་ཁོང་གིས་བསང་སྲོལ་བྱེད་སྟངས་དང་། ལོ་གསར་སྐྱེལ་སྟངས། བྱིས་པའི་གླུ་ལེན་གར་རྩེད་སོགས་སྲོལ་རྒྱུན་རིག་གནས་དང་གོམས་སྲོལ་མང་བོ་ཞིག་གྲོང་ཁྱེར་སོགས་སུ་དམིགས་བསལ་གྱིས་ཉམས་རྒུད་དུ་འགྲོ་བཞིན་པ་དག་ཟུར་འདོན་བྱས་ཤིང་། ཁོང་གིས་ཀྱང་དམངས་ཁྲོད་རིག་གནས་སྲུང་སྐྱོབ་བྱ་རྒྱུ་དེ་ནི་མི་རེ་རེའི་ཕྲག་ན་འགན་འཁུར་ཡོད་ཅེས་བཤད་སོང་།
在热贡民间口头文学研讨会上，来自麦秀村的格日才让真诚地感谢一些新一代的年轻人召集了这样一个重要的研讨会。他强调指出，他还对传统文化和习俗的衰落感到关切，特别是正在消失的传统的婚礼习俗，包括所穿的衣服和所播放的歌曲等传统特征到处都在退化。此外，他还指出了传统文化的变化，如祭祀、儿童歌舞以及其他许多在城市中慢慢衰落的传统文化和习俗。他还说，保存和保护它是每个人的责任。
- ང་ནི་ཆེན་པོ་ཞིག་བཤད་ཤེས་མཁན་ཞིག་མིན།
- མང་པོ་ཞིག་བཤད་རྒྱུ་མེད།
- སྤྱིར་བཏང་དུ་ད་ཐེངས་ཀྱི་ལས་གཞི་འདི་སྒྲུབ་མཁན་གྱི་གཞོན་སྐྱེས་འདི་དག
- གཞན་ཕན་གྱི་དོན་ཟེར་ན་ཆོག་གི་གང་ལྟར་རང་དོན་རེད།
- མི་རིགས་ཀྱི་བླ་སྲོག་རེད།
- འདི་འདྲ་ཞིག་ཡིད་ལ་བཅིངས་ནས།
- ད་ཐེངས་གྱི་ལས་གཞི་འདི་འདྲ་ཞིག་སྒྲུབ་པའི་སྟེང་ལ།
- དཀའ་བའི་ཚེགས་ལ་མ་འཛེམ་པར།
- ད་ཐེངས་འདི་ནས་ལས་གཞི་འདི་སྒྲུབ་པའི་མི་སྣ་འདི་ཐམས་ཅད་ལ།
- ངའི་སྙིང་ཐག་པ་ནས་བཀའ་དྲིན་ཞུས་པ་དང་དགའ་བསུ་བྱས་པ་ཡིན།
- ང་རང་ལ་མཚོན་ན་མཐོ་རིམ་གྱི་སློབ་གསོ་མྱངས་པ།
- དགོན་སྡེ་ནས་སློབ་གཉེར་བྱས་པ་དེ་འདྲ་ཞིག་རྩ་བ་ཉིད་ནས་མིན།
- ང་རང་གི་ལས་རིགས་ཡིན་ན་རླངས་འཁོར་ཁ་ལོ་བ་ཞིག་ཡིན།
- དེ་འདྲ་ཡིན་པས་སློབ་གྲྭ་སོགས་ལའང་འགྲིམ་མགོ་མ་འཆང་།
- ཡིན་ནའང་རང་ཉིད་ལ་མཚོན་ན་ཕོ་རྩལ་སྣ་དགུ་འཛོམས་པ།
- ངག་གི་རྩལ་གསུམ་ལྡན་པ།
- ལོ་རྒྱུས་ཀྱི་དགེ་ཐོན་པ་དང་ཤགས་ཀྱིས་ཕ་རོལ་ནོན་པ།
- གཏམ་མགོ་བཞད་གད་ཐོན་པ།
- དེ་འདྲའི་འཇོན་ཐང་ཅན་ཞིག་རྩ་བ་ཉིད་ནས་མིན་མོད།
- ཡིན་རུང་མིན་རུང་དེ་རིང་འདིར་ཕེབས་ཡོད་པ་འདི་དག
- མི་རྒན་དང་ཕ་རྒད་བསྐལ་བ་ཆགས་པའི་གངས་རི།
- དེ་འདྲ་རྣམས་ས་རེབ་གོང་གི་སྟོད་སྨད་ནས།
- འདི་འདྲའི་རྒན་པ་རྣམས་ཀྱིས་ཀྱང་དཀའ་བ་དང་དཀའ་ཚེགས་ལ་མ་འཛེམས་པར།
- དགུང་ལོ་འདི་འདྲ་བགྲེས་ནའང་ད་ཐེངས་ཀྱི་ལས་གཞི་སྒྲུབ་ཡོད་པ་འདིའི་སྟེང་དུ།
- འདིར་ཐོན་པ་ལ་ཁྱེད་རྣམ་པར་བཀའ་དྲིན་ཆེ་ཞུས་པ་ཡིན།
- དེ་གཅིག་རེད།
- དེ་རིང་སྐབས་སུ་བབས་པའི་བཤད་རྒྱུ་ནི་གཏམ་བཤད་ཀྱི་བགྲོ་གླེང་ཞིག་རེད།
- དེ་བས་ད་ཐེངས་ཀྱི་བརྗོད་བྱ་གཙོ་བོ་གཏམ་བཤད་ཀྱི་བརྗོད་བྱ་འདིའི་སྟེང་དུ་བརྗོད་དགོས།
- ང་རང་གི་རྒྱུ་མཚན་འདིའི་སྔོན་ལ་བཤད་ཟིན་པ་དེ་རེད།
- ངས་འདི་ནས་མང་པོ་ཞིག་བཤད་ན་དུས་ཚོད་ཀྱང་འགོར་འགྲོ།
- ཚང་མས་འདི་ནས་རྣམ་འགྱུར་ཞིག་སྟོན་ཞེས་བཤད་ན།
- རང་ཉིད་ཀྱང་འདི་ལ་དགའ་དད་སྤྲོ་གསུམ་ཡོད་པའི་སྟེང་ནས་ཡོང་བ་ཡིན།
- ཁ་སང་ལ་མཚོན་ནའང་བློ་མཐུན་འགའ་རེ་ཡོང་ནས།
- བཅར་འདྲི་ཟེར་ན་ཆོག་གི་ཁ་བརྡ་བྱེད་དུ་ཡོང་ན།
- རང་གིས་ཀྱང་དགའ་དགའ་སྤྲོ་སྤྲོ་ཡི་ངང་ནས་དེ་དང་ལེན་བྱས་པ་ཡིན།
- དེ་རིང་ལ་མཚོན་ནའང་འདིར་གཅིག་ཤོག་ཅེས་བཤད་ན།
- རང་ཉིད་ཡོང་བའི་རྒྱུ་མཚན་དེ་ཡིན།
- འདིར་ཡོང་ན་ངོ་མས་བཤད་ན་རང་གི་སེམས་སུ་ཚོར་བ་ཚོར་སྣང་དང་།
- དགའ་བ་སོགས་རང་གིས་བཤད་མི་ཤེས་པ་དེ་འདྲ་ཞིག་རང་ལ་ཡོད་ཀི།
- རྒྱུ་མཚན་འདྲ་བོ་དེ་འདྲ་ཞིག་རེད།
- དེ་ན་ངས་དེ་རིང་འདི་ནས་བཤད་རྒྱུའི་སྟེང་ནས།
- སྣ་ཁ་འདྲ་བོ་གང་ཡིན་ཟེར་ན།
- བོད་ཀྱི་སྲོལ་རྒྱུན་གྱི་རིག་གནས་ཀྱི་སྟེང་ནས།
- འདི་གཏམ་དང་འབྲེལ་ནས་བསྡད་དེ།
- འདིའི་ཕྱོགས་འདི་ནས་རང་གི་སེམས་ལ་འཆར་སྒོ་ཙམ་ཞིག་ཡིན་ན་ཆོག་གི།
- དེ་འདྲའི་སྐད་ཆ་འགའ་བཤད་རྒྱུའི་རྒྱུ་མཚན་དེ་ཡིན།
- ཁ་སང་གློ་བུར་དུ་བརྡ་བརྒྱབ་པ་རེད།
- གྲ་སྒྲིག་ཅི་ཡང་མེད།
- མེད་རུང་སྐབས་སུ་བབས་པས་སྐད་ཆ་འགའ་མ་བཤད་ན་མི་བཟང་གི།
- དེ་བས་རང་ལ་འདིའི་སྟེང་འདི་ནས་སྣ་ཁ་ནི།
- འདི་འདྲ་གཉིས་གསུམ་ཞིག་གི་སྟེང་ནས།
- ཁྱེད་རྣམ་པའི་སྙན་ལམ་ལ་ཞུ་རྒྱུ་ཞིག་ཡོད།
- གཅིག་ནི་གང་རེད་ཟེར་ན་སྲོལ་རྒྱུན་རིག་གནས་ཀྱི་སྟེང་ནས།
- སྣ་ཁ་གཅིག་གི་སྟེང་ནས་བཤད་ན།
- གཉེན་སྟོན་གྱི་སྟེང་ནས་བཤད་ན་སྔོན་ལ་ཨ་ཁུ་ཡིས་བཤད་པ་བཞིན།
- དེ་ལྟར་ང་ཚོ་བོད་ཀྱི་གཉེན་སྟོན་འདི་ལ་མཚོན་ན།
