16 Mar 2012
42 min 4 sec
Video Overview
Creators:
Mayuk Cultural Video Company, རྨ་ཡུལ་རིག་གནས་བརྙན་འཕྲིན་སྒྲིག་བཟོ་ཀུང་སི།, 玛域文化影视制作公司
Children games: This video was filmed in the villages of Daowei Township in Xunhua County. Most of the participants are students who had poor knowledge of the games, and thus they were trained by elders before being filmed.
- Dobi
- བཤད་མཁན་དང་པོ།ཞུན་ཧྭ་ས་ཆའི་བོད་ཁུལ་འདིར།
- སྔོན་ནས་མི་རིགས་རང་གི་ཁྱད་ཆོས་མ་ཡལ་བའི།
- དམངས་སྲོལ་རིག་གནས་ཀྱི་རྔམ་ཁ་མཐུག་པོ་ཞིག་ཆགས་ཡོད།
- ད་ལྟའི་འཛམ་གླིང་སྤྱིའི་འཕོ་འགྱུར་ཤུགས་དྲག་པའི་དུས་འདིར།
- དམངས་སྲོལ་རིག་གནས་མང་ཤོས་ཤིག་ཉམས་དམས་སུ་འགྲོ་བཞིན་པའི་སྐབས་འདིར།
- ས་ཁུལ་འདི་ཡང་དེ་ལས་མ་འདས་པར།
- དེ་སྔོན་དམངས་ཁྲོད་དུ་དར་ཁྱབ་ཆེ་བའི་བྱིས་པའི་རྩེད་མོའི་རྣམ་གྲངས་མི་ཉུང་བ་ཞིག
- ཉམས་རྒུད་དུ་སོང་དང་འགྲོ་མོས་སུ་མཆིས།
- བཤད་མཁན་གཉིས་པ།འདི་ལུག་གི་རྐང་བའི་ལྕག་རེད།
- འདིའི་མིང་ལ་ལྕག་ཟེར།
- ཐེ་གེ་ལྕག་གི་ཐོག་ན་མ་གཏོགས་ཡོད་པ་མ་རེད།
- འདི་ནི་ལྕག་རེད།
- ཐེ་གེ་འདི་ལྕག་གི་མགོ་ན་ཡོད་པ་རེད།
- རྐང་པ་གཉིས་ཀྱི་མགོ་ན་གཅིག་རེ་གཅིག་རེ་ཡོད་པ་རེད།
- ལག་པའི་སྟེང་དུ་ཡོད་པ་མ་རེད།
- ཐེ་གེ་འདི་འདྲ་བཞི་ཡོད་པ་རེད།
- འདི་ནི་རྟ་རེད།
- འདི་ལ་བོང་བུ་ཟེར་བ་རེད།
- འདི་ལ་ལུག་ཟེར་བ་རེད།
- འདི་ལ་ར་མ་ཟེར་བ་རེད།
- བཤད་ན་འདི་འདྲ་འདེད་རྒྱུ་ཡོད་པ་རེད།
- ཐེ་གེ་འདི་སྲོག་ཆགས་དྲུག་ལ་ངོས་འཛིན་བྱེད་པ་རེད།
- སྲོག་ཆགས་རིགས་འདྲ་གཉིས་རེ་རྒྱག་དགོས།
- དཔེ་བཞག་ན་འདི་ལྟར་བརྒྱབ་ན་གཅིག་ལེན་དགོས།
- འདི་ངས་བླངས་པ་རེད།
- འདི་ང་ལ་ཐོབ་སོང་བ་རེད།
- འདི་ལྟར་རྒྱག་དགོས།
- དེའི་རྗེས་ནས་འདི་ལུག་ཅིག་དང་ར་ཞིག་ཡིན་ན།
- རིགས་འདྲ་ཏག་ཏག་ཡིན་ན་འཕྲོག་རེས་བྱེད།
- ལུག་ཏག་ཏག་རེད།
- འདི་འཕྲོག་རེས་རེད།
- འཕྲོག་རེས་མི་གཅིག་པ་ཞིག་ཡོད།
- ཅི་ཞིག་རེད་ཟེར་ན་འདི་རིགས་འདྲ་ཏག་ཏག་རེད།
- མ་གཞི་ནས་སྣ་ཁ་མི་གཅིག་པ་ཐེ་གེ་བཞི་དང་གསུམ་གྱི་སྐབས་སུ་བྱུང་བ་རེད།
- བཤད་མཁན་དང་པོ།ཐེ་གེ་ནི་ར་ལུག་སོགས་སྲོག་ཆགས་ཀྱི་རྗེ་ངར་དང་།
- རྐང་མགོ་འདྲེས་མཚམས་ཀྱི་རུས་པ་རྡོག་པོ་དེ་ཡིན་ཞིང་།
- དེ་ཉིད་གཙང་མར་བཏོག་ཅིང་བརྡར་བ་ལས་རྩེད་ཆས་འདི་གྲུབ་ལ།
- དེ་ཡང་རུས་རྡོག་འདི་ལ་ཕྱོགས་དྲུག་ཡོད་པ་ལས།
- དེ་དག་རེ་རེ་བཞིན་སྲོག་ཆགས་རེ་ལ་ངོས་འཛིན་པ་སྟེ།
- དཀྱིལ་ཁུག་དུ་ལྷུང་བའི་ཕྱོགས་དེ་ནི་ར་དང་དེའི་ལྡོག་ཕྱོགས་ནི་ལུག
- འགྲམ་གཉིས་ལས་ངོས་སྙོམས་པོའི་ཕྱོགས་དེ་ནི་བོང་བུ་དང་།
- དེའི་ལྡོག་ཕྱོགས་ནི་རྟ།
- སྣེ་གཉིས་ལས་ཡར་འཁྱིལ་ཡོད་པ་ནི་སེང་གེ་དང་།
