12 Mar 2012
56 min 10 sec
Video Overview
Creators:
Mayuk Cultural Video Company, རྨ་ཡུལ་རིག་གནས་བརྙན་འཕྲིན་སྒྲིག་བཟོ་ཀུང་སི།, 玛域文化影视制作公司
Religious rituals, including Mani Bumdrub, fasting festival, water offering festival, Ngamchod and stone tent offering festival, are filmed respectively in Muhong Village, Dortse Village, Muhong Village, Ningba Village, and Horonbo Village in Daowei Township. These rituals are conducted by most of the local communities annually to avoid bad luck.
- Dobi
- བཤད་མཁན་དང་པོ།ཡུལ་གྲུ་འདི་ལ་མཚོན་ན།
- ལོ་རེའི་ཧོར་ཟླ་བཞི་བའི་ནང་དམངས་ཚོགས་རང་བཞིན་གྱི་ཆོས་ལུགས་ཀྱི་བྱེད་སྒོ་དང་།
- རིམ་གྲོ་སྣ་ཚོགས་སྒྲུབ་པ་ཅུང་མང་སྟེ།
- ཟླ་འདིའི་ནང་བཞིན་བའི་སྨོན་ལམ་དང་བཞི་བའི་སྨྱུང་གནས།
- བཞི་བའི་མཆོད་པ།
- བཞི་བའི་མ་ཎི་བུམ་སྒྲུབ་སོགས་སྡེ་བ་སོ་སོ་ན་རྣམ་པ་མི་འདྲ་བའི་སྒོ་ནས།
- ཆོས་ལུགས་ཀྱི་ཆོ་ག་ཕུན་སུམ་སོགས་པར་སྒྲུབ་བཞིན་ཡོད།
- བཞི་བའི་མཆོད་པ་ནི་ས་ཆ་འདིའི་སྡེ་བ་སོ་སོར་དར་བའི་ཐུན་མོང་གི་དུས་སྲོལ་ཞིག་མིན་ཏེ།
- སྡེ་བ་ཁ་ཤས་ན་མ་གཏོགས་ཆོས་ལུགས་ཀྱི་བྱེད་སྒོ་འདི་སྤེལ་གྱིན་མེད་པས།
- ཐེངས་འདིར་ང་ཚོ་ཆེད་དུ་རྡོ་སྦིས་སྨད་པ་སྡེ་བདུན་གྱི་ཡ་གྱལ།
- དམག་དཔོན་སྡེ་བར་སོང་ནས་འདིའི་སྐོར་གྱི་གནས་ཚུལ་ལ་རྒྱུས་ལོན་དང་།
- བཅར་འདྲི་ཐེངས་གཅིག་བྱས་པ་ཡིན།
- སྡེ་བ་འདི་ལ་མཚོན་ན་དུ་ཁྱིམ་ལྔ་བཅུ་ལྷག་ལས་མེད་ཀྱང་།
- སྡེ་བའི་ནང་གི་སྲོལ་རྒྱུན་གྱི་དུས་སྟོན་དང་།
- ཆོས་ལུགས་ཀྱི་བྱེད་སྒོ་ཕལ་ཆེར་ཞིག་མ་ཉམས་པར།
- དུས་ད་ལྟ་ཡང་འཛིན་སྤེལ་དང་རྒྱུན་སྐྱོང་བྱེད་བཞིན་ཡོད།
- སྡེ་བ་འདིས་སྔ་སྲོལ་བཞིན་ཟླ་བ་འདི་ལ་བཞི་བའི་མཆོད་པ་དང་།
- བཞི་བའི་སྨྱུང་གནས་གཉིས་ཀྱི་རིམ་གྲོ་དང་བཅའ་བ།
- རྣམ་པ་མི་འདྲ་བའི་སྒོ་ནས་བསྟུན་མར་སྤེལ་བཞིན་ཡོད།
- བཞི་བའི་མཆོད་པ་ནི་ཟླ་བ་འདིའི་ཚེས་བཞི་ནས་ཚེས་བཅུ་གཅིག་བར་ཏེ།
- བསྡོམས་པས་ཉིན་བརྒྱད་ལ་མཚམས་མ་ཆད་པར་བྱེད་སྒོ་འདི་སྤེལ་བ་ཡིན་པས།
- སྔ་ཉིན་ནས་བཟུང་མཆོད་པ་སྒྲུབ་པར་གྲ་སྒྲིག་ལེགས་པར་བྱེད་དགོས།
- མཆོད་པ་སྒྲུབ་མཁན་རྣམས་ལ་གསོལ་ཇ་གཏོང་མཁན་གྱི་ཚོ་བའམ་ཁྱིམ་ཚང་དེ་ཚོས།
- ཕྱེ་དང་གཡིས།
- འབུད་ཆོས་སོགས་བཟུང་སྟེ།
- སྔ་མོ་ནས་གཏན་འཁེལ་བྱས་ཡོད་པའི་ཁྱིམ་ཚང་ཞིག་ལ་ཁྱེར་ཡོང་ནས།
- གོ་རེ་འཚོད་པ་དང་གཡིས་ཉོག་གཡོ་བ།
- སྔོ་ཚོད་རིགས་ཀྱི་ཚོད་མ་བཅའ་བ་སོགས།
- ཉིན་གང་བོར་གྲ་སྒྲིག་གི་ལས་ལ་བྲེལ་དགོས་པ་རེད།
- ཚེས་བཞི་ཉིན་མཆོད་པ་སྒྲུབ་པའི་མགོ་དངོས་སུ་བཙུགས་པས།
- ཉིན་འདིའི་ནངས་སྔ་མོ་ནས་ཡུལ་མི་ཚོས་མ་ཎི་ཁང་གི་སྒོ་ཕྱི་ནང་ལ།
- གཙང་སྦྲ་ལེགས་པར་བྱེད་པ་དང་།
- མ་ཎིའི་ཁྱམས་ལ་གདན་གྲལ་འདིང་བ་དང་ཅོག་ཙེ་འཇོག་པ།
- སྒྲོལ་མའི་ཐང་ཀ་དང་ཐུགས་རྗེ་ཆེན་པོའི་ཐང་ཀ་སོགས་གྲལ་མགོར་བཤམས་པ།
- གཞན་ཡང་མཆོད་པ་སྟོང་ཕྲག་ལྷག་ཡོད་པ་དེ་དག་རེ་རེ་བཞིན་གཙང་མར་དབྱི་དགོས་པ་དང།
- མཆོད་ཆུ་སོངས་བླངས་ཏེ་གྲ་སྒྲིག་ཡོངས་སུ་འཛོམས་པར་བྱ་དགོས།
- མཆོད་པར་བཤམས་རྒྱུའི་ཆུ་ལ་རེ་བ་མཆོན་པོ་ཡོད་པས།
- དེ་ལ་དོ་སྣང་གལ་ཆེན་བྱེད་དགོས་པ་སྟེ།
- མཆོད་ཆུ་ལ་ཆུ་གང་རུང་ཞིག་གང་དགར་སྐྱེལ་ཆོག་པ་མིན་པར།
- དེ་ནི་དྲི་མས་མ་སྦགས་པའི་ཆུ་མགོ་གཙང་མ་ཞིག་ནས།
- དྭངས་ཤིང་གསལ་ལ་མངར་བསིལ་འཇམ་པའི་ཡོན་ཏན་དང་ལྡན་པའི་ཆུ་ཁུར་ཡོང་སྟེ།
- རྫ་མའི་ནང་བླུགས་ནས།
- དེའི་ནང་བཟང་དྲུག་སོགས་རྫས་སྣ་ཁ་ཚང་བར་བཏབ་རྗེས།
- ད་གཟོད་མཆོད་ཆུ་ལ་བཀོལ་ཆོག་པ་ཡིན།
- དེ་ནས་རྒན་པ་ཚོ་གྲལ་མགོ་ནས་སྐྱིལ་ཀྲུང་དུ་བསྡད་དེ།
- མཆོད་པའི་འདོད་ཡོན་རྣམས་འདོན་ཞིང་།
- མི་གཞན་པ་ཚོས་མཆོད་པ་སྟོང་ཕྲག་ལྷག་ཡོད་པ་དེ་དག
- གྲལ་ལེགས་པོའི་སྒོ་ནས་ཅོག་ཙེའི་སྟེང་བཤམས་རྗེས་མཆོད་ཆུ་འབུལ་བ་དང་།
- སླར་ཡང་མཆོད་པ་དེ་དག་རེ་རེ་བཞིན་བཤག་པ་དང་།
- དེ་ནས་ཕྱིར་མཆོད་པ་འབུལ་བ་སོགས།
- ཉིན་གཅིག་ལ་མཆོད་པ་སྟོང་ཕྲག་ལྷག་ཡོད་པ་དེ།