- ང་ཚོའི་འདི་ལ་བརྒྱུད་རིམ་དང་རྣམ་པ།
- ཁྱད་ཆོས་ལ་སོགས་པ་ཕུན་སུམ་ཚོགས་པ་ཡོད་ཀི།
- ཡོད་མོད་དེ་རིང་གནངས་ཀ་འདི་ཉམས་ནས་འགྲོ་བཞིན་ཡོད།
- ཕྱོགས་གང་ཐད་ནས་བཅུ་ཕྲག་རིག་གནས་འདི།
- དེ་ལས་སེམས་ཅན་གྱི་སྲོལ་རྒྱུན་གྱི་རིག་གནས།
- སྐད་དང་ཡི་གེ་གཙོ་བྱས་ཏེ།
- གང་དང་གང་ཡིན་རུང་མི་ཤི་རྗེས་དུ་བ་ལངས་ནས་བསྡད་ཡོད་པ།
- ང་རང་གིས་བལྟས་ན་ཚད་དེ་འདྲ་ཞིག་ལ་ཐོན་འདུག་སྙམ།
- ཕར་ལ་བེམ་པོ་ཡི་གྲལ་ལ་བརྩི་རྒྱུ་མེད་པ་དང་ཚུར་ལ་མི་ཡི་གྲལ་དུ་བརྩི་རྒྱུ་མེད་པ།
- འདི་འདྲའི་གཉོམ་ཆུང་བ་དང་ཉག་ཕྲ་བའི་ཚད་ཐིག་འདི་འདྲ་ཞིག་ལ་ཐོན་འདུག
- འདིའི་སྟེང་ལ་ན་ཟུག་དང་རེ་བའི་སྟེང་ནས།
- དེ་རིང་ཁོང་རྣམ་པས་གསུང་བ་ནི།
- ཚང་མས་མགྲིན་གཅིག་དང་དབྱིངས་གཅིག་གིས་བཤད་པ་ཚང་མ་གཅིག་དང་གཅིག་རེད།
- ལྷག་པར་དུ་རེབ་གོང་ས་ཆ་འདིའི་ལུང་པ་ཕ་རོལ་ཚུར་རོལ་འདི།
- ང་ཚོའི་རྨ་ལྷོ་ཁུལ་ཡོད་ས་དང་རོང་བོ་གྲོང་རྡལ་ཡོད་ས།
- རོང་བོ་སྡེ་བདུན་ཡོད་ས།
- ལྷག་པར་དུ་ཆབ་སྲིད་དང་དཔལ་འབྱོར་ཡིན་ན།
- རིག་གནས་ཡིན་ན་དམངས་སྲོལ་ཡིན་ན།
- ཐམས་ཅད་ཀྱི་ལྟེ་བ་རེད།
- འདི་གཅིག་པུ་ཡི་སྟེང་ནས་བལྟས་ནའང་།
- ཧ་ཅང་མཐའ་ཆགས་དང་ངོ་མས་བྱ་བཙོག་གི་སྙམ་པ།
- ང་རང་ལ་ལྟ་ཚུལ་འདི་འདྲ་ཞིག་ཡོད་མོད་མིན་ན་ཡང་ཐང་།
- ང་ཚོ་རེབ་གོང་གི་འཆད་པ་རྣམ་གསུམ་དང་བསྟོད་པ་རྣམ་གསུམ་གཅིག་བཤད་ན།
- ང་འདྲ་བ་ཞིག་གིས་བཤད་ཤེས་པ་ཞིག་མ་རེད།
- ང་ཚོའི་རེབ་གོང་སྒྱུ་རྩལ་དང་རེབ་གོང་རིག་གནས་ཟེར་བ་འདི།
- དེ་རིང་གནངས་ཀ་ཡང་འདིའི་སྙན་གྲགས་སམ་སྙན་པའི་གྲགས་པ་འདི།
- སྲིད་པ་འཁོར་ལོ་ཡིན་ན་ཁྱོན་འདི་ན་བཀང་ཡོད་པ་དེ་འདྲ་ཞིག་རེད།
- འདི་ངས་བཤད་མི་དགོས།
- རེབ་གོང་རིག་པ་འབྱུང་བའི་གྲོང་ཁྱེར་དང་རེབ་གོང་དགེ་བའི་འབྱུང་གནས་ལ་སོགས་པ།
- རེབ་གོང་གསེར་མོ་ལྗོངས།
- རྩེ་གཞུང་སྐྱིད་པའི་སྨན་ལྗོངས་ལ་སོགས་པ།
- ང་ཚོའི་རེབ་གོང་ལ་ཤོག་ཁ་བཅུ་གཉིས།
- འདི་འདྲའི་ཆེ་ས་ཆུང་ས་གང་གི་སྟེང་ནས་ཡིན་ནའང་།
- སྔོན་ཆད་ཀྱི་ལོ་རྒྱུས་རིང་མོ་ཞིག་ཡོད་པ།
- རྒྱུ་མཚན་དེ་འདྲ་ཞིག་རེད།
- དེ་བས་དེ་རིང་གནངས་ཀ་ཡི་ཚད་འདི་ལ་བལྟས་ན།
- གཉེན་སྟོན་ཞིག་གི་སྟེང་ནས་ཀྱང་ཡར་གྱི་རྗེས་དེད་ནས་ཡར་ལ་སོང་།
- མར་གྱི་རྗེས་དེད་ནས་མར་ལ་རྒྱུགས།
- རང་ལ་རང་ཚུགས་མེད་པར།
- རང་གི་རྒྱན་གོས་དང་རང་གི་མཆོད་ཁ་ཕྱག་ལེན།
- དེ་དག་ཐམས་ཅད་ཀྱི་སྟེང་ནས་དེ་རིང་གནངས་ཀ་ས་རེབ་གོང་འདི་ནས།
- ང་ཡིན་ནའང་འདིར་ཡོང་ནས་འདི་ནས་བྱ་བ་ལས་ཏེ།
- ཕལ་ཆེར་ལོ་ངོ་བཅོ་ལྔ་དེ་འདྲ་ཞིག་འགོར་སོང་།
- ད་བར་རང་ཉིད་འདུག་ས་ཡང་འདི་ཡིན།
- འདི་ན་ཁ་ཆེ་ཡིས་ཀྱང་གཉེན་སྟོན་བྱེད་བཞིན་ཡོད།
- རྒྱ་རིགས་ཀྱིས་ཀྱང་གཉེན་སྟོན་བྱེད་བཞིན་ཡོད།
- ཟ་ལར་རིགས་ཀྱིས་ཀྱང་གཉེན་སྟོན་བྱེད་བཞིན་ཡོད།
- བོད་རིག་དང་སོག་རིགས་འདི་དག་སྣ་ཚོགས་ཀྱིས་སྟོན་མོ་བྱེད་བཞིན་ཡོད།
- ང་ཚོ་བོད་མི་རིགས་ཀྱི་འདིའི་སྟེང་ནས་རང་ཚུགས་ཤོར་ནས།
- ཅི་ཡང་མིན་པ་འདི་འདྲ་ཞིག་གིས་ལོག་ཡོད་པ་འདི།
- རང་ཉིད་ལ་མཚོན་ནའང་དངོས་གནས་ཡིད་སྐྱོ་བ།
- གནས་ཚུལ་དེ་འདྲ་ཞིག་ཡིན་འདུག
- ང་རང་ཉིད་ལ་མཚོན་ནའནང་ངོ་ཚ་རྒྱུ་མེད་པར།
- སེམས་ཅན་ཐམས་ཅད་ཀྱིས་ང་ལ་ཁྱོད་ཤོག་དང་།
- ངེད་ཚང་གི་སྟོན་མོ་འདི་ལ་མདོ་འཛིན་ཞིག་བྱོས་ཞེས་བཤད་ན།
- རང་ཉིད་དེར་རྒྱུགས་ནས་དེ་ལྟར་བྱས་ཏེ།
- དེ་ལྟར་ང་རང་ཉིད་སོང་མྱོང་བའི་སྟོན་མོ་དེ་དག་ལ་བལྟས་ན།
- ངོ་མས་བཤད་ན་ང་ཚོའི་སྲོལ་རྒྱུན་ཉམས་པའི་ཚད་ཆེ།
- དཔེ་འཇོག་རྒྱུ་ན་དེ་རིང་གནངས་ཀ་ལས་ཁུངས་ནང་གི་མི་ཞིག་ཡིན་ན་ཆད།
- སྡེ་བ་རེའི་མཐའ་ཁ་ཐག་ཉེ་ན་ཡོད་པའི་མི་ཡིན་ན་ཆད།
- ཐ་ན་དམངས་ཚོགས་ཕལ་བ་ཞིག་གིས་སྟོན་མོ་བྱས་ན།
- དེ་ནས་མི་རིགས་གཞན་པ་ཞིག་གི་ལད་མོ་བྱས་ནས།
- གཞན་པ་ཞིག་གི་ཚོང་ཁང་དུ་སོང་ནས།
- ཨ་ཞང་ཚང་དང་གཉེན་ཚང་ཚང་གཉིས་མཉམ་དུ་བསྡད་ཡོད་པ་འདྲ།
- ཡང་ན་ཆང་འཐུང་ཕྱོགས་དང་ཟ་མ་ཟ་ཕྱོགས།
- ལྭ་བ་གྱོན་ཕྱོགས་དང་གླུ་ལེན་གར་རྩེ་བྱེད་ཕྱོགས།
- ཐམས་ཅད་པོ་མི་རིགས་གཞན་པ་ཞིག་གི་ཚུགས་ཀ་བྱས་ནས།
