རི་དྭགས་སྐྱོ་གླུ་ནི་དུས་རབས་ཉི་ཤུ་བའི་ལོ་རབས་དགུ་བཅུ་བར་མང་ཚོགས་ཀྱིས་དགའ་བསུ་ཆེན་པོ་ཐོབ་ཡོད་པའི་གཞས་ཤིག་ཡིན། སྐྱོ་གཞས་འདིའི་འདྲེན་ཤུགས་གཙོ་བོ་ནི་གླུ་ཚིག་གི་ཕྱོགས་ན་ཡོད་དེ། གླུ་ཚིག་འདི་ཚེག་བར་བདུན་ཅན་གྱི་ཤོ་ལོ་ཀ་བརྒྱད་ཀྱིས་གྲུབ་ཅིང་། རི་དྭགས་ཉམ་ཆུང་ཞིག་གི་རང་གི་ཨ་མ་དེ་རྔོན་པས་བསད་པའི་སྔ་གཞུག་བར་གསུམ་གྱི་སྐྱོ་སྡུག་རྣམས་གླུའི་ལམ་ནས་མཚོན་ཐུབ་པར་བྱས་ཡོད། རི་དྭགས་ཉམ་ཆུང་དེ་མི་གཤིས་ཅན་དུ་བསྒྱུར་ནས་ཨ་མའི་མཉམ་དུ་ཡོད་སྐབས་ཀྱི་བདེ་སྐྱིད་དང་། ཨ་མ་གསོད་སྐབས་ཀྱི་འཇིགས་སྐྲག ཨ་མ་མེད་པའི་ལོ་ཟླའི་ཁྲོད་ནས་ཨ་མ་དྲན་ཚུལ། ད་དུང་མི་དང་རི་དྭགས་བར་གྱི་དབང་ཤུགས་བསྡུར་བ་སོགས་གོ་སླ་བའི་ཚིག་དང་། འགྲོས་དལ་བའི་འགྱུར་ཁུགས་ཀྱི་ལམ་ནས་མངོན་པར་བྱས་ཡོད་པས། གླུ་འདི་གོ་མ་ཐག་ཏུ་མིའི་སེམས་ལ་སྐྱོ་སྡུག་གི་ཚོར་བ་བཅོས་མིན་ཞིག་སྟེར་ཐུབ་པའི་ནུས་པ་ཡོད།