08 Mar 2012
41 min 9 sec
Video Overview
Creators:
Mayuk Cultural Video Company, རྨ་ཡུལ་རིག་གནས་བརྙན་འཕྲིན་སྒྲིག་བཟོ་ཀུང་སི།, 玛域文化影视制作公司
Tibetan new year festival, mainly filmed in Muhong Tibetan Village, Daowei Township, and Xunhua County. Some other villages also made some contributions to this film.
- བཤད་མཁན་དང་པོ།མདོ་སྨད་ཡུལ་གྱི་ས་ཆ་མང་ཆེ་ཤོས་ཀྱི་ལོ་གསར་ནི།
- ལུགས་རྙིང་གི་ཟླ་དང་པོའི་ཚེས་གཅིག་ཉིན་གཏོང་བ་ཡིན་ལ།
- ཞུན་ཧྭ་ས་ཁུལ་གྱི་ལོ་གསར་གཏོང་བའི་དུས་ཚོད་ཀྱང་དེ་བཞིན་ཡིན།
- འདིར་ཡོངས་ཁྱབ་ཏུ་རྒྱ་ལོ་ཚེས་གཅིག་གམ་རྒྱ་ལོ་ཚེས་མགོ་ཡང་ཟེར་བ་ཡིན།
- སྤྱིར་བཏང་དུ་ཞུན་ཧྭ་བོད་ཁུལ་ནས།
- ལུགས་རྙིང་གི་ཟླ་བ་བཅུ་གཉིས་པ་ནས་ལོ་གསར་ལ་གྲ་སྒྲིག་བྱེད་པ་ཡིན།
- དེ་དུས་ཞིང་ཁར་ལུད་སྐྱེལ་བ་དང་བུད་ཤིང་འཐུ་བ་སོགས་ཀྱི།
- ལས་ཀ་ཡོངས་རྫོགས་སྒྲུབ་ཚར་ཡོད་པས་ལོ་གསར་སྐོར་གྱི་གྲ་སྒྲིག་བྱེད་པ་ཡིན་ཏེ།
- ཐོག་མར་ཧོར་ཟླ་བཅུ་གཉིས་པའི་ཚེས་བརྒྱད་ཀྱི་དུས་ཆེན་འདི་རོལ་བ་ཡིན།
- འདི་ནི་རང་རེའི་ལུགས་སྲོལ་ཞིག་ཏུ་མ་ངེས་ཀྱང་ས་ཁུལ་འདི་ནས་གནའ་ནས་རོལ་བར་བྱེད།
- དེ་ནས་ཟླ་འདི་ནི་ལོ་གཅིག་གི་ཟླ་ཆེས་ཐ་མ་ཡིན་པས།
- འདིའི་ནང་སྐུ་རིམ་ཡོངས་རྫོགས་འགྲུབ་དགོས་ཏེ།
- དཔེར་ན་ཚེས་ལྔ་ནས་བཟུང་བོད་ལོ་བསྐང་བ་ཞེས་མགོ་འཛིན་པ་སྟེ།
- སྔར་སྲོལ་ལྟར་ན་ཁྱིམ་ཚང་རེ་ནས་དགེ་འདུན་པ་བཞི་ཙམ་གྱིས།
- ཉིན་གསུམ་ལ་འདོན་པ་ཡིན་ཞིང་།
- དེ་འདོན་མཁན་ལ་བསྐང་འདོན་ཨ་ཁུ་ཟེར།
- བསྐང་བ་བཏོན་ཚར་རྗེས།
- དགོན་སྡེ་སོ་སོ་ནས་བོད་ལོ་སྐུ་རིམ་སྒྲུབ་པ་ཡིན་ཏེ།
- དེ་ནི་ཚེས་ཉེར་ལྔ་ནས་ཉེར་དགུ་བར་ཡིན།
- གཞན་ཡང་སིལ་ཏོག་གྲ་སྒྲིག་གི་སྐོར་ལ།
- ལོ་གསར་སྒྲིག་པ་ཞེས་ལོ་གསར་རོལ་བར་མཁོ་བའི་དངོས་ཟུང་ཉོ་བྱང་གྲ་སྒྲིག་བྱེད།
- བསྐང་བ་བཏོན་ཚར་རྗེས་ཀྱི་ཚེས་བཅུ་དགུ་ཉིན་ནི།
- དུ་ཕྱག་བྱས།
- ཁང་བ་ཡོད་ཚད་ལ་གད་བདར་དང་གཙང་སྦྲ་བྱེད་པའི་ཉིན་མོ་ཡིན།
- དེའི་དགོང་མོར་དཀར་ཉོག་ཅེས་པའི་ཉོག་ཅིག་ཀྱང་ཡོད་པ་ཡིན།
- བཤད་མཁན་གཉིས་པ།ཁུར་ནས་ཡོང་ཡོད།
- བཤད་མཁན་གསུམ་པ།ཡ་་་དེ་ནས་ཞོག་དང་།
- བཤད་མཁན་དང་པོ།ཚེས་ཉེར་ལྔ་ཉིན་བ་ཚའི་ཐབ་ཀ་བཤིག་ལ།
- ཚེས་ཉེར་དྲུག་དང་ཉེར་བདུན་ལ་གོ་དམར་བཙོ་བ་དང་ཚོད་མ་བཅའ་བ།