- དེར་ཡང་མི་རིགས་འདིའི་ཚུགས་ཀ་ཡིན་ཟེར་རྒྱུ་ཡང་མེད།
- གང་ལེགས་པ་མི་ཤེས་པར་མགོ་རྔ་མ་མེད་པ།
- མགོ་ན་ཨོཾ་མེད་པ་དང་རྗེས་ན་ཧཱུཾ་མེད་པ་ཞིག་གིས་ལོག་ཡོད།
- འདི་ནི་ཧ་ཅང་གིས་ཉེན་ཁ་ཅན་ཞིག་རེད།
- དེ་བས་རང་ལ་འདིའི་ཕྱོགས་ན་རིན་པོ་ཆེ་ཞིག་ཡོད་ན།
- རང་ལ་མ་མེས་ཀྱི་གཅེས་ནོར་འདི་འདྲ་ཞིག་ཡོད་ན།
- དེ་རིང་གནངས་ཀ་ང་ཚོའི་ལག་ནས་ཤོར་བཞིན་པ་འདི།
- འདིའི་སྔོན་ལ་རྣམ་པ་ཚོས་གསུང་བ་དེ་དང་དེ་བཞིན་རེད།
- མི་རེ་རེའི་ཕྲག་ན་འགན་འཁུར་ཡོད་ཀི།
- དེ་རིང་འདིར་ཕེབས་ཡོད་པའི་རྒན་པ་རྣམས་ལ་མཚོན་ནའང་།
- སྤྱིར་ང་ཚོར་རེབ་གོང་ཤོག་ཁ་བཅུ་གཉིས་ཞེས་བཤད་ན་རྒྱ་ཆེ་སོང་མོད།
- གང་ལྟར་ཀྱང་རང་རང་གི་སྡེ་བ་དང་ཚོ་བའི་ནང་ནས།
- ཁྱེད་ཚོ་ཡིན་ན་དོན་ཆེན་གྲོས་མགོ་བཏང་།
- ཕ་སྐད་གསེར་གྱི་བདག་པོ།
- ཕལ་ཆེར་མིན་རྒྱུ་ཡོད་པ་མ་རེད།
- དེ་ཡིན་ན་མགོ་ནས་བཟུང་སྟེ་རྒན་པ་རྣམས་ཀྱིས།
- རང་རང་གི་ཁྱིམ་ཚང་།
- རང་རང་གི་ཁྱིམ་མཚེས།
- རང་རང་གི་ཉེ་ས་ཐམས་ཅད་ལ།
- སྲོལ་ཡག་པོ་ཞིག་བཏོད་ནས་འདི་ཕྲག་བཟུང་བྱས་ཡོད་པ་ཡིན་ན།
- དེ་འདྲ་ཞིག་ཉམས་རྒྱུ་མ་རེད་འདོད།
- འདི་ཉམས་པ་འདི་དེ་རིང་གནངས་ཀ་ཡི་གསར་སྐྱེས་ཏག་ཏག་དང་།
- གཞན་གྱི་རིག་གནས་ང་ཚོའི་འདིའི་ནང་དུ་ནང་འཛུལ་བྱས་པ་ཡིན་ན་ཆོག
- མངོན་གསལ་དུ་ང་ཚོའི་འདིའི་ནང་དུ་ཐོན་ཡོད་པ་དག་ཡིན་ན་ཆད།
- དེའི་རྒྱུ་རྐྱེན་གཅིག་པུ་ཡང་མིན་པ་འདྲ།
- དེ་བས་རང་གི་ཨ་ཕ་དང་ཨ་ཁུ་རྣམས་ལ་ལེ་བདའ་བྱས་པ་མིན་མོད།
- འདི་དག་ཐམས་ཅད་ཀྱི་འགྲོ་ལུགས་འདུག་སྟངས་ལ།
- ལོ་ལོན་རྒན་པ་རྣམས་ཀྱིས་འདི་བྱེད་དགོས་དང་གན་བྱེད་དགོས་ཞེས།
- ཁྱིམ་ཚང་ཞིག་ལ་མཚོན་ནའང་།
- དཔེ་འཇོག་རྒྱུ་ན་སྟོན་མོ་ཞིག་གི་སྐབས་སུ་ཡིན་ན་ཆད།
- འདི་དག་ཐམས་ཅད་ཀྱི་སྟེང་ནས་རང་གི་སྡེ་བ་རུ་ཡིན་ན་ཆད།
- ཡུལ་སྲོལ་གོམས་གཤིས་ཡིན་ན་ཆད།
- ཐ་ན་དེ་རིང་གནངས་ཀ་བསང་ཞིག་ཕུད་ནའང་།
- བསང་ཕུད་ན་བསང་རྩིས་པའི་མི་མེད་ཀི།
- ངས་དྲན་པའི་རྒད་པོ་རྣམས་ཀྱིས་བསང་ཡག་པོ་ཞིག་བརྩི་ཤེས་པ།
- དེ་ལ་ཀ་ར་སིལ་ཏོག་དང་ཟས་ཟ་མ་ཕུད།
- དེ་ལ་དཀར་གསུམ་དམར་གསུམ་གང་ཡོད་ན།
- དེ་ལ་དེ་རིང་གནངས་ཀ་ཅི་ཞིག་བྱེད་བཞིན་འདུག་ཟེར་ན།
- དགོན་པ་ནང་དུ་སོང་ནའང་བསང་བརྩི་ཞིག་གཏོར་རྗེས་བུད་འགྲོ།
- དེའི་འཕྲོར་དེའི་ནང་ན་རྒན་པ་ཡོད་ན་ཆད་གཞོན་པ་ཡོད་ན་ཆད།
- བསང་བརྩི་བ་དང་བཤད་པ་དེ་འདྲ་གཅིག་ཀྱང་མེད།
- དཔེ་འཇོག་རྒྱུ་ན་སྟེར་ཁ་ཞིག་འདིར་ལྟར་སྒྲིག་ནས་འཇོག་པ་ཡིན་ན།
- འདི་ཁྱེད་ལ་དྲངས་པ་ཡིན་ལ་ཁྱེད་ཀྱིས་ཟ་དགོས་ཞེས།
- དཔེ་འཇོག་རྒྱུ་ན་དེར་རང་གི་བགོས་སྐལ་ཅི་ཡང་མེད།
- རང་རང་གིས་བསང་བརྩི་གཏོར་རྗེས་བུད་འགྲོ་བའི་རྒྱུ་མཚན་དེ་འདྲ་ཞིག་རེད།
- དེར་མཚོན་ནའང་བསང་འདིའི་ནང་ནའང་རྒྱུ་མཚན་མང་པོ་ཞིག་ཡོད་ཀི།
- བསང་དེ་ལ་ཡང་རྩིས་ན་སྐད་ཀྱི་གདངས་ཡོད་པ།
- བསང་བརྩི་སྲོལ་ཡོད་པ།
- རང་རང་གིས་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་སྲུང་མ།
- ཡུལ་ལྷ་གཞི་བདག
- ས་འདིའི་ས་བདག་ཡུལ་བདག་གནས་བདག་ལ་སོགས་པ་ཐམས་ཅད་པོ།
- རང་རང་གི་ས་ཆའི་ཡུལ་ལྷ་གཞི་བདག
- མཆོད་པའི་ཡུལ་དེ་དག་ཐམས་ཅད་པོ་གསལ་བོ་ཞིག་བཤད།
- ཉན་ནས་བསྡད་ན་ཨ་ཨ་ཨ་་་དེ་རིང་ཨ་ཁུ་ཅིག་མཅིག་གིས་བསང་ཕུད་ཀྱིན་འདུག
- ཚང་མ་སོང་ནས་དེར་ཉན་པ་དེ་འདྲ་ཞིག་རེད།
- དེ་རིང་གནང་ས་ཀ་དེ་ཉམས་འདུག
- དེ་བས་དེའི་སྟེང་ནའང་ངོ་མས་བཤད་ན།
- རིག་གནས་རྩ་ཆེན་ཆེན་པོ་ཞིག་ཉམས་ནས་འདུག
- སྟོན་མོ་ཞིག་གི་ཐོག་ལ་ཐོན་ན་ཡང་དེ་དང་དེ་བཞིན་རེད།
- ཁོར་ཡུག་ལས་སྡེ་བ་ཚོ་བའི་ནང་གི་ཁ་མགོ་ཡིན་ན་ཆད།
- དགོན་སྡེ་ཡི་བླ་མ་དང་དགེ་བའི་བཤེས་གཉེན་ཡིན་ན་ཆད།
- དེའི་འཕྲོ་ནས་སྡེ་བ་ཡི་ནང་གི་མགོ་བ་ཡིན་ན་ཆད།
- ཚང་མ་ལ་རང་གི་ལུགས་སྲོལ་དེ་གཞན་ཞིག་གིས་མ་འཛུགས་ཟེར་གྱིན་མེད།
- རང་ཉིད་མ་འཁྱོང་བ་མ་གཏོགས་རྒྱལ་ཁབ་ལ་ཡང་མ་ཉེས་ཁག་གཡོགས་བྱེད་རྒྱུ་མེད།
- སྲིད་ཇུས་ཀྱི་སྟེང་ནའང་མི་རིགས་རང་གི་ཡུལ་སྲོལ་གོམ་འདྲིས་དང་།
- མི་རིགས་ཀྱི་རིག་གནས་ལ་བརྩི་འཇོག་བྱེད་དགོས་ཞེས།
- བཅའ་ཁྲིམས་ཀྱི་ནང་དུ་གཏན་ལ་ཕབ་ཡོད་པ་རེད།