- ཐེངས་བཅུ་གསུམ་ཙམ་ལ་འབུལ་དགོས་ཤིང་།
- མཆོད་པ་སྒྲུབ་པའི་ཉིན་བརྒྱད་པོ་དེ་ལ།
- བསྡོམས་པས་མཆོད་པ་འབུམ་ཚོ་གཅིག་ལྷག་བཤམས་པ་ཡིན།
- གཞན་ཡང་མཆོད་པ་སྒྲུབ་པའི་ཉིན་འདི་དག་གི་རིང་ལ།
- མཆོད་པ་སྒྲུབ་མཁན་རྣམས་ཀྱིས་རང་རང་གི་བཟའ་བཏུང་ལ་དོ་སྣང་བྱ་དགོས་ཏེ།
- བཟའ་བཏུང་སྤྱོད་པའི་སྐབས་སུ།
- སྔ་ཉིན་ནས་གྲ་སྒྲིག་བྱས་ཡོད་པའི་དཀར་ཟས་ཀྱི་རིགས་དེ་དག་ལས།
- སྒོག་པ་སོགས་དྲི་ངན་གྱི་རིགས་དང།
- ཤ་སོགས་དམར་ཟས་ཀྱི་རིགས་གཏན་ནས་ཟས་སུ་སྤྱོད་མི་ཉན་པས།
- ལུས་ངག་ཡིད་གསུམ་གྱིས་སྲུང་བྱ་དག་ཇི་བཞིན་སྲུང་དགོས།
- མཆོད་པའི་ལས་རྣམ་པར་དག་པའི་སྒོ་ནས་སྒྲུབ་དགོས་པ་ཡིན།
- སྡེ་བ་འདིའི་བཞི་བའི་མཆོད་པའི་སྲོལ་འཛུགས་མཁན་སུ་ཞིག་ཡིན་མིན་སྐོར་ལ།
- བཤད་ཚུལ་མི་འདྲ་བ་མང་དུ་ཡོད་དེ།
- ལ་ལས་ཤར་སྐལ་ལྡན་རྒྱ་མཚོ་སྐུ་ཕྲེང་སྔོན་མ་ཞིག་ཡིན་པར་བཤད་ཅིང་།
- ཡང་ལ་ལས་བླ་མ་གསེར་ཁང་པ་དང་བླ་མ་མ་ཎི་བ་སོགས།
- གང་རུང་ཞིག་ཡིན་ཚུལ་མང་དུ་བཤད་ཀྱིན་ཡོད།
- རྒན་པ་ཚོས་བཤད་པ་ལྟར་ན།
- སྔོན་ཆད་ཞིག་ལ་སྡེ་བ་འདིའི་སྡེ་མི་རྣམས་ལ།
- རིམས་ནད་ངན་པ་ཞིག་ཕན་ཚུན་ལ་འགོས་མགོ་བརྩམས་ནས།
- ནད་ཡམས་དེ་ཞི་ཞིང་བགེགས་བར་ཆད་མཐའ་དག་རྩ་བ་ནས་སེལ་ཕྱིར།
- རྒད་པོ་བསམ་ཤེས་འགའ་ཞིག་གིས་གྲོས་བྱས་ཏེ།
- གྲོས་ཐོག་གཅིག་ལ་བཞག་པའི་སྒོ་ནས།
- རེབ་གོང་རྫོང་དཀར་དགོན་གྱི་ཨ་ལགས་རྫོང་དཀར་ཚང་ལ་ཞུ་རུ་སོང་བར་བཤད།
- བླ་མས་ཀྱང་དགོང་མོའི་རྨི་ལམ་དུ།
- ལུང་པ་སྐྱ་སྐྱ་ཞིག་ནས་འགྲུབ་བ་མེད་པོ་འགའ་ཐོན་ཏེ།
- དེ་དག་དང་ཐུག་པའི་རྨི་ལྟོས་ལེགས་པ་ཞིག་རྨིས།
- དེའི་ཕྱི་ཉིན་ཁོ་ཚོ་ཐོན་རྗེས།
- བླ་མས་སྔ་མོ་ནས་མཁྱེན་ཏེ་ཁོ་ཚོ་ལ་བསུ་བ་ལེགས་པོར་མཛད་ཅིང་།
- ལོ་རེ་བཞིན་མཆོད་པའི་རིམ་གྲོ་སྒྲུབ་དགོས་པའི་བཀའ་མོལ་ཡང་གནང་ངོ།།
- དུས་དེ་ནས་བཟུང་བཞི་བའི་མཆོད་པ་ཞེས་པའི་སྲོལ་འདི་དར་ནས།
- དུས་ད་ལྟའི་བར་དུ་རྒྱུན་མ་ཆད་པར་བཤད།
- སྨྱུང་གནས་སྲུང་བ་ནི།
- ལུས་ངག་ཡིད་གསུམ་གྱིས་མི་དགེ་བའི་ལས་སྣ་ཚོགས་ཉུང་ངུར་གཏོང་བ།
- དཔེར་ན་ངག་བསྡམས་ཏེ་ཚིག་རྩུབ་ངང་སྨས་མི་བྱེད་པ་དང་།
- ཁ་ཡི་ཟས་སྐོམ་སོགས་བཅད་དེ་མི་དགེ་བའི་ཁ་ཟས་མི་འདྲེན་པ།
- ཡིད་ནས་བརྣབ་སེམས་དང་གནོད་སེམས་མི་བཅིང་བར།
- དགེ་བའི་ལས་རྩེ་གཅིག་ཏུ་སྒོམ་པ་སོགས།
- མི་དགེ་བའི་ལས་སྤོང་བའམ་ཉུང་ངུར་བཏང་སྟེ།
- རྣམ་དཀར་དགེ་བའི་ལས་ལ་གཞོལ་བའི་བྱ་སྤྱོད་ལ་གོ་བ་ཡིན།
- སྨྱུང་གནས་སྐབས་ཀྱི་གནས་ཞེས་པ་ནི།
- མི་དགེ་བའི་ལས་སྣ་ཚོགས་སྤངས་ཏེ།
- དགེ་བའི་ལས་ཉམས་སུ་བླངས་པའམ་དེར་གནས་པའི་དོན་ཡིན།
- སྨྱུང་གནས་སྲུང་བའི་དུས་ཀྱི་ཆ་ནས་བཤད་ན།
- སྤྱིར་སྨྱུང་གནས་སྲུང་བའི་དུས་ལ་ངེས་གཏན་མེད་དེ།
- མི་ལ་ལས་ལོ་ཧྲིལ་བོར་སྨྱུང་གནས་སྲུང་བའམ།
- ཡང་ན་ལ་ལས་ལོ་ཕྱེད་དང་ཟླ་གཅིག་གམ།
- ཟླ་ཕྱེད་སོགས་ལ་སྨྱུང་གནས་སྲུང་བ་ཡང་ཡོད།
- གང་ལྟར་གཟའ་སྐར་འཕྲོད་སྦྱོར་ལེགས་པའི་ཉིན་བཟང་སྐར་བཟང་གི་དུས་ཟླ་ཞིག་བདམ་སྟེ།
- སྨྱུང་གནས་སྲུང་བ་ནི་དམངས་ཚོགས་ཐུན་མོང་གི་ལུགས་སྲོལ་ཞིག་ཏུ་ཆགས་ཡོད་དེ།
- དུས་ཀྱི་ཆ་ནས་བཤད་ན།
- དབྱར་དགུན་སྟོན་དཔྱིད་ལས།
- ཞིང་ཕྱུགས་ལས་གཉིས་ཀྱི་ལས་ཀའི་ཚེགས་ཡང་བའི་དགུན་གྱི་དུས་དང་།
- གཞན་ཟླ་བ་རེའི་ཚེས་བཅོ་ལྔའམ་གནམ་གང་།
- ཚེས་བརྒྱད་བཅས་ནི་སྨྱུང་གནས་སྲུང་བའི་དུས་སྐབས་བཟང་བོ་ཡིན།
- དེ་མིན་དགུ་བའི་ཉེར་གཉིས་དང་བཅུ་བའི་ལྔ་མཆོད་སོགས།
- ལོ་གཅིག་གི་དུས་ཆེན་གལ་ཆེན་གྱི་སྐབས་དང་།
- ཡང་ན་འདས་མཆོད་སྒྲུབ་པའི་སྐབས་སོགས་སུ།
- སྨྱུང་གནས་སྲུང་བའི་སྲོལ་སྔ་མོ་ནས་ཆགས་ཡོད།
- གཞན་ཡང་ཞུན་ཧྭ་རྡོ་སྦིས་ཞང་མདོ་རྩེ་སྡེ་བ་སོགས་སུ།
- ལོ་རེའི་ལུགས་རྙིང་གི་ཟླ་བཞི་བའི་ནངསྨྱུང་གནས་སྲུང་བ་ཡིན་ལ།
- དུས་སྲོལ་འདི་ནི་མདོ་སྨད་ཀྱི་ཡུལ་གྲུ་མང་ཆེ་བར་དར་བས།
- དུས་འདིར་མཚོན་ན་སྨྱུང་གནས་སྲུང་བའི་ཡུལ་གྱི་ཁྱབ་རྒྱ་ཆེ་ཞིང་།
- སྨྱུང་གནས་སྲུང་མཁན་གྱི་མི་གྲངས་ཀྱང་ཆེས་མང་བའི་དུས་རེད།
- བཞི་བའི་སྨྱུང་གནས་ལྟ་བུའི་སྡེ་བ་ཐུན་མོང་གིས་སྲུང་བའི་སྨྱུང་གནས་ལ་མཚོན་ན།