- བྱིས་པ་རྣམས་ཕྱེ་གདལ་དུ་སོང་ནས་ལོ་གསར་གྱི་ཐུག་པ་གྲ་སྒྲིག་བྱེད་པ་ཡིན།
- སྐྱེས་པ་རྣམས་ཀྱིས་ཁང་བའི་དྲ་མ་རྣམས་ཤོག་བུ་དཀར་སེར་དམར་སྔོ་སོགས་ཀྱིས།
- པ་ཏྲ་དང་བཀྲ་ཤིས་རྟགས་བརྒྱད།
- མཆོད་རྟེན་དང་ལོ་སྐོར་བཅུ་གཉིས།
- དུང་དཀར་གཡས་འཁྱིལ།
- ནོར་བུ་མེ་འབར།
- སྟག་སེང་ཁྱུང་འབྲུག་དང་རི་དྭགས་གཅན་གཟན་སྣ་ཚོགས།
- སིལ་ཏོག་སྣ་མང་གི་གཟུགས་ཀྱི་རི་མོར་བྲིས་ཏེ།
- བརྒྱན་ཞིང་ལེགས་པར་སྦྱོར་བ་ཡིན།
- ཚེས་ཉེར་བརྒྱད་དང་ཉེར་དགུ་ཉིན།
- སྐྱེས་པ་རྣམས་ཀྱིས་འཁྱགས་རིལ་ཏུ་གྱུར་བའི་ཤ་རྣམས་ཕྱིར་ཕྱུང་སྟེ།
- ཉི་མར་སྐེམ་ཞིང་སིལ་བུར་གཏུབ་སྟེ་བཙོ་རྐྱང་བྱེད་པ་དང་།
- ཐ་ན་བུད་ཤིང་ལ་སོགས་ཀྱང་གཏུབ་སྟེ་གྲ་སྒྲིག་བྱེད་ལ།
- རྒན་པ་རྣམས་ཀྱིས་ལོ་གསར་སྐབས་སུ་བཀོལ་རྒྱུའི་བསང་རྩི་དང་བསང་ཤིང་།
- བསང་རྫས་རིལ་བུ་རྣམས་ཕུན་སུམ་ཚོགས་པར་གྲ་སྒྲིག་བྱེད་པ་ཡིན།
- གཞན་ཡང་ཚེས་ཉེར་དགུ་ཉིན།
- གདན་དཀྲུག་ཅེས་ཁྱིམ་ནང་གི་སྟན་རྣམས་ཕྱི་རུ་ཕྱུང་སྟེ།
- གྲམ་པའི་དར་ཐོག་ནས་གཙང་མར་དཀྲུག་པ་ཡིན།
- ཚེས་སུམ་ཅུའམ་གནམ་གང་ཉིན།
- བྱིས་པ་རྣམས་ཀྱིས་སྔོན་ལ་ས་དམར་སླེ་བོ་ཕྱེད་ཙམ་ཁུར་ཡོང་སྟེ།
- གོར་གོར་དབྱིབས་ཀྱི་ལེབ་མོ་གཉིས་བརྫིས་རྗེས།
- དེའི་ཐོག་ཏུ་སུ་རུ་གཙོ་བྱེད་པའི་ཐང་ལོ་དང་ཤུག་པ།
- བདུག་སྤོས་སོགས་བཙུགས་ཤིང།
- དེར་མར་ཁུ་ཟ་སྣུམ་སོགས་བླུགས་ནས་འབར་སླ་བར་བྱས་ཏེ་འཇོག་ལ།
- དེ་ལ་ལོ་ཟེར།
- འདིར་ཁྱིམ་ཚང་ཁ་ཤས་ཀྱིས་ས་དམར་གྱི་ཚབ་ཏུ་ནས་ཕྱེ་དང་ཕྱེ་བརྩི་ཞིང་།
- སུ་རུའི་ཚབ་ཏུ་ཙི་ཏོ་འཛུགས་པ་ཡང་ཡོད།
- དེ་ནས་ཉེ་འཁོར་གྱི་སྡོང་ར་སོགས་ལས།
- ཚེར་སྐྱ་དབྱིབས་ལེགས་པ་རེ་བཅག་ཡོང་སྟེ།
- ཐོག་ཏུ་ཙོ་རིལ་དང་དཀར་སེར་དམར་སྔོ་ཡི་ཀ་ར།
- སིལ་ཏོག་སྣ་ཚོགས་དང་སིང་བལ།
- ཤོར་སྒོར་གསར་བ་སོགས་བཏགས་ནས་ཁྱིམ་གྱི་དཀྱིལ་ཀ་དང་།
- ཡང་ན་ཀ་ཞིག་གི་སྟེང་དུ་འགེལ་བ་དང་།
- དེར་ཙོ་སྡོང་ཟེར།
- བཤད་མཁན་བཞི་བ།ད་ཁྱེར་ཤོག་དང་།
- བཤད་མཁན་དང་པོ།གནམ་གང་ཉིན་ཁྱིམ་གྱི་སྒོ་ལྷས་རྣམས་གཙང་མ་ཕྱགས་ཤིང་།
- སྣོད་ཅ་ལག་རྣམས་ལ་ཕྱི་བདོར་ལེགས་པར་བྱས།
- གནམ་གང་གི་ཕྱི་དྲོ་ནས་བཟུང་སྟེ།
- སྔ་ཉིན་ཉི་མར་སྐེམ་པའི་ཤ་དང་རུས་པ་རྣམས་ཐབ་ལ་འཕངས་ཤིང་གདུ་བར་བྱེད་པ་དང།
- ཕྱི་ན་ཡོད་པའི་སྒོ་ཟོག་ཡོད་ཚད་ཁྱིམ་ནང་གི་ལྷས་རར་འཇུག་པ་ཡིན།
- གཞན་ཡང་ཟླ་འདིའི་ནང་སྡེ་བ་སོ་སོའི་ན་གཞོན་རྣམས་ཀྱིས།