- ཡིན་ན་ཡང་དེ་རིང་འདིར་འདུས་ཡོད་པའི་ནང་ནའང།
- འདི་མི་བཤད་མཁན་གཅིག་ཀྱང་མེད་ཀི།
- ཁ་ནང་ན་བཤད་མཁན་མང་མོད་ལག་ལེན་དུ་འདེབ་མཁན་ཉུང་བ།
- རྒྱུ་མཚན་དེ་འདྲ་ཞིག་ཡིན་ཏེ་རང་རང་གི་ཚད་ཐིག་དེ་རང་གིས་ཤེས་པ་རེད།
- དེ་ལྟར་སྟོན་མོ་ཞིག་གི་སྟེང་དུ་སོང་ནའང།
- བོད་ལྭ་ཞིག་གྱོན་རྒྱུ་དེ་ངོ་ཚ་ཞིག་དང་མི་ཡག་པ་ཞིག་གི་ཚུལ་དུ་བཟུང་ནས།
- རྒྱ་ལྭ་ཞིག་གྱོན་ནས།
- དེ་འདྲ་ཞིག་གྱོན་ནས་ཅི་ཡིན་རུང་།
- རྒྱ་ལྭ་ཞིག་གྱོན་ནའང་གྲལ་དག་ཅིག་མི་གྱོན་པར།
- རང་བཞིན་གྱིས་ཅི་འདོད་གང་འདོད་དུ་གྱོན་ནས།
- དེ་ལྟར་བྱེད་པའི་རྒྱུ་མཚན་དེ་འདྲ་ཞིག་རེད།
- རྒྱ་ལོའི་ཚེས་གཅིག་ཉིན་ལོ་གསར་དུས་སུའང་དེ་དང་དེ་བཞིན་རེད།
- དེ་ནས་མཆོད་པ་བྱེད་པ་དང་བསང་ཞིག་ཕུད་པ།
- ལོ་ལོན་ལ་ལོ་གསར་སྟེར་རྒྱུ།
- དེ་ནས་རྒན་པ་རྣམས་ལ་ལོ་གསར་སྐྱེལ་རྒྱུ།
- དེ་ནས་མི་ཤི་སོང་བར་འདུན་འོག་ན་ཡོད་པའི་མི་རྣམས་ལ་ལོ་གསར་སྟེར་རྒྱུ།
- དེའི་འཕྲོར་ཉི་མ་སྐར་མ་ཡག་དུས་སྡེ་བའི་ནང་གི་ལོ་ལོན་དང་རྒན་རྒོན་ཚང་མ་འདུས་ནས།
- སྡེ་བའི་ནང་དུ་ལྷ་རྩེད་ཡོད་ན།
- མདའ་རྩེད་ལ་སོགས་པ་ཡོད་ན།
- དེའི་ནང་དུ་རྩེད་རིགས་ལ་སོགས་པ་ཡོད་ན།
- གླུ་ལེན་གར་རྩེད་སོགས་བྱས་ན་དེར་ཁོར་ཡུག་ཅིག་ཡོད་རྒྱུ་ན།
- དེང་སང་གི་བྱིས་པ་ཚོས་གླུ་ལེན་མི་ཤེས་པ།
- འདི་དང་ཐམས་ཅད་དང་གཏམ་བཤད་མི་ཤེས་པ་འདི་ལ་ཁག་མེད་ཀི་འདོད།
- ངའི་སྟོན་མོ་འདི་འདྲ་ཞིག་ཡིན་ལ་ཁོ་ཚོའི་སྟོན་མོ་འདི་འདྲ་ཞིག་རེད་ཅེས།
- ང་ཚོའི་རྒན་པ་འདི་ཚོའི་ཕྱིན་ཆད་ཡིན་ན་ཆད།
- གང་དང་གང་ཞིག་ཡིན་ན་ཐོག་མཐའ་བར་གསུམ་དུ།
- དེར་ཅུང་ཙམ་མཉམ་བཞག་ནས།
- འདི་དང་དུ་བླངས་ན་འདི་ལ་སྲོལ་ཞིག་ཆགས་རྒྱུ་རེད།
- སྲོལ་དེ་ཆགས་ནས་རྒྱུན་བརྐྱང་ན་ང་ཚོས་ཐུབ་པ་རེད།
- དེ་མ་གཏོགས་སློབ་མ་རྣམས་དང་མཁས་པ་རྣམས་ཀྱིས་བཤད།
- རྒྱ་ཆེན་ཞིག་བཤད་རྒྱུ་དེ་འདྲ་ཞིག་མ་རེད།
- འདི་ཡིན་ན་ཆུང་གཞོན་པ་དང་ཆེ་རྒན་པ།
- འདི་དག་ཐམས་ཅད་ཀྱིས་རང་ངོས་ནས་འབད་པ་བྱེད་དགོས།
- ང་ལ་བསམ་བློ་དེ་འདྲ་ཞིག་ཡོད།
- དཔེ་འཇོག་རྒྱུ་ན་སྡེ་བའི་ནང་ཡིན་ན་ཆད་དགོན་པའི་ནང་ཡིན་ན་ཆད།
- རྒན་པའི་ནང་ཡིན་ན་ཆད།
- སྤྱི་ཚོགས་ཡོངས་ནས་སྣ་སྒོ་སོ་སོ་ནས།
- ཐེབས་རྩ་ཚོགས་པ་ཡིན་ན་གཞན་གྱི་ཚོགས་པ་ཡིན་ན།
- དེའི་འཕྲོར་ལུས་རྩལ་གྱི་བྱ་འགུལ་སྤེལ་བ་འདྲ།
- འདི་འདྲ་ཞིག་ཡོད་ན་ཁ་བརྡ་བྱེད་ན་བརྟག་རེ་བྱེད་ན་དག་ས་བྱེད་ན།
- རང་གི་རྩེད་རིགས་ཅི་ཡིན་རུང་དེའི་ཕྱོགས་ལ་འབུད་རྒྱུ་ཡོད་ན།
- རྡུང་རྒྱུ་ཡོད་ན་ལེན་རྒྱུ་ཡོད་ན།
- བཤད་རྒྱུ་ཡོད་ན།
- དེར་རང་རང་གི་ཁྱད་ཆོས་དང་ཡོན་ཏན་དེ་ཕུད་ས་ཡོད་ཀི།
- ང་ཚོའི་ཁོར་ཡུག་འདིའི་དང་དུ་ཁྱོད་རང་གིས་ཅིག་མི་ཤེས་ནའང་།
- ཁོར་ཡུག་དེ་ཡིན་ན་མིན་ན་བསྐྲུན་དགོས་སྙམ།
- ཟི་ལིང་གྲོང་ཁྱེར་ན་ཡོད་པ་དེ་དག་གིས་ཀྱང་བོད་ཀྱི་སྟོན་མོ་ཞིག་ཡིན་ན།
- མནའ་མ་དང་མག་པ་རྣམས་ཀྱིས་ཀྱང་བོད་ཀྱི་ལྭ་བ་ཞིག་གྱོན་ནས།
- བོད་ཀྱི་ཁྱད་ཆོས་སྒྲིག་པ་ཡིན་ཟེར་མོད།
- གོང་དུ་ཚང་མས་བཤད་པ་དེ་རེད།
- བོད་ཀྱི་གླུ་མ་ཞིག་དང་གླུ་བ་ཞིག་ཉོ་དགོས།
- དེ་ལྟར་གླུ་གཅིག་བླངས་ན་སྒོར་མོ་བརྒྱ་ནས་ཉིས་བརྒྱ་སྟེར་དགོས།
- ཚོགས་པ་དེའི་ནང་ནས་སྟོན་མོ་ཞིག་ཡིན་ན་སྟོན་མོ་དེའི་རྣམ་པ་ཅི་འདྲ་ཞིག་རེད་ཟེར་ན།
- ཆེད་ལས་ཀྱི་རྣམ་པ་དེ་འདྲ་ཞིག་གིས་ལོག་ཡོད།
- དཔེ་འཇོག་རྒྱུ་ན་ཨ་ཞང་ཚང་དང་གཉེན་ཚང་ཚང་གཉིས་ཀ་འདྲིས་ནས།
- གཅིག་གིས་གཅིག་ལ་བཤད་པ་རེ་བཤད་པ་དང་ངོ་སྤྲོད་རེ་བྱས།
- འགྲུལ་བ་ཞིག་ལ་འགྲུལ་མགོ་ཞིག་ཅེས་ཁ་བརྡ་ཞིག་བྱེད་རྒྱུ་ན།
- དེར་སྟོན་མོ་ཡི་མིང་ཡོད་གི།
- དེ་ནས་རྒན་པ་ཚོས་ཀྱང་ཁོ་ཚོར་ཆང་འཐུང་རྒྱུ་ཡོད་ན།
- གཏམ་བཤད་རྒྱུ་ཡོད་ན།
- ཁོང་ཚོར་ཡང་དེ་ནས་གོང་ཞིག་གཅོད་རྒྱུ་ཡོད།
- གཞོན་པ་ཚོ་ཡང་དེ་དང་དེ་བཞིན་རེད།
- དགའ་སྣང་སྤྲོ་སྣང་གི་ཚོད་ཀྱིས་ནུས་པ་བཏོན་ན་ཆོག
- ཡིན་ཡང་དེ་རིང་གནངས་ཀ་དེ་འདྲ་ཞིག་མ་རེད།
- སྟོན་མོ་ཞིག་ལ་སོང་ནའང་ཚོང་ཁང་ཆེན་པོ་ཞིག་གི་ནང་དུ་སོང་ནས་འཚོགས་ཏེ།
- ནང་དུ་ཁ་བརྡ་གཅིག་ཀྱང་བཤད་རྒྱུ་མེད་ཀི།