- སྨྱུང་གནས་སྲུང་བར་གྲ་སྒྲིག་ལེགས་པོ་བྱེད་དགོས་ཏེ།
- སྨྱུང་གནས་མ་སྲུང་བའི་སྔ་ཉིན་ནས་བཟུང་།
- སྨྱུང་གནས་སྲུང་ཡུལ་མ་ཎི་ཁང་སོགས་ཀྱི་སྒོ་ཕྱི་ནང་ཀུན་ཏུ།
- གཙང་སྦྲ་ལེགས་པོར་བྱེད་པ་དང་།
- ལོ་དེའི་སྨྱུང་གནས་བར་མཆོད་ཡོན་སྒྲུབ་མཁན་གྱི་ཚོ་བའམ་ཁྱིམ་ཚང་རེ་ནས།
- མར་ཆུར་རྩམ་གསུམ་དང་ཕྱེ་དང་གཡིས།
- འོ་མ།
- གཞན་དངོས་རྫས་འཇོག་བྱེད་ཀྱི་སྣོད་ཅ་ལག་སོགས།
- སྨྱུང་གནས་སྲུང་ཡུལ་གྱི་གནས་དེར་ཁྱེར་ཡོང་སྟེ།
- དགོས་ངེས་ཀྱི་མཐུན་རྐྱེན་ལེགས་པར་སྐྲུན་དགོས།
- གཞན་སྨྱུང་གནས་བླ་མ་དང་གྲྭ་བ་གཞན་རྣམས་ཀྱང་།
- སྨྱུང་གནས་སྲུང་ཡུལ་གྱི་གནས་དེར་སྔ་མོ་ནས་ཡོང་སྟེ།
- མཆོད་ཁང་ནང་དུ་སྐུ་རྟེན་དང་མཆོད་རྫས་སྣ་ཚོགས་བཤམས་ཏེ།
- ཕྱི་ཉིན་གྱི་སྨྱུང་གནས་སྲུང་བར་གྲ་སྒྲིག་ཡོངས་སུ་འཛོམས་པར་བྱས་ཡོད།
- སྤྱིར་བཏང་དུ་སྨྱུང་གནས་སྲུང་བར་སྡོམ་པ་སྲུང་བ་དང་སྨྱུང་གནས་སྲུང་བ།
- ཐུན་གྲོལ་བ་བཅས་བསྡོམས་པས་ཉིན་གསུམ་དུ་བགར་ཡོད།
- སྡོམ་པ་མ་སྲུང་བའི་སྔ་ཉིན་ནས་བཟུང་།
- སྨྱུང་གནས་སྲུང་མཁན་རྣམས་ཀྱིས་ལུས་ངག་ཡིད་གསུམ་གྱི་བྱ་སྤྱོད་ལ྄
- དོ་སྣང་གལ་ཆེན་བྱེད་དགོས་ཏེ།
- མི་དགེ་བའི་སྡུག་ལས་སྣ་ཚོགས་དང་།
- རྫུན་ཕྲ་མ།
- བརྣབ་སེམས་གནོད་སེམས་སོགས་སྤང་དགོས་པར་མ་ཟད།
- སྒོག་པ་དང་ཙོང་།
- ཀེའུ་སོགས་དྲི་ངན་གྱི་ཟས་མི་ཟ་བ་དང་།
- ཤ་སོགས་དམར་ཟས་ཀྱི་རིགས་དང་།
- ཉེས་དམིགས་ཀྱི་ལས་དང་ཆགས་སེམས་སོགས་རྣམ་པར་སྤངས་ཏེ།
- སྒོ་གསུམ་གཙང་སེལ་དང་སྡུག་ལས་རྣམས་རྩ་བ་ནས་སྤང་བར་བྱས་ཏེ།
- ཕྱི་ཉིན་སྡོམ་རྩ་ལེན་པ་དང་སྨྱུང་གནས་སྲུང་བར་གྲ་སྒྲིག་ལེགས་པར་བྱེད་དགོས།
- སྨྱུང་གནས་ཀྱི་ཉིན་དང་པོ་ནི་སྡོམ་པ་སྲུང་བ་ཡིན་ཏེ།
- སྡོམ་པའི་དུས་ཀྱི་སྲུང་བྱ་གཙོ་བོ་ནི།
- ཁ་ཡི་ཟས་སྐོམ་ཉུང་ངུར་གཏོང་བ་མ་གཏོགས་ངག་གི་སྨྲ་གཅོད་མི་དགོས།
- ཉིན་འདིའི་སྔ་མོའི་དུས་ཚོད་ལྔ་ཡས་མས་སུ།
- སྨྱུང་གནས་ཀྱི་ཁ་མགོ་བས་དུང་བུས་ཏེ་ཚོགས་བརྡ་བརྒྱབ་རྗེས།
- སྨྱུང་གནས་སྲུང་མཁན་རྣམས་མ་ཎི་ཁང་དུ་འཛོམས་ཏེ།
- མཆོད་སྐུའི་མདུན་ནས་འདོན་པ་རྣམས་བཏོན་ཏེ།
- ཆོས་ཀྱི་གསོ་སྦྱོང་ལེན་པ་དང་།
- སྔ་དྲོའི་བྱེད་རིམ་རྣམས་མཇུག་རྫོགས་རྗེས་དྲོས་ཇ་འཐུང་བ་ཡིན།
- དྲོས་ཇའི་ཞལ་ཟས་ལ་མར་ཆུར་རྩམ་གསུམ་ལས་གཞན།
- ཀ་ར་དང་སོལ་ཏོག་རིགས།
- སྔོ་ཚོལ་དང་ཞོག་ཁོག་སོགས་ཉེས་སྡིག་དང་དྲི་ངན་མེད་པའི་ཟས་རིགས་ཟ་བ་ཡིན།
- ཉིན་གང་བོའི་བསྙེན་གནས་སྡོམ་པའི་སྐབས་ཀྱི་འདོན་པ་རྣམས་བཏོན་ཚར་རྗེས།
- དགོང་ཇའི་དུས་སུ་འོ་ཇ་འཐུང་བ་ཙམ་ལས་ཟས་རིགས་གཞན་གང་ཡང་ཟ་མི་ཆོག་ལ།
- དེ་ནས་བཟུང་ཕྱི་ཉིན་སྨྱུང་གནས་ཀྱི་ཐུན་གྲོལ་རག་བར་དུ།
- ཆུ་ཐིགས་ཙམ་ཡང་ཁ་ལ་རེག་མི་ཉན།
- གཞན་ཉིན་དང་པོའི་ཐུན་གྲོལ་ཐེངས་གསུམ་ཡོད་པ་དེའི་རེ་རེའི་སྐབས་སུ།
- ཆབ་རྒྱག་དགོས་ལ་ལུས་པོ་རང་སྣང་གང་ཤར་དུ་འགུལ་སྐྱོད་མི་བྱེད་པར།
- ཆབ་རྒྱབ་རྗེས་ད་གཟོད་འགུལ་ཆོག་པ་ཡིན།
- ཉིན་དང་པོའི་བསྙེན་གནས་ཀྱི་སྡོམ་པ་ཡན་ལག་བརྒྱད།
- རྣམ་པར་དག་པའི་སྒོ་ནས་མཇུག་རྫོགས་རྗེས།
- ཉིན་གཉིས་པའི་སྔ་མོའི་གཉིད་ལས་སད་པའི་དུས་ནས་བཟུང་།
- ངག་བསྡམ་པའི་ལས་ལ་ཞུགས་པ་དེས་སྨྱུང་གནས་དངོས་སྲུང་བ་ཡིན།
- སྨྱུང་གནས་ཀྱི་སྐབས་སུ་ངག་ནས་ཚིག་མི་སྨྲ་བ་དང་།
- ཁ་ཡིས་ཟས་སྐོམ་གཅོད་དགོས་པ།
- གཞན་སྨྱུང་གནས་སྲུང་མཁན་རྣམས་ཀྱིས་ལས་ཀ་ལྕི་ཡང་གང་རུང་དང་།
- ལུས་ངག་ཡིད་ཀྱི་སྡིག་པའི་ལས་མཐའ་དག་ངེས་པར་སྤངས་ཏེ།
- བསམ་པ་རྩེ་གཅིག་གིས་ཕྱག་མཆོད་དང་།
- སྐོར་བའི་ལས་བྱས་ནས་དཀོན་མཆོད་གསུམ་ལ་གསོལ་འདེབས་དང་སྨོན་ལལ་རྒྱག་དགོས།
- ཉིན་གསུམ་པར་སྨྱུང་གནས་ཀྱི་ཐུན་གྲོལ་བ་ཡིན་ཏེ།
- ཉིན་འདིའི་སྐྱ་རེངས་མ་བཏང་གོང་།
- སྨྱུང་གནས་སྲུང་མཁན་རྣམས་ཀྱིས་སྨྱུང་གནས་བླ་མའི་དབུ་མཛད་འོག
- འདོན་མཆོག་དང་དགེ་རྩ་བསྔོ་བ་སོགས་ཀྱི་ཆོ་ག་རེ་རེ་བཞིན་སྒྲུབ་ཚར་རྗེས།
- གཡང་འབོད་དང་བཀྲ་ཤིས་འཇོག་པ་ཡིན།
- དེ་རྗེས་ཆབ་བརྒྱབ་རྗེས་ད་གཟོད་ཐུན་གྲོལ་བ་དང་།
