26 Sep 2012
19 min 55 sec
Video Overview
Creators:
Unknown
At the Repgong Tamshé Seminar, Lugyal from the China Village confessed that he had never attended such a meeting. In particular, he neither studied folk culture nor he is an expert. However, due to his personal interest, he loved folk culture out of curiosity and he has traveled to many places around Repgong. As result, he briefly described some traditions that have already disappeared. Accordingly, he also compared some of the old traditions and customs with modified modern traditions and customs, especially the influence of modernization and outer forces on the traditions that eventually lead to deterioration. He ended his speech with a “Tonshé”.
རེབ་གོང་གཏམ་བཤད་བགྲོ་གླེང་ཚོགས་འདུའི་ཐོག་ཆུ་མ་སྡེ་བའི་ཀླུ་རྒྱལ་གྱིས་རང་ཉིད་ཚོགས་འདུ་འདི་འདྲ་ཞིག་ལ་ད་ལྟའི་བར་དུ་ཞུགས་མྱོང་མེད་པ་དང་། ལྷག་པར་དུ་དམངས་ཁྲོད་རིག་གནས་དང་ཡུལ་སྲོལ་གོམས་གཤིས་སོགས་ལ་ཞིབ་འཇུག་དང་སློབ་སྦྱོང་བྱས་མྱོང་མེད་ན་ཡང་། རང་ཉིད་དམངས་སྲོལ་རིག་གནས་ལ་དགའ་བ་དང་། དེ་ཤེས་འདོད་ཀྱི་མཚར་སྣང་གིས་རེབ་གོང་གི་ཕྱོགས་སོ་སོའི་ཡུལ་ལུང་མང་བོ་ཞིག་ལ་འགྲུལ་བསྐྱོད་བྱས་ཏེ་དངོས་སུ་་ཉམས་ལེན་བྱས་པའི་མཐོང་ཐོས་མྱོང་གསུམ་གྱི་རིགས་ཁོང་གིས་ངོ་སྤྲོད་མདོར་བསྡུས་ཤིག་བྱས་སོང་ལ། ཁོང་གིས་ཀྱང་གནའ་དང་དེང་གི་འགྱུར་ལྡོག་དང་། སྒོས་སུ་དམངས་ཁྲོད་དང་ཡུལ་སྲོལ་གོམས་གཤིས་ལ་ཐེབས་པའི་ཤེན་ཤུགས་དང་ཉམས་རྒུད་དུ་འགྲོ་བཞིན་པའི་ཡུལ་སྲོལ་སོགས་ཟུར་འདོན་བྱས་མཐར། ཁོང་གིས་ད་ཐེངས་ཀྱི་འདུ་འཛོམས་ལ་རྟེན་འབྲེལ་མཚོན་བྱེད་སྟོན་བཤད་ཅིག་གིས་རང་གི་གཏམ་བཤད་དེའི་མཇུག་བསྡུས་སོང་།
在热贡民间口头文学研讨会上，来自热贡曲麻村的李加说他从来没有参加过这样的会议， 尤其是对民间文化、风俗习惯等没有研究学习，也不是什么专家。 然而，由于个人的兴趣，喜欢民俗文化，出于好奇心，他去过许多热贡的很多地方，亲身体验的所见所闻都作了简短的给大家介绍。因此，他简要地举例说明了一些已经消失的传统。他还将一些旧的传统和习俗与经过改造的现代传统和习俗进行了比较，特别是现代化和外力对传统的影响最终导致了那些恶化的传统习俗。最终，他以传统习俗的口头演讲结束了他的演讲。
- Repgong
- བཤད་མཁན་དང་པོ།: ང་འདི་འདྲའི་བགྲོ་གླེང་དང་ཚོགས་འདུ་ཞིག་གི་སྟེང་དུ་ཞུགས་ཀྱང་མ་མྱོང་།
- ཞུགས་པ་ཐེངས་དང་པོ་ཡིན།
- དེ་རིང་འདིར་བྱ་བ་འདི་ལ་ཉམས་མྱོང་ཅན་ཏག་ཏག་འཚོགས་ནས།
- འཇིག་རྟེན་གྱི་ཉམས་མྱོང་ཅན་ཏག་ཏག
- ལག་ལེན་བྱས་ནས་མཐར་ཕྱིན་ཡོད་པ་འདི་འདྲ་ཏག་ཏག་འཚོག་འདུག
- དེ་བས་རེབ་གོང་གི་རོང་འབྲོག་དང་སྡེ་ཉིན་སྲིབ།
- ཁ་སྟོད་སྨད་ཀྱི་རྒན་པ་སྟག་དང་གཟིག་འདྲ་ཏག་ཏག་རེད།
- རྒན་ཉམས་དྲེག་པ་ཅན་པོ་དང་ཟངས་རྒན་དྲེག་ནག་ཅན་པོ་ཞེས།
- འདི་ལ་ངོ་མས་བྱ་བའི་ཉམས་མྱོང་དང་།
- རང་རང་གིས་ལག་ལེན་དུ་བླངས་ནས་ཡོང་བ་ཏག་ཏག་རེད།
- འདི་འདྲ་ཞིག་གི་སྔུན་ནས་ང་རང་ཅི་རེད་ཟེར་ན།
- སངས་རྒྱས་སྔུན་གྱི་ཀ་ཁ་དང་ཨ་མའི་སྔུན་གྱི་གནའ་གཏམ་ཟེར་བ་བཞིན།
- ངས་ཡར་ལ་འདི་འདྲ་ཞིག་གི་སྔུན་ནས་བཤད་ན་འདི་འོས་འཚམས་ཤིག་མ་རེད།
- འོས་འཚམས་ཤིག་མིན་པའི་རྒྱུ་མཚན་ཅི་རེད་ཟེར་ན།
- གཅིག་ནི་རང་ལ་ཤེས་པའི་ཡོན་ཏན་ཡོད་པ་མ་རེད།
- སྦྱངས་སྟོབས་ཀྱི་ཡོན་ཏན་ཡོད་པ་མ་རེད།
- དེ་ཡིན་ན་འདི་འོས་འཚམས་ཤིག་མིན་པའི་རྒྱུ་མཚན་འདི་འདྲ་ཞིག་རེད།
- དེ་ཡིན་ན་འདིའི་མན་ཆད་ཀྱི་ན་གཞོན།
- ངག་ཐོག་གི་རིག་གནས་འཚོལ་སྡུད་བྱེད་བཞིན་པའི།
- འདི་འདྲའི་ན་གཞོན་འདི་དག་ལ་དངོས་གནས།