- ཅི་རེད་ཟེར་ན་ཚང་མས་རྒྱ་སྐད་མིན་པ་དང་བོད་སྐད་མིན་པའི་སྦྲགས་སྐད་ཅིག་བཤད་ནས།
- སྟོན་མོ་མགོ་བརྩམས་པ་ཡིན་ཞེས་བཤད་དུས་ཚང་མས་དགའ་བསུ་ཞིག་བྱེད་པ་དེ་རེད།
- དེ་ནས་མི་ཅིག་མ་ཅིག་གིས་རྟེན་འབྲེལ་གྱི་གླུ་ཞིག་ལེན་རྒྱུ་རེད་ཅེས་བཤད་དེ།
- གླུ་དབྱངས་དང་རྡུང་ལེན་ཏག་ཏག་རེད།
- དེ་བས་ཆད་ལས་ཅན་གྱི་རྣམ་པ་ཞིག་གིས་ལོག་ནས།
- གཉེན་ཚང་གཉིས་ལ་ཁ་བརྡ་ཡིན་ན།
- མནའ་མ་དང་མག་པ་མཚམས་སྦྱོར་ཡིན་ན།
- ང་ཚོ་བོད་ཀྱི་སྟོན་མོ་ཡི་བརྒྱུད་རིམ་དེ་ཁྱེད་རྣམ་པའི་རྒྱུད་ན་མེད་པ་མ་རེད།
- སྟོན་མོ་ཅི་འདྲ་མང་བ་ལ།
- ངས་དེ་རིང་འདི་ནས་བཤད་ན་དུས་ཚོད་མང་པོ་འགོར་འགྲོ་མོད།
- སྟོན་མོ་ཡི་བརྒྱུད་རིམ་ཅུང་ཙམ་བཤད་རྒྱུ་ཡོད།
- རྒྱུ་མཚན་དེ་འདྲ་ཞིག་རེད།
- དེ་བས་ང་ཚོས་ཁ་ཚ་དགོས་གཏུགས་ཀྱིས་འདི་ཅི་བྱེད་དགོས་ཟེར་ན།
- ཁོར་ཡུག་ཡག་པོ་ཞིག་བསྐྲུན་རྒྱུ།
- འདི་ལ་ཡིན་ན་མིན་ན་མགོ་ཁྲིད་ཏག་ཏག་དང་མཁས་པ་ཏག་ཏག
- བླ་མ་ཏག་ཏག་གིས་མར་ལ་བཀོད་སྒྲིག་བརྒྱབ་ནས།
- ཡིན་ན་མིན་ན་འདི་བྱེད་དགོས་ཞེས་བཤད་པ་མེད་མོད།
- ཚང་མའི་སེམས་ཤུགས་འདིའི་སྟེང་དུ་སོང་ནས།
- འདི་ལ་སྲོལ་འདྲ་ཞིག་ཆགས་པ་ཡིན་ན།
- ང་ཚོས་མྱུར་སྐྱོབ་བྱེད་པ་ལ་ཁོར་ཡུག་ཅིག་སྐྲུན་རྒྱུ་ནི།
- དེ་གལ་བོ་ཆེ་བྱེད་རྒྱུ་ན་རྒྱལ་ས་དེ་རེད་འདོད།
- ཁྱིམ་ཚང་ཞིག་ཡིན་ནའང་མ་མཐའ་བཟའ་དཔོན་ཞིག་རེད།
- ཁྱོད་བཟའ་དཔོན་ཡིན་ན་ཁྱིམ་ཚང་ནང་གི་དེ་ཚོ་ཐུབ་པ་རེད།
- བྱིས་པ་ལ་ཨ་ཁུ་དང་དར་མ་གཞོན་གསུམ་གང་ཡོང་ན་སྒོར་བུད་ནས།
- བོད་ལྭ་གྱོན་སྟངས་འདི་འདྲ་ཞིག་རེ་གན་འདྲ་ཞིག་རེད།
- ཨ་ཁུ་བཤད་པ་བཤད་མཁན་འདིས་བཤད་པ་དེ་དང་དེ་བཞིན་རེད།
- ང་ཚོས་བོད་ལྭ་གྱོན་སྟངས་ཀྱང་དེ་རིང་གནངས་ཀ་གསལ་བོ་ཤེས་ཀྱིན་མེད།
- བླ་མ་ཞིག་མཇལ་བའམ་གོང་དཔོན་པོ་ཞིག་གི་སྐུ་མདུན་ལ་འགྲོ་ན།
- དེའི་སྐབས་སུ་ཕུ་ཐུང་གཉིས་ཀ་གྱོན་ནས་དེ་ལྟར་ཕྱག་འཚལ་བ།
- འདུན་ལ་སོགས་པ་ཡོད་ན་སྐེད་རགས་སྔུན་ནས་མདུད་རྒྱུ།
- སྡེ་བ་སོ་སོའི་སྲོལ་ཅུང་ཙམ་མི་གཅིག་མོད།
- མི་གཅིག་མོད་ཕལ་ཆེར་དེ་འདྲ་རེད།
- དེ་འདྲ་རེད།
- གླུ་ལེན་གར་རྩེད་ཀྱི་ཕྱོགས་ནས་ཀྱང་རྒྱུ་མཚན་དེ་འདྲ་ཞིག་རེད།
- དེ་རིང་གནངས་ཀ་སྟོན་མོ་ཞིག་གི་ཐོག་ཏུ་སོང་ནའང་།
- བཤད་པ་ཞིག་དང་གླུ་ཞིག་གི་སྟེང་དུ་འཁོར་རྒྱུ་ཡོད་པ་མ་རེད།
- འཁོར་རྒྱུ་མེད་པའི་ཁོར་ཡུག་དེ་འདྲ་ཞིག་ཡིན་ན་འདི་ཡག་པོ་ཞིག་མི་ཡོང་བ་རེད།
- དེའི་འཕྲོ་ནས་རིག་གནས་སྲུང་སྐྱོབ་བྱེད་རྒྱུའི་སྟེང་ནས།
- ང་ཚོའི་སྐད་དང་ཡི་གེ་གཙོ་བའི་ནང་གི་གཙོ་བོ་རེད།
- ཡིན་ནའང་དེའི་ཞོར་ནས་ལུས་རྩལ་གྱི་བྱ་འགུལ་ཡིན་ན་ཆད།
- རྟགས་དང་སྟོན་མོ་དང་གོན་ཨོ་ལ་སོགས་གོང་ནས་བཤད་པ་རེད།
- འདིའི་སྟེང་ནས་སློབ་གསོ་ཡར་སྐུལ་ཚོགས་པ།
- དཔེ་འཇོག་རྒྱུ་ན་རིག་གནས་ལ་སོགས་པའི་སྟེང་ནས་འཛིན་སྐྱོང་ཚོགས་པ།
- ཡང་ན་ཕ་སྐད་འཛིན་སྐྱོང་ཚོགས་པ།
- རང་རང་གི་ཁྱིམ་ཚང་དང་ཁོར་ཡུག་ནས་སྦྲགས་སྐད་སོགས་མི་བཤད་པ།
- མི་རིགས་གཞན་གྱི་སྐད་དང་ཡི་གེ་མ་སློབ་ཟེར་བ་མ་རེད།
- དེ་དག་ལ་ཅི་འདྲ་མཁས་ན་དེ་འདྲ་བཟང་མོད།
- རང་གི་སྟེང་ནས་སྐད་དང་ཡི་གེ་འགྱུར་མི་ཉན་པ་འདི།
- ཚང་མ་ལ་མི་ཆེན་ཁོག་ན་སྡུག་ཆེན་དང་མི་ཆུང་ཁོག་ན་སྡུག་ཆུང་།
- ཚང་མས་དེ་རིང་སྔ་དྲོ་བཤད་པ་དེ་རེད།
- དེ་བས་འདི་ལ་ཚོགས་པ་ལ་སོགས་པ་བཙུགས་ནས།
- ཁྱིམ་ཚང་ནང་ནས་ཀྱང་སྒྲིག་ལམ་བཅོས་ནས།
- དེ་འདྲ་བྱས་ན་ང་ཚོ་མི་ཞིག་གི་སྟོབས་ཤུགས་སྐད་ཀྱི་སྟེང་ན་ཡོད།
- དེས་སྐད་ཆ་ཚིག་འགའ་བཤད་ནའང་དེ་མི་འཇོག་ཐང་ཅན་ཞིག་རེད།
- དེས་ནང་དོན་ཡོད་པའི་སྐད་ཆ་བཤད་བྱུང་ཞེས།
- སྐད་ཆ་བཤད་ནའང་རྒྱ་སྐད་རྒྱ་སྐད་མིན་པ།
- བོད་སྐད་བོད་སྐད་མིན་པའི་སྦྲགས་མ་ཞིག་བཤད་ནས།
- དབྱིན་སྐད་ལ་སོགས་པ་བསྲེས་ནས་དེ་ལྟར་སྦྲགས་པ་རེ་བཤད་ན།
- དེས་ང་ཚོ་སྟོབས་ཆེན་རྒྱལ་ཁབ་ཨ་མེ་རི་ཁ་འདྲ་ཞིག་གི་རྗེས་ཀྱང་མི་ཆོད་ལ།
- དེ་རིང་གནངས་ཀ་རྒྱ་རིགས་ལ་སོགས་པའི་མི་རིགས་སྔོན་ཐོན།
- ཅུང་ཙམ་སྟོབས་ཆེན་ཟེར་བ་ཡིན་ནམ།
- འདི་འདྲའི་རྗེས་ཀྱང་མི་ཆོད།
- ང་ཚོས་རང་གི་དེ་ཀྱང་མི་ཤེས་ལ་གཞན་གྱི་རྗེས་ཀྱང་མི་ཆོད་པ་དེ་འདྲ་ཞིག་རེད།