- དེའི་ལྡོག་ཕྱོགས་ནི་རྒང་ལ་ངོས་འཛིན་པ་རེད།
- འདིའི་རྩེད་སྟངས་ལ་རྒྱུན་མཐོང་གི་སྣ་ཁ་གཉིས་ཡོད་ལ།
- མང་རྒྱག་དང་ལྔ་རྒྱག་ཡིན།
- དེ་ཡང་མང་རྒྱག་ནི་ཐེ་གེ་སུམ་ཅུ་བཞི་བཅུ་འམ་དེ་ལས་མང་བ་ཅི་ཙམ་རྩེད་ཀྱང་རུང་བ་དང་།
- ལྔ་རྒྱག་ནི་ངེས་པར་དུ་ཐེ་གེ་ལྔ་རྒྱག་དགོས།
- འདི་རྩེད་མཁན་གྱི་མི་གྲངས་ལ་ཚོད་འཛིན་མེད་པར།
- ཉིན་གཉིས་ཀྱི་ཡན་ཆད་དུ་རྩེད་ན་ཡང་ཆོག
- སྒྲིག་སྲོལ་དང་གོ་རིམ་གྱི་ཐད་ནས།
- མང་རྒྱག་གི་སྐབས་ཚང་མས་ཐོག་མར་ཐེ་གེ་མང་པོའི་ཁྲོད་ནས།
- རང་ཉིད་ལ་རྟ་འབབ་ཅེས་ཐེ་གེ་རེ་བསལ་དགོས་ལ།
- དེ་ནི་མི་གང་རུང་ཞིག་གི་རྟ་འབབ་ཀྱི་ཐེ་གེ་དེ་དག་ས་ལ་གཏོར་རྗེས།
- དེ་ལས་སུ་ཞིག་གི་རྟ་འབབ་ལ་སྲོག་ཆགས་ལྟར་བབས་ཡོད་ན།
- དེ་ནི་ཐོག་མར་རྒྱག་མཁན་ཡིན་ལ།
- དེ་ནས་ཡང་དང་བསྐྱར་དུ་གཏོར་ནས།
- རྟ་བབས་པའི་སྔ་གཞུག་ལྟར་གོ་རིམ་གྱིས་རྒྱག་དགོས།
- རྒྱག་མཁན་གྱིས་ཐེ་གེ་མང་པོ་ས་ལ་གཏོར་བ་དང་།
- སྲོག་ཆགས་དྲུག་པོ་ལས་ཆ་འགྲིག་ཕན་ཚུན་རྒྱག་དགོས།
- སྤྱིར་བཏང་དུ་སེང་གེ་དང་རྒང་འབབ་པ་ཅུང་ཉུང་།
- སྲོག་ཆགས་ཆ་ཉིས་ཐུག་རྒྱག་པའི་སྐབས་ཐེ་གེ་གཞན་ལ་ཐུག་ན་མི་ཆོག་པ་དང་།
- དེ་གཉིས་ལས་གཅིག་ལེན་དགོས་ཤིང་།
- དེ་ནི་རང་ལ་ཐོབ་པར་བརྩི་བ་དང་།
- དེ་ལྟར་ལེན་པའི་ཚེ་ན་ཐེ་གེ་གཞན་པ་སྒུལ་ན་མི་ཆོག
- གལ་ཏེ་ཐུག་རྒྱག་པའི་སྐབས་དང་ལེན་པའི་སྐབས་སུ།
- དམིགས་བལྟས་ཀྱི་ཐེ་གེ་དེ་ལས་གཞན་པ་གང་རུང་ཞིག་སྒུལ་ན་སྒྲིག་སྲོལ་དང་འགལ་ནས།
- རྒྱག་མཁན་དེ་ཉིད་ཐེངས་དེར་རྒྱག་པའི་གོ་སྐབས་ཤོར་བར་རྩི།
- དེ་ལྟར་རེ་མོས་སུ་མི་རེ་རེས་ཐང་ལ་གཏོར་ཞིང་།
- མཐའ་མཇུག་སུས་བླངས་ཡོད་པའི་ཐེ་གེ་གྲངས་ཀ་མང་ན།
- དེ་ཉིད་རྒྱལ་བར་རྩི་བ་ཡིན།
- ལྔ་རྒྱག་གི་སྐབས་སུ།
- རྒྱག་མཁན་ཚོས་རྟ་འབབ་ཀྱི་གོ་རིམ་ལྟར་རྒྱག་དགོས་ཤིང་།
- རྒྱག་ཐེངས་གཅིག་གིས་ཐེ་གེ་ལྔ་བོ་ལེན་མ་ཐུབ་ན།
- ཐེངས་དེར་རྒྱག་མཁན་དེ་ཕམ་པར་རྩི་བ་ཡིན།
- གཞན་དུ་ན་འདིའི་རྩེད་སྲོལ་ཁྲོད་དུ་ཐང་ལ་གཏོར་རྗེས།
- ཐེ་གེ་ཚང་མ་སྲོག་ཆགས་རིགས་འདྲར་བབས་ཡོད་ན།
- དེའི་སྐབས་སུ་གཉིས་རེ་བྱས་ཏེ་ཐུག་རྒྱག་མི་དགོས་པར།
- ཐད་ཀར་རྒྱག་མཁན་ཚང་མས་ལག་ལ་འཐད་འཕྲོག་རེས་བྱེད་པས་ཆོག
- རྩེད་སྲོལ་འདིའི་ཁྲོད་རྒྱལ་བའི་ཕྱོགས་ཀྱིས་ཕམ་ཕྱོགས་ལ།
- ཐེ་གེ་མང་ཉུང་ལྟར་མཛུབ་རྡེག་བྱས་ཏེ་ཆད་པ་གཅོད་པ་ཡིན།
- ཐེ་བོ་རྩི་ཚུལ་འདི་ནི་ས་ཁུལ་གཞན་ན་ཡོད་པ་དང་ཕལ་ཆེར་འདྲ་ལ།
- ས་ཁུལ་འདི་ནས་ཐེ་བོ་འདི་ཕལ་ཆེར་བུ་མོ་རྣམས་ཀྱི་རྩེད་མོའི་རྣམ་གྲངས་ཞིག་ཡིན།
- རྩེད་ཆས་འདིའི་དབྱེ་བའི་ཐད་ནས་རྩིད་པ་དང་ར་སྤུ།
- བྱ་སྤུ་སོགས་རྒྱུ་ཆ་འདྲ་མིན་ལས་བཟོས་པའི་སྣ་ཁ་ཁ་ཤས་ཡོད་ལ།
- བཟོ་ཚུལ་ནི་བྱ་སྤུའམ་རྩིད་པ་ཆུན་པོ་ཞིག་དོང་ཙེ་བུ་ག་རེར་བརྒྱུས་ཤིང་།