- སྨྱུང་གནས་སྲུང་མཁན་རྣམས་ཀྱིས་ངག་ནས་སྐད་ཆ་བཤད་ཆོག་པ་དང་།
- ཁ་ལ་ཟས་སྐོམ་བཏུང་ཆོག་སྟེ།
- ཟས་ཐོག་མ་ཐོད་ཐུག་ཅེས་པ་ཞིག་འདྲེན་པ་ཡིན།
- དེ་ནི་ཕྱེ་དང་ཆུར་བ།
- འོ་མ་གསུམ་མཉམ་དུ་བསྲེས་ཏེ་བསྐོལ་བའི་དཀར་ཚད་རན་པའི་གདུ་རུ་ཞིག་ཡིན།
- ཉིན་འདི་ནི་སྨྱུང་གནས་སྲུང་མཁན་རྣམས་ཀྱིས།
- སྨྱུང་གནས་ཀྱི་རྩ་བ་བཞི་དང་ཡན་ལག་བཞིའི་སྡོམ་ཁྲིམས་ལེགས་པར་སྲུང་རྗེས།
- མཐར་ཐུག་གི་ལས་རྣམ་པར་དག་པའི་བཀྲ་ཤིས་སྨོན་འདུན་དང་བཅས།
- ལུས་ངག་ཡིད་གསུམ་བདེན་པ་ཡངས་པོར་བྱས་ཏེ།
- སྨྱུང་གནས་ཀྱི་མཇུག་རྫོགས་པར་བྱེད་པ་ཡིན།
- བཅུ་བའི་ལྔ་མཆོད་ནི་ལོ་རེར་ཧོར་ཟླ་ལྟར་བྱས་པའི།
- ལུགས་རྙིང་གི་ཟླ་བཅུ་བའི་ཚེས་ཉེར་ལྔ་ཉིན་ཡིན།
- ཡུལ་གྲུ་འདིའི་མི་རྣམས་ཀྱིས།
- ཉིན་དེ་ནི་རྗེ་བདག་ཉིད་ཆེན་པོ་དགོངས་པ་གཤེགས་པའི་ཉི་མ་ཡིན་ཞེས།
- དགོངས་རྫོགས་རྗེས་དྲན་གྱི་ཆོ་ག་མང་པོ་སྒྲུབ་པ་ཡིན།
- རྡོ་སྦིས་ས་ཁུལ་ལ་མཚོན་ནས་བཤད་ན།
- ཉིན་འདིར་རྡོ་སྦིས་གྲྭ་ཚང་གཙོ་བྱས་ནས།
- རྡོ་སྦིས་སྟོད་སྨད་བར་གསུམ་གྱི་དགོན་མ་ལག་བཅུ་གསུམ་ཡོད་པ་སོ་སོས།
- སྨོན་ལམ་གསུང་བ་དང་ཚོགས་མཆོད་སྒྲུབ་པ།
- བསང་སེར་གཏོང་བ།
- ལྷ་ཁང་མཆོད་ཁང་སོགས་སུ་རྒྱ་མཆོད་སྟོང་མཆོད་འབུལ་བ་སོགས།
- དགེ་རྩ་སྣ་ཚོགས་སྒྲུབ་པ་ཡིན།
- སྤྱིར་བཅུ་བའི་ལྔ་མཆོད་ལ་དགའ་ལྡན་ལྔ་མཆོད་ཆེན་མོ་ཞེས་བརྗོད་དེ།
- དེ་ནི་རྒྱལ་བ་གཉིས་པ་རྗེ་ཙོང་ཁ་པ་ཆེན་པོ་བློ་བཟང་གྲགས་པ།
- དགོངས་རྫོགས་ཀྱི་དུས་མཆོད་ཉིན་མོ་ཡིན།
- དེ་ཡང་ས་ཕག་སྟེ་སྤྱི་ལོ་ཆིག་སྟོང་བཞི་བརྒྱ་བཅུ་དགུ་ལོར།
- རྗེ་ཙོང་ཁ་པ་ཆེན་པོས་སྟོད་ལུང་དང་སེ་འབྲས་སོགས་སུ་ཕེབས་ནས།
- གདམ་པ་མང་དུ་གནང་མཐར་ཕྱིར་དགའ་ལྡན་དུ་ལོག་རྗེས།
- ཐུབ་དབང་ཚུལ་ཁྲིམས་པའི་སྐུ་མདུན་དུ།
- མཆོད་འབུལ་དང་བསྔོ་སྨོན་རྒྱ་ཆེར་མཛད་རྗེས།
- སྐུ་གཟན་དང་དབུ་ཞྭ་སྲས་ཀྱི་ཐུ་བོ་དར་མ་རིན་ཆེན་ལ་གནང་སྟེ།
- རྒྱལ་ཚབ་ཏུ་བསྐོ་བཞག་མཛད་ནས།
- བོད་ས་ཕག་ལོར་སྤྱི་ལོ་ཆིག་སྟོག་བཞི་བརྒྱ་བཅུ་དགུ་ལོའི་ཟླ་བཅུ་བའི་ཚེས་ཉེར་ལྔ་ཉིན།
- གཟིམས་ཁང་འོད་གསལ་ཕུག་ཏུ་བདེ་བར་གཤེགས།
- སྤྱི་ལོ་ཆིག་སྟོང་བཞི་བརྒྱ་ཉི་ཤུ་ལོའི་ཟླ་བཅུ་བའི་ཚེས་ཉེར་ལྔ་ཉིན།
- དགའ་ལྡན་དུ་རྗེ་ཉིད་ཀྱི་སྲས་ཀྱི་ཐུ་བོ་རྣམས་ཀྱིས།
- རྗེ་རིན་པོ་ཆེའི་དགོངས་རྫོགས་རྗེས་དྲན་སྒྲུབ་མཆོད་ཤིན་ཏུ་རྒྱས་པར་སྒྲུབ་པ་ལ་བརྟེན།
- དུས་དེ་ནས་བཟུང་།
- དགའ་ལྡན་ལྔ་མཆོད་ཆེན་མོ་ཞེས་པའི་སྲོལ་འདི་དར།
- དུས་ད་ལྟའི་བར་ལོ་ངོ་དྲུག་བརྒྱ་དགུ་བཅུ་ལྷག་ཕྱིན།
- དེ་བས་ཉིན་འདི་ལ་དགོན་པ་གྲྭ་ཚང་ལས་གཞན།
- རྒྱ་ཆེའི་དམངས་ཚོགས་རྣམས་ཀྱིས་ཀྱང་དགེ་རྩ་སྣ་ཚོགས་སྒྲུབ་བཞིན་ཡོད་དེ།
- ཉིན་འདིར་མི་རྣམས་ཀྱིས་སྲོག་མི་གཅོད་པ་དང་།
- མི་དགེ་བའི་ལས་མི་བྱ་བར་དམ་པའི་ཆོས་སྒྲུབ་ཅི་ཐུབ་བྱེད་པ་ཡིན།
- སྡིག་བཤགས་སུ་དམིགས་བརྩེ་མ་དང་མ་ཎི་འདོན་ཞིང་།
- སྐྱེས་ཕོ་མོ་རྒན་གཞོན་ཚང་མས་རང་ནུས་ཅི་ལྕོགས་སྒོས།
- སྨྱུང་གནས་དང་སྡོམ་པ་སོགས་སྲུང་གང་ཐུབ་བྱེད།
- ལྷག་པར་ཉིན་དེར།
- ཚང་མས་གོས་གསར་བ་མི་གྱོན་ཞིང་གསེར་དངུལ་གཡུ་བྱུར་གྱི་རྒྱན་ཆ་ཡང་མི་འདོགས་ལ།
- སྐྱེས་མ་ཚོས་ད་དུང་ར་སྣེ་ལ་ཐུག་སྐུ་དཀར་པོ་ཞིག་འདོགས་པ་དང་།
- སྐ་རགས་ཀྱི་སྣེ་མོ་ཡང་ཐུར་དུ་མི་སྣར་བར་སྐེད་ལ་བཅིངས་ཏེ།
- གཞན་ཡང་ཉིན་དེར་སྦྱིན་བདག་དད་པ་ཅན་རྣམས་ཀྱིས།
- དགོན་པ་གྲྭ་ཚང་ལ་དམངས་ཇ་སྐོལ་བ་སོགས་ཀྱི་ཆོས་སྦྱིན་མང་པོ་སྤེལ་བ་དང།
- ལྷ་སྐུ་སོགས་ལ་གསེར་ཚོན་འབུལ་བའམ་མ་ཎི་བསྐོར་བ།
- སྨོན་ལམ་གྱི་ཐང་ཀ་བཞེངས་མཁན་ཡང་མང་པོ་ཡོད།
- དགོངས་རྫོགས་རྗེས་དྲན་གྱི་ཆོ་ག་འདི།
- དུས་ཡུན་རིང་བོའོ་ལོ་རྒྱུས་ཀྱི་ཆུ་རྒྱུན་རིང་མོའི་ཁྲོད།
- ཡུན་གྱི་ས་ཆ་འདིའི་ཡུལ་སྲོལ་གྱི་རྣམ་པ་གཞན་ཞིག་ཏུ་ཡང་གྱུར་ཡོད་དེ།
- ན་གཞོན་རྣམས་ལ་མཚོན་ན།
- ཉིན་དེའི་དགོང་མོ་ནི།
- ཁ་ཡ་ན་ཟླ་རྣམས་ལྷན་དུ་འཛོམས་ཏེ་སྤྲོ་ཚོགས་ལ་རོལ་བའི་དུས་སྟོན་ཁྱད་པར་བ་ཞིག་ཡིན།
- དགོང་མོ་འདིར་ཆུང་བ་ལོ་བདུན་བརྒྱད་ནས་ཆེ་བ་ལོ་སུམ་ཅུ་ཡས་མས་ཚང་མ།