- དེ་བས་འདིར་ཡང་ཁོར་ཡུག་ཅིག་དང་རྨང་གཞི་ཞིག
- འདི་ལ་ཆགས་སུ་བཅུག་ནས།
- ང་ཚོའི་ཆར་ཐོག་ལ་སོགས་པ་ཆོས་ལུགས་པས་ལས་པ་རེད།
- སྡེ་བའི་ནང་དུ་ལོ་གསར་ལྟ་བུའི་སྟེང་ནས།
- དེ་རིང་གནངས་ཀ་ལོ་གསར་ཡོད་མེད་ཕལ་ཆེར་མི་ཤེས།
- ཆེན་པོ་ཞིག་གམ་ཟ་ཁང་ཞིག་གི་ནང་དུ་སོང་ནས་ཅིག་འཐུང་བ་ལས།
- དེའི་སྐབས་སུ་གོས་གྱོན་པ་དང་རྒྱན་འདོགས་རྒྱུ།
- གླུ་ལེན་གར་རྩེད་བྱེད་རྒྱུ་ལྟ་བུའི་ཁོར་ཡུག་མེད་ཀི།
- ཁོར་ཡུག་མེད་ན་ང་ཚོའི་བྱིས་པ་ཚོས་ཀྱང་དེ་རེད།
- མི་རིགས་གཞན་ཏེ་རྒྱ་རིགས་དང་ཁ་ཆེ་ཡི་ལྟ་བ།
- མགོ་ཡང་དམར་པོར་གཏོང་བ་དང་དཀར་པོར་གཏོང་བ།
- སེར་པོར་གཏོང་བ་སོགས་སྣ་མ་སྣ་ཚོགས།
- འདི་དག་ཐམས་ཅད་ང་ཚོ་རྒན་པ་ཚོས་ཀྱང་འདི་བྱེད་ཉན་པ་དང་འདི་བྱེད་མི་ཉན་པ།
- དེ་ཚོར་ཅི་ཁག་ཏེ་སློབ་གྲྭ་རྒྱ་ནང་ལ་སོང་ན།
- གཞན་གྱི་ལག་ཆ་དང་གཞན་གྱི་རིག་གནས་ཀྱི་ཉིང་བཅུད།
- དེ་དག་ཚང་མ་ཚུར་ལ་ལེན་པ་ལས་ཚུགས་ཀ་དེ་དག
- གོན་པ་སོགས་གསར་བ་ཞིག་ཡོད་ན་སྔོན་ལ་དེ་གྱོན།
- དེ་བས་རྒན་པ་ཚོས་ཀྱང་ཁྱོད་སྡེ་བའི་ནང་གི་རུ་དཔོན་ཞིག་ཡིན་ན་ཆད།
- ཁྱོད་རུ་ཆུང་ཞིག་གི་དཔོན་པོ་ཞིག་ཡིན་ན་ཆད།
- དེ་དག་ཐམས་ཅད་ཀྱིས་སྒར་བ་དགོན་སྡེ་ཡི་ནང་གི་མཁས་པ་ཡིན་ན་ཆད།
- སློབ་གྲྭ་ནས་ཕྱིར་ཡོང་ཡོད་པ་དང་སྲིད་འཛིན་དང་དགེ་རྒན་ཡིན་ན་ཆད།
- འདི་དག་ཐམས་ཅད་ཀྱིས་འདིའི་སྟེང་ལ་སྟོབས་ཤུགས་ཤིག་བཀོལ་ནས།
- རང་མི་རིགས་ཀྱི་སྲོལ་རྒྱུན་རིག་གནས་འདི་མྱུར་སྐྱོབ་བྱེད་དགོས་ན།
- འདི་ལ་ཚང་མས་དཔུང་གདང་མཉམ་ཞིབ་བྱས་ནས།
- བྱིས་པ་ཚོར་དབྱར་གནང་དང་དགུན་གནང་གི་སྐབས་སུའང་སྡེ་བའི་ནང་དུ་བཀོད་སྒྲིག་བྱས་ནས།
- དེའི་ནང་ནས་སྲོལ་རྒྱུན་རིག་གནས་ཀྱི་གོམས་སྲོལ་ཡིན་ན་ཆད།
- ལུགས་ཀྱི་བསླབ་བྱ་ཡིན་ན་ཆད།
- འདི་འདྲའི་ཚོགས་ས་བྱས་ནས།
- དེའི་འཕྲོ་ནས་སྒྱུ་རྩལ་གྱི་ཕྱོགས་ནས་ཀྱང་།
- རྒད་པོ་བཤད་ལྕེ་བདེ་མཁན་དག་གིས་གཏམ་ལ་སོགས་པ་བཤད་ནས།
- དེ་ལྟར་ཡིན་ན་དེའི་རྩིབ་ལ་སོང་ནས་དེར་ཁོར་ཡུག་ཅིག་ཡོད་ན།
- བརྟག་རེ་བྱེད་པ་དང་གཏམ་བཤད་རེ་བྱས་ནས།
- ཤགས་ལ་འགྲོ་ན་ངས་དེ་རིང་དཔེ་ཆའི་སྟེང་ནས་བློར་བཟུང་སྟེ་ཡོང་རུང་ཐུབ་པ་མ་རེད།
- ཕ་རོལ་པས་ཤགས་ཅི་ལྟར་བརྒྱབ་ན་ངས་དེ་ལྟར་ཤགས་རྒྱག་དགོས།
- དེ་འདྲའི་ཁོར་ཡུག་ཅིག་བསྐྲུན་རྒྱུ་ན་རང་བཞིན་གྱིས་དེར་རྨང་གཞི་ཞིག་ཆགས་རྒྱུ་རེད།
- སྟོན་མོ་ཡིན་ནའང་དེ་དང་དེ་བཞིན་རེད།
- སྟོན་མོ་ཞིག་ཡིན་ནའང་མ་མཐའ་ཡང་ཨ་ཞང་ཚང་ཞེས་བཀུར་ས་ཞིག
- ནང་དུ་སྔ་བ་བྱས་ནས་འདུག་མཁན།
- ང་སོང་ཡོད་ས་དག་སྟེ་རེབ་གོང་ས་ཆ་ནས་ཁྱོད་ཚོས་རིག་ཡོད་ནའང་ཐང་།
- སྔོན་ལ་སོང་ནས་མཐུན་པ་སྤུན་བཞི་ཡི་ཟུར་ཁ་དེ་ནས་མར་ལ་ཐང་ཀ་ཞིག་གཤམ་ནས།
- གྲལ་ཡི་མགོར་རྔ་ཡང་ཤེས་པ་མ་རེད།
- ང་ཚོར་གཡས་གྲལ་གཡོན་གྲལ་དང་གདུང་གྲལ་ཞེས།
- གཡས་གྲལ་ཉི་མ་ཤར་འདྲ་རེད་དང་གཡོན་གྲལ་ཟླ་བ་ཚེས་འདྲ་རེད།
- དེ་འདྲ་མང་པོ་བཤད་རྒྱུ་ཡོད།
- དེ་ན་གྲལ་ཞེས་མགོ་རྔ་མ་མེད་པར།
- ཚང་མ་གོར་གོར་བྱས་ནས་བཙོག་རྒྱུ་དེ་རེད།
- དེ་བས་གཙོ་བོ་དང་ཕལ་བ་ཞེས།
- དཀྱིལ་དང་མཐའ་ཞེས་ཡོད་པ་མ་རེད།
- དེ་བས་རང་ཉིད་དེར་སོང་ན་བོད་ཀྱི་སྟོན་མོ་ཡི་མཆོད་ཁ་ཆ་ཚང་ཞིག་མི་ཡོང་མོད།
- མི་ཡོང་མོད་རྟེན་འབྲེལ་གྱི་དབང་གིས།
- མགོ་རྔ་མ་ཅུང་ཙམ་མཚོན་བྱེད་ཙམ་ཡོད་པ།
- དེ་འདྲ་ཞིག་བཅའ་ཅི་ཐུབ་བྱས་པ་ཡིན།
- དཔེར་ན་སྔོན་ལ་ཐང་ཀ་ཞིག་གཤམ་ནས།
- རང་ལ་གྲོ་གསུམ་ཕྱེ་མར་འཇོག་རྒྱུ་ཡོད་ན་དེ་བཞག་སྟེ།
- མེད་ན་ཕྱུར་མར་འདྲ་བཞག་ནས།
- དེའི་འཕྲོར་ཉིན་དེའི་ཟ་མ་འཚོ་བ་དང་ཟས་བཅུད་སོགས་ཡིན་ནཆད།
- ཀ་ར་སིལ་ཏོག་ཀི་སྣ་ཁ་སྒྲིག་ནས།
- དེ་ནས་ཐོག་མར།
- སྟོན་པ་བླ་མེད་སངས་རྒྱས་རིན་པོ་ཆེ།
- སྤྱོད་པ་བླ་མེད་དམ་ཆོས་རིན་པོ་ཆེ།
- འདྲེན་པ་བླ་མེད་དགེ་འདུན་རིན་པོ་ཆེ།
- སྐྱབས་གནས་དཀོན་མཆོག་གསུམ་ལ་མཆོད་པ་འབུལ་ཞེས།
- ང་ཚོ་བོད་པ་ཚང་ལ་ནང་བ་སངས་རྒྱས་ལ།
- འདི་དག་རིག་གནས་ཀྱི་རྩ་བ་དང་ལྟ་སྤྱོད་ཀྱི་འབྱུང་ཁུངས།
- དམ་པའི་ཡུལ་ལ་སོགས་པ་མ་གྱུར་སེམས་ཅན་ཐམས་ཅད་ལ་དེ་ལྟར་རེད།
- ཐོག་མར་དེའི་མཆོད་པ་བྱས་པའི་རྗེས་སུ།
- སྟོན་མོའི་མགོ་ཡི་འགྲོ་ལུགས་རྣམས།