- ལོ་གསར་སྐབས་སུ་འཁྲབ་སྟོན་བྱེད་རྒྱུའི་རྣམ་ཐར་དང།
- རིག་རྩལ་སོགས་ཀྱི་སྦྱོང་བརྡར་གྱི་ལས་ལ་བྲེལ་བཞིན་ཡོད།
- གཞན་ཡང་ཚེས་ཉེར་དགུ་དང་གནམ་གང་གི་ཉིན་འདི་ལ།
- ཁྱིམ་བདག་གིས་བྱིས་པ་ཚོ་མངགས་ཏེ།
- རང་གི་དགོན་པ་གྲྭ་ཚང་ནང་གི་ཨ་མཆོད་དང་གྲྭ་བ་རྣམས་ལ་ལོ་གསར་སྐྱེལ་བ་རེད།
- བཤད་མཁན་ལྔ་བ།ཨ་ཁུ་་་ངས་ཁྱོད་ལ་ལོ་གསར་ཁྱེར་ཡོང་ཡོད།
- བཤད་མཁན་དང་པོ།གཞན་ཡང་སྡེ་བའི་ནང་གི་ཁྱིམ་ཚང་སུ་ཚང་ལ་མཛོ་མོ་བཞོ་རྒྱུ་མེད་ན།
- དེ་ཚང་ལ་འོ་མ་ཁྱེར་བ་ཡིན།
- ཁྱིམ་ཚང་དེ་ཚོས་ཀྱང་འོ་མ་ཁྱེར་ཡོང་བའི་བྱིས་པ་དེ་ཚོས་ཀྱི་སྣོད་ཀྱི་ནང་དུ།
- ཀ་ར་སིལ་ཏོག་སོགས་བཞག་སྟེ།
- སྣོད་སྟོང་བ་ཕྱིར་ཁྱེར་དུ་མི་འཇུག
- འདི་ནི་རྟགས་དང་རྟེན་འབྲེལ་ལ་བརྟག་རྒྱུར་དགའ་བའི།
- བོད་མི་ཚོའི་རང་གཤིས་ཤིག་ཏུ་ཆགས་འདུག
- གྲ་སྒྲིག་དེ་དག་ཡོངས་སུ་འགྲུབ་རྗེས།
- གནམ་གང་གི་དགོང་མོ་ནས་བཟུང་སྟེ་ལོ་གསར་གཏོང་བའི་མགོ་ཚུགས་པ་ཡིན།
- དགོང་མོའི་ས་རུབ་མ་རུབ་ཀྱི་མཚམས་སུ།
- ཐབ་ཀྱི་ཤ་དང་རུས་པ་རྣམས་བླངས་ཏེ་ཟ་བར་བྱེད་ཅིང་།
- གནམ་གང་གི་དགོང་མོ་ནི་ལོ་གཅིག་གི་ཆེས་མཇུག་མཐའི་དགོང་མོ་ཡིན་པས།
- སྒོ་ཟོག་ཡོད་ཚད་ནང་དུ་བཅུག་རྗེས།
- ལོ་གསར་གྱི་སྐལ་ཞེས་གོ་དམར་སོགས་ཚིམ་པར་སྟེར་བ་ཡིན།
- ཁྱིམ་མི་ཡོངས་ཀྱིས་ཤ་ཟོས་ཤིང་ཐུག་པ་འཐུང་ཚར་རྗེས།
- ཡུལ་འདིའི་ས་ཆ་ཁ་ཤས་སུ་ལོ་སྐྱེལ་བ་ཞེས་པའི་སྲོལ་ཞིག་ཡོད་དེ།
- དེ་ནི་གོང་དུ་བཤད་པའི་ས་དམར་གྱི་གོར་གོར་དབྱིབས་ཀྱི་ལེབ་མོ་ཞིག་ལས་པའི།
- ལོ་ཞེས་པ་དེར་ཁྱིམ་གྱི་ལོ་ན་རྒན་པ་ཞིག་གིས་མེ་སྦར་བ་དང་།
- ལོ་དེའི་ལོ་མཇུག་སྐྱིད་པའི་བཀྲ་ཤིས་ཁ་གཡེང་དང་མཉམ་དུ།
- གྲུ་ལ་གཡས་སྐོར་བརྒྱབ་སྟེ་སྒོར་སྐྱེལ་ལ།
- ཁྱིམ་མི་གང་བོས་གསོལ་བ་འདེབས་པ་དང་།
- ཁ་ཏོན་འདོན་བཞིན་བྱིས་པ་དང་སྐྱེས་པ་རྣམས་ཀྱིས་ཤོག་སྦག་རྒྱག་པ་ཡིན།
- དེ་ལ་ལོ་སྐྱེལ་བ་ཟེར་ཏེ།
- ལོ་རྙིང་བའི་མཇུག་བསྡུ་བའི་མཚོན་རྟགས་ཡིན།
- དེ་རྗེས་སྣོད་ཅ་ལག་ཚང་མ་དག་གཙང་གང་ལེགས་བྱེད་པ་དང་།
- སྐྱེས་མ་རྣམས་ཀྱིས་ཕྱེ་བརྫིས་ཏེ།
- ཕྱི་ཉིན་སྔ་མོའི་གོ་རེ་ཆུ་བརྫིས་བཅའ་བ་དང་།
- གྲོ་མ་འབྲས་བསིལ་བཅའ་བ།
- མར་ཁུ་བཞུ་བ་སོགས་ཀྱི་གྲ་སྒྲིག་བྱེད་པ་ཡིན།
- ཁྱིམ་བདག་གིས་ལྷ་མདུན་མཆོད་མདུན་དུ།
- སིལ་ཏོག་དང་ཀ་ར་སོགས་མཆོད་བཤམ་རྒྱ་ཆེར་བྱེད་པ་དང།
