འབྲུག་གི་གླུ་གཞས་ཀྱི་སླ་ལས་ བསམ་ཡས་ཀྱི་ས་སླངས་འདི་ གཞུང་སྒྲའི་དབྱེ་ཁ་ནང་ཚུདཔ་ཨིནམ་ད་ གླུ་གཞས་འདི་ ནུབ་ཕྱོགས་རྫོང་ཁག་ སྤུན་ན་ཁ་རྫོང་ཁག་ རྟ་ལོག་གི་གཡུས་སྒོ་ནང་ འཐེན་སྲོལ་དང་ རྐྱབ་སྲོལ་ཡོད་མི་ཅིག་ཨིན། གླུ་གཞས་འདི་ ཞབས་དྲུང་འཇིགས་མེད་གྲགས་པ་གིས་ རྟ་ལོག་གི་གཙུག་ལག་ཁང་ཆེན་པོ་ བཞེངས་གནང་པའི་སྐབས་ བརྩམས་གནང་ཡོདཔ་སྦེ་ ཡིད་ཆེས་བསྐྱེདཔ་ཨིནམ་ད་ གླུ་གཞས་འདི་ནང་ གཙུག་ལག་ཁང་གི་ རྨང་གཞི་བཙུགས་པ་ལ་སོགས་པའི་དུས་ཚོད་ཚུ་ ནམ་དང་ནམ་ར་འབད་ཡི་གའི་ སྐོར་ལས་བཤདཔ་ཨིན་པས། ཏེ་གཙུག་ལག་ཁང་བཞེངས་ནིའི་དོན་ལུ་ ས་འདི་བྱི་བའི་ལོ་ལུ་བཅད་ཡོདཔ་ད་ འདི་ཡང་ བྱི་རྩི་གིས་ ས་དོང་གཏིང་རིངམ་སྦེ་བརྐོ་སྟེ་ ཚང་སྒྲིང་སྒྲིང་སྦེ་ བཟོ་དོ་བཟུམ་སྦེ་ ང་བཅས་ཀྱིས་ཡང་ དཔེ་འདི་ལུ་སྦྱར་ཏེ་ ས་གཞི་གུ་ ག་ཅི་ར་རྐྱབ་རུང་ གཏན་ཏོག་ཏོ་དང་ སྒྲིང་སྒྲིང་འོང་ཐབས་ ས་འདི་བྱི་བའི་ལོ་ལུ་བཅད་ཡོདཔ་ད་ བསམ་ཡས་ཀྱི་གྱངམ་འདི་ གླང་གི་ལོ་ལུ་དང་ གཙུག་ལག་ཁང་གི་སྒོ་འདི་ཡང་ སྟག་གི་ལོ་ལུ་ལྷོང་ཡོདཔ་མས། འདི་ལས་ རབ་གསལ་འདི་ཡོས་ཀྱི་ལོ་ལུ་ ལྷོང་ཡོདཔ་ད་ གནམ་པང་འདི་ འབྲུག་གི་ལོ་ལུ་ལྷོང་ དེ་ལས་ ཁྱིམ་ཐོག་འདི་ བྱའི་ལོ་ལུ་ལྷོང་ཡོདཔ་སྦེ་ བཤད་ནི་འདུག།  གླུ་གཞས་འདི་ ཞབས་དྲུང་འཇིགས་མེད་གྲགས་པ་ཀྱིས་ བོད་བསམ་ཡས་བསམ་ཡས་ཀྱི་ གཙུག་ལག་ཁང་ལུ་ གཞི་བཞག་སྟེ་ བརྩམས་བརྩམས་་ཨིན་ན་ ཡང་ན་ སྤུ་ན་ཁ་ལུ་ཡོད་མི་ རྟ་ལོག་དགོན་པ་ལུ་ གཞི་བཞག་སྟེ་ཨིན་ན་ འདི་ཁུངས་གཏུག་པའི་ཡིག་ཆ་ཚུ་ནང་མིན་འདུག། ག་དེ་སྦེ་ཨིན་རུང་ གླུ་གཞས་ཀྱི་ཚིག་རྒྱན་ལུ་བལྟ་བ་ཅིན་ བོད་ལུ་ཡོད་མི་ བསམ་ཡས་གཙུག་ལག་