- སྨད་ནས་རྩད་བཅད་སྟོན་ནས་མི་བཙལ།
- ངོ་མས་སྡུག་མཐོང་ནས།
- རང་རང་གི་མི་རིགས་འདི་ལ་ཕན་སེམས་ཀྱིས་རང་གིས་ཐུབ་ཚོད་ཀྱིས།
- འདི་ནི་རྒྱུ་ནོམ་པ་ཡི་ཆེད་དུ་ལས་པ་ཞིག་མ་རེད།
- མི་རིགས་ཀྱི་བླ་སྲོག་ཟེར་བ།
- མི་རིགས་ཀྱི་སྲོལ་རྒྱུན་ཟེར་བ།
- རིག་གནས་ཟེར་བ་འདི་ལ་སྣ་གང་ཐད་ནས།
- རང་རང་སྟེ་ཆེན་པོ་ཞིག་གིས་ཆེན་པོ་གི་ཐུབ་ཚོད་ཀྱི་ཞབས་ཞུ།
- ཆུང་ཆུང་ཞིག་གིས་ཆུང་ཆུང་གི་ཐུབ་ཚོད་ཀྱི་ཞབས་ཞུ།
- འདི་སྒྲུབ་རྒྱུ་བསམ་ཐུབ་པ་དེ་གལ་ཆེ།
- རང་གི་བསམ་ཐོག་ལ་ལེན་མི་ལེན་གཙོ་བོ་དེར་ཐུག་ཡོད།
- འདི་ནི་རྒྱུ་ཆེན་ཞིག་གིས་ཐུབ་པ་དང་རྒྱུ་མེད་ཅིག་གིས་མི་ཐུབ་པ་དེ་འདྲ་ཞིག་མ་རེད།
- ང་ཡིན་ན་ཆེ་ས་ཞིག་ནས་བཤད་ཀྱང་མི་ཤེས།
- མ་གཞི་ནས་རང་ལ་རིག་གནས་དང་ཡོན་ཏན་ཡོད་པ་མ་རེད།
- ཆུང་ས་ཞིག་ནས་བཤད་ན།
- ཆེས་ཆུང་ས་ནས་ཡར་ལ་བཤད་ན།
- དེ་རིང་གི་དགེ་རྒན་དང་སྐུ་མགྲོན་རྣམ་པས།
- ཉན་ཡང་ཡོད་ལ་བཤད་ཀྱང་བཤད་བྱུང་།
- ཐ་ན་རང་གི་འཚོ་བ་ཡི་ངོས་ན།
- ཉིན་རྒྱུན་རང་གིས་ལག་ལེན་བྱེད་བཞིན་པ།
- ཐ་ན་སྐྱེས་མ་ཚོའི་སྟེང་ནས་བཤད་ན།
- ས་འོག་གི་གོ་རེ་ཉམས་སོང་བ་རེད།
- དེ་ཡིག་ཐོག་ན་མེད་པ་རེད།
- ངག་ཐོག་གི་རང་གི་སྲོལ་རྒྱུན།
- རང་གིས་ཡིན་ཟོན་བྱས་ནས་འདི་འདི་འདྲ་ཞིག་འགོར་དགོས།
- དེའི་མེ་ཡི་བཙན་ཚད་འདི་འདྲ་ཞིག་ཡིན་དགོས།
- མིག་གིས་མི་རིག་ལ་ལག་ལེན་གྱི་ཉམས་མྱོང་ངོ་མ་བོ་རེད།
- དེ་ཅིག་ལ་ཉེར་ཚགས་བྱས་ནས་འདི་དུས་ཚོད་འདི་འདྲ་ཞིག་ལ་ཞོག་དང་།
- འདིའི་སྟེང་ནས་ལེན་དགོས་ཞེས་དེ་འདྲ་གཅིག་ཀྱང་བཤད་མེད།
- འདི་ནི་རྒན་པས་གཞོན་པར་ངག་ཐོག་ནས་བརྒྱུད་དེ།
- འདི་འདྲ་ཞིག་ཞོག
- སྐྱུར་འདི་འདྲ་ཞིག་རྒྱོངས་ཞེས།
- ད་བར་ང་ཚོའི་ས་ཆ་རུ་ལྕགས་ལེབ་ཅིག་གི་ཐོག་ནས་སྲེག་སྟེ།
- དེ་འདྲ་སྲེག་ཐུབ་མཁན་ཉུང་ཉུང་ཡིན་ལ་ཇེ་ཉུང་དུ་སོང་ཡོད།
- དེའི་འཕྲོར་ཡིན་ན་རང་གི་མི་རིགས་ཀྱི།
- སྔོན་ལ་རྒན་རྒོན་ཚོས་བཤད་བྱུང་།
- བོད་ལྭ་གྱོན་ན་ངོ་ཚ་དགོས་པའི་ཚད་རེད།
- རྒྱ་ལྭ་གྱོན་ན་ངོ་ཚ་མི་དགོས་པ་འདྲ།
- བོད་ལྭ་གྱོན་ན་ངོ་ཚ་དགོས་པའི་ཚད་ལ་ཐོན་ཡོད་པ་མ་ཟད།
- ཁོ་ཚོས་བོད་ལ་འདིའི་སྟེང་ན་ཤེས་བྱ་ཅི་འདྲ་ཞིག་ཡོད་པ།
- གནའ་མི་རྒན་པ་རྣམས་ལ་ཝ་ལེར་གསལ་བ་རེད།
- དེ་རིང་བོད་ལྭ་ཞིག་གྱོན་ན།
- དེ་ལ་གུས་པའི་ཚུལ་གྱིས་གྱོན་སྲོལ་ཞིག
- སྡུག་བསྔལ་གྱི་ཚུལ་དུ་གྱོན་སྲོལ་ཞིག
- ཡང་ན་ང་རྒྱལ་གྱི་ཚུལ་དུ་གྱོན་པ།
- དེའི་སྟེང་ན་ཆ་རྐྱེན་མང་པོ་ཞིག་ཡོད་པ་རེད།
- ཅིག་གིས་བལྟས་ན་བོད་ལྭ་ཞིག་གྱོན་ནས་འགྲོ།
- གན་གྱིས་བོད་ལྭ་ཞིག་གྱོན་ནས་འགྲོ་བས་བོད་ཅིག་ཡིན་པ་འདྲ།
- དེ་འདྲ་གཅིག་པུ་ཡིས་མི་ཚད།
- དེའི་ཐོག་ན་མང་པོ་ཞིག་འདུས་ཡོད་པ་རེད།
- དེ་རིང་བླ་མ་ཞིག་གི་སྐུ་མདུན་དུ་འགྲོ་ན་གུས་པའི་ཚུལ་དུ་ཅི་ལྟར་གྱོན་དགོས་པ།
- ཡང་ན་དེ་རིང་ཆོས་ཀྱི་ཕྱོགས་ནས་ཨ་ལགས་རྣམ་པ་ཡིན་ན།
- ཆོས་འཆད་དུས་ཅི་འདྲ་ཞིག་བསྣམས་ནས་འགྲོ་དགོས་པ།
- དེ་རྣམས་ལ་ཚད་ཅིག་ཡོད།
- ང་ཚོའི་བོད་ལ་ཡང་དེའི་རྒྱུ་མཚན་གསལ་བོ་ཞིག་བཤད་ན།
- ངས་ཅང་བཤད་མི་ཤེས་མོད་ཆུང་ས་ཞིག་ནས་བཤད་ན།
- དེ་རིང་བླ་མ་དཔོན་པོ་ཞིག་གི་སྔུན་ལ་འགྲོ་ན།
- དེའི་སྔུན་ལ་འགྲོ་སྲོལ་གྱི་གོན་པ་གྱོན་ནས་འགྲོ་སྟངས་ཤིག
- ཨ་ནེ་ཨ་མྱེས་ཐོན་ན་གོན་པ་གྱོན་ནས་དེའི་སྔུན་ལ་འགྲོ་སྟངས་ཤིག
- རང་གི་ན་ཟླ་མཉམ་འགྲོ་ཞིག་གི་རྩིབ་ལ་འགྲོ་ན་དེར་འགྲོ་སྟངས་ཤིག
- དེ་རིང་སྟོན་མོ་དང་སྟོན་ཐོག་ཅིག་ལ་འགྲོ་ན་དེར་འགྲོ་སྟངས་ཤིག
- དེ་འདྲ་མང་པོ་ཞིག་ཡོད་པ་ཚང་མས་ཤེས།
- དེ་ནི་ཆུང་ས་ནས་རེད།