- སྔ་མོ་ནས་གྲ་སྒྲིག་བྱས་ཡོད་པའི།
- བྱིས་པའི་ལོ་སློང་བྱེད་ཀྱི་ཙོ་ཁུ་དང་།
- བཟའ་མི་ཚོར་ཉོས་ཡོད་པའི་གོས་དང་ལྷམ་རྣམས་ཕྱིར་བླངས་ཏེ།
- ཚེས་གཅིག་སྔ་མོའི་གེ་སེར་གྱོན་པ་ལ་གྲ་སྒྲིག་བྱེད་པ་ཡིན།
- གསར་བུ་རྣམས་ཀྱིས་ཕྱི་ཉིན་སྔ་མོར་རི་བསང་ཕུད་དུ་འགྲོ་བར།
- བསང་རྩི་དང་བསང་ཤིང་།
- རི་མཐོ་སར་རྒྱག་རྒྱའི་དར་ལྕོག་སོགས་གྲ་སྒྲིག་བྱེད།
- བྱིས་པ་ཚོས་ཅོག་ཙེ་ཐོག་ཏུ་སྡེར་ཁ་སྒྲིག་པ་ཡིན།
- གནམ་གང་གི་དགོང་མོའི་ཆུ་ཚོད་བཅུ་གཉིས་ཡོལ་བ་ན།
- བཟང་ཚང་གང་བོ་མལ་ལས་ལངས་ཏེ།
- ཀ་ར་སིལ་ཏོག་དང་ཤ་མར་ཚོད་མ་སོགས་ཀྱི་སྡེར་ཁ་ལེགས་པར་སྒྲིག
- ཕོ་གཞོན་ཚོས་བསང་ཤིང་དང་བསང་རྩི།
- བསང་ཆང་། བསང་རྫས་རིལ་བུ།
- རླུང་རྟ། རྒྱལ་མཚན་རྩེ་མོའི་དར་ལྕོག་སོགས་བཟུང་ནས།
- རི་མཐོ་སར་བསང་ཕུད་པ་དང་དར་ལྕོག་རྒྱག་ཏུ་འགྲོ་ལ།
- དེ་ལས་ཕྱིར་ཡོང་རྗེས་ཡུལ་གྱི་ཁང་སྟེང་ནས་བསང་ཕུད་ཅིང།
- དེ་ནས་མི་ཎི་ཁང་དུ་བསང་ཕུད་པར་འགྲོ།
- བསང་ཕུད་ཅིང་ནང་ལས་སྒྲུབ་ཚར་རྗེས།
- བཟའ་མི་གང་བོས་ཤ་མར་ཇ་ཆང་དང་གྲོ་མ་འབྲས་བསིལ།
- གོ་རེ་ཚོད་མ་ཚོགས་ཟས་མཆོག་ཅི་ལྡན་ལ་རོལ་བ་དང།
- གླུ་གར་རྩེད་མོ་བྱས་ཏེ་གནམ་ལོ་གསར་བ་བསུ།
- དེ་ནས་ཆུང་བ་རྣམས་ཀྱིས་ཆེ་བ་རྣམས་ལ་ཚེ་ཐག་རིང་བའི་སྨོན་ལམ་འདེབས་ཞོར།
- ཕྱག་འཚལ་ནས་གོང་དུ་བཀུར་བ་དང་།
- ཆེ་བ་ཚོའི་ཁ་ནས་ད་ཚེ་རིང་ལོ་བརྒྱ་ཐོབ།
- ཁ་ལས་དགེ་རླུང་རྟ་དར་ཞེས་པ་སོགས་ཀྱི་ཁ་གཡེང་འབོད་ཅིང་།
- ལོ་གསར་གྱི་ལེགས་སྐྱེས་སྟེར་བ་ཡིན།
- དེ་ལ་ལོ་སྟེར་བ་ཡང་ཟེར།
- ངོ་ཚོ་བོད་རིགས་ནི་རྟགས་དང་རྟེན་འབྲེལ་གྱི་བདག་པོ་ཡིན་པས།
- དཀར་ཡོལ་སོགས་སེམས་ཆུང་གིས་ཡར་འཇོག་མར་འཇོག་བྱེད་པ་རེད།
- ལོ་གསར་ཚེས་གཅིག་གི་སྔ་མོར།
- རྟགས་དང་རྟེན་འབྲེལ་ཤིན་ཏུ་འགྲིག་སྟེ།
- ཚིག་རྩུབ་པོ་དང་བཀྲ་མི་ཤིས་པའི་ཚིག་གཏན་ནས་མི་བརྗོད་ལ།
- གཅོག་པ་སོགས་ཀྱི་ལས་ལ་ཤིན་ཏུ་གཟབ།
- དེ་ལྟར་རང་ཁྱིམ་ནང་ཁུལ་ནས་ལོ་གསར་བྱས་ཚར་རྗེས།
- གཉེན་ཉེ་ནང་ཕན་ཚུན་དང་།
- སྡེ་བ་རུ་སྐོར་དག་ལ་ལོ་གསར་ལ་འགྲོ་ཞིང་།
- སུ་ཚང་ན་ལོ་ལོན་རྒན་པ་ཡོད་ན་དེར་ཕྱག་འཚལ་དུ་འགྲོ་བ་ཡིན།
- གཞན་ཡང་ཡུལ་གྲུ་འདིར་སྡེ་བ་གཅིག་གི་ནང་ཁུལ་དུ།
- ནམ་མ་ལངས་གོང་ནས།
- བྱིས་པ་རྣམས་ཀྱིས་སྔ་མོ་ནས་གྲ་སྒྲིག་བྱས་ཡོད་པའི་དཔེ་ཁུག་སྤུས་ལེགས་དེ་ཁུར་ནས།
