༉  ང་བཅས་ར་ འབྲུག་རང་ལུགས་ཀྱི་ཁྱིམ་འདི་ མང་ཤོས་ཅིག་ པར་འཆམ་ཞིནམ་ལས་རྐྱབ་དོ་ཡོདཔ་ད་ པར་འཆམ་པའི་སྐབས་ སྐད་ཀྱིས་གདངས་འཐེན་ཏེ་ པར་ཤིང་བསྐུལ་ནི་ཟེར་འབད་ནི་ཡོདཔ་བཞིན་དུ་ ད་ལྟོ་དར་དཀར་ན་རྫོང་ཁག་ བ་ལུང་གཡུས་ཚན་ལས་ སྐལ་བཟང་དབང་མོ་དང་ཆ་རོགས་ཚུ་གིས་སྦེ་ པར་ཤིང་བསྐུལཝ་ཨིན་པས། པར་ཤིང་བསྐུལ་ནིའི་ལམ་སྲོལ་འདི་ དུས་རབས་ ༡༧ པའི་ནང་ ཞབས་དྲུང་ངག་དབང་རྣམ་རྒྱལ་མཆོག་ འབྲུག་ལུ་བྱོན་ཞིནམ་ལས་ཚུར་འགོ་བཙུགས་ཡོདཔ་ད་ ཁ་རྒྱུན་རིག་གཞུང་དང་འཁྲིལཝ་ད་ ཞབས་དྲུང་རིན་པོ་ཆེ་མཆོག་ གདན་ས་སྤུན་ན་ཁ་ལུ་ བཞུགས་དགོཔ་སྦེ་ ལུང་བསྟན་ཡོདཔ་བཞིན་དུ་ སྤྲུལ་པའི་བཟོཝ་ཅིག་ལུ་ པར་ཤིང་བཟོ་ནིའི་ཤིང་འཚོལ་དགོཔ་སྦེ་བཀའ་གནང་པའི་སྐབས་ བཟོཝ་འདི་གིས་ ག་ཏེ་འགྱོ་རུང་ ཤིང་འདི་འཚོལ་མ་ཐོབ་ལས་ པར་ཤིང་འདི་ བོད་ལས་མར་སྤྱན་དྲང་དགོཔ་སྦེ་ཞུ་ནུག ཏེ་ཁོ་གིས་ བོད་ལས་པར་ཤིང་གདན་འདྲེན་ཞུ་སྟེ་ འབྲུག་ལུ་ལྷོདཔ་ད་ བླམ་རིན་པོ་ཆེ་མཆོག་གིས་ འདི་འབྲུག་ལུ་ ལམ་སྲོལ་དར་ཁྱབ་འགྱོ་ནིའི་རྟེན་འབྲེལ་ཨིན་ཟེར་ གསུངས་གནང་ཡོདཔ་ད་ པར་འཆམ་པའི་སྐབས་ སེམས་ཁར་སྤྲོ་བ་འབྱུང་ཐབས་ལུ་ པར་ཤིང་བསྐུལ་ནི་འདི་ཡང་ དར་ཁྱབ་བྱུང་ནུག ང་བཅས་ར་ ད་རེས་ནངས་པར་ཡང་ རང་ལུགས་ཀྱི་ཁྱིམ་རྐྱབ་ད་ལུ་ པར་འཆམ་ནི་གི་རྟེན་འབྲེལ་བརྩི་བའི་སྐབས་ པར་ཤིང་བོད་ལས་ཞུ་ནི་དང་ པར་འཆམ་ནི་མཇུག་བསྡུ་ཚར་ཞིནམ་ལས་ པར་ཤིང་བོད་ལུ་སྐྱེལཝ་ཟེར་ བསྐུལ་གདངས་ཀྱི་ཐོག་ལས་འབད་ འབད་བའི་སྲོལ་ཡོདཔ་ཨིན།