- དེ་ནས་ཟ་མའི་སྟེང་ནས་ཡིན་ནའང་སྔོན་ཆད་ལས་མི་དཔེ་བ།
- སྔོན་ཆད་དང་བསྡུར་ན་འབྲུ་རིགས་ང་ཚོས་ད་བར་ད་དུང་འདེབས་ཀྱིན་ཡོད།
- ད་བར་ཡིན་ནའང་འབྲུ་རིགས་ད་དུང་འགྱུར་ཡོད་པ་མ་རེད།
- ཧྲིག་རྩམ་ཞེས་བཅའ་རྒྱུ་ཞིག་ཡོད་ཀི།
- ངས་དེ་ཨ་ལགས་གཡར་ཆུང་དང་ཨ་ལགས་བསེ་ཚང་།
- ནང་ཆེན་ལ་སོང་ནས་ལས་ཏེ་ཟོས་པ་མ་གཏོགས་ཟ་མ་མྱོང་།
- དེ་བཅའ་ཤེས་མཁན་ཁ་ཁུར་རེད།
- བླ་མ་རྣམ་པར་བཅོས་ནས།
- དེ་མིན་རང་ལ་བཅའ་རྒྱུ་དང་བཅའ་མཁན་ཡོད་རུང་བཅའ་སྲོལ་ལ་སོགས་པའི་ཚད་མི་ཤེས།
- ཚད་ལས་བརྒལ་ན་མི་ཡག་པ་དང་མི་ཞིམ་པ་རེད།
- དེ་དག་ཐམས་ཅད་ཉམས་རྒུད་དུ་འགྲོ་བཞིན་འདུག
- འདི་དག་ནི་ཆུང་ས་རེད།
- ཆེ་ས་ནས་འདི་འདྲའི་མཁས་པ་ཏག་ཏག་ཡོད་ཀི།
- ང་ལ་གཞན་བཤད་རྒྱུ་མེད།
- འདི་དག་གི་སྟེང་ནས་ངོ་མས་བཤད་ན།
- རང་ཉིད་དགོན་པ་གྲྭ་ཚང་དང་སྡེ་བ་ལ་ཉུལ་ནས་བསྡད་ཡོད་པ་ཞིག་ཡིན།
- གཞུང་ཡར་མར་དང་རྒྱལ་ཁབ་ཕྱི་མིན་མོད།
- ང་ཚོ་རེབ་གོང་ཕྱི་ནང་དུ་རང་ཉིད་བླ་མ་རྣམ་པའི་སྐུ་མདུན་དུ་སོང་ན།
- ང་རང་ཉན་རྒྱུར་དགའ།
- རིག་གནས་མེད་མོད།
- འདི་ཡི་བཅའ་སྲོལ་དང་ལས་སྲོལ་ཅི་འདྲ་ཞིག་ཡིན་ནམ།
- དེ་ཡིས་བཤད་ཕྱོགས་ཅི་འདྲ་ཞིག་རེད།
- ང་རང་ཁ་བརྡ་ལ་དགའ།
- ཁ་བརྡ་ལ་དགའ་ན་མི་ཡི་དགའ་ཕྱོགས་ཀྱིས།
- རང་རང་གི་ཡིད་ལ་ཅུང་ཙམ་འགྲོ་བ་རེད།
- དེ་བས་ངག་ཐོག་གི་རིག་གནས་འཚོལ་བསྡུ་བྱེད་པ་འདི་ལ་དངོས་གནས་བཀའ་དྲིན་ཆེ།
- ཡིག་མཁན་པ་རྣམས་ཀྱི་རང་གི་དཀའ་ངལ་ལ་མ་བལྟས།
- ངག་ཐོག་ནས་ཡིག་ཐོག་ཏུ་ཕབ་ནས།
- ཡིག་ཐོག་ནས་ངག་ཐོག་ཏུ་བབས་ནས།
- ཐོག་མར་ངག་ཐོག་ནས་བྱུང་བ་རེད།
- དེ་ཚང་མས་ཤེས་དགོས།
- གཞན་རྣམས་ཡིན་ནའང་ངག་ཐོག་གི་དེར་བལྟས་ནས་ཉར་ཚགས་བྱས།
- དེ་ཇེ་བདེ་རུ་བཏང་ནས།
- ཡིག་ཐོག་ཏུ་ཕབ་པ་དང་ཡིག་ཐོག་ནས་ཕྱིར་ངག་ཐོག་ལ་ཡོང་ནས་དེ་ལྟར་བྱེད།
- དེ་བས་འདིར་བཞུགས་ཀྱི་རྒན་པ་རྣམ་པ་ཡིན་ན།
- ངའི་འདིའི་ནང་ན་འགྲོ་མ་ཤེས་པ་དང་བཤད་མ་ཤེས་པ་ཡོད་ན།
- རིག་གནས་མེད་པའི་སྟབས་ཀྱིས།
- དེ་འདྲ་ཡོད་ན་དགོངས་དག་ཞུས་པ་ཡིན།
- ཁོ་ཚོའི་རེ་བ་ལྟར་དུ་བཤད་པ་ཞིག་བཤད་པ་ཡིན།
- བཤད་པ་ཞིག་བཤད་ན་རིག་གནས་ཡོད་མཁན་ཞིག་དང་།
- དཔྱད་པ་ཡི་ཉར་ཚགས་ཀྱི་རིམ་པ་ཁ་ཚང་བ།
- དེ་འདྲ་ཞིག་ཡིན་པ་མ་རེད།
- ངག་ཐོག་ནས་བརྒྱུད་དེ་ཡོང་བ་ངོ་མ་བོ་ཡིན་པ་རེད།
- རྒན་པ་རྣམས་ཀྱིས་ཁ་ནས་བཤད་པ་ལ་ང་རང་དགའ་བས།
- དེར་ཉན་པ་དང་དེར་བལྟས་ནས་དེ་བློ་ལ་ཨེ་ཟིན་བལྟས།
- རང་ཉིད་དགའ་བ་ལས་ཅིག་གིས་བཅོལ་བ་མ་རེད།
- དེ་ལྟར་བྱས་པ་རེད།
- དེ་རིང་གོང་འོག་ཚང་མར།
- ངས་དེ་རིང་ཁྱེད་ཚོར་ལེགས་སྐྱེས་ཀྱི་ཚུལ་དུ་འདི་དག་གི་རེ་བ་ལྟར།
- ཉམས་རྒུད་དུ་འགྲོ་བཞིན་འདུག་ཟེར་ན་ངས་གཅིག་བཤད་ཅེས་པ་དེ་ཡིན།
- དེར་ཡང་ཧ་ཅང་མགོ་རྔ་ཚང་བ།
- ངག་མི་ཆད་པ་དང་ཚིག་མི་འཆུག་པ་དེ་འདྲ་ཞིག་ཡིན་པ་མ་རེད།
- དེར་དགོངས་དག་ཞུ་ཞེས་པ་དེ་ཡིན།
- དེ་རིང་གནམ་ལ་བལྟས་ན་སྐར་མ་བཟང་གི།
- ས་ལ་བལྟས་ན་དུས་ཚོད་བཟང་གི།
- བཀྲ་ཤིས་པའི་ཉི་མ་དོན་འགྲུབ་པའི་ཉི་མ།
- ཕུན་སུམ་ཚོགས་པའི་ཉི་མ།
- བཀྲ་ཤིས་བདེ་ལེགས་ཀྱི་ཉི་མ་འདིར།
- ང་རང་གིས་བཤད་པ་ཞིག་བཤད་ན།
- སྐྱེས་ཕོ་རབ་ཅིག་བཤད་ལ་ཟེར་གི།
- རྒོད་ཐང་དཀར་གྱིས་གནམ་འཕང་བཅད་འདྲ་ཡིན་ནས་ཟེར་གི།
- འདི་འཕུར་གྱིན་འཕུར་གྱིན་ཇེ་མཐོ་ཡིན་ནས་ཟེར་གི
- ཀླད་པ་དགུང་ལ་མི་ཐུག་པའི་ཡིད་ཟོན་ཞིག་ཡོད་ནས་ཟེར་གི།
- འདི་སྐྱེས་ཕོ་འབྲིང་ཞིག་བཤད་ལ་ཟེར་གི།
- གླག་གླག་མོས་རི་སྐེད་གཏུབ་འདྲ་ཡིན་ཟེར་གི
- འདི་འཕུར་གྱིན་འཕུར་གྱིན་ཇེ་དམའ་ཡིན་ནས་ཟེར་གི།
- འདིའི་གཤོག་པ་བྲག་ལ་མི་རྡེབ་པའི་ཡིད་ཟོན་ཞིག་ཡོད་ནས་ཟེར་གི།