- བར་ནས་མག་གཅིག་གན་རྐེད་རགས་བཅིངས་བ་དེ་ལྟར་བྱས་ནས།
- དེར་ཡང་གཞན་བཤད་མཁན་ཡོད་ན་བཤད་དུ་བཅུག་ནས།
- གཞན་བཤད་མཁན་མེད་ན་རང་གིས་ཚབ་བྱས་ནས་སྐད་ཆ་འགའ་རེ་བཤད་དེ།
- ཞབས་ཀྱི་གདན་གྱི་སྟེང་དུ་བུད་དང་བུ་ཚ་ཚེ་རིང་ལོ་བརྒྱ།
- མི་ལུས་རིན་ཆེན་གསེར་ནག་གི་མཆོད་རྟེན་ཡིན་པའི་ཆ་ནས།
- ངས་ཁྱེད་ལ་རི་མོ་ཅན་གྱི་གོས་བསྐོན་དགོས།
- གོམ་ལག་ཅན་གྱི་རྟ་ལ་བསྐྱོན་དགོས།
- ཞིམ་མངར་ཅན་གྱི་ཟས་སྟེར་དགོས་པ་རེད།
- མཐུན་སྒྲིལ་ཅན་གྱི་ཚིག་བཤད་དགོས་ཞེས།
- དེ་ལྟར་བཤད་དེ་སྟབས་བདེ་ཞིག་བྱས་ནས་གང་ལྟར།
- དེའི་འཕྲོ་ནས་མགོ་ནས་ཆང་མཆོད་ཅིག་ཡིན་ན་ཆད།
- རང་བཞིན་གྱི་མཆོད་པ་ཡི་ནང་གི་གོ་བདེ་ཞིག
- དེ་འདྲ་ཞིག་བཤད་ནས།
- དཔེ་འཇོག་རྒྱུ་ན་དེ་རིང་གི་ཉི་མ་བཟང་བོ་སྐར་མ་བཟང་བོ།
- བཀྲ་ཤིས་པའི་ཉི་མ་དོན་འགྲུབ་པའི་ཉི་མ།
- ཕུན་སུམ་ཚོགས་པའི་ཉི་མ་འདི་ལ།
- སྟོད་རི་རྒྱལ་ལྷུན་པོས་གསེར་ཞྭ་གོན་ནས།
- རྨད་རྒྱ་མཚོ་ཁ་ནས་རླངས་པ་འཕྱུར་ཏེ།
- ཀླུའི་རྒྱལ་བོ་ཆེན་མོ་ཁྲི་ལ་བཞུགས་ཏེ།
- བླ་མ་བཟང་བོས་ཆོས་སྒྲ་སྒྲོག་ནས།
- མ་སྲུ་མོ་ཚང་གིས་མཆོད་པ་བྱེད་པའི་དུས་སྐབས་འདི་ལ།
- རྨ་བྱ་ཅན་གྱི་བཀྲག་མདངས་མངོན་ནས།
- ཁུ་བྱུག་ཅན་གྱི་གསུང་སྙན་ཁུར་ནས།
- དེ་ནས་རི་རྒྱལ་ལྷུན་པོ་བཞིན་དུ་བརྗིད་ཆགས་པ།
- རྒྱ་མཚོ་མར་བ་བཞིན་དུ་བརྟན་གྱིལ་ལེ།
- ཁྱེད་རྣམ་པ་བདེ་མོ་ཡིན་ནམ་ཞེས་འཚམས་འདྲི་ཞིག་བྱས་ནས།
- དེ་ལྟར་མདོར་བསྡུས་ཤིག་བྱས་ནས།
- མཆོད་པ་མཆོད་ཁ་དེ་དག་མར་ལ་འགྲོ་རུ་བཅུག
- དེའི་འཕྲོ་ནས་གླུ་ལེན་ནའང་སྔོན་ལ་གླུ་མགོ་ཡག་པོ་ཞིག་ལེན་རྒྱུ།
- རྔ་མ་ནས་བཀྲ་ཤིས་འཇོག་རྒྱུ།
- མང་ཆེ་བར་དེ་འདྲ་མེད་ཀི།
- རང་ཉིད་སོང་ན་ནས་དེ་རིང་བཀྲ་ཤིས་པའི་གཉེན་སྟོན་འདིའི་སྟེང་དུ།
- གླུ་བ་བཀྲ་ཤིས་ཚེ་རིང་ཟེར་རྒྱུ་དང་གླུ་མ་ཚེ་རིང་སྒྲོལ་མ་ཟེར་རྒྱུ།
- དེ་འདྲ་ཞིག་གིས་སྐུ་རི་རྒྱལ་ལྷུན་པོ་ཡར་ལ་བཞེངས་ནས།
- གསུང་མགུར་མ་ཡག་མོ་ངག་ལ་དྲངས་ནས།
- དེ་རིང་གི་བཀྲ་ཤིས་པའི་གླུ་སྒོ་དང་པོ་དེ་འབྱེད་རྒྱུ་རེད།
- ཁོ་ཚོར་ཡང་བསྟོད་པ་འདྲ་བྱས་ནས་གླུ་སྒོ་འབྱེད་དུ་བཅུག
- རྔ་མ་ནས་ཀྱང་ཁ་གཡེང་འདྲ་ཞིག་བོས་ནས།
- ད་ནས་བཟུང་སྟེ་གང་ནས་བརྩམ་ཏེ།
- ཁྱེད་རྣམ་པའི་ཁ་རྗེ་རླུང་དང་ཁ་ལས་རླུང་རྟ།
- ཡར་ནས་ཡར་འགྲོ་གོང་ནས་གོང་འཕེལ།
- ཚེ་དང་བསོད་ནམས་དཔལ་དང་འབྱོར་བ།
- དབྱར་རྒྱས་མཚོ་མོ་བཞིན་དུ་དཔྱིད་ཀྱི་དཔལ་ཡོན་བཞིན་དུ།
- ཡར་ངོའི་ཟླ་བ་བཞིན་དུ།
- བཀྲ་ཤིས་བ་དང་དོན་དག་རྣམས་འགྲུབ་དགོས།
- ཡུལ་ཐམས་ཅད་ལ་བཀྲ་ཤིས་རྒྱུ་དང་མི་ཐམས་ཅད་ལ་ཚེ་རིང་རྒྱུ།
- ཕྱུགས་ཐམས་ཅད་ལ་གཡང་འགུག་རྒྱུ།
- འབྲུ་ཐམས་ཅད་ལ་བཅུད་ཡོང་རྒྱུ།
- ཡ་མི་ཚོགས་སྟོབས་ཀྱི་དཔལ་ལ་མཆོད་པར་ཤོག་ཅེས།
- རྔ་མ་ནས་དེ་ལྟར་བྱས་ཏེ་རྔ་མ་བསྡུས།
- དེ་ལྟར་བྱས་ཏེ་བོད་ཀྱི་ཚུགས་ཀ་བྱས་ནས་སོང་བ་ཡིན།
- དེ་མས་གང་བཤད་པ་ཡིན་ཟེར་ན་ཚང་མས་འདི་ལ་ཁོར་ཡུག་ཅིག་སྐྲུན་རྒྱུ།
- ང་ཚོའི་སྟོན་མོ་བྱས་ན་ཟ་ཁང་ནང་དུ་སྟོན་མོ་བྱེད་དུ་འགྲོ་རྒྱུ་མེད།
- ཟ་ཁང་ནང་དུ་སྟོན་མོ་བྱེད་དུ་སོང་ན་ཨ་ཞང་ཕྱོགས་གཅིག་ནས་འདུག་པ་དང་།
- གཉེན་ཚང་ཚང་འདི་ཕྱོགས་ནས་འདུག་རྒྱུ།
- དེ་ནས་ད་དུང་བག་མ་དང་མག་པ་ཡིན་ནའང་དེའི་གོན་པ་དང་རྒྱན་ཆ།
- དེའི་ཉིན་དེར་སྐྲ་ཕབ་ནས།
- སྐྲ་ཡི་ནང་དུ་དེ་དག་བཏགས་ནས།
- ང་ཚོ་ཡིན་ན་སྐྲ་ཡིན་ནའང་ཨང་དང་པོ་ཡིན་ན་ལས་ནས།
- ང་ཚོར་དེའི་རིག་གནས་ཕུན་སུམ་ཚོགས་པ་ཞིག་ཡོད་པ་རེད།
- དེ་བས་འདིའི་ཕྱོགས་འདི་ནས་ཁོར་ཡུག་ཡག་པོ་ཞིག་སྐྲུན་རྒྱུ་འདི་རེད།
- དེ་བས་སྐད་དང་ཡི་གེ་ཡི་སྟེང་ནས་ངས་དམངས་ཉུང་བསྡུས་ཤིག་བཤད་པ་དེ་རེད།
- མདོར་བསྡུས་ཤིག་བཤད་པ་དེ་རེད།
- དེ་བས་བོད་ཀྱི་སྐད་དང་ཡི་གེ་སྟེ་ལྷག་པར་དུ་སྐད་ཆ།
- ང་ཚོ་རྒན་པ་མང་པོ་ཞིག་འཚོགས་པ་ཡིན་ན།
- ཁ་བརྡ་ཡི་ནང་དུ་རང་ཤུགས་ཀྱིས་བོད་ཀྱི་གཏམ་དཔེ་ཐོན་འཇོག
- འདི་ན་བཞུགས་ཡོད་པའི་ཁྱེད་རྣམ་པར་མཚོན་ན་ངོ་མས་བཤད་ན།
- ལས་གཞི་དངོས་ཀྱི་ནང་ནས་འཚར་ལོངས་བྱུང་བ་ཏག་ཏག་རེད།
- སྐྱིད་ཀྱི་དལ་ཞིག་ཡོད་ན་སྡུག་གི་བྲེལ་ཞིག་ཡོད་ན།