- དེའི་དཀྱིལ་དུ་སྟག་པ་སོགས་ཤིང་སྲ་མོ་ཞིག་བསྡམས་ནས་སྲ་མོར་བསྡམས་རྗེས།
- རྐང་བས་རྩི་བ་ཡིན་ལ།
- དེ་ལ་རྩི་ཚུལ་གྱི་འགུལ་སྟངས་ཐད་བོད་རྩི་དང་རྒྱ་རྩི།
- ཧོར་རྩི་སོགས་ཡོད་པ་རེད།
- རྩེད་ཆས་འདི་མི་གཉིས་ཀྱིས་རྩེད་ཆོག་ལ།
- མི་མང་པོ་ཕྱོགས་གཉིས་སུ་བགོས་ནས་རྩེད་ཀྱང་ཆོག
- མཇུག་མཐར་ཕྱོགས་གང་གིས་རྩེད་པ་མང་ན་དེ་ཉིད་རྒྱལ་བར་རྩི་བ་ཡིན་ལ།
- རྒྱལ་ཕྱོགས་ལ་དཔོན་པོ་དང་ཕམ་ཕྱོགས་ལ་གླ་བ་ཟེར།
- གླ་བའི་ཆད་པ་ལ་དཔོན་པོ་གོམ་པ་བཅུ་ཙམ་གྱི་ས་ལ་འཁུར་བའམ།
- དཔོན་པོས་ཐེ་བོ་གནམ་ལ་འཕངས་ནས་རྐང་བའི་ཤུགས་ཀྱིས་རྒྱང་རིང་དུ་འཕེན་ལ།
- གླ་བས་དེ་ས་ལ་མ་ཐུག་པར་འཛིན་དགོས།
- ཆ་རྡེའུ་ཞེས་པ་ནི་རྡེའུ་ཡིས་གྲུབ་པའི་རྡོ་བའི་རྩེད་ཆས་རིགས་ཤིག་ཡིན་ཏེ།
- ད་ལྟའི་དུས་སུ་འདི་ནི་རྩེད་རྒྱུན་ཧ་ལམ་ཆད་པར་ཉེ།
- དེ་ནི་རྡེའུ་རིལ་རིལ་ལྔ་ཡིས་གྲུབ་པ་དང་།
- དེ་ལ་སྡེ་བ་ཁ་ཤས་ཀྱི་རྩེད་སྲོལ་མི་གཅིག་ན་ཡང་།
- སྤྱིར་བཏང་གི་འགུལ་སྟངས་ཕལ་ཆེར་མཚུངས་བར་རིག
- དེ་ཡང་རྡེའུ་གཅིག་གནམ་ལ་འཕངས་ཤིང་འཕྲོ་མ་བཞི་བོ་ས་ལ་གཏོར་ནས།
- རེ་རེ་བཞིན་ས་ནས་འཐུ་བ་ཡིན།
- གནམ་ལ་འཕངས་བ་དེའི་མིང་ལ་མགོ་རྡེའུ་ཟེར།
- མགོ་རྡེའུ་གནམ་ལ་འཕངས་ནས་ཐང་གི་རྡེའུ་གཅིག་རེ་གཅིག་རེ་བྱས་ཏེ་འཐུ་བ་ལ་ཁེར་ར་དང་།
- གཉིས་རེ་འཐུ་བ་ལ་ཉིས་ར།
- གསུམ་ཆ་གཅིག་ཏུ་བཏུས་ཤིང་གཅིག་གཞུག་ནས་འཐུ་བ་ལ་སུམ་ར།
- བཞི་བོ་མཉམ་གཅིག་ཏུ་འཐུ་བ་ལ་སྤར་ར།
- དེ་ནས་རྡེའུ་ལྔ་བོ་ལག་མཐིལ་ལ་བླངས་ནས་སེམས་ཆུང་གིས་གནམ་ལ་འཕངས་ཤིང་།
- མཛུབ་གུའི་སྟེང་དུ་བླངས་རྗེས་སླར་ཡང་སྤར་བར་འཛིན་པ་ལ་མགོ་ལེབ་ཟེར་ལ།
- དེ་ནས་མགོ་རྡེའུ་གནམ་ལ་འཕེལ་ཞོར་རྡེའུ་གཞན་པ་རེ་རེ་བཞིན།
- མཛུབ་ཆུང་དང་སུམ་མཛུབ་བར་ནས་ཐང་ལ་འཇོག་པ་ལ་གཏུག་གཏོང་།
- མགོ་རྡེའུ་གནམ་ལ་འཕངས་ཤིང་རྡེའུ་གསུམ་ཐང་ལ་བཞག་ནས།
- ལག་གི་རྡེའུ་དེ་བརྗེ་སྤོར་བྱེད་པ་ལ་རྡེའུ་སྤོར།
- ཐང་གི་རྡེའུ་རྣམས་མགོ་རྡེའུ་དང་མཉམ་དུ་ལེན་པ་ལ་འཁྱར་འཁྱོར།
- རྡེའུ་གསུམ་གྱི་ཐོག་ཏུ་རྡེའུ་གཅིག་སྒའི་ཚུལ་དུ་འཇོག་པ་ལ་སྒ་གཏོད་བཅས་ཟེར་ལ།ས
- གོ་རིམ་གཅིག་བརྒྱབ་ཚར་ན་ཕ་རོལ་བོར་སྒ་གཅིག་གཏད་པར་རྩི་ལ།
- སྒ་འཁུར་མཁན་གྱིས་སྒ་གཏོད་མཁན་གོམ་པ་བཅུ་ཙམ་ལ་འཁུར་བའམ།
- ཆ་རྡེའུ་ཡིས་ལག་པའི་ཚིགས་རུས་ཀྱི་སྟེང་དུ་རྒྱག་པ་སོགས་ཀྱ་ཆད་པ་གཅོད་དགོས།
- སྒྲིག་སྲོལ་འདི་ནི་རྒྱག་པའི་གོ་རིམ་ཁྲོད་དུ་མགོ་རྡེའུ་ཐང་ལ་ལྷུང་བའམ།
- རྡེའུ་ཐང་ནས་མ་ལོན་ན་ཤོར་སོང་བར་རྩི་བ་ཡིན།
- ཐིག་སྐུད་འདྲེན་པའི་རྩེད་སྲོལ་འདི་ནི།
- ཐིག་སྐུད་ཨ་ལོང་ཅན་ཞིག་མཛུབ་གུའི་མགོ་ནས་འདྲེན་ཚུལ་ཞིག་དང།
- རྩེད་མོ་འདི་ནི་མི་གཉིས་ཀྱིས་རྩེད་པ་ཡིན་ལ།
- དེ་ཡང་གཅིག་གི་མཛུབ་མགོ་ནས་གཅིག་གིས་བླངས་ཤིང་།
- རི་མོའི་དབྱིབས་སྣ་མང་གིས་འདྲེན་པ་ཞིག་ཡིན།