- འདིར་སྐྱེས་ཕོ་དམན་ཞིག་བཤད་ལ་ཟེར་གི།
- བྱ་འཕུར་ནས་ཡོང་སྟེ་རྒུན་འབུ་བཏུས་འདྲ་ཡིན་ཟེར་གི།
- འདི་ཕྱིར་འཁོར་ནས་གཅིག་འབབ་དགོས་ཟེར་གི།
- སྒུར་སྒུར་ནས་གཅིག་འཐུ་དགོས་ཟེར་གི།
- རྒུམ་རྒུམ་ནས་གཅིག་མིད་དགོས་ཟེར་གི།
- དེ་ལྟར་ཡིན་ན་དེ་རིང་ང་ལ་དཀའ་ལས་ཆེ་མོད།
- ངའི་མགོ་ཡི་ཞྭ་མོ་འདི་མཐོ་ས་ཞིག་ལ་མ་བཞག་ན་འཕུར་རྒྱུ་དཀའ་ཟེར་གི
- དེ་རིང་ཁྲོམ་པ་འཇིག་ཆེ་གི།
- ང་བཤད་མཁན་ཞི་ལི་སྙིང་ཆུང་གི།
- ངའི་བཤད་པ་བཀྲ་ཤིས་འཁྱིལ་གྱི་ཡ་ཆུང་ཆེམ་ལ་ཤར་གཅིག་དཀའ་བ།
- རྗེས་མར་བཀྲ་ཤིས་འཁྱིལ་བའི་ནང་ནས་ཡོང་གཅིག་དཀའ་བ།
- མིད་ཐག་སྦུ་གུ་ནང་ནས་ཡོང་གཅིག་དཀའ་ཀི།
- ཤེལ་དུང་སོ་སུམ་ཅུའི་བར་ནས་བཤད་གཅིག་དཀའ་ཀི།
- ཁ་ལྕེ་དཀར་དམར་གྱི་བར་ནས་འཁྱོངས་གཅིག་དཀའ་ཀི།
- དེ་རིང་ངག་དང་ཚིག་འཆུག་སོང་ན།
- གྲལ་མགོ་ཡི་ཨ་ཁུ་སྨྲ་ར་ཅན་རྣམས་ཀྱིས་ཁ་ལོག་དང་ཚིག་ལོག་རེ་མ་རྒྱག
- གྲལ་སྐེད་ཀྱི་ན་གཞོན་གྲི་ཆུང་ཅན་གྱིས་ཁ་དགོད་དང་ཁོང་དགོད་རེད་མ་བྱེད།
- གྲལ་རྔ་ཡི་མ་སྲུ་དུང་ར་ཅན་རྣམས་ཀྱིས་ཁ་གྲོས་དང་སྣ་གྲོས་གཅིག་མ་བྱེད་ཟེར་རྒྱུ།
- དམངས་ཚོགས།: རེད་རེད།
- བཤད་མཁན་དང་པོ།:ཡ་ད་་་དེ་རིང་སྐྱེས་ཕོ་རབ་ཀྱིས་ཉན་ན་ཟེར་རྒྱུ།
- མགོར་གཟུར་ནས་རྣ་ཡིས་ཉན་ན་ཟེར་རྒྱུ།
- ད་དུང་གངས་དཀར་གྱི་སེམས་ཀྱིས་ཉན་ན་ཟེར་རྒྱུ།
- གངས་དཀར་པོའི་སེམས་འདི་བཀྱག་བཀྱག་ཅིག་བྱས་ནས་ཉན་ན།
- གངས་དཀར་སེམས་ལ་དད་པ་སྐྱེས་པ་ཞིག་ཡིན་ཟེར་གི།
- ད་སྐྱེས་ཕོ་འབྲིང་གིས་གཅིག་ཉན་ན་ཟེར་རྒྱུ།
- མགོ་དཀར་གྱི་རྣ་ཡིས་ཉན་ན་ཟེར་རྒྱུ།
- རྣ་སྒུར་སྒུར་ཞིག་བྱས་ནས་ཉན་ན།
- སྣ་འདིར་འབྲུ་ཡི་བསོད་ནམས་ཀྱིས་འདང་བ་ཡིན་ཟེར་རྒྱུ།
- སྐྱེས་ཕོ་ངན་གྱིས་གཅིག་ཉན་ན་ཟེར་རྒྱུ།
- ཁ་གདང་ནས་ཉན་ན་ཟེར་རྒྱུ་མིག་ཅེར་ནས་ཉན་ན་ཟེར་རྒྱུ།
- འདིའི་ནང་ན་ཁ་གདང་སྣ་ལུག་ཅིག་ཡོད་ཀི་ཞེས་པ་མིན་མོད་ཀྱང་།
- ད་དང་པོ་ངའི་ལག་གི་དཀར་ཡོལ་འདིའི་བསྟོད་པ་རྣམ་གསུམ་གཅིག་བཤད།
- དང་པོ་ངའི་ལག་གི་དཀར་ཡོལ་འདིའི་བསྟོད་པ་རྣམ་གསུམ་གཅིག་བཤད་ན།
- འདི་འབུད་ས་མི་མཐོ་འབུད་ས་མཐོ་བ།
- འདི་འབུད་ས་རྒྱ་ནག་ཁ་ནས་བུད་པ།
- རྒྱ་ཆེ་བ་ཞིག་གིས་ཁྲིད་ནས་ཡོང་བ།
- འདི་རྨིག་པ་ཆུང་བ་ཞིག་ལ་བཀལ་ནས་ཡོང་བ།
- བོད་སྟོབས་འབྱོར་ཆེ་བའི་ནགས་ལ་ཡོང་བ།
- ཕ་ཨ་ཁུ་འཚོགས་ནས་ཆེ་གི་ཞེས་བཤད་པ།
- མ་སྲུ་མོ་འཚོགས་ནས་ཆུང་གི་ཞེས་བཤད་པ།
- སྤུན་ན་ཟླ་འཚོགས་ནས་ཚད་ཅིག་རེད་ཅེས།
- འདིའི་ཁ་ན་འཁོར་ལོ་རྩིབས་བརྒྱད་ཀྱི་རྩིབས་ཡག་གི།
- འདིའི་ཞབས་ན་པདྨ་འདབ་བརྒྱད་ཀྱི་འདབ་ཡག་གི
- འདིའི་སྟེང་ན་བཀྲ་ཤིས་རྟགས་བརྒྱད་ཀྱི་རྟགས་ཡག་གི
- འདིའི་ནང་གི་བདུད་རྩི་བསིལ་མ་འདིའི་བསྟོད་པ་རྣམ་གསུམ་བཤད་ཟེར་རྒྱུ།
- འདིའི་ནང་གི་བདུད་རྩི་བསིལ་མ་འདིའི་བསྟོད་པ་རྣམ་གསུམ་བཤད་རྒྱུ་ཡིན་ན།
- སྟོད་རྒྱ་གར་ཡུལ་གྱི་ནས་དཀར་གྱི་ཆང་ཡིན་ནས་ཟེར་རྒྱུ།
- སྨད་རྒྱ་ནག་ཡུལ་གྱི་རྒུན་འབྲུམ་གྱི་ཆང་ཡིན་ནས་ཟེར་རྒྱུ།
- བོད་གངས་ཅན་ཡུལ་གྱི་ནས་ནག་གི་ཆང་ཡིན་ནས་ཟེར་རྒྱུ།
- འདི་ལོ་ལ་བསྙལ་བའི་ལོ་ཆང་ཡིན་ཟེར་གི།
- ཟླ་ལ་བསྙལ་བའི་ཟླ་ཆང་ཡིན་ཟེར་གི།
- འདི་ཞག་ལ་བསྙལ་བའི་ཞག་ཆང་ཡིན་ཟེར་གི།
- དེ་རིང་གི་ཉིན་ཆང་གསར་བ་འདི།
- ཕ་ཨ་ཁུས་འཐུང་ན་ཚེ་ཐག་རིང་ནས་ཟེར་གི།
- སྤུན་ན་ཟླས་འཐུང་ན་དགྲ་ལྷ་འཁོར་ནས་ཟེར་གི།
- མ་སྲུ་མོས་འཐུང་ན་ཟས་ལྷ་འཁོར་ནས་ཟེར་གི།
- འདི་སྐྱིད་དུས་འཐུང་ན་སྐྱིད་གྲོགས་ཉན་ན་ཟེར་གི།
- འདི་འགྲོ་དུས་འཐུང་ན་འགྲོ་རོགས་ཉན་ན་ཟེར་གི།
- བྱིས་པ་རྣམས་ཀྱི་རྩེད་རིགས་ཉན་ན་ཟེར་གི།