- རང་རང་གི་ལོ་ཚོད་དང་མཐུན་པར་འགའ་རེ་སྐོར་གཅིག་ཏུ་འཚོགས་ནས་ཁ་གསོ་བ་ཡིན་ཏེ།
- ཐོག་མར་གནས་ཚང་ཞིག་གཏན་འཁེལ་བྱས་རྗེས།
- ཚང་མས་རང་རང་གི་ཁྱིམ་ནས་ཤ་མར་ཐུད་གསུམ་དང་ཕྱེ་དང་གཡིས།
- འོ་མ་སོགས་ཁྱེར་ཡོང་ནས་ཟས་རིགས་སྣ་ཚོགས་ལས་ཏེ།
- བཟའ་བཏུང་ཕུན་སུམ་ཚོགས་པའི་དཔལ་ལ་རོལ་ཞིང་།
- གླུ་ལེན་གར་རྩེད་བྱས་ཏེ་ཕྱི་ཉིན་ནམ་ལངས་རག་བར་དུ་འདུག་པ་ཡང་ཡོད།
- སྲོལ་འདི་ནི་དུས་ནམ་ཞིག་ནས་མགོ་བཟུང་བ་མི་ཤེས་རུང་།
- འོན་ཀྱང་བླ་མ་རྗེས་དྲན་གྱི་ཉི་མ་དེ་རྒྱུན་འཛིན་བྱས་པའི་གོ་རིམ་ནང་ད་གཟོད།
- རིམ་བཞིན་ཆོས་ལུགས་ཀྱི་ཆོ་ག་སྒྲུབ་མཆོད་མཛད་པ་ཞིག་ནས་དམངས་སྲོལ་ཞིག་ཏུ་གྱུར་ཅིང་།
- སྐྱིད་སྡིག་མཉམ་གནས་ཀྱི་ཉིན་མོར་མ་ཎི་འདོན་པ་དང།
- སྨྱུང་གནས་སྲུང་བ་སོགས་ཚོགས་བསགས་པའི་ཆོ་ག་སྒྲུབ་པ་དང་།
- མཚན་མོར་ཟས་བཅུད་ཞིམ་པོ་འཐུང་ཞིང་།
- གླུ་དགའ་རྩེད་མོའི་སྐྱིད་པའི་དཔལ་ལ་རོལ་བའི་དུས་སྲོལ་ཞིག་ཏུ་གྱུར་ཡོད།
- ལོ་རེའི་ལུགས་རྙིང་གི་ཟླ་ལྔ་བའི་ཚེས་དགུ་ཉིན་ནི།
- རྡོ་སྦིས་ཧོར་རོན་པོ་སྡེ་བའི་ཕ་བོང་སྦིས་ལ་གསོལ་སྐལ་རྒྱག་པའི་ཉིན་མོ་ཡིན།
- ཕ་བོང་དེ་ནི་རྡོ་སྦིས་བསྟོད་པ་ཁག་གསུམ་ཟེར་བའི་ཧོར་རོན་པོ་དང་ཧོར་གྲོལ་བ།
- སྤུས་ལུང་སྡེ་བ་བཅས་སྡེ་བ་གསུམ་གྱི་བར་ན་གནས་ཡོད་ལ།
- རྒྱང་རིང་ནས་བལྟས་ཚེ།
- སྦིས་དཀར་ཞིག་ཕུབ་ཡོད་པ་དང་གཉིས་སུ་མ་མཆིས་པས།
- རྡོ་སྦིས་ཞེས་པའི་ས་མིང་ཡང་དེ་ལ་བརྟེན་ནས་ཆགས་པར་བཤད།
- རྒད་པོ་རྣམས་ཀྱི་ངག་རྒྱུན་ལྟར་ན་ཡང་།
- རྡོ་སྦིས་ལུང་པ་ནི་གནའ་སྔ་མོར་བོན་ཆོས་དར་ཆེ་བའི་ས་ཆ་ཞིག་ཡིན་ཟེར།
- ངག་དབང་རྣམ་རྒྱལ་ཞེས་པའི་ཤར་པའི་མི་ཞིག་ལ།
- རྗེ་ཀརྨ་རོལ་བའི་རྡོ་རྗེ་ཡིས།
- རྡོ་ཡི་སྦིས་དཀར་འདྲ་བའི་ཤར་ཕྱོགས་སུ།
- རི་རྒྱལ་མཚན་འདྲ་བའི་ལྟེ་བ་རུ།
- དུས་གསུམ་སངས་རྒྱས་ཀྱི་ལྷ་ཁང་ཞིག་བཞེངས་ཤིག་ཅེས་པའི་ལུང་བསྟན་ཐོབ་སྟེ།
- ཁམས་ཕྱོགས་འབའ་ཐང་ནས་གནས་འདིར་ཡོང་བ་ཡིན་ཞིང་།
- ཐོག་མར་ཁོ་ཚོ་སྦིས་དཀར་ཞིག་ཕུབ་པ་དང་འདྲ་བའི་རྡོ་ཕ་བོང་དེ་ལ་ཐུག་པ་ན།
- ཁོ་ཚོས་བླ་མའི་ལུང་བསྟན་ཡིད་ལ་དྲན་ཏེ་ཕྱོགས་བཞིར་བལྟས་པ་ན།
- ཕ་བོང་དེའི་ཁ་གཏད་དུ་ཡང་མདོག་དམར་པོ་ངོས་ཤར་མོ་ཅན།
- རྒྱལ་མཚན་དང་མཚུངས་པའི་རི་ཞིག་ཀྱང་མཐོང་བས།
- ལུང་བསྟན་པའི་ས་ཡིན་པ་ཤེས་ཏེ།
- གནས་དེར་གཞིས་ཆགས་པའི་བློ་ཐག་བཅད།
- བཤད་མཁན་གཉིས་པ།ཕ་བོང་སྦིས་ཟེར་བ་འདིའི་ལོ་རྒྱུས་ཧ་ཅང་རིང་བ་རེད།
- ལོ་དྲུག་བརྒྱ་བདུན་བརྒྱ་ལྷག་གི་ལོ་རྒྱུས་རེད།
- ཀརྨ་སྐུ་ཕྲེང་བཞི་བ་སྟེ་ཀརྨ་རོལ་བའི་རྡོ་རྗེ།
- རྨ་ཆེན་གངས་ལྷ་ཡིས་ཕོ་ངག་དབང་རྣམ་རྒྱལ་ལ་ལུང་བསྟན་པ་ཞེས་བཤད་རྒྱུ་ཡོད།
- རྡོ་སྦིས་དཀར་འདྲ་བའི་ཤར་ཕྱོགས།
- རི་རྒྱལ་མཚན་འདྲ་བའི་ལྟེ་བ།
- ང་ཧོར་བ་ཡན་ཚང་ཞེས།
- གང་ལྟར་རྡོ་སྦིས་གསེར་མོ་ལྗོངས་ཀྱི་ས་འཛིན་གྱི་དང་པོ་ཡིན་ཟེར་བ་རེད།
- སྡེ་འཛིན་གྱི་མགོ་མ་ཡིན་ཟེར་བ་རེད།
- ཧོར་ངག་དབང་རྣམ་རྒྱལ་གྱིས་དང་པོ་ནས་བླ་མའི་གསུང་ཁུར་ཏེ།
- གང་ལྟར་ཧོར་བ་ཡན་ཚང་འདི་གང་ནས་ཡོང་ཟེར་ན།
- ང་ཚོ་འབའ་ནས་ཡོང་ལ་འབའ་རྩེ་སྒང་རིང་མོ་ནས་ཡོང་།
- ང་ཨ་ཞང་མཛོ་མོར་དགུ་ཞོན་བྱེད་མཁན།
- ང་ཨ་མདོ་འབོ་རི་ཁ་ཁྲ་ཞོན་པ།
- ང་གྲི་ཆུང་སྤུར་གྲུ་འདྲ་བོ་དཔུང་ལ་ཁུར་ནས།
- ཐོ་བ་གནམ་ལྕགས་འདྲ་བོ་ལག་ལ་བཟུང་ནས།
- ང་ས་རྡོ་སྦིས་གསེར་མོ་ལྗོངས་ལ་བབས་པ།
- ལོ་རེ་རེའི་ལྔ་བའི་ཚེས་དགུ་འདིར།
- གང་ལྟར་གསོལ་སྐལ་འདི་གང་ལ་བརྒྱབ་པ་རེད་ཟེར་ན་རྡོ་སྦིས་རྡོ་རྒན་ཕ་བོང་ལ་བརྒྱབ་པ་རེད།
- འདི་ང་ཚོ་ཧོར་རོན་པོ་ལ་མ་གཏོགས་ཡོད་པ་མ་རེད།
- དེ་བས་སྡེ་བ་འདིའི་ལུགས་སྲོལ་དང་ས་བདག་ཆུ་བདག་ཡིན་པའི་སྟབས་ཀྱིས།
- ཧོར་རོན་པོ་སྡེ་བ་མ་གཏོགས་རྡོ་རྒན་ཕ་བོང་འདི་སྲུང་མཁན་ཡང་མེད་པ་འདི་རེད།
- ང་ཚོས་དེང་མའི་སྲོལ་རྒྱུན་འདི་སྟེ་ལོ་ངོ་བདུན་བརྒྱ་ལྷག་གི་སྲོལ་རྒྱུན་འདི་ཆད་དུ་མ་བཅུག་པར།
- རྡོ་སྦིས་རྡོ་རྒན་ཕ་བོང་ལ་མཇལ་བ་རེད།
- ས་འཛིན་གྱི་དང་པོ་སྡེ་འཛིན་གྱི་མགོ་མ་ཟེར་བའི་རྒྱུ་མཚན་འདི་འདྲ་ཞིག་རེད།
- བཤད་མཁན་དང་པོ།ད་ལྟ་ཡོད་པའི་ཧོར་དགེ་ཚོ་བ་ནི་གནའ་མི་དེ་དག་གི་ཚབ་གཞུག་ཏུ་བཤད་ལ།