- དོན་དངོས་སུ་འདི་ནི་རིག་པའི་འགྲན་བསྡུར་ཞིག་ཀྱང་ཡིན་ནོ།
- རྩེད་སྲོལ་འདི་ནི་མི་དུ་རྩེད་ནའང་ཆོག་ལ།
- དེ་ཡང་རང་རང་གི་དོང་ཙེ་གྱང་ངོས་ལ་འཕངས་ནས།
- སུས་དེ་མར་འདྲུད་པ་ཐག་རིང་ན་དེས་རང་ཉིད་ཀྱི་དོང་ཙེ་ཡོད་སའི་གནས་དེ་ནས།
- དེས་འཁེལ་སོང་ན་ཞོལ་མ་དེའི་དོང་ཙེ་དེ་རང་ཉིད་ལ་ཐོབ་པར་རྩི་ལ།
- དེ་ནས་མུ་མཐུད་དུ་དེའི་ཞོལ་མའི་དོང་ཙེ་ལ་རྒྱག་དགོས།
- གལ་ཏེ་མ་འཁེལ་ན་གཞན་པའི་དོང་ཙེ་ལེན་མ་ཐུབ་པས།
- གོ་སྐབས་ཤོར་སོང་བར་རྩི་བ་ཡིན།
- འདི་ནི་དོན་དངོས་སུ་རྒྱུགས་རྩལ་འགྲན་པའི་རྩལ་སྦྱོང་གི་རྩེད་མོའི་རྣམ་གྲངས་ཤིག་སྟེ།
- དེར་འགྲོ་མཁན་དང་བདའ་མཁན་གཉིས་ཡོད་ལ།
- བདའ་རེས་མ་བྱས་གོང་ནས་འབྲོ་མཁན་དེ་ལ།
- མལ་ས་ཞེས་ངལ་གསོ་སའི་མལ་སྟན་གྱི་གནས་ཤིག་གཏན་འཁེལ་བྱས་ཡོད།
- དེ་ཡང་འབྲོ་མཁན་དེའི་ཁ་ནས་ཨ་་་ཞེས་སྐད་འདོན་བཞིན་འབྲོ་དགོས་ཤིང་།
- བདའ་མཁན་གྱིས་དབུགས་རིང་ཐེངས་གཅིག་ལ་ཟིན་པར་བྱེད་དགོས།
- གལ་ཏེ་འབྲོ་མཁན་ཐང་ཆད་པ་སོགས་བྱུང་ན།
- མྱུར་ཏུ་མལ་སར་ལོག་ནས་ངལ་གསོས་ཆོག་ལ།
- དེར་ཐོན་ལ་བདའ་མཁན་གྱིས་བཟུང་མི་ཆོག
- ངལ་གསོས་རྗེས་མུ་མཐུད་དུ་བདས་ཆོག
- དེ་ལྟར་མལ་སར་ཐེངས་གསུམ་ལོན་རག་བར་མ་ཟིན་ན།
- སྔོན་གྱི་བདའ་མཁན་བྲོས་ནས་འབྲོ་མཁན་གྱིས་བདའ་དགོས།
- བདའ་རེས་བྱེད་པའི་གོ་རིམ་ཁྲོད།
- འབྲོ་མཁན་གྱིས་ཨ་་་ཞེས་པའི་སྐད་ཆད་པའམ།
- བདའ་མཁན་གྱིས་བཟུང་ཐུབ་སོང་ན།
- དེའི་ཆད་པ་ལ་གོམ་པ་བཅུ་ཙམ་གྱི་ས་ལ་འཁུར་དགོས།
- རྩེད་སྲོལ་འདི་ནི་མི་དུ་རྩེད་ན་ཡང་ཆོག་པའི་རྩེད་མོའི་རྣམ་གྲངས་ཤིག་ཡིན་ཏེ།
- ཐོག་མར་རང་ཉིད་ཀྱི་སྐལ་ལ།
- སྟར་ཀ་ཞིག་ངེས་གཏན་གྱི་ས་ཞིག་ཏུ་འབེན་དུ་བརྩིངས་དགོས་ཤིང།
- དེ་ནས་གོམ་པ་བདུན་བརྒྱད་ཙམ་གྱི་ས་ནས།
- སྟར་ཀ་གཞན་ཞིག་གིས་འབེན་ལ་རྒྱག་དགོས།
- བརྩིངས་བྱའི་འབེན་གྱི་མདུན་གྱི་གོམ་པ་གཉིས་གསུམ་གྱི་ས་ན་བར་ཐག་ཅིག་ཡོད་པ་དང་།
- བརྩིངས་ཡོད་པའི་སྟར་ཀ་ལ་འབེན་དང་།
- རྒྱག་བྱེད་ཀྱི་སྟར་ཀ་དེའི་མིང་ལ་ཡོག་ཟེར།
- རྩེད་སྟངས་ལ་སྣ་ཁ་གཉིས་ཡོད་དེ།
- གཅིག་ནི་རྒྱག་མཁན་ཚང་མས་འབེན་ལ་རྒྱག་པ་དེར་བཀུམ་རྒྱོབ་ཟེར་བ་དང་།
- ཅིག་ཤོས་ནི་རྒྱག་མཁན་དང་པོ་དེས་འབེན་ལ་རྒྱག་དགོས་ཤིང་།
- གཞན་ཚང་མས་དེའི་འོག་ལ་རྒྱག་པ་ཞིག་དང་།
- དེར་ཀ་རྒྱོབ་ཟེར།
- བཀུམ་རྒྱོབ་ཀྱི་སྐབས་སུ་རྒྱག་མཁན་ཚོས་འབེན་རེ་རེར་བརྒྱབ་ནས་འཁེལ་སོང་ན།
- དེ་ནི་རང་ལ་ཐོབ་པར་རྩི་ལ།
- ཀ་རྒྱོབ་ཀྱི་སྐབས་སུ་རྒྱག་མཁན་དང་པོས་འབེན་ལ་རྒྱག་དགོས་ཤིང་།
- འཕྲོ་མ་དག་གིས་འབེན་ལ་མི་རྒྱག་པར་རྒྱག་མཁན་དང་པོའི་འོག་ལ་རྒྱག་དགོས་ལ།
- གལ་ཏེ་འཁེལ་སོང་ན་འབེན་ལ་བརྩིངས་ཡོད་པའི་སྟར་ཀ་ཚང་མ་རང་ལ་ཐོབ་པར་རྩི་བ་ཡིན།
- རྩེད་སྲོལ་འདི་ནི་མི་དུ་རྩེད་ན་ཡང་ཆོག་པའི་རྩེད་མོའི་རྣམ་གྲངས་ཤིག་ཡིན་ཏེ།