- སྐོར་དང་སྐོར་བྱས་ནས་ལོ་གསར་བཟང་ཞེས་འབོད་བཞིན།
- ཁྱིམ་ཚང་རེ་རེར་སྒོ་ཉུལ་བྱས་ཏེ་ལོ་སློང་བར་འགྲོ་ལ།
- སོ་སོའི་ཁྱིམ་ནས་ཙོ་རིལ་དང་ཀ་ར།
- སིལ་ཏོག་སྟེར་ལ།
- ལོ་གསར་གྱི་ལེགས་སྐྱེས་སྟེར་བ་ཡིན།
- དེ་ཡང་དུས་ཀྱི་འགྱུར་ལྡོག་དང་བསྟུན་ནས།
- ད་ལྟ་ཤོག་སྦག་དང་སྒོར་མོ་སྟེར་བའི་ཕྱོགས་ལ་ཡང་འགྱུར་བཞིན་ཡོད་ལ།
- སྤྱིར་བཏང་དུ་ཡུལ་འདིའི་དཔེ་ཞིག་ལ།
- མག་པ་ཨ་ཞང་ཚང་ལ་ཕྱག་འཚལ་དུ་འགྲོ་བ་ཞེས།
- ཁ་ཐག་ཅི་འདྲ་རིང་ཡང་ཚེས་གཅིག་སྔ་མོར།
- མག་པ་བཟའ་ཟླ་བུ་ཕྲུག་དང་བཅས་པ།
- ཨ་ཞང་ཚང་ལ་ཕྱག་འཚལ་དུ་ཐོན་དགོས་ཤིང་།
- ཨ་ཞང་ལ་ཆང་དང་དུ་བ།
- ཨ་ནེ་ལ་རྡོ་ཀ་ར་དང་སིལ་ཏོག་སོགས་ལོ་གསར་གྱི་སྐལ་སྟེར་ཞིང་ཕྱག་འཚལ་བ་ན།
- ཨ་ཞང་གིས་མག་པ་བཟའ་ཚང་གང་བོར་ཁ་ལས་དགེ་ཞིང་རླུང་རྟ་དར་བ།
- བསོད་ནམས་འཁོར་ཞིང་བྱ་བ་ལམ་འགྲོ་ཡོང་བའི་ཁ་གཡེང་འབོད་པ་ཡིན།
- འདིར་ངེས་པར་དུ་ནམ་མ་གསལ་གོང་ཨ་ཞང་ཚང་ལ་ཐོན་དགོས་ཤིང་།
- ཐོན་པ་ཅི་ལྟར་སྔ་ན་ཨ་ཞང་ལ་དེ་ལྟར་འདང་བརྩེ་ཡོད་པར་བཤད།
- ཚེས་གཅིག་གི་སྔ་མོའི་ནམ་གསལ་ལ་མ་གསལ་བའི་དུས་སུ།
- གནམ་གང་གི་དགོང་མོ་ལོ་སྐྱེལ་བ་ལྟར།
- སྒོ་ཕྱི་ནས་གནམ་གང་དགོང་མོའི་ལོ་སྐྱེལ་སྐབས།
- སྒོ་ཕྱི་ལ་ཁྱེར་བའི་ས་དམར་དང་ནས་ཕྱེ་ལས་ལས་པའི་མི་སྒྲོན་དེ་ནང་ལ་ཁྱེར་ཡོང་ཞིང་།
- ལོ་དེའི་མགོ་ཚེས་པ་ཡག་ཅིང་མི་ལ་ན་ཚ་དང་ཕྱུགས་ལ་གོད་ཁ་མེད་པ།
- འབྲུ་ལ་ལོ་ལེགས་འབྱུང་བའི་བཀྲ་ཤིས་སྨོན་འདུན་དང་ཆབ་ཅིག་བསུ་བ་བྱེད་ལ།
- དེར་ལོ་བསུ་བ་ཟེར།
- གནམ་གང་གི་དགོང་མོ་གཉིད་འཕྱི་བ་དང་ཚེས་གཅིག་སྔ་མོ་ལངས་སྔ་བས།
- སྤྱིར་བཏང་དུ་ཚེས་གཅིག་ཉིན་གྱི་ཉིན་དཀར་ལ་ཅུང་གཉིད་པ་དང་།
- ཁྱིམ་མིའི་ནང་གི་གསར་བུ་དག་ཐག་རིང་གི་སྡེ་བའི་ཉེ་མི་དག་ལ་ལོ་གསར་ལ་འགྲོ་བ་ཡིན།
- བསམ་ཤེས་རྣམས་ཀྱིས་སྡེ་བའི་ནང་གི་ལོ་ལོན་རྒན་རྒོན་དག་ལ་ལོ་གསར་ཁྱེར་བ་ཡིན།
- ཚེས་གཉིས་ཉིན་ནས་རུ་སྐོར་དང་རུ་སྐོར།
- ཁ་ཡ་ན་ཟླ།
- བཟང་ས་རྒྱན་ས་བྱས་ཏེ་ཁྱིམ་ཚང་རེ་མོས་ཀྱིས་ལོ་གསར་འཐུང་རེས་བྱེད་ཅིང་།
- སྡེ་བའི་ལོ་ལོན་རྒན་པ་རྣམས་བོས་ཏེ་ལོ་གསར་གཏོང་བ་ཡིན།
- སྐབས་དེར་གླུ་ལེན་གར་རྩེད་དང་ཤ་མར་ཇ་ཆང་གི་དཔལ་ལ་རོལ་བ་ཡིན།
- གླུ་མ་དང་པོ།ཡེད་་་དུང་ལོ་ལོ་ཡ་རེ་ལེན་ཡ།
- ཞང་ཡ་རེ་ཟེར་ན་དུང་ལོ་ལོ་གླུ་རེ་ལེན་ཡ།
- རྫ་འབྲོང་མོ་ཕ་འཛོམས་མ་འཛོམས་རེད།
- མ་ངེད་ཀྱི་འབྲོང་ཕྲུག་མཐའ་ནས་ངུར།