- ནང་བསྟན་འཕྲིན་ལས་སྤེལ་རྒྱུ་ནི།
- ཁོ་ཚོ་རྡོ་སྦིས་ས་ཆར་ཡོང་བའི་དམིགས་ཡུལ་ཉག་གཅིག་ཡིན་པས།
- ཁོ་ཚོས་ཐོག་མར་ལྷ་ཁང་ཞིག་བཞེངས།
- ལྷ་ཁང་དེའི་ཀླད་ངོས་ནི་ཚོན་དམར་ལྗང་བྱུགས་ཡོད་ཅིང་།
- ལྷའི་སྐུ་བརྙན་བརྐོས་ཡོད་པའི་ཤིང་ལེབ་གྲུ་བཞི།
- ཕྱོགས་བཞི་ནས་བརྩེགས་མ་རྩེག་མ་རྩེག་བཞིན་ལྟེ་བར་རྩིག་ཡོད་པ་ཅན་ཞིག་ཡིན་ལ།
- ཁང་བའི་ནང་དུ་ཀ་བ་གཅིག་ཀྱང་མེད་པས་ཨ་མདོ་ལྷ་ཁང་ཀ་མེད་ཅེས་ཐོགས།
- འདི་ལྟ་བུའི་ངོ་མཚར་བའི་ངག་རྒྱུན་ཞིག་ཡོད་པའི་རྒྱུ་མཚན་གྱིས།
- ཧོར་རོན་པོ་སྡེ་བའི་ཕ་བོང་སྦིས་ལ་སྲོལ་སྐལ་རྒྱག་པའི་གནའ་སྲོལ་འདི་ཡང་།
- ལོ་རེ་བཞིན་རྒྱུན་མ་ཆད་པར་སྤེལ་བཞིན་ཡོད།
- ཉིན་དེའི་ཉི་མ་རི་རྩེར་ཤར་བ་ན།
- སྡེ་བ་ཡོངས་ཀྱི་ལོ་ལོན་དང་།
- ལོ་བཅོ་ལྔ་མན་གྱི་བྱིས་པ་ཚང་མ་མ་ཎི་ཁང་དུ་འདུས་ཤིང་།
- ཁོ་ཚོས་བསང་ཕུད་རྗེས་ར་མ་ཞིག་ཁྲིད་ཡོང་སྟེ།
- དེ་ལ་ཤུག་གདུག་བྱེད་ཅིང་།
- བྱིས་པ་ཚོས་ཆོས་དཔེ་རེ་ཁུར་ནས་གྲལ་ཕྲེག་སྒྲིག་སྟེ་བསང་ཁྲི་ལ་སྐོར་གསུམ་བརྒྱབ་རྗེས།
- སྐྱེས་པ་དར་མ་ཞིག་གིས་ར་མ་ཁྲིད་པའི་རྗེས་སུ་དེད་དེ།
- ཆོས་འཁོར་རྒྱག་པའི་མགོ་རྩོམ་པ་ཡིན།
- བྱིས་པ་སྔོན་ལ་འགྲོ་མཁན་གཉིས་ཀྱིས་དུང་འབུད་པ་དང་།
- གཞན་ཚང་མས་མགྲིན་གཅིག་ཏུ་མ་ཎི་རིང་འདོན་བྱེད་བཞིན།
- སྡེ་བའི་ཞིང་མཐའི་ས་མཚམས་བསྐོར་ནས་འགྲོ་བ་རེད།
- ལམ་སྐེད་ཅིག་ལ་ཐོན་རྗེས།
- ཁོ་ཚོས་བསང་ཕུད་པ་དང་ཕྱག་འཚལ་ཏེ་ཡུལ་ལྷ་གཞི་བདག་ལ་མཆོད་པ་མཛད་ཅིང་།
- ཁོ་ཚོས་ལམ་སྐེད་ནས་བཏུས་ཡོང་བའི་ཀྱེར་མའི་མེ་ཏོག་སོགས་ཀྱིས།
- མེ་ཏོག་གི་ཕྲེང་བ་བཟོས་ཏེ་ར་མའི་སྐེ་ལ་སྐོན་པ་ཡིན།
- ཉིན་འདིར་སྡེ་བའི་ཞིང་སྲུང་བ་རྣམས་ཀྱིས།
- སྔ་མོ་ནས་ཟས་བཟོ་བྱེད་ཀྱི་ཡོ་བྱད་སྣ་ཚོགས་ཁྱེར་ཞིང་།
- རྒན་པོ་རྣམས་ཁྲིད་དེ་རྡོ་ཕ་བོང་དེའི་དྲུང་དུ་འདུས་ལ།
- ཁོ་ཚོས་ཐབ་ཀ་འཛུགས་པ་དང་ཟ་མ་ལས་པའི་འགན་ཁུར་དགོས་པ་ཡིན།
- རྒན་པ་རྣམས་ཀྱིས་ཀྱང་བསང་ཕུད་དེ་ཇ་འཐུང་བཞིན།
- ཞིང་མཐའ་ནས་བརྒྱུད་ཡོང་བའི་བྱིས་པ་དང་ར་མའི་སྔུན་བསུ་བ་ཡིན།
- བྱིས་པ་རྣམས་ཀྱིས་ར་མ་ཁྲིད་བཞིན་བསང་ལ་སྐོར་གསུམ་དང་།
- རྡོ་ཕ་བོང་ལ་སྐོར་གསུམ་བརྒྱབ་རྗེས་ཆོས་དཔེ་རྣམས་ཞིང་མཐར་རྩིག་སྟེ།
- རྡོ་ཕ་བོང་ལ་ཕྱག་གསུམ་འཚལ་བ་རེད།
- དེ་ནས་རྒན་པོ་རྣམས་ཀྱིས་ར་མ་བསང་གི་མདུན་དུ་ཁྲིད་དེ་ཤུག་བདུག་བྱེད་ཅིང་།
- ར་ཡི་ཐོད་པ་དང་ར་ཡི་རྩེར་མར་བྱུག་པ་དང་།
- ར་མགོ་ནས་སྒལ་བར་འོ་ཆུ་བླུགས་རྗེས་བྱིས་པ་ཚོ་ར་མར་སྐོར་ཅིང་།
- རྒད་པོ་རྣམས་ཀྱིས་བསང་མཆོད་འདོན་པ་ཡིན།
- ར་མས་འདར་ཟུག་ཅིག་བྱས་པ་ན་སྲོལ་ཁ་བླངས་པ་མཚོན་པས།
- ཚང་མས་ལྷ་རྒྱལ་ལོ་ཞེས་ཀི་སྒྲ་སྒྲོག
- དེ་ནས་ར་བཤས་ཏེ་དམར་མཆོད་བྱས་རྗེས།
- ཁོ་ཚོ་མཉམ་དུ་འཛོམས་ནས་ཤ་ཟས་ལ་རོལ་བ་དང་།
- རྒན་པོ་རྣམས་ཀྱིས་ཇ་ཆང་འཐུང་རྗེས་གཏམ་བཤད་བྱེད་ཅིང་།
- བྱིས་པ་རྣམས་རྡོ་ཕ་བོང་ཐོག་ཏུ་ཡར་འགོས་མར་ཤུད་བྱས་ཏེ་རྩེད་མོ་ལ་རོལ་བ་ཡིན།
- མ་ཎི་བུམ་སྒྲུབ་ནི་ཡུལ་གྲུ་འདིའི་སྡེ་བ་སོ་སོ་ན་དར་ཁྱབ་ཆེ་བའི།
- དམངས་ཚོགས་ཀྱི་ཆོས་ལུགས་ཆོ་ག་ཞིག་ཡིན་པས།
- སྡེ་བ་ཕལ་ཆེ་བས་ལོ་རེ་རེ་བཞིན་མ་ཎི་བུམ་སྒྲུབ་གྱི་ཆོ་ག་འདི་སྤེལ་གྱིན་ཡོད།
- སྡེ་བ་སོ་སོས་མ་ཎི་བུམ་སྒྲུབ་སྲུང་བའི་དུས་ལ་ཁྱད་པར་ཅུང་ཡོད་དེ།
- སྡེ་བ་ལ་ལས་ལུགས་རྙིང་གི་ཟླ་བ་བཞི་བའི་ནང་མ་ཎི་བུམ་སྒྲུབ་སྲུང་བ་དང་།
- ཡང་སྡེ་བ་ལ་ལས་ཟླ་བ་ལྔ་བ་དང་ཟླ་བ་དྲུག་པའི་ནང་སྲུང་བ་སོགས།
- དུས་ཀྱི་ཆ་ནས་མི་འདྲ་བ་ཁ་ཤས་ཡོད་མོད།
- ཕལ་ཆེ་བས་ཟླ་བ་དྲུག་པའི་ནང་དུ་མ་ཎི་བུམ་སྒྲུབ་གྱི་ཆོ་ག་འདི་སྤེལ་བ་ཡིན།
- མ་ཎི་བུམ་སྒྲུབ་སྲུང་སའི་གནས་ནི་མ་ཎི་ཁང་དང་དགོན་པའི་འདབས།
- སྡེ་བའི་ཉེ་འཁོར་གྱི་ནགས་འདབས་སོགས་ཡིན་ཏེ།
- མ་ཎི་བུམ་སྒྲུབ་སྲུང་བའི་ཉིན་འདི་དག་གི་རིང་དུ།
- མ་ཎི་བུམ་སྒྲུབ་སྲུང་མཁན་རྣམས་རང་ཁྱིམ་དུ་ཕྱིར་ལོག་མི་ཆོག་པས།
- མ་ཎི་བུམ་སྒྲུབ་གྲོལ་རག་བར་དུ་སྲུང་གནས་དེ་དག་ནས་ཞག་འདུག་བྱེད་དགོས་པ་ཡིན།