- ཐོག་མར་རང་ཉིད་ཀྱི་སྐལ་ལ།
- སྟར་ཀ་ཞིག་ངེས་གཏན་གྱི་ས་ཞིག་ཏུ་འབེན་དུ་བརྩིངས་དགོས་ཤིང།
- དེ་ནས་གོམ་པ་བདུན་བརྒྱད་ཙམ་གྱི་ས་ནས།
- སྟར་ཀ་གཞན་ཞིག་གིས་འབེན་ལ་རྒྱག་དགོས།
- བརྩིངས་བྱའི་འབེན་གྱི་མདུན་གྱི་གོམ་པ་གཉིས་གསུམ་གྱི་ས་ན་བར་ཐག་ཅིག་ཡོད་པ་དང་།
- བརྩིངས་ཡོད་པའི་སྟར་ཀ་ལ་འབེན་དང་།
- རྒྱག་བྱེད་ཀྱི་སྟར་ཀ་དེའི་མིང་ལ་ཡོག་ཟེར།
- རྩེད་སྟངས་ལ་སྣ་ཁ་གཉིས་ཡོད་དེ།
- གཅིག་ནི་རྒྱག་མཁན་ཚང་མས་འབེན་ལ་རྒྱག་པ་དེར་བཀུམ་རྒྱོབ་ཟེར་བ་དང་།
- ཅིག་ཤོས་ནི་རྒྱག་མཁན་དང་པོ་དེས་འབེན་ལ་རྒྱག་དགོས་ཤིང་།
- གཞན་ཚང་མས་དེའི་འོག་ལ་རྒྱག་པ་ཞིག་དང་།
- དེར་ཀ་རྒྱོབ་ཟེར།
- བཀུམ་རྒྱོབ་ཀྱི་སྐབས་སུ་རྒྱག་མཁན་ཚོས་འབེན་རེ་རེར་བརྒྱབ་ནས་འཁེལ་སོང་ན།
- དེ་ནི་རང་ལ་ཐོབ་པར་རྩི་ལ།
- ཀ་རྒྱོབ་ཀྱི་སྐབས་སུ་རྒྱག་མཁན་དང་པོས་འབེན་ལ་རྒྱག་དགོས་ཤིང་།
- འཕྲོ་མ་དག་གིས་འབེན་ལ་མི་རྒྱག་པར་རྒྱག་མཁན་དང་པོའི་འོག་ལ་རྒྱག་དགོས་ལ།
- གལ་ཏེ་འཁེལ་སོང་ན་འབེན་ལ་བརྩིངས་ཡོད་པའི་སྟར་ཀ་ཚང་མ་རང་ལ་ཐོབ་པར་རྩི་བ་ཡིན།
- རྩེད་མོའི་རྣམ་གྲངས་འདིར་མི་གྲངས་ཀྱི་ཚོད་འཛིན་མེད་པ་དེ།
- གལ་ཏེ་མི་ལྔ་དྲུག་ཙམ་གྱི་ཡན་ཡོད་ན་རྩེ་ཆོག་པ་ཡིན།
- རྩེད་མཁན་གྱི་མི་རྣམས་གོར་སྐོར་བྱས་ཏེ་ཐང་ལ་ཙོག་རྗེས།
- མི་ཞིག་གི་ལག་ཏུ་རྡོ་ཆུང་ཆུང་ཞིག་བཟུང་ནས།
- ཙོག་ཡོད་པའི་མི་རྣམས་ཀྱི་ཕྱི་རོལ་ནས་རྒྱུགས་ཤིང་།
- རྡོ་དེ་མི་ཞིག་གི་རྒྱབ་ལ་ཁ་རོག་གེར་བཞག་རྗེས་སྐོར་བ་བྱེད་ཞོར་འབྲོ་དགོས།
- རྡོ་ལྟག་རྒྱབ་ཏུ་བཞག་པའི་མི་དེ་འཇོག་མཁན་དེའི་རྗེས་དེད་ནས་བདའ་དགོས་ལ།
- གོར་སྐོར་ལ་སྐོར་བ་གསུམ་རྒྱག་རག་བར་མ་ཟིན་ན།
- བདའ་མཁན་གྱི་མི་དེ་གོར་མོའི་དཀྱིལ་དུ་ཡོང་ནས་རྩེད་རིགས་ཤིག་འཁྲབ་སྟོན་བྱེད་པའམ།
- དགོད་གཏམ་ཐུང་ངུ་ཞིག་ཤོད་པ་སོགས་གང་རུང་བྱེད་དགོས་པ་དང་།
- དེ་ནས་མུ་མཐུད་དུ་སྔར་བཞིན་རྩེད་མོ་སྤེལ་ཆོག
- དེ་ཡང་འཇོག་བྱའི་རྡོ་དེ་ཙོག་ཡོད་པའི་མིའི་རྒྱབ་ཏུ་བཞག་སྟེ།
- རྐེད་པ་རྡོ་འཇོག་ཅེས་ཟེར་བ་ཡིན།
- དེ་ཡང་རྩེད་མོ་འདིའི་ཁྲོད་མི་སྣ་ཁ་ཤས་ཡོད་པ་སྟེ།
- ཨ་ཁུ་སྤྱང་ཀི་དང་ཨ་མ་མ་མོ།
- ལུ་གུ་རྣམས་སོ།
- རྩེད་སྲོལ་ནི་ལུ་གུ་རྣམས་ཨ་མ་མ་མོའི་རྗེས་མཐུད་དེ་སྒྲིག་དགོས་ཤིང་།
- ཐོག་མར་སྤྱང་ཀིས་མི་མངོན་ས་ཞིག་ནས་ཨག་རིང་ཞིག་བརྒྱབ་པ་ན།
- མ་མོས་ལུ་གུ་རྣམས་ལ་ཨ་ཁུ་སྤྱང་ཀི་ཐོན་ཐལ།
- རེ་མ་ཙོག་ཅེས་བཤད་ཅིང།
- ཡང་སྤྱང་ཀིས་ཨག་རིང་ཞིག་བཏོན་པ་ན།
- མ་མོས་ལུ་གུ་རྣམས་ལ་ཨ་ཁུ་སྤྱང་ཀི་ཐོན་ཐལ།
- རེ་མ་ལོངས་ཞེས་བཤད།
- དེ་ནས་སྤྱང་ཀིས་མིག་གཅིག་བཙུམ་ཞིང་རྐང་བ་གྱོལ་བ།
- ཁ་ལ་མ་མོ་ཞིག་གི་རྐང་ཡས་ཞིག་ཟ་བཞིན་ལུག་ཁྱུའི་སྔོན་ལ་ཐོན་ཞིང་།
- ཨ་མ་མ་མོ་དང་ཁ་བརྡ་ཐུང་ཐུང་ཞིག་བྱེད་པ་ཡིན།