- མ་བུ་མོ་སྐྱེལ་དུས་རྫོང་བ་ཉན་ན་ཟེར་རྒྱུ་རེད།
- དམངས་ཚོགས།: ཡེད་་་་ཡེད་་་་
- བཤད་མཁན་དང་པོ།:ཡ་་་ད་ཆོས་སྐྱབས་འགྲོ་མེད་ན་འདོན་སྲོལ་མེད་ནས་ཟེར་གི།
- གོས་གོང་བ་མ་བཏགས་གོན་སྲོལ་མེད་ནས་ཟེར་གི།
- གཏམ་ཀུ་རེ་མེད་ན་བཤད་སྲོལ་མེད་ནས་ཟེར་གི།
- དེ་རིང་གི་བདུད་བརྩི་བསིལ་མ་འདིར་མཆོད་ཁ་རེ་འཕངས་ན།
- ངས་མཆོད་གཅིག་འདི་དགུང་སྔོན་གནམ་ལ་མཆོད།
- དགུང་ཨ་སྔོན་འདིར་མ་མཆོད་དང་མ་བཀུར་ན།
- དགུང་ཉི་ཟླ་སྐར་གསུམ་ཤར་ས་རེད།
- ལྷོ་གཡུ་འབྲུག་སྔོན་མོ་གྲགས་ས་རེད།
- བར་དྲག་ཆར་བསིལ་མ་འབབ་ས་རེད།
- བྱ་རྒོད་པོ་མང་པོའི་འཕུར་ས་རེད།
- ངས་མཆོད་གཉིས་འདི་དོག་མོ་ས་ལ་མཆོད།
- ས་དོག་མོ་འདིར་མ་མཆོད་དང་མ་བཀུར་ན།
- འདི་ཚ་བོའི་གཉོམ་ལག་རྒྱས་ས་རེད།
- འདི་འབྲུ་ལྔའི་ལོ་ལེགས་འབྱུང་ས་རེད།
- རྟ་མང་པོའི་འཕེལ་ཁ་རྒྱས་ས་རེད།
- འབྲི་མཚོ་མོའི་ནུ་ཁ་ཡངས་ས་རེད།
- ལུག་ཚ་རུའི་བལ་ཁ་འཇམ་ས་རེད།
- རྟ་མདོ་བས་གོམ་ལག་འགྲན་ས་རེད།
- བོད་གངས་ཅན་ཕྱུག་མོ་གཡང་གི་ར་བ་འདིར།
- དོག་མོ་ས་རེད་ཅེས་ཟེར་རྒྱུ་རེད།
- དམངས་ཚོགས།: ཡེད་་་་ཡེད་་་་
- བཤད་མཁན་དང་པོ།:ཡ་་་ངས་མཆོད་གསུམ་འདི་དབུས་གཙང་ཡུལ་ནས་མཆོད།
- སྟོད་དབུས་གཙང་ཡུལ་འདིར་མ་མཆོད་དང་མ་བཀུར་ན།
- འདི་རྒྱལ་བ་པན་ཆེན་བཞུགས་ས་རེད།
- བསྟན་པ་བཅུ་གཉིས་གནས་ས་རེད།
- སེ་འབྲས་དགའ་གསུམ་ཚོགས་ས་རེད།
- འདི་བློ་རིག་བསྟན་པའི་ཆོས་འཁོར་བསྐོར་ས་རེད།
- བོད་གདོང་དམར་བའི་ཕ་ས་རེད་ཟེར་རྒྱུ་ཅན་ཞིག་རེད་ཟེར་རྒྱུ།
- དམངས་ཚོགས།: ཡེད་་་་ཡེད་་་་
- བཤད་མཁན་དང་པོ།:ཡ་་་ད་ངས་གོང་སྔོན་མའི་སངས་རྒྱས་ཀྱི་བསྟན་པ་དར་ཚུལ།
- མདོར་བསྡུས་ཙམ་ཞིག་བཤད་དགོས་ཟེར་རྒྱུ།
- སངས་རྒྱས་ཀྱི་བསྟན་པ་དར་ཚུལ་མདོར་བསྡུས་ཙམ་ཞིག་བཤད་ན།
- དང་པོ་རྒྱ་གར་ཤར་གྱི་ཡུལ་ནས།
- རྒྱལ་བོ་ཟེ་ཚང་ཟེ་ཡི་སྲས་བྱས་ནས་འཁྲུངས་བ།
- དགུང་ལོ་ཉེར་གཉིས་སྟེང་ནས་རྒྱལ་ས་སྐྱོང་ཟིག
- རྒྱལ་སའི་སྟེང་ནས་རབ་ཏུ་བྱུང་ཟིག
- ཏིང་ངེ་འཛིན་ལ་ལོ་དྲུག་བཞུགས་པ།
- མཐའ་མ་རྔ་མར་སངས་རྒྱས་པ།
- དང་པོ་བསྟན་པའི་དབུ་བརྙེས་པ།
- བར་དུ་བསྟན་པའི་སྲོལ་བཙུགས་པ།
- རྗེས་མར་ཆོས་འཁོར་རིམ་པ་གསུམ་བསྐོར་བ།
- ཆོས་འཁོར་དང་པོ་རྒྱ་གར་ཝ་ར་ན་སིའི་ཡུལ་ནས་བསྐོར་བ་ཟེར་རྒྱུ།
- སེམས་ཅན་བློ་ཁ་ཆོས་ལ་བསྒྱུར་ནས་ཟེར་རྒྱུ།
- གཉིས་པ་འདི་རྒྱ་གར་རྡོ་རྗེ་གདན་ནས་བསྐོར་ཟིག
- བཀའ་དམ་ཆོས་མང་པོ་གཏན་ལ་ཕབ་ནས་ཟེར་རྒྱུ།
- གསུམ་པ་འདི་བྱ་རྒོད་ཕུང་པོའི་རི་ནས་བསྐོར་བ་ཟེར་རྒྱུ།
- སངས་རྒྱས་བསྟན་པ་ཡོངས་ལ་ཁྱབ་ནས་ཟེར་རྒྱུ་ཅན་ཞིག་རེད་ཟེར་རྒྱུ།
- དམངས་ཚོགས།: རེད་་་རེད་་་
- བཤད་མཁན་དང་པོ།:ཡ་་་ད་ངས་དེ་རིང་གཉེན་གྱི་དར་ཚུལ་མདོར་བསྡུས་ཙམ་ཞིག་བཤད་དགོས་ཟེར་རྒྱུ།
- གཉེན་གྱི་དར་ཚུལ་མདོར་བསྡུས་ཙམ་ཞིག་བཤད་ན།
- དང་པོ་དགུང་ཉི་ཟླ་གཉིས་ཀྱི་གཉེན་དར་བ།
- སྨིན་དྲུག་ཕྲ་མོ་བག་ལ་སྐྱེལ་བ།
- དགུང་སྐར་ཚོགས་མང་པོ་རྫོང་བ་བྱས་པ།
- དང་པོ་ལྷ་ཀླུ་གཉིས་ཀྱི་གཉེན་དར་བ།
- ལྷ་ཆེན་ཚངས་པ་དཀར་པོ་མག་པ་བྱས་པ།
- ཀླུའི་སྲས་མོ་མེ་ཏོག་ལྷ་མཛེས་བག་མ་བྱས་པ།
- ཀླུ་རྟ་དཀར་པོ་བག་རྟ་བྱས་ནས།
- དེ་ནས་རྒྱལ་བོ་གཉིས་ལ་གཉེན་དར་བ།
- རྒྱ་ནག་ཐང་ཐའེ་ཙུང་གི་སྲས་མོ།
- རྒྱ་བཟའ་ཀོང་ཇོ་བོད་ལ་གདན་དྲངས་པ།
- རྒྱལ་བོ་སྲོང་བཙན་སྒམ་པོ་མག་པ་བྱས་པ།
- རྒྱ་བཟའ་ཀོང་ཇོ་བག་མ་བྱས་ནས།
- བློན་པོ་མགར་བར་བ་བྱས་པ།
- ཇོ་བོ་ཤཱཀྱ་མུ་ནེ་རྫོང་བ་ཡིན་པ་ཟེར་རྒྱུ་ཅན་ཞིག་རེད་ཟེར་རྒྱུ།
- དམངས་ཚོགས།: རེད་་་རེད་་་
- བཤད་མཁན་དང་པོ།: ཡ་་་ད་དེ་རིང་ཡར་བལྟས་ན་གངས་ཤིག་རིག་ནས་ཟེར་རྒྱུ།
- གངས་དཀར་པོའི་མཆོད་རྟེན་བཞེངས་འདྲ་ཡིན་ཟེར་རྒྱུ།
- དགུང་ཨ་སྔོན་འདེགས་པའི་ཀ་བ་ཡིན་ཟེར་གི།
- འདིའི་དཀྱུས་ལུང་ཐམས་ཀྱི་གངས་ཀྱིས་བཀང་ནས་ཟེར་རྒྱུ།
- ཆག་བཞག་ན་གེ་སེར་འབྲོང་ཡིན་ཟེར་གི།
- འདིའི་བར་མ་ཐམས་ཅད་མདོ་རིག་རྟ་ཡིས་བཀང་ནས་ཟེར་རྒྱུ།
- ཆག་བཞག་ན་ཁ་དཀར་རྐྱང་ཡིན་ཟེར་གི།
- འདིའི་ཕར་ལུང་ཐམས་ཅད་ཚ་རུའི་ལུག་གི་བཀང་ནས་ཟེར་གི།
- ཆག་བཞག་ན་དེ་ནི་རྒོ་ཡིན་ཟེར་གི།
- འདི་བོད་ཁ་བ་ཅན་གྱི་བླ་རི་ཡིན་ཟེར་རྒྱུ།
- ཆག་བཞག་ན་ཨ་མྱེས་རྨ་ཆེན་ཡིན་ཟེར་གི།
- འདི་ལོ་རེ་བསྡད་ན་ཇེ་མཐོ་ཡིན་ཟེར་གི།
- བོད་དབུ་འཕང་མཐོ་བའི་རྟེན་འབྲེལ་ཡིན་ཟེར་རྒྱུ་ཅན་ཞིག་རེད་ཟེར་རྒྱུ།
- དམངས་ཚོགས།: རེད་་་་རེད་་་
- བཤད་མཁན་དང་པོ།:ཡ་་་་ད་མར་བལྟས་ན་མཚོ་ཞིག་ཡོད་ནས་ཟེར་གི
- དགུང་ཨ་སྔོན་ཐང་ལ་ལྷུང་འདྲ་ཞིག་ཡོད་པ།
- ཆག་བཞག་ན་མཚོ་མོ་ཁྲི་ཤོར་ཡིན་ཟེར་གི།
- མཚོ་མགོ་འདི་པ་ཏྲ་ཡིས་བརྒྱན་ནས་ཟེར་གི
- མཚོ་སྙིང་འདི་མ་ཧ་དེ་བས་རྒྱན་ནས་ཟེར་གི།
- མཚོ་རྔ་འདི་མཚེར་བ་རིའི་བརྒྱན་ནས་ཟེར་གི།
- བྱ་འདབ་ཆགས་མང་པོའི་རྫོང་བ་ཡིན་ནས་ཟེར་གི
- ས་དོག་མོ་ཆགས་པའི་ལྟེ་བ་ཡིན་ནས་ཟེར་གི།
- བོད་ཁ་བ་ཅན་གྱི་བླ་མཚོ་ཡིན་ནས་ཟེར་གི།
- འདི་ལོ་རེ་བསྡད་ན་ཇེ་ཆེ་ཡིན་ཟེར་གི།
- བོད་སྟོད་སྨད་སྟོབས་འབྱོར་ཆེ་བའི་རྟེན་འབྲེལ་ཡིན་ཟེར་རྒྱུ་ཅན་ཞིག་རེད་ཟེར་རྒྱུ།
- དམངས་ཚོགས།: རེད་་་རེད་་་
- བཤད་མཁན་དང་པོ།: ཡ་་་ད་རེབ་གོང་ཡུལ་ནས་བལྟས་ན་རྫ་ཞིག་རིག་ནས་ཟེར་གི།
- བྱ་ཁྱུང་ཁྱུང་མཁའ་ནས་ལྡིང་འདྲ་ཡིན་ཟེར་གི
- བླ་མ་གསེར་གཞིའི་ཅན་ལ་གཤོག་འདབ་བྱས་པ་ཡིན་ཟེར་གི།
- དགེ་སློང་ཁ་གསར་ཅན་ལ་ཞབས་ཏོག་སྒྲུབ་ནས་ཟེར་གི།
- དཔོན་པོ་མངའ་འབངས་ཅན་ལ་ཞབས་ཞུ་སྒྲུབ་ནས་ཟེར་གི།
- ཆག་བཞག་ན་ཨ་མྱེས་བྱ་ཁྱུང་ཡིན་ནས་ཟེར་གི།
- ས་བརྒྱད་པ་ཐོབ་པའི་ཨ་མྱེས་བྱ་ཁྱུང་ཡིན་ནས་ཟེར་རྒྱུ།
- ཕ་ཨ་ཁུ་བརྟེན་སའི་སྐྱེས་ལྷ་ཡིན་ཟེར་གི།
- སྤུན་ན་ཟླས་བརྟེན་པའི་དགྲ་ལྷ་ཡོད་ནས་ཟེར་གི།
- མ་སྲུ་མས་བརྟེན་པའི་ཟས་ལྷ་ཡིན་ཟེར་རྒྱུ་ཅན་ཞིག་རེད་ཟེར་རྒྱུ།
- དམངས་ཚོགས།: རེད་་་རེད་་་
- བཤད་མཁན་དང་པོ།:ཡ་ད་མར་བལྟས་ན་རི་ཞིག་རིག་ནས་ཟེར་གི།
- དཔོན་ཆེན་པོ་ཁྲི་ལ་བཞུགས་འདྲ་ཡིན་ཟེར་གི།
- བློན་ཆེན་པོ་བཅིབས་ལ་ཆས་འདྲ་ཡིན་ཟེར་གི།
- ས་སྔ་བ་ཐོབ་པའི་ཨ་མྱེད་སྟག་མོ་ཡིན་ཟེར་རྒྱུ་ཅན་ཞིག་རེད་ཟེར་རྒྱུ།
- དམངས་ཚོགས།: རེད་་་་རེད་་་
- བཤད་མཁན་དང་པོ།:ཡ་་་ད་དེ་རིང་ངས་བསྟོད་པ་ལ་རྟེན་འབྲེལ་གྱི་ཨ་ཞང་བསྟོད་དགོས་ཟེར་རྒྱུ།
- ཨ་ཞང་ཚང་ལ་བསྟོད་པ་རྣམ་གསུམ་གཅིག་བཤད་ན།
- ལམ་ཁ་ཐག་རིང་བས་ཡོང་ཚེགས་ཆེ་གི།
- ཤར་ཉི་མ་འདྲ་ཞིག་ཤར་ནས་ཡོང་ཟིག
- མགོ་ཁྲི་གདུགས་འདྲ་ཞིག་ཁྲིད་ནས་ཡོང་།
- བྱང་ཁུ་བྱུག་འདྲ་ཞིག་གྲགས་ནས་ཡོང་ཟིག
- ཆར་བསིལ་མ་འདྲ་ཞིག་བབས་ནས་བྱང་ཁུ་བྱུག་འདྲ་ཞིག་གྲགས་ནས་ཡོང་ཟིག
- ཟླ་བཞི་བ་འདྲ་ཞིག་ཁྲིད་ནས་ཡོང་བ།
- ལྷོ་གཡུ་འབྲུག་འདྲ་ཞིག་གྲགས་ནས་ཡོང་ཟིག
- ཆར་བསིལ་མ་འདྲ་ཞིག་བབས་ནས་ཡོང་ཟིག
- གཉེན་ཚང་ཚང་གིས་ཨ་ཞང་ཚང་ལ་ས་ལ་འབབ་སྟན་གཏོང་བའི་རྒྱུ་མཚན་གཅིག་བཤད་ན།
- ཇ་ལན་ཆེན་བརྩིགས་ནས་ཁྲི་ཞིག་བརྒྱབ་པ།
- ལན་ཆུང་བརྩིགས་ནས་གོས་ཤིག་འཕངས་བ།
- ལན་ཆེན་སྟེང་ལ་གདན་དཀར་བཏིང་བ།
- གདན་དཀར་སྟེང་ལ་གདན་དམར་བཏིང་བ།
- གདན་དམར་སྟེང་ལ་ཕྲུག་གདན་འཕངས་བ།
- ཕྲུག་གདན་སྟེང་ལ་ཁ་བཏགས་བཏིང་བ།
- གཉེན་ཚང་ཚང་གིས་དེ་རིང་ཕྱག་གཡས་གང་གིས་སྒོ་འགྱོག་བྱས་ནས་ཟེར་གི།