- དེ་བས་སྔ་ཉིན་ནས་བཟུང་སྟེ་དེ་ལ་གྲ་སྒྲིག་ལེགས་པར་བྱེད་དགོས་པ་རེད།
- སྡེ་བའི་ནང་ནས་སྒོར་མོ་དང་མར་རྩམ་སོགས་ཀྱི་རིན་ཐབ་བརྒྱབ་སྟེ།
- མ་ཎི་བུམ་སྒྲུབ་སྲུང་བར་མཐུན་རྐྱེན་ཡོངས་སུ་འཛོམས་པར་བྱེད་དགོས་ལ།
- ལོ་དེའི་མ་ཎི་བུམ་སྒྲུབ་ཀྱི་ཁ་མགོ་བ་ཚང་མས་མ་ཎི་བུམ་སྒྲུབ་སྲུང་སའི་གནས་དེ་རུ།
- ཚོགས་སྦིས་རྒྱག་པ་དང་ཐབ་ཀ་འཛུགས་པ་སོགས་ཀྱི་གྲ་སྒྲིག་བྱེད་དགོས།
- མ་ཎི་བུམ་སྒྲུབ་སྲུང་མཁན་རྣམས་ཀྱིས་ཀྱང་རང་ཁྱིམ་ནས་སྣོད་ཅ་ལག་དང་།
- གོན་པ་ཉལ་གདན་སོགས་བསྡུ་གསོག་བརྒྱབ་རྗེས།
- ཕྱི་ཉིན་ནངས་སྔ་མོ་ནས་ལམ་ལ་ཆས་ཏེ།
- མ་ཎི་བུམ་སྒྲུབ་སྲུང་སའི་གནས་དེ་ལ་འགྲོ་དགོས་པ་ཡིན།
- མ་ཎི་བུམ་སྒྲུབ་འདིའི་སྲུང་ཚུལ་ནི།
- སྡེ་བ་གཞུང་གིས་ཐུན་མོང་དུ་སྲུངབའམ།
- ཡང་ན་སྡེ་བ་གཉིས་སམ་གསུམ་ཁ་འཆམ་པོའི་སྒོ་ནས་མཉམ་གཅིག་ཏུ་སྲུང་བ་སོགས།
- རྣམ་པ་མི་འདྲ་བ་རེ་གཉིས་ཡོད།
- ང་ཚོས་ད་ལྟ་རིག་ཐུབ་པ་འདི་ནི་རྡོ་སྦིས་དམག་དཔོན་སྒར་གྱི་ཉེ་འདབས་སུ།
- སྡེ་བ་གསུམ་གྱིས་ཉིན་གཅིག་ཏུ་མ་ཎི་བུམ་སྒྲུབ་སྲུང་བའི་ཚོགས་གནས་ཤིག་ཡིན་ཏེ།
- སྡེ་བ་དེ་གསུམ་ནི་རྡོ་སྦིས་སྨད་པ་སྡེ་བདུན་གྱི་ཡ་གྱལ་རྒྱ་ཚང་སྡེ་བ་དང་དམག་དཔོན་སྡེ་བ།
- འདེལ་མ་སྡེ་བ་བཅས་གསུམ་ཡིན་ཞིང་།
- སྡེ་བ་འདི་གསུམ་གྱིས་མ་ཎི་བུམ་སྒྲུབ་ཉིན་གཅིག་ཏུ་སྲུང་བའི་སྲོལ་འདི་སྔ་མོ་ནས་ཆགས་ཡོད་ཟེར།
- བཤད་མཁན་གསུམ་པ།དེང་མ་སྔོན་ཆད་ཀྱི་ཡར་སྔོན་དུ་ང་ཚོའི་འདི་རུ་སྡེ་བ་གསུམ་པོ་འཚོགས་པ་ཡིན་ནམ།
- བཤད་མཁན་བཞི་བ།དེ་དུས་མགོ་བ་སུམ་ཅུ་ཐམ་པ་ཡོད།
- སྡེ་བ་རེ་ན་ཁ་མགོ་བ་བཅུ་རེ་སྟེ་བསྡོམས་པས་སུམ་ཅུ་ཐམ་པ་ཡོད་པ་རེད།
- དེའི་འཕྲོར་སྡེ་བ་གཅིག་ཇ་ལྡུག་ཡིན་པ་རེད།
- ད་ལོ་རྒྱ་ཚང་ཇ་ལྡུག་རེད་དང་ཡང་ན་དམག་དཔོན་ཇ་ལྡུག་རེད།
- འདེལ་སྨད་ཇ་ལྡུག་རེད་ཅེས།
- དེའི་ལོ་དེར་འགན་ཁུར་ཚང་མ་སྡེ་བ་དེའི་སྟེང་ན་ཡོད།
- དཔེ་བཞག་ན་ད་ལོ་འདེལ་སྨད་ཇ་ལྡུག་རེད།
- ཕྱི་དྲོ་འདེལ་སྨད་ཀྱི་མིས་ཆུ་ཁུར་ནས་ཡོང་བ་རེད།
- ཆུ་ལེན་དུ་ཕ་རོལ་ལ་འགྲོ་དགོས་པ་རེད།
- དེ་ལྟར་ཁུར་ནས།
- དེང་མ་བསིལ་བ་ཚང་མ་ཕྱིས་ཏེ་ལྭ་བ་གྲལ་དག་གྱོན་ནས།
- དེ་ལྟར་ཡོང་ནས་ཚང་མ་ལྟད་མོར་འབུད་པ་རེད།
- ཆུ་ལེན་ཡོང་བཞིན་འདུག་ཅེས།
- ཇ་ལྡུག་རྣམས་ཀྱི་རྐང་སྣམ་དེ་འདྲ་བཟང་བོ་མ་རེད།
- འདི་ལ་གོས་ཀྱི་ཐོད་ཀོ་ཞེས་པུས་མོ་མགོར་ཡག་པོ་ཞིག་བཟོས་ཡོད་པ་རེད།
- སྔུན་ཏག་ཏག་ཡག་པོ་བཅོས་ཡོད་པ་རེད།
- རྒྱབ་ན་ཅུང་ཙམ་མ་གཏོགས་ཡོད་པ་མ་རེད།
- རྐང་སྣམ་གྱི་སྟེང་དུ་དེ་བཅིངས་བ་རེད།
- དེ་དུས་ཀྱི་ལག་ཕྱིས་དེ་མགོར་དཀྲིས།
- ད་དུང་རལ་བ་མགོར་དཀྲིས།
- ཇ་ལྡུག་དུས་དེ་ཚང་མ་གཞིག་དགོས་པ་རེད།
- དེ་དག་བཤིག་ནས་རལ་བ་སྐེ་ལ་འཕངས་ཏེ།
- དེང་མ་དེ་འདྲ་ཞིག་རེད།
- བཤད་མཁན་ལྔ་བ།འདི་ཇ་ཁང་རེད།
- བཤད་མཁན་བཞི་བ།ཇ་ལྡུག་དུས་ཇ་ལྡུག་ཚོ་འདི་ནས་གཤར་ཏེ་འགྲོ།
- བལྟས་ནས་བསྡད་དེ་དེའི་ཕན་ཆད་ལ་སོང་ཆོག་པ་མ་རེད།
- དེ་ནས་ཨ་ཁུ་ཚོ་འདིར་སོང་།
- དཔེ་བཞག་ན་རྒྱ་ཚང་ཚོ་འདིར་སོང་དང་དམག་དཔོན་གྱི་མི་ཚོ་འདིར་སོང་ཞེས།
- ཁ་འཕྲོ་ཁ་འཕྲོ་ཚང་མ་དེ་ལྟར་བགོས་ནས་འགྲོ་དགོས་པ་རེད།
- བཤད་མཁན་དང་པོ།མ་ཎི་བུམ་སྒྲུབ་སྲུང་བའི་གྲ་སྒྲིག་རིམ་པ་བཞིན་མཇུག་རྫོགས་རྗེས།
- མ་ཎི་བུམ་སྒྲུབ་དངོས་སུ་སྲུང་བའི་མགོ་བརྩམས་པ་སྟེ།
- ཐོག་མར་མི་རྣམས་སེར་ཕྲེང་སྒྲིག་སྟེ་ཐུགས་རྗེ་ཆེན་པོའི་སྐུ་གདན་འདྲེན་པ་ཡིན་ལ།
- གྲྭ་བ་རྣམས་ཀྱིས་སྨོན་ལམ་གསུངས་ཤིང་།
- དེ་ལ་མཆོད་བཤམ་རྒྱ་ཆེར་མཛད་རྗེས་ད་གཟོད་ནངས་ཇ་བཞེས་པ་ཡིན།
- ཁ་མགོ་བས་སེར་སྐྱ་ཡོངས་ཀྱིས་ནངས་ཇ་འཐུང་བའི་གོ་སྐབས་འདི་དང་བསྟུན་ནས།
- ཚོགས་སྦིས་ཀྱི་སྒོ་ཁར་འཚམས་ཐོ་བརྩིངས་བ་དང་།
- སྡེ་བའི་ཚོགས་སྦིས་གསུམ་ཡོད་པ་དེ་རེ་རེའི་ནང་ནས་གྲལ་ཡིག་བསྒྲག་པ་རེད།
- དེ་བས་མ་ཎི་བུམ་སྒྲུབ་སྲུང་མཁན་རྣམས་ཀྱིས།
- ལུས་ངག་ཡིད་གསུམ་གྱི་འདུལ་ཁྲིམས་ལ་དོ་སྣང་གལ་ཆེན་བྱེད་དགོས་པ་རེད།
- རང་སྣང་གང་ཤར་སྒོས་ཕྱི་སྒོར་རྒྱུགས་མི་ཆོག་པ་དང་།
- ནང་དུ་གཉིད་ལོག་པའམ་ཡང་ན་ཕན་ཚུན་བར་ལ་ཁ་བརྡ་སོགས་མི་བྱེད་པར།