- དེ་ནས་སྤྱང་ཀི་མ་མོའི་གཡས་དང་གཡོན་ནས་རྒྱུགས་ཤིང་།
- ལུ་གུ་ཆེས་རྗེས་མ་འཛིན་ཐུབ་ཐུབ་བྱེད་ཅིང་།
- མ་མོས་ལུ་གུ་རྣམས་ལ་སྲུང་སྐྱོབ་བྱེད་ཆེད།
- ཅི་ཐུབ་ཀྱིས་སྤྱང་གི་འགོག་དགོས།
- དེ་ལྟར་སྤྱང་ཀིས་བཟུང་བའི་ལུ་གུ་རྣམས་ཀྱིས་འགྲམ་ཞིག་ནས།
- ཨ་ཁུ་སྤྱང་ཀི་མིག་ལ་བལྟས་ན་ཞར་བ་རེད།
- རྐང་བ་ཡ་གཅིག་གྱོལ་བོ་རེད།
- ཨ་ཁུ་སྤྱང་ཀི་་་ཤ་ཟས་ན་ནུས་མེད་པོ་ཞེས་སྡིག་དམོད་བྱེད་པ་དང་།
- ལུ་གུ་རྣམས་བཟུང་ཚར་རྗེས།
- ཨ་མའི་མགོ་ལ་སོ་འབྲེད་བྱེད་པ་ཞེས།
- སོ་རྟག་བྱེད་ཁུལ་བྱེད་པ་ཡིན།
- རྣམ་གྲངས་འདི་ཡང་རྩལ་སྦྱོང་གི་རྣམ་གྲངས་ཀྱི་ཁོངས་སུ་གཏོགས་ལ།
- དེང་སང་ད་རུང་ཉམས་དམས་སུ་སོང་མི་འདུག་སྟེ།
- ཐག་དུམ་ཞིག་གི་ཐོག་ནས་ལྡིང་བཞིན་རྩེད་པའི་རྩེད་མོའི་རྣམ་གྲངས་ཡིན།
- འདིའི་འགུལ་སྟངས་ཀྱི་ཐད་ནས་མི་གཅིག་རེ་ལྡིང་བ་དང་།
- གཉིས་རེ་ལྡིང་བ་སོགས་ཁ་ཤས་སུ་སྣང་མོད།
- རྩེད་སྲོལ་འདི་ནི་ཕལ་ཆེར་དེང་གི་ཐག་འཐེན་དང་འདྲ་ལ།
- དེ་ནི་གཙོ་བོ་ཤེད་ཤུགས་འགྲན་བསྡུར་བྱེད་པའི་རྩལ་སྦྱོང་གི་རྩེད་མོའི་རྣམ་གྲངས་ཤིག་ཡིན།
- ཐོག་མར་མི་གྲངས་མང་ཉུང་མེད་པར་ཁག་གཉིས་སུ་བགོས་རྗེས།
- ཕྱོགས་གཉིས་ཀའི་ཤེད་ཅན་རེ་རེ་ཁ་གཏད་དུ་ལངས་ནས།
- གཅིག་གཅིག་གི་སྐ་རགས་ཀྱི་སྲུབས་ལ་ལག་པ་བརྒྱབ་ཅིང་།
- གཞན་པ་ཚོས་དེ་གཉིས་ཀྱི་རྗེས་མཐུད་དེ།
- སྐ་རགས་སྲུབས་ལ་འཇུས་ནས་ཕྱོགས་གཉིས་སུ་འཐེན་དགོས།
- སུ་ཚང་ལ་ཤེད་མོ་ཆེ་ན་དེ་ཚང་གི་གྲལ་འགྲོ་ལ།
- ཐེངས་གསུམ་གྱི་རྗེས་ནས་རྒྱལ་ཕམ་གྱི་དབྱེ་བ་འབྱེད་ཐུབ།
- ཏ་ཏོ་ལོ་ཞེས་པའི་ཐ་སྙད་འདི་ནི་བོད་སྐད་རྣལ་མ་ཞིག་ཡིན་མིན་གྱི་རྡར་ཤ་གཅོད་དཀའ་ལ།
- སྡེ་བ་ཁ་ཤས་ཀྱི་ཨ་ཏོ་ལོ་ཡང་ཟེར།
- གང་ལྟར་ས་ཁུལ་འདིར་སྔོན་ཆད་ནས་དར་ཁྱབ་ཆེ་བའི་བྱིས་པའི་རྩེད་མོའི་རྣམ་གྲངས་ཤིག་ཡིན།
- དེ་ལ་དབྱེ་བ་ཁ་ཤས་ཡོད་ཅིང་འགུལ་སྟངས་ཕལ་ཆེར་རིགས་འདྲ་ཡིན།
- འདི་མི་གཉིས་དང་གསུམ།
- བཞི་སོགས་གང་རུང་གིས་རྩེད་ཆོག་པ་དང།
- རྩེད་སྲོལ་ནི་ཐང་ལ་རྟགས་བརྒྱབ་ནས་རྡོ་ལེབ་ཆུང་ཆུང་ཞིག་དྲ་མིག་དང་པོར་བཞག་ནས།
- རྐང་བ་ཡ་གཅིག་རྐུམ་ཞིང་།
- ཡ་གཅིག་གི་སྣེ་མོས་རྡོ་ལེབ་དེ་རིམ་གྱིས་དྲ་མིག་གཉིས་པ་དང།
- གསུམ་པར་རིམ་གྱིས་འདེད་པ་ཞིག་དང་དྲ་མིག་ཆེས་མཐོ་ཤོས་སུ་སླེབས་ན།
- ཡར་རྐུམ་པའི་རྐང་བ་དེ་མར་ཕབ་ཅིང་ཕྱིར་འཁོར་ཏེ།
- རྐང་སྣེ་ཅུང་ཤུགས་ཆེན་པོས་རྡོ་ལེབ་དེའི་ཞོལ་གྱི་དྲ་མིག་ཏུ་གཡུག་དགོས་པ་དང།
- དྲ་མིག་གང་ལ་བབས་ན་དེར་ངེས་གཏན་གྱི་མིང་རུས་དང་།
- འགུལ་སྟངས་འདྲ་མིན་རེ་རྩེད་རྒྱུ་ཡོད་པ་སྟེ།
- དྲ་མིག་སོ་སོའི་མིང་ནི་གཅིག་གོམ་པ།
- གཉིས་གཏུག་པ།
- གསུམ་རྐང་ཆག
- བཞི་ཞར་བ།
- ལྔ་ཨ་མ་བདའ་དང་རྟགས་ཀྱི་ཕྱི་རོལ་ལ་ཕྱིར་བགྲད།
- གལ་ཏེ་རྡོ་ལེབ་གཡུག་ནས་དྲ་མིག་དང་པོར་བབས་ན།