- སྟོན་མོ་ཆེ་མ་ཆུང་གསུམ་ཅི་ཞིག་ཡོད་རུང་།
- ཁྱེད་རྣམ་པ་སོང་ནས་དོན་དག་ཆེན་པོ་ཞིག་ཐག་གིས་གཅོད་ན།
- ཆུང་ཆུང་ཞིག་ཐག་གིས་གཅོད་ན།
- སྔོན་ལ་བཤད་པའི་བོད་ཀྱི་གཏམ་དཔེ་དང་སྒྱུ་རྩལ་གྱི་སྟེང་ནས།
- དོན་དག་ཆེན་པོ་ལུགས་སྲོལ་དེ་ལྟར་དུ་ཐག་གིས་བཅད་ནས།
- དོན་དག་མང་པོ་སྒྲུབ་མྱོང་བ་རེད།
- དེ་བས་དེ་རིང་གནངས་ཀ་རྩེད་རིགས་ལ་སོགས་པ་མེད་ན།
- དཔེ་འཇོག་རྒྱུ་ན་གྱོད་བཤད་རྒྱག་ས།
- གཏམ་བཤད་རྒྱུ་སྣ་མ་སྣ་ཚོགས་རེད།
- དེ་རིང་གནངས་ཀ་ཡིན་ན་གཏམ་གྱི་བྲོ་བ་དེ་ཉམས་སོང་བ་མ་གཏོགས།
- སྔོན་ཆད་ཡིན་ན་གཏམ་བཤད་འདི་རེབ་གོང་ཁོག་ལ་མཚོན་ན།
- གྲགས་ཅན་མང་བ་རེད།
- ང་ཚོ་ཁ་སོག་ལ་སོང་ན་ཁ་སོག་ཨ་ག་གྲགས་པ་ཞེས་བཤད་ན།
- ངོ་མས་བཤད་ན་གཏམ་གྱི་བང་མཛོད་ཅིག་དང་གཏམ་གྱི་རྒྱ་མཚོ་ཡིན་པ་རེད།
- ང་ཚོ་དམེ་ཤུལ་ལ་མཚོན་ན་དམེ་ཤུལ་ཁྲིད་ལེ་རྒྱ་ལོ་ཟེར་ན།
- ངོ་མས་དེ་འདྲའི་ལོ་རྒྱུས་དང་དམངས་ཁྲོད་ཀྱི་རྒན་པ།
- དེ་རིང་གི་ཉིན་ནས་ས་རེབ་གོང་ཁོག་ན་དེ་འདྲ་ཡོད་པ་མ་རེད།
- དེ་རྣམས་ཀྱི་གཏམ་གྱི་སྒྱུ་རྩལ་དང་གཏམ་གྱི་ཉམས་འགྱུར།
- དེའི་བྲོ་བ་དེ་ལ་བལྟས་ན་ཧ་ལས་པ་རེད།
- དེ་རིང་གནངས་ཀར་དྲན་པའི་ངོས་ན་ཡོད་པ་མ་གཏོགས།
- དེའི་སྐབས་སུ་སྒྲ་བླངས་ཡོད་པ་འདྲ་ཡིན་ན་ད་བར་རིན་པོ་ཆེ་ཡི་ལོག་ཡོད།
- དེ་ནི་དཔེ་ཆ་ཞིག་གི་ངོས་ནས་བྲིས་ནས་ཡོང་བ་འདྲ།
- གཏམ་དེ་ཡང་རང་བཞིན་གྱིས་ཡིད་ལ་ཡོང་བ་ཐམས་ཅད།
- གཅིག་ལོག་གཉིས་ལོག་བྱས་ནས་འདེབ་རྒྱུ་དེ་འདྲ་ཞིག་མ་རེད།
- དེ་ལ་མགོ་རྩོམ་སྲོལ་དང་མཇུག་བསྡུ་སྲོལ།
- དོན་དག་ཅིག་ཡིན་ནའང་གྱོད་བཤད་ཅིག་ཡིན་ན་གྱོད་བཤད་དང་རོལ་བཤད་ཡིན་ན་རོལ་བཤད།
- གྱོད་དེ་འགྲིག་དགོས་ན་འགྲིག་དགོས་པ།
- དགྲ་ཁ་ཚོན་ཆེ་ན་འགྲིག་རྟགས་ཡིན་པ་དང་འབྲུག་ངར་སྐད་བྱས་ན་མཐིང་རྟགས་ཡིན།
- དེ་རིམ་བཞིན་བཤད་ནས།
- ཚུགས་ཀར་བལྟས་ན་ཕ་རོལ་བ་ཞིག་གིས་བཤད་ནས་ཡོང་ཚུར་རོལ་བས་ཉན་ན།
- དོན་དག་དེ་ཡག་སར་འགྲོ་བཞིན་ཡོད་དམ་བཙོག་སར་འགྲོ་བཞིན་ཡོད་པ།
- ཅི་ལྟར་འགྲོ་དགོས་པ་ང་ཚོས་ཤེས་འདུག་པ་རེད།
- འདི་ལྟར་ཚིག་འགའ་ཡིས་དོན་དག་ཆེན་པོ་མང་པོ་ཐག་གིས་གཅོད་པ་དེ་འདྲ་རེད།
- ཡོད་མོད་ལོ་ལོན་ཚོ་ཁ་རོག་གེར་བསྡད་ན།
- བྱིས་པ་ཚོར་དེའི་ཁོར་ཡུག་མེད་ཀི།
- དེ་བས་ང་ཚོས་ཡིག་ཐོག་ཅིག་ནས་སྦྱངས་རྒྱུ་ཟེར་ན་དེ་དངོས་གནས་དཀའ་མོ་ཞིག་རེད།
- དེ་བས་ཕྱིན་ཆད་ཡིན་ན་ཚིག་བརྒྱད་བརྒྱ་བཤད་པའི་མདོ་གང་ཡིན་ཟེར་ན།
- ཁྱིམ་ཚང་གི་ནང་ཡིན་ན་ཆད་སྡེ་བ་ཡིན་ནང་ཡིན་ན་ཆད།
- ཚོ་བ་ཡི་ནང་ཡིན་ན་ཆད།
- ས་ཁུངས་ཞིག་ཡིན་ན་ཆད་ལས་ཁུངས་ཤིག་གི་ནང་ཡིན་ན་ཆད།
- ཚོགས་པ་ཞིག་གི་ནང་ཡིན་ན་ཆད།
- ང་ཚོ་བོད་ཀྱི་སྐད་དང་ཡི་གེ་ཡིན་ན།
- འཛིན་སྐྱོང་སྤེལ་གསུམ་བྱེད་རྒྱུའི་ཞོར་དུ།
- སྲོལ་རྒྱུན་གྱི་རིག་གནས་སྣ་ཚོགས་ཚོགས་ཤིག་ཡོད་པ།
- སྣ་མ་སྣ་ཚོགས་ཤིག་ཡོད་ལ་རྐྱང་རྐྱང་མ་རེད།
- འདི་ཚང་མ་ལ་ཡང་ཚང་མས་མཛུ་མོ་ལྔ་བོ་ཁུ་ཚུར་བྱས་ནས།
- ཚང་མས་སྲུང་ཁྲག་དམར་པོའི་བཞུར་རྒྱུན་དུ།
- བོད་པ་ཚོའི་སྲུང་ཁྲག་བཞུར་མཁན་ཞིག་ཡིན་ཕྱིར།
- འདིར་མི་བསྙེག་མཁན་ཞིག་ཡོད་པ་མ་རེད།
- དེ་བས་ཚང་མས་དེའི་སྟེང་ནས་རང་ཉིད་ནས་མགོ་བརྩམས་ཏེ།
- དེ་ལྟར་རང་ཉིད་ཀྱིས་ནུས་པ་ཅི་ཡོད་ཅིག་འདོན་དགོས་ཞེས།
- རེ་བ་ཙམ་ཡོད་པ་དེ་ལས་གཞན་བཤད་ན་མང་ཐལ།
Loading ... Collection:
Subject
- Oral Traditions
- Repgong
Terms
- གཏམ་བཤད
- བགྲོ་གླེང
- ཚོགས་འདུ
Related Media:
Is Part Of
Is Part Of
Is Part Of
Is Part Of
Is Part Of
Is Part Of
Cinematographer:
Yidam Tsering, Khashem Gyal
Director:
Dudul Dorjay, Rinchen Khar
Editor:
Yidam Tsering
Contributing Speaker:
Guru Tsering
Contributing Facilitator:
Tibetan & Himalayan Library
Copyright Holder:
Tibetan & Himalayan Library
Publisher:
Tibetan & Himalayan Library
Data Entry:
Copyright Owner:
Tibetan & Himalayan Library
Year Published:
2012
Visibility:
Public (group default)
Shanti AV Id:
1885