- ལུས་སེམས་རྩེ་གཅིག་གིས་ཉིན་གང་བོར་མ་ཎི་བཏོན་ཏེ།
- ཉིན་གཅིག་ལ་ཁས་བླངས་ཡོད་པའི་མ་ཎིའི་ཁ་གྲངས་དེ་ལོང་ཅི་ཐུབ་བྱེད་དགོས།
- གཞན་ཡང་མ་ཎི་བུམ་སྒྲུབ་ཀྱི་སྐབས་སུ།
- གྲོལ་ཆུང་ཞེས་མཚམས་མཚམས་སུ་ངལ་གསོ་བའི་དུས་ཚོད་ཅིག་ཡོད་དེ།
- དེ་ལ་དུང་བུས་ཏེ་བརྡ་བརྒྱབ་རྗེས་ད་གཟོད་མི་རྣམས་སྒོར་བུད་དེ།
- ངལ་ཅུང་ཙམ་གསོས་ཆོག་པ་ཡིན།
- དེ་ནས་ཚོགས་བརྡ་ཕྱིར་བརྒྱབ་རྗེས།
- མ་ཎི་སྲུང་མཁན་རྣམས་ཀྱིས་ཐོག་མར་ཁྲུས་ཆུ་ཡིས་ལག་པ་གཙང་མར་བཀྲུས་ཤིང་།
- ཤུག་གདུག་བྱས་རྗེས་ད་གཟོད་མ་ཎི་འདོན་པའི་མགོ་རྩོམ་པ་ཡིན།
- དེ་ལྟར་ཕྱི་དྲོའི་ཚོགས་གྲོལ་སྐབས།
- རང་གིས་ཉིན་གང་བོར་བཏོན་པའི་མ་ཎིའི་ཁ་གྲངས་ཁ་མགོ་བར་རྩིས་སྤྲོད་དགོས་པ་ཡིན།
- དེ་བཞིན་དུ་ཉིན་དེ་དག་གི་བྱེད་སྒོ་དང་ཆོ་ག་སྤེལ་ཚུལ་རྣམས་ཕལ་ཆེར་གཅིག་འདྲ་ཡིན།
- མ་ཎི་བུམ་སྒྲུབ་སྒྲུབ་པ་ལ་མ་ཎི་རིལ་བ་ཞེས་པ་ཞིག་འབབ་རྒྱུ་ཡོད་ལ།
- རིལ་བུའི་གྲངས་ཀ་ཅི་ཙམ་མང་ན་མ་ཎི་བུམ་སྒྲུབ་གྱི་ཚོགས་སྒྲུབ་པ་དེ་ཧ་ཅང་བཟང་བར་བཤད།
- སྤྱིར་བཏང་དུ་མ་ཎི་བུམ་སྒྲུབ་འདི་ཉིན་ལྔ་ལ་སྲུང་བ་ཡིན་ལ།
- ཉིན་འདི་དག་གི་རིང་ལ།
- མ་ཎི་བུམ་སྒྲུབ་སྲུང་མཁན་རྣམས་ཀྱིས།
- ལུས་ངག་ཡིད་གསུམ་གྱིས་སྡོམ་ཁྲིམས་ལེགས་པར་བརྩི་སྲུང་བྱེད་དགོས་པ་ཡིན་ཏེ།
- ཁོ་ཚོས་མི་དགོས་པའི་སྡུག་ལས་སྣ་ཚོགས་དང་རྫུན་ཁྲ་མ།
- བརྣབ་སེམས་གནོད་སེམས་སོགས་སྤངས་དགོས་པར་མ་ཟད།
- སྒོག་པ་དང་ཙོང་།
- ཀེའུ་སོགས་དྲི་ངན་གྱི་ཟས་མི་ཟ་བ་དང་།
- ཤ་སོགས་དམར་ཟས་ཀྱི་རིགས་དང་ཉེས་དམིགས་ཀྱི་ལས་དང་།
- སྒོ་གསུམ་གཙང་སེལ་དང་སྡིག་ལས་རྣམས་རྩ་བ་ནས་སྤངས་བར་བྱས་ཏེ།
- མ་ཎི་བུམ་སྒྲུབ་གྱི་ཆོ་ག་ཚུལ་བཞིན་སྒྲུབ་དགོས་པ་ཡིན།
- སྦྱིན་བདག་དད་པ་ཅན་རྣམས་ཀྱིས་ཀྱང་གོ་སྐབས་འདི་དང་བསྟུན་ནས།
- དགོན་པར་ཚོགས་གཏོང་བ་དང་།
- མ་ཎི་བུམ་སྒྲུབ་སྲུང་མཁན་རྣམས་ལ་འབུལ་བ་འབུལ་བ་དང་།
- ཀ་ར་སིལ་ཏོག་སོགས་ཀྱི་ཚོགས་སྟེར་བ་སོགས་རྣམ་པ་མི་འདྲ་བའི་སྒོ་ནས།
- དགེ་རྩ་རེ་སྒྲུབ་བཞིན་ཡོད།
- འདི་ལྟ་བུའི་མ་ཎི་བུམ་སྒྲུབ་གྱི་ཆོ་ག་འདི་དུས་ནམ་ཞིག་ལ་དར་མགོ་བརྩམས་པ་དང།
- མི་སུས་སྲོལ་ཕྱེ་བ་དག་ལ་བཤད་ཚུལ་མི་འདྲ་བ་རེ་གཉིས་ཡོད་དེ།
- ལ་ལས་ཡབ་རྗེ་སྐལ་ལྡན་རྒྱ་མཚོས་སྲོལ་ཕྱེ་བར་བཤད་ཅིང་།
- ཡང་ལ་ལས་རྗེ་མ་ཎི་བ་ཤེས་རབ་བཀྲ་ཤིས་དང་།
- ཨ་ལགས་བཟང་བོ་ཡིན་ཚུལ་སོགས་ཀྱི་བཤད་རྒྱུན་ཡང་ཡོད།
- སྔོན་ཆད་ཡིན་ན་མ་ཎི་བུམ་སྒྲུབ་མཇུག་རྫོགས་པའི་ཉིན་རྗེས་མ་འདི་ལ།
- སྡེ་བ་འདི་གསུམ་གྱི་སྐྱེས་ཕོ་མོ་རྒན་གཞོན་ཚང་མ་གནས་འདིར་འཛོམས་ཏེ།
- གླུ་ལེན་གར་རྩེད་གྱི་གླིང་ག་གཏོང་བའི་སྲོལ་ཡོད་པར་བཤད་མོད།
- ཡིན་ཡང་བར་སྐབས་ཀྱི་བར་ཆད་ཅིག་གིས།
- སྲོལ་འདི་ད་ལྟ་སླར་གསོ་བྱེད་ཐུབ་མེད།
- དེ་བས་དུས་ད་ལྟ་མ་ཎི་བུམ་སྒྲུབ་མཇུག་རྫོགས་ཏེ།
- བླ་མ་ལ་མཇལ་བ་སོགས་ཀྱི་བྱེད་སྒོ་རྣམས་སྤེལ་ཚར་རྗེས།
- མ་ཎི་བུམ་སྒྲུབ་སྲུང་མཁན་རྣམས་ཀྱིས་དངོས་པོ་རྣམས་བསྡུ་གསོག་བརྒྱབ་སྟེ།
- ཕྱིར་རང་ཁྱིམ་དུ་ལོག་པ་ཡིན།
Loading ... Collection:
Subcollection
- Ritual
Subject
- Butter Lamp Offering
- Fasting Ritual
Referenced Places
- Dobi
Recording Location
- Dobi
Language
- Tibetan
Producer:
Mayuk Cultural Video Company
Producer:
རྨ་ཡུལ་རིག་གནས་བརྙན་འཕྲིན་སྒྲིག་བཟོ་ཀུང་སི།
Producer:
玛域文化影视制作公司
Editor:
Daglha Gyal
Editor:
སྟག་ལྷ་རྒྱལ།
Editor:
斗拉加
Director:
Lhugyal
Director:
ཀླུ་རྒྱལ།
Director:
李加
Other:
Tsering Bum
Other:
ཚེ་རིང་འབུམ།
Other:
才让本
Contributing Transcriber:
Kalwang
Copyright Holder:
Friends of Rural Community Development
Distributor:
乡村之友发展协会
Distributor:
གྲོང་གསེབ་འཕེལ་རྒྱས་སྐུལ་འདེད་ཚོགས་པ།
Publisher:
Tibetan and Himalayan Library
Data Entry:
Copyright Owner:
Friends of Rural Community Development
Year Published:
2011
Visibility:
Public (group default)
Shanti AV Id:
1729