- མིག་རྒྱང་གང་གིས་བསུ་མ་བྱས་ནས།
- ས་འདབ་བརྒྱད་རྔ་མ་བསུ་སྐོལ་ཁྱེར་ནས་ཟེར་གི།
- བསུ་སྐོར་རིམ་པ་བཅུ་གསུམ་ཁྱེར་ནས།
- ཕྱག་གཡས་གང་གིས་དེ་རིང་དགུང་ཨ་སྔོན་དབྱིངས་ལ་བསྟོད་དུ་ཡོང་ནས།
- ས་དོག་མོ་ཡུལ་ལ་འདུག་ཏུ་ཡོང་ནས།
- སྟོད་བལ་བོའི་ཡུལ་ལ་ཕྱིང་དཀར་བཏིང་ཡོད་ནས།
- མགོ་ནག་ཁྲི་ཁྲི་འབུམ་འབུམ་འཚོགས་ཡོད་ནས།
- ཤ་ཚང་ར་གཉིས་ཀ་ལྷུ་འགྲིག་ཡོད་ནས།
- ཆང་བཀང་བོས་རྒྱ་མཚོ་བསྐྱིལ་ཡོད་པ།
- ཤ་སྡེར་གྱི་རི་ཞིག་བརྩིགས་ཡོད་ནས།
- ཇ་ཆང་གི་མཚོ་ཞིག་སྐྱིལ་ཡོད་ནས།
- འདི་མགོ་ནས་མགྲོན་པོ་ཡིས་གཅིག་བཞེས་དགོས་ཟེར་རྒྱུ།
- དལ་ལྷོད་ནས་ཨ་ཞང་ཚོས་གཅིག་བཞེས་དགོས་ཟེར་རྒྱུ།
- འདི་མགོ་ནས་མགྲོན་པོ་ཡིས་གཅིག་རྩེད་དགོས་ཟེར་རྒྱུ་ཅན་ཞིག་རེད་ཟེར་རྒྱུ།
- དམངས་ཚོགས།: རེད་་་་རེད་་་
- བཤད་མཁན་དང་པོ།:ཡ་་་ད་དེ་རིང་བསྟོད་བསྟོད་ལ་མགོ་ཡི་སྐྱིད་ཀྱི་མགོ་ར་གྲུ་བཞི་འདི་བསྟོད་དགོས་ཟེར་རྒྱུ།
- སྐྱིད་ཀྱི་མགོ་ར་གྲུ་བཞི་འདིའི་བསྟོད་པ་རྣམ་གསུམ་པོ་བཤད་རྒྱུ་ཡིན་ན།
- འདི་སྨྱུག་རི་རྡོ་ཡིས་སྟོད་དུ་ལས་ནས་ཟེར་གི།
- འདི་ཁེར་བ་རྐྱང་གི་ཞོལ་དུ་ལས་ནས་ཟེར་གི།
- བྲེ་སེར་འབྲོང་གི་ཆང་བསུ་བྱས་ནས་ཟེར་གི།
- སྟོད་ལྷ་མོ་བརྒྱ་ཡིས་བཀལ་པ་ཡིན་ཟེར་གི།
- མ་ཀླུ་མོ་བརྒྱ་ཡིས་འཐག་པ་ཡིན་ཟེར།
- འདི་ལྷ་མོ་བརྒྱ་ཡིས་ཕུག་པ་ཡིན་ཟེར་གི།
- ཕྱི་ནས་བལྟས་ན་ལྷོ་སྤྲིན་ཐང་ལ་ལྷུང་འདྲ་ཡིན་ཟེར་གི།
- ནང་དུ་སོང་ན་ལྷ་ཁང་ཕུག་འདྲ་ཡིན་ཟེར།
- དེ་རིང་ང་ཚོའི་མགོ་ཡི་སྐྱིད་ཀྱི་མགོ་ར་ལྷ་ཁང་འདྲ་བོ་འདིའི་ནང་ནས།
- མག་པ་ལྷོ་འབྲུག་འདྲ་བོ་འདྲ་བསྟོད་དགོས་ཟེར།
- མག་པ་ལྷོ་འབྲུག་འདྲ་བོའི་བསྟོད་པ་རྣམ་གསུམ་བཤད་ན།
- དགུང་སྔོན་པོ་འདྲ་བའི་ཨ་ཞང་ལ་འབྲུག་ཕོ་ཆུང་འདྲ་བའི་མག་པ་ཡོད་ཀི།
- ཆར་བསིལ་མ་འདྲ་བའི་སྐེད་རགས་བཅིངས་དགོས།
- ནགས་རྒྱ་རྫོང་འདྲ་བའི་ཨ་ཞང་ལ་སྟག་དམར་ཡག་འདྲ་བའི་མག་པ་ཡོད་ཟེར་གི།
- ནགས་ལྗང་ལོ་འདྲ་བའི་སྐེད་རགས་བཅིང་དགོས་ཟེར་གི།
- ཆུ་རྨ་ཆུ་འདྲ་བའི་ཨ་ཞང་ལ་ཉ་གསེར་མིག་འདྲ་བའི་མག་པ་ཡོད་ནས་ཟེར་གི།
- དར་ཟ་འོག་འདྲ་བའི་སྐེད་རགས་བཅིང་དགོས་ཟེར་གི།
- བྱ་ཁྱུང་ཆེན་འདྲ་བའི་ཨ་ཞང་ལ་བུ་ཁྲ་རིག་འདྲ་བའི་མག་པ་ཡོད་ནས་ཟེར་གི།
- སྒྲོ་སྨུག་པོ་འདྲ་བའི་སྐེད་རགས་བཅིང་དགོས་ཟེར་གི།
- སྤང་སྤང་དཀར་འདྲ་བའི་ཨ་ཞང་ལ།
- གཅིན་ཀག་འདྲ་བའི་སྐེད་རགས་བཅིང་དགོས་ཟེར་གི།
- སྤང་མེ་ཏོག་འདྲ་ཡི་སྐེད་རགས་བཅིངས་དགོས་ཟེར་རྒྱུ་ཅན་ཞིག་རེད་ཟེར་རྒྱུ།
- དམངས་ཚོགས།: རེད་་་རེད་་་་
- བཤད་མཁན་དང་པོ།:ཡ་་་ད་དེ་རིང་ང་ཚོའི་མག་པ་ལྷོ་འབྲུག་འདྲ་བོ་འདིའི་བསྟོད་པ་རྣམ་གསུམ་བཤད་ན།
- རྟ་འདོ་བའི་གོང་ནས་གློག་ཞགས་ཀྱི་མེ་ཡིན་ཟེར་གི།
- གོས་ཚ་རུའི་ནང་ན་མདའ་སྨྱུག་གི་དྲག་ཡིན་ཟེར་རྒྱུ།
- རྒྱ་ནག་པོར་ཐུག་ན་འགག་སྒོ་ཡི་རྩུབ་ཡིན་ཟེར་གི།
- ནང་ཕུ་ནུའི་བར་དུ་བལ་དཀར་གྱི་འཇམ་ཡིན་ཟེར་རྒྱུ།
- ལ་རྐེད་གོང་ན་ཉན་ནས་ཡོད་པ།
- རྟ་བརྒྱའི་གོང་ནས་ལྷག་ནས་ཡོད་པ།
- ད་དེ་རིང་བསྟོད་བསྟོད་བསྟོད་ལ་ང་ཚོའི་སྐྱིད་ཀྱི་བག་མ་འདི་བསྟོད་དགོས་ཟེར།
- སྐྱིད་ཀྱི་བག་མ་འདིའི་བསྟོད་པ་རྣམ་གསུམ་བཤད་ན།
- ཕ་དང་ཨ་ཁུས་སྐྱེལ་ནས་ཡོང་ཟེར་གི།
- གོས་ཚ་རུའི་ཁུགས་ལ་བཏུམ་ནས་ཡོང་བ་ཡིན་ཟེར་གི།
- སྐེ་གཡུ་བྱུར་རྒྱན་ཆ་བཏགས་ནས་ཡོང་ཟེར་གི།
- འདིའི་ཤ་རྩ་ཚ་བའི་དམར་ཡིན་ཟེར་གི།
- ཚ་དམར་པོ་གོང་གི་ཚ་བོ་ཡིན་ཟེར།
- འདིའི་སོ་རྩ་དུང་སོ་དཀར་ཡིན་ཟེར་གི།
- དུང་དཀར་པོ་གོང་གི་ཚ་བོ་ཡིན་ཟེར།
- འདིའི་མིག་རྩ་ཁྱུང་གི་ཁྲ་ཡིན་ཟེར་གི།