- གླུ་མ་གཉིས་པ།ང་མ་འཛོམས་འབྲུག་ཆུང་མཐའ་ན་ཡོད།
- འདི་མཐའ་ནས་མ་འཇོག་དཀྱིལ་ལོངས།
- སང་ནངས་མོ་འབྲུག་སྒྲ་གྲགས་རོགས་ཡིན།
- བཤད་མཁན་དང་པོ།གཞན་རང་སྡེ་ནང་ཁུལ་ནས་ལྒང་བུ་འགྲན་སྡུར་དང་།
- ཐག་འཐེན་འགྲན་སྡུར་སོགས་ཀྱི་ཐག་འཐེན་བྱ་འགུལ་སྤེལ་བ་དང་།
- སྔ་མོ་ནས་གྲ་སྒྲིག་བྱས་ཡོད་པའི་རིག་རྩལ་འཁྲབ་སྟོན་བྱས་ཏེ་གནམ་ལོ་གསར་བ་བསུ།
- ཡུལ་གྲུ་འདིའི་སྡེ་བ་གང་དུ་ཡང་མི་ཎི་ཁང་ཡོད་པས།
- ཚེས་གསུམ་ཉིན་ཨ་ཁུ་མ་ཎིས་ཙོ་རིལ་གཏོར་བ་ཞེས།
- མ་ཎི་ཀོར་གཉེར་གྱིས་བྱིས་པ་རྣམས་ལ་ཀ་ར་ཙོ་རིལ་སོགས་གཏོར་བར་བྱེད་ལ།
- བྱིས་པ་རྣམས་ཀྱིས་འཕྲོག་རེས་ངང་འཐུ་བ་ཡིན།
- དེ་ལྟར་སྡེ་བ་ནང་ཁུལ་ནས་རིག་རྩལ་འཁྲབ་སྟོན་དང་།
- ལུས་རྩལ་གྱི་འགྲན་སྡུར་རྒྱ་ཆེ་བར་བྱས་ཚར་རྗེས།
- ཐག་ཉེ་སྡེ་བ་དག་ལ་ཕན་ཚུན་འཁྲབ་སྟོན་དང་།
- འགྲན་སྡུར་གྱི་འགྲོ་འོང་བྱེད་པའི་སྲོལ་ཡང་ཡོད།
- གཞན་ཡང་སྔོན་སྲོལ་ལྟར་ན་རྩེད་མོ་རྩེ་རྒྱུ་གཞན་ཞིག་ཡོད་པ་ནི།
- རྒན་གཞོན་མེད་པར་སྟེར་ཀ་གུམ་པ་ཞེས་པའི་རྩེད་སྲོལ་ཞིག་ཡོད་པ་དང་།
- དེ་ནི་མི་གྲངས་ལ་ཚོད་འཛིན་མེད་པར་ངེས་གཏན་གྱི་ས་ཞིག་ཏུ།
- རང་ཉིད་ཀྱི་སྐལ་ལ་སྟེར་ཀ་འབེན་ལ་བརྩིང་རྗེས།
- རེ་མོས་ཀྱིས་བརྒྱབ་སྟེ།
- འབེན་གྱི་སྟེར་ཀ་མང་པོ་སུས་ལེན་ཐུབ་མིན་ལ་བལྟ་བའི་རྩེད་མོའི་རྣམ་གྲངས་ཤིག་ཡིན་མོད།
- ད་ལྟ་དེ་བྱིས་པ་རྣམས་ཀྱིས་མ་གཏོགས་དར་མ་དག་གིས་མི་རྩེ་བ་ཞིག་ཏུ་གྱུར་འདུག
- ཚེས་བདུན་ནི་ཉིན་ནག་ཡིན་པས་སྒོ་ཕྱིར་མོ་འགྲོ་ལ།
- སྡེ་བའི་ནང་ཁུལ་ནས་ལོ་དེའི་རིམ་གྲོ་ཐོག་མ་སྟེ།
- ཨ་ཡེ་འབར་མ་ཞེས་གཏོར་མ་ཆེན་པོ་ཞིག་འཕེན་སྲོལ་ཡོད།
- ཨ་ཡེ་འབར་མའི་གཏོར་མ་ལ་རིགས་གཉིས་ཡོད་ཀྱང་།
- དེ་ཡང་ཕོ་མོ་གཉིས་སུ་དབྱེ་ལ།
- ཕོ་ནི་གཏོར་མ་གཙོ་བོ་ཡིན་པ་དང་མོ་ཀླུ་མོ་ཡིན།
- འདི་ནི་གཙོ་བོ་ཀླུའི་རིགས་ལ་མཆོད་པའི་ཆོས་ལུགས་ཀྱི་བྱ་འགུལ་ཞིག་ཡིན།
- གོ་རིམ་ནི་ཐོག་མར་གྲྭ་བ་ཚོས་གཏོར་བཟློག་སོགས་ཀྱི་འདོན་མཆོག་གསུངས་བ་དང་།
- ཀླུ་བདག་རྫོང་བར་ཕུལ་ཡོད་པའི་མཆོད་རྫས་གཏོར་མ་བཞུགས་སུ་གསོལ་བའི་ཁང་བཟང་རུ་འབུལ་བ་དང།
- སྐྱ་མི་ཚོས་ལོ་འདིར་རང་ཉིད་ལ་དགག་བར་ཆད་ཅི་རིགས་མི་འབྱུང་བའི་སླད་དུ།
- རང་ཉིད་ཀྱི་ལོ་གྲངས་བྲིས་ཡོད་པའི་ཤིང་གི་བྱང་བུ།
- ཕོ་རྣམས་ཀྱིས་སྟག་པ་དང་།