- ཐད་ཀར་གོམ་པ་སྤོས་ཏེ་ཡོང་ནས་རྡོ་ལེབ་བླངས་ཆོག་ལ།
- གཉིས་པ་བབས་ན་རྐང་སྣེ་གཅིག་ཐོག་གཅིག་ལ་རྩེག་ནས།
- གནམ་ལ་ལྡིང་བཞིན་ཡོང་ནས་རྡོ་ལེབ་ལེན་དགོས།
- གསུམ་པའི་སྐབས་སུ་རྐང་བ་གཅིག་རྒྱབ་ལ་རྐུམ་ཤིང་ལག་པས་བཟུང་རྗེས།
- ལྡིང་བཞིན་ཡོང་ནས་རྡོ་ལེན་དགོས།
- བཞི་བའི་སྐབས་སུ་མིག་བཙུམ་ཞིང་ལག་མྱོང་གིས་རྡོ་ལེབ་བླངས་རྗེས།
- ཞར་བའི་ཚུལ་དུ་གོམ་པ་རེ་རེ་སྤོས་ཏེ་དྲ་མིག་དང་པོའི་ཕྱི་ལ་འབུད་དགོས།
- དྲ་མིག་གི་ཕྱི་རོལ་དུ་གཡུག་ན་ཕྱིར་ནུར་གྱིས་འགྲོ་དགོས།
- རྩེད་མོའི་གོ་རིམ་ཁྲོད་རྐང་བའི་རྟགས་ཀྱི་ཐོག་ཏུ་སྤོས་པའམ།
- རྡོ་ལེབ་རྟགས་ནང་དུ་འཁེལ་བ་སོགས་བྱུང་ན་ཤོར་སོང་བར་རྩི་བ་ཡིན།
- རྩེད་མོའི་རྣམ་གྲངས་འདིར་ས་ཆ་ལ་ལས་ཁུར་ཡོད་སྣར་ཡོད་ཟེར་ཞིང་།
- མི་གཉིས་རེ་ཆ་རྡེབ་ནས་རྩེད་པའི་རྩེད་མོ་ཞིག་ཡིན།
- དེ་ནི་ངེས་གཏན་གྱི་ས་ཆ་ཞིག་ནས་ས་ཆ་གཞན་ཞིག་ལ་འཁུར་རེས་བྱེད་པ་ཡིན།
- རྩེད་མོ་འདིར་ཁུར་ཡོད་སྣར་ཡོད་ཟེར་དོན།
- མི་གཉིས་ཀྱིས་ཕན་ཚུན་འཁུར་རྗེས་སྣེ་གཅིག་ནས་ཕན་ཚུན་རྒྱབ་གཏད་ཅིང།
- ལག་གཉིས་གཅིག་གཅིག་ལ་སྣོལ་རྗེས།
- རེས་བཞག་རེས་ཁུར་གྱིས་འཁུར་རེས་བྱེད་པ་ཞིག་ཡིན།
- བོད་ཀྱི་ཡུལ་གྲུ་གཞན་དག་དང་འདྲ་བར།
- འགྱིག་འདེད་པ་ནི་ཞུན་ཧྭ་ས་ཆའི་བོད་ཁུལ་གྱི།
- སྲོལ་རྒྱུན་གྱི་རྩེད་མོའི་རྣམ་གྲངས་ཤིག་ཡིན་པར་མ་ཟད།
- ཕོ་མོ་རྒན་གཞོན་ཀུན་གྱིས་འགྱིག་གི་རིགས་སྣ་ཚོགས་འདེད་ཤེས་ཤིང་།
- དེ་འདེད་པར་ཧ་ཅང་དགའ་ཞིང་དུངས།
- འགྱིག་ལ་མཚོན་ལ་དུས་བཞིའི་ཁྱད་པར་མེད་ལ་ཡུལ་གྱི་ཚད་བཀག་ཡང་མེད་པར།
- དབྱར་དགུན་སྟོན་དཔྱིད་གང་ཡིན་རུང་།
- གང་ལྟར་ཡུལ་མི་ཚོར་ཁོམ་པ་རེ་ཡོད་ཚེ།
- ལུག་རྗེས་ཟོག་རྗེས་ཡིན་ན་འདྲ།
- ཞིང་ཁ་ཆུ་ཁ་ཡིན་ནའང་འདྲ།
- སྡེ་བར་རུ་བར་ཡིན་ནའང་འདྲ།
- འགྱིག་པ་ཕན་ཚུན་འཛོམས་ཏེ་ཐང་ངོས་སྙོམ་པོ་ཞིག་ལ་འགྱིག་བྲིས་ཏེ།
- རྡེའུ་དཀར་རྡེའུ་ནག་གམ།
- ཡང་ན་རིལ་མ་ཤིང་དུམ་སོགས་གང་རུང་ཞིག་བཏུས་ཏེ།
- འགྱིག་གི་མཐའ་ནས་གོར་སྐོར་རིལ་བུ་འདྲ་ཞིག་ཙོག་སྟེ།
- འགྲོ་སྔ་བརྩད་དེ་འགྱིག་འདེད་པར་བྱས་ཤིང་།
- གལ་ཏེ་འགྱིག་དེད་དེ་རྟིང་ལ་སོང་ཚེ།
- ཉི་མ་ཡང་གང་ནས་ཤར་ཏེ་གང་ལ་ནུབ་པ་ཡང་མི་ཤེས་པའི་ཚོད་ལ་སླེབས་ནས།
- འགྱིག་དེད་དེ་རྒྱལ་ཕམ་གྱི་དབྱེ་བ་རྩོད་པ་ནི་འགྱིག་གི་ཆེས་ཉམས་མཚར་ཞིང་།
- ཡིད་སེམས་ཅིག་ཅར་དྲངས་ཐུབ་པའི་གྲུབ་ཆ་གཙོ་བོ་ཡིན་ལ།
- དེའི་ནང་འགྱིག་པ་ཕན་ཚུན་གྱི་རིག་པའི་རྩལ་དང་སྤོབས་པའི་བློ་འདུས་པར་མ་ཟད།
- གཞན་ཁོག་དབང་ལ་རྒྱ།
- བག་ཡོད་དང་ངོ་ཚ་སོགས་ཀྱང་འདུས་པས།
- གལ་ཏེ་དེ་རིང་འགྱིག་དེད་དེ་འགྱིག་པ་ཁ་ཅིག་ཕམ་སོང་བ་ཡིན་ན།
- ཕྱི་ཉིན་མུ་མཐུད་དུ་རྒྱལ་ཕམ་རྩོད་པའི་དཔེ་ཡོད་ལ།
- ཉིན་མོ་རྒྱལ་ཕམ་གྱི་དབྱེ་བ་བརྩད་དེ་མ་ཆོད་ན།