- འདི་ཁྲ་མོ་གོང་གི་ཚ་བོ་ཡིན་ཟེར།
- ལ་རྐེད་གོང་ན་ཉན་ནས་ཡོད་པ།
- རྟ་བརྒྱའི་གོང་ནས་ལྷག་ནས་ཡོད་པ།
- ང་ཚོའི་སྐྱིད་ཀྱི་བག་མ་འདི་ཡིན་ཟེར་རྒྱུ་ཅན་ཞིག་རེད་ཟེར་རྒྱུ།
- དམངས་ཚོགས།: རེད་་་་རེད་་་
- བཤད་མཁན་དང་པོ།:ཡ་་་ད་དེ་རིང་གི་གཉེན་སྟོན་འདིའི་སྟེང་ནས།
- ངས་འཇིག་རྟེན་གྱི་དར་བ་རྣམ་གསུམ་བཤད་དགོས་ཟེར་རྒྱུ།
- འཇིག་རྟེན་གྱི་དར་བ་རྣམ་གསུམ་མདོར་བསྡུས་ཤིག་བཤད་ན།
- དཔོན་ཆེན་པོ་དར་ན་ཧྲག་རྟ་དར་ནས་ཟེར་གི།
- མ་བཟང་མོ་དར་ན་ཨ་ནེ་དར་ནས་ཟེར་གི།
- ཆུ་རྨ་ཆུ་དར་ན་རང་འཐག་དར་ནས་ཟེར་གི།
- འདི་འཇིག་རྟེན་གྱི་དར་བ་རྣམ་གསུམ་ཡིན་ནས་ཟེར་གི།
- འཇིག་རྟེན་གྱི་མི་དལ་བ་རྣམ་གསུམ་བཤད་དགོས་ཟེར་གི།
- ཆུང་མ་བླངས་ན་ཁ་མི་དལ་ཟེར་གི།
- གཡག་ལ་ཞོན་ན་སུག་མི་དལ་ཟེར་གི།
- ལོག་རྩྭ་བུས་ན་ལག་མི་དལ་ཟེར་གི།
- འདི་འཇིག་རྟེན་གྱི་མི་དལ་བ་རྣམ་གསུམ་ཡིན་ནས་ཟེར་གི།
- འཇིག་རྟེན་གྱི་ལྡན་པ་རྣམ་གསུམ་བཤད་དགོས་ཟེར་གི།
- ལྡན་པ་རྣམ་གསུམ་བཤད་ན།
- སྟག་ཤ་རའི་སྐེད་ན་གྲི་ཆུང་ལྡན་ནས་ཟེར་གི།
- མ་བཟང་མོའི་ལག་ནས་ཐོན་བུ་ལྡན་ནས་ཟེར་གི།
- ཇ་དཀར་དམར་ཁ་ན་འབྲུ་མར་ལྡན་ནས་ཟེར་གི།
- འདི་འཇིག་རྟེན་གྱི་ལྡན་པ་རྣམ་གསུམ་ཡིན་ནས་ཟེར་གི།
- འཇིག་རྟེན་གྱི་དཀའ་བ་རྣམ་གསུམ་བཤད་དགོས་ཟེར་རྒྱུ།
- མགོ་ཝ་མོ་ཅན་ལ་མེ་འབུད་དཀའ་ཟེར་གི།
- གོས་འཁོར་གསུམ་ཅན་ལ་ཕྲག་གཟུར་དཀའ་ཟེར་གི།
- རྐང་སག་ལྷམ་ཅན་ལ་རྟ་རྒྱབ་ནས་དཀའ་ནས་ཟེར་གི།
- འདི་འཇིག་རྟེན་གི་དཀའ་བ་རྣམ་གསུམ་ཡིན་ནས་ཟེར་གི།
- འཇིག་རྟེན་གྱི་བཀུག་པ་རྣམ་གསུམ་བཤད་དགོས་ཟེར་རྒྱུ།
- སྟོད་རི་རྐྱང་སྔོན་མོ་འདི་གཟན་གྱིས་བཀུགས་ནས་ཟེར་གི
- གློག་ཞགས་འདི་ཆུ་བོ་ཆང་གིས་འགུགས་ནས་ཟེར་གི།
- དེ་རིང་མགྲོན་པོ་ཚོ་དལ་མོར་བཞུགས་ནས་ཆང་ཞིག་བཞེས་ཟེར་རྒྱུ་དེ་རེད།
- དམངས་ཚོགས།: རེད་་་་རེད་་་
- བཤད་མཁན་དང་པོ།:ཡ་་་ད་དེ་རིང་གི་གཉེན་སྟོན་འདིའི་སྟེང་ནས།
- ངས་ཁ་གཡེང་བཀྲ་ཤིས་འཁྱིལ་བ་ཞིག་འབོད་དགོས་ཟེར་རྒྱུ།
- ཁ་གཡེང་བཀྲ་ཤིས་འཁྱིལ་བ་རེ་བོས་ན།
- རྒན་པ་རྣམས་ཚེ་ཐག་རིང་བའི་བཀྲ་ཤིས་ཤོག
- གཞོན་པ་རྣམས་འདབ་ལག་རྒྱས་པའི་བཀྲ་ཤིས་ཤོག
- ཞིང་རྣམས་ལ་ལོ་ལེགས་འབྱུང་བའི་བཀྲ་ཤིས་ཤོག
- རྟ་མདོ་བའི་འཕེལ་ཁ་དར་བའི་བཀྲ་ཤིས་ཤོག
- ས་འོག་གཏེར་གྱིས་བཀང་བའི་བཀྲ་ཤིས་ཤོག
- ས་ཁ་རྒྱུ་ཡིས་བཀང་བའི་བཀྲ་ཤིས་ཤོག
- གོ་ཁ་བུ་ཡིས་བཀང་བའི་བཀྲ་ཤིས་ཤོག
- ཅི་བསམ་ལྷུན་གྱིས་འགྲུབ་པའི་བཀྲ་ཤིས་ཤོག
- བཀྲ་ཤིས་གཡང་དུ་འཁྱིལ་བའི་བཀྲ་ཤིས་ཤོག
- དམངས་ཚོགས།:རེད་་་རེད་་་
Loading ... Collection:
Subcollection
- Northeastern Tibet (Amdo) Collections
Subject
- Repgong
- Oral Traditions
Referenced Places
- Repgong
Recording Location
- Repgong
Language
- Amdo Group
Terms
- གཏམ་བཤད
- བགྲོ་གླེང
- ཚོགས་འདུ
Related Media:
Is Part Of
Is Part Of
Is Part Of
Is Part Of
Is Part Of
Is Part Of
Cinematographer:
Yidam Tsering, Khashem Gyal
Director:
Dudul Dorjay, Rinchen Khar
Editor:
Yidam Tsering
Contributing Speaker:
Lugya
Contributing Facilitator:
Tibetan & Himalayan Library
Copyright Holder:
Tibetan & Himalayan Library
Publisher:
Tibetan & Himalayan Library
Data Entry:
Copyright Owner:
Tibetan & Himalayan Library
Year Published:
2012
Visibility:
Public (group default)
Shanti AV Id:
1884