- མོ་རྣམས་ཀྱིས་ལྕང་མའི་སྟེང་བྲིས་ཏེ་གཏོར་མའི་མཐའ་འཁོར་དུ་གསེབ་པ་དང་།
- རང་ཁྱིམ་ནས་ཀ་ར་སིལ་ཏོག་སོགས་དང་།
- སྒོར་མོ་སོགས་ཀྱི་རྫོང་སྐལ་གྱ་ནོམ་པའི་རྫོང་བ་བྱེད་པ་ཡིན།
- གཏོར་འོག་ནས་བསྡད་རྗེས།
- རྩམ་པའི་ཕྲེང་བུ་རང་ཉིད་ཀྱི་ལུས་ཕུང་ཡོངས་སུ་བྱུགས་རྗེས།
- གཏོར་མ་དང་མཉམ་དུ་འཕངས་བར་བྱེད།
- གྲྭ་བ་ཚོས་འདོན་མཆོག་གསུང་ཚར་ལ་ཉེ་དུས།
- ཁྲུས་ཆུ་སྒོ་ཡི་ཕྱིར་ཁྱེར་ཏེ་མགོ་དང་ལུས་ལ་བྱུགས་ནས།
- ལོ་དེའི་ལུས་སྟེང་གི་ན་ཚ་སོགས་འཕོ་བར་བྱེད་པ་ཡིན།
- ཉེན་དེར་སྔོན་སྲོལ་ལྟར་ན།
- གཏོར་ཟློག་བོའུ་རྒྱག་ཅེས་གསར་བུ་རྣམས་ཀྱིས་བོའུ་རྒྱག་པ་དང་།
- མ་སྲུ་ཚོས་ས་སྤར་གྱིས་བརྒྱབ་སྟེ་འབར་མ་རྫོང་བར་བྱེད་མོད།
- ད་ལྟ་མང་ཆེ་བ་ཤོག་སྦག་རྒྱག་པ་ཡིན།
- སྡེ་བ་ལ་ལར་ཚེས་བརྒྱད་ནས་ཚེས་བཅུ་བར་གྱི་ཉིན་གསུམ་ལ།
- མ་ཎི་གདུ་རུ་དང་མ་ཎི་ཐུག་པ་ཞེས།
- གྲོ་ཚགས་གདུ་རུ་དང་འབྲས་གདུ།
- ཐུག་པ་སོགས་ཁྱིམ་ཚང་རེ་རེ་ནས་སྐོལ་ཏེ།
- སྡེ་མི་ཡོངས་ཀྱིས་མ་ཎི་ཁང་དུ་མཉམ་དུ་འཐུང་བའི་སྲོལ་ཡང་ཡོད།
- དེ་མིན་བར་སྐབས་འདིར་སྡེ་བ་སོ་སོ་ན་རང་རང་གི་ཁྱད་ཆོས་དང་ལྡན་པའི།
- རིག་རྩལ་གྱི་བྱ་འགུལ་རབ་དང་རིམ་པ་སྤེལ་རྒྱུ་ཡོད་དེ།
- སྡེ་བ་ཁ་ཤས་ནས་སེང་གེ་རྩེད་བ་དང་ཁ་ཤས་ནས་ལྷ་རྩེད་རྩེ་བ།
- ཡང་འགའ་རེ་ནས་གེ་སེར་གྱི་སྒྲུང་དང་རྣམ་ཐར་སོགས་འཁྲབ་སྟོན་བྱེད་པ།
- ཡང་ན་ཁ་ཤས་ནས་རྟ་རྒྱུགས་འགྲན་སྡུར་སོགས་བྱེད་པའི་སྲོལ་ཡང་ཡོད་དོ།
- གཞན་ཡང་ད་ལྟའི་དུས་སུ།
- རྡོ་སྦིས་དང་བིས་མདོ།
- ཀ་རིང་གང་དུ་ཡང་ས་ཆ་སོ་སོ་ནས་གཞི་རྒྱ་ཆེན་པོའི་སྒོ་ནས།
- སྡེ་བ་ཕན་ཚུན་བར་ལྒང་བུ་འགྲན་སྡུར་བྱེད་བཞིན་ཡོད་པས།
- ཞུན་ཧྭ་ཡོད་ཁུལ་ལ་མཚོན་ན།
- ལྒང་བུ་འདི་ས་ཆ་གཞན་ལ་མདའ་འཕེན་འགྲན་སྡུར་དར་སྲོལ་ཆེ་བ་ནང་བཞིན།
- ལྒང་བུ་འགྲན་སྡུར་ནི།
- སྐྱེས་ཕོ་མོ་རྒན་གཞོན་མེད་པར་ཀུན་གྱིས་དགའ་བསུ་ཆེ་ཆེར་ཐོབ་པའི།
- ལུས་རྩལ་བྱ་འགུལ་གྱི་རྣམ་གྲགས་ཤིག་ཡིན།
- ལྒང་བུ་འགྲན་སྡུར་འདི་ཕལ་ཆེར་ཚེས་བརྒྱད་དང་དགུ་ནས་མགོ་བརྩམས་ཏེ།
- ཚེས་བཅུ་གཉིས་དང་བཅུ་གསུམ་ལ་གྲོལ་བ་དང་།
- གཟེངས་སུ་ཐོན་པ་དག་ལ་བྱ་དགའ་སྟེར་བ་ཡིན།
- དེ་ནས་ཚེས་བཅུ་གསུམ་དང་བཅུ་བཞི་ནས།
- ས་ཁུལ་སོ་སོའི་དགོན་པ་སོ་སོ་ན་འཆམ་རྩེ་བ་དང་གོས་སྐུ་བཤམ་པ།
- བྱམས་པ་གླིང་སྐོར་སོགས་ཆོས་ལུགས་ཀྱི་བྱ་འགུལ་མང་བས།
- སེར་སྐྱ་དམངས་ཚོགས་རྣམས་དགོན་པར་འདུས་ཏེ་དུས་ཆེན་ལ་རོལ་བར་བྱེད་པ་ཡིན།
- ཚེས་བཅོ་ལྔའི་ཉིན་གྱི་ལོ་གསར་སྐྱེལ་སྟངས་ཀྱང་རྣམ་པ་མི་འདྲ་བ་ཁ་ཤས་ཡོད་དེ།
- ཕལ་ཆེ་བས་ནམ་མ་ལངས་གོང་ཡུལ་བསང་དང་རི་བསང་ཕུད་དེ།
- ལོ་གསར་སྐྱེལ་བ་རེད།
- ཡང་གསར་བུ་ལ་ལས་རི་མཐོན་པོའི་རྩེ་ནས་རྒྱལ་མཚན་རྩེ་མོ་འཛུགས་པ་དང་།
- རླུང་རྟ་སྐུར་ཏེ་ལོ་གཅིག་གི་བྱ་ལེགས་འགྲུབ་ཡོང་བར་སྨོན་ལམ་རྒྱག་པ་དང་ཆབས་ཅིག
- ལོ་གསར་སྐྱེལ་བ་ཡིན།
- ཡང་སྡེ་བ་ཁ་ཤས་ཀྱིས་སྔ་ཉིན་ནས་གྲ་སྒྲིག་བྱས་ཡོད་པའི་ལབ་ཙེ་གཏོད་པ་ཡིན།
- ལབ་ཙེ་གཏོད་པར་སྤྱིར་བཏང་དུ་ཤིང་སྟག་པའི་ཡལ་གའི་སྟེང་དུ།
- དར་ཚོན་སྣ་ལྔ་དང་ཁ་དོག་རྣམ་པར་བཀྲ་བའི་བལ་ཆད་འདོགས་པ་དང་།
- གཞན་ཡང་དེའི་སྟེང་དུ་གོ་རེ་སྣ་གཅུ་དང་།
- སིལ་ཏོག་གི་ཕྲེང་བ་སྐོན་ཏེ་ལབ་ཙེ་གཏོད་པ་ཡིན།
- ལབ་ཙེ་གཏོད་པ་འདི་ལ་སྡེ་བ་ཐུན་མོང་གིས་གཏོད་པ་དང་།
- ཚོ་བ་ཐུན་མོང་གིས་གཏོད་པ་སོགས་རིགས་མི་འདྲ་བ་སྣ་མང་ཡོད་ལ།
- ལབ་ཙེ་གཏོད་པ་འདིའི་གཙོ་བོ་སྡེ་བའམ་ཚོ་བ་ཐུན་མོང་གི་མཐུན་སྒྲིལ་ཇེ་དམ་དང་།
- རང་ཕྱོགས་ཀྱི་ཆོས་སྐྱོང་སྲུང་མ་བཀུག་སྟེ།
- སྡེ་བའམ་ཚོ་བའི་གདོན་བགེགས་བར་ཆད་སེལ་ཞིང་།
- བྱ་བ་ལེགས་ལམ་འགྲོ་བར་ཁ་གཡེང་བཀྲ་ཤིས་འབོད་པ་ཡིན།
Loading ... Producer:
Mayuk Cultural Video Company
Producer:
རྨ་ཡུལ་རིག་གནས་བརྙན་འཕྲིན་སྒྲིག་བཟོ་ཀུང་སི།
Producer:
玛域文化影视制作公司
Editor:
Daglha Gyal
Editor:
སྟག་ལྷ་རྒྱལ།
Editor:
斗拉加
Director:
Lhugyal
Director:
ཀླུ་རྒྱལ།
Director:
李加
Other:
Tsering Bum
Other:
ཚེ་རིང་འབུམ།
Other:
才让本
Contributing Transcriber:
Kalwangjyid
Distributor:
Friends of Rural Community Development
Distributor:
གྲོང་གསེབ་འཕེལ་རྒྱས་སྐུད་འདེད་ཚོགས་པ།
Distributor:
乡村之友发展促进会
Data Entry:
Copyright Owner:
Friends of Rural Community Development
Year Published:
2011
Rights Summary:
Edited and distributed by Friends of Rural Community Development and produced by Mayuk Cultural Video Company.
乡村之友发展促进会和玛域文化影视制作公司摄制
གྲོང་གསེབ་འཕེལ་རྒྱས་སྐུལ་འདེད་ཚོགས་པ་དང་རྨ་ཡུལ་རིག་གནས་བརྙན་འཕྲིན་སྒྲིག་བཟོ་ཀུང་སིས་སྒྲིག་བཟོ་བྱས།
Visibility:
Public (group default)
Shanti AV Id:
1726