- དགོང་མོ་ཚ་ཐབ་ཐོག་གི་གདན་ཕྱིས་ཤིང་།
- དེའི་སྟེང་འགྱིག་བྲིས་ཏེ།
- ནམ་ལངས་རག་བར་དུ་འགྱིག་འདེད་པའི་སྣང་ཚུལ་ཡང་མང་དུ་ཡོད།
- སྤྱིར་ཞུན་ཧྭའི་བོད་ཁུལ་དུ་དར་བའི་འགྱིག་གི་རྣམ་གྲངས་ལ།
- ནུར་འགྱིག་དང་བཙུར་འགྱིག་སོགས་འགྱིག་གི་རིགས་མི་འདྲ་བ་སྣ་ཚོགས་ཡོད་མོད།
- ད་ལྟ་ས་ཆ་མང་ཆེ་བ་ན།
- ནུར་འགྱིག་གི་རིགས་འདི་འདེད་པ་ཧ་ཅང་དར་ཁྱབ་ཆེ།
- གཞན་ཡང་འགྱིག་གི་དཀའ་སླའམ་ཡང་ན་རིག་པའི་རྩལ་གྱི་ཆེ་ཆུང་གི་ཐད་ནས་ཀྱང་།
- འགྱིག་ལ་དར་མའི་འགྱིག་དང་བྱིས་པའི་འགྱིག་གཉིས་སུ་བགར་ཆོག་སྙམ།
- བྱིས་འགྱིག་ཕལ་ཆེ་བ་སྤྱིར་བཏང་དུ་བཙུར་འགྱིག་གི་རིགས་སུ་གཏོགས་ལ།
- ནུར་འགྱིག་དང་བཙུར་འགྱིག་སོགས་དར་མའི་འགྱིག་དང་བསྡུར་ན།
- བྱིས་འགྱིག་ལ་གཅིག་ནས་འགྱིག་རྡེའུ་ཉུང་ཞིང་།
- གཉིས་ནས་འདེད་ཐབས་སླ་བ་སོགས་ཀྱི་ཁྱད་ཆོས་མང་དུ་འདུག་པས།
- བྱིས་པ་ཚོའི་རིག་པའི་བློ་ཁ་དང་ཧ་ཅང་འཚམས་ལ།
- བྱིས་པ་ཚོས་ཀྱང་ཁོམ་པ་དང་གོ་སྐབས་རེ་ཡོད་ཚེ།
- རང་དང་ན་ཚོད་རན་པའི་རྩེད་རོགས་སྐོར་དང་སྐོར་བྱས་ཏེ།
- འགྱིག་རྩལ་འགྲན་བཞིན་ཡོད་ལ།
- དོན་ངོ་མས་བཤད་ན།
- དེ་ནི་འགྱིག་དེད་དེརྩེད་ཁ་དགོད་ཁ་སློང་བ་ཙམ་མ་ཡིན་པར།ས
- འགྱིག་འདེད་པ་ནི་བྱིས་པའི་བློ་རྩལ་སྦྱོང་བྱེད་ཀྱི་ཐབས་ལམ་དགའ་ཞིག་ཡིན་ལ།
- དེས་བྱིས་པའི་བློ་ཡི་སྒོ་མོ་ཕྱེ་སྟེ།
- རིག་པའི་རྟ་རྒོད་གློག་དམར་འཁྱུག་འཁྱུག་དང།
- ཁ་ཡི་སྒོ་མོ་འབྲུག་སྒྲ་ལྡིར་ལྡིར།
- སྤོབས་པའི་བོང་ཁ་ཐོག་ཆེན་འཕེན་འཕེན་འདྲ་བྱས་ནས།
- མདོར་ན་འགྱིག་ནི་བྱིས་པའམ་དར་མའི་རིག་པ་འགྲན་པའི།
- དམངས་ཁྲོད་ཀྱི་རོལ་རྩེད་ཁྱད་པར་བ་ཞིག་རེད།
Loading ... Collection:
Subcollection
- Games in Tibet
Subject
- Children's Games
- Games in Tibet
Referenced Places
- Dobi
Recording Location
- Dobi
Language
- Amdo Group
Terms
- བྱིས་པ
- གླུ་གར་རྩེད་མོ
- རྩེད་མོ
Related Media:
Producer:
Mayuk Cultural Video Company
Producer:
རྨ་ཡུལ་རིག་གནས་བརྙན་འཕྲིན་སྒྲིག་བཟོ་ཀུང་སི།
Producer:
玛域文化影视制作公司
Editor:
Daglha Gyal
Editor:
སྟག་ལྷ་རྒྱལ།
Editor:
斗拉加
Director:
Lhugyal
Director:
ཀླུ་རྒྱལ།
Director:
李加
Other:
Tsering Bum
Other:
ཚེ་རིང་འབུམ།
Other:
才让本
Contributing Transcriber:
Kalwang
Distributor:
Friends of Rural Community Development
Distributor:
乡村之友发展协会
Distributor:
གྲོང་གསེབ་འཕེལ་རྒྱས་སྐུལ་འདེད་ཚོགས་པ།
Publisher:
Tibetan and Himalayan Library
Data Entry:
Copyright Owner:
Friends of Rural Community Development
Year Published:
2011
Visibility:
Public - accessible to all site users
Shanti AV Id:
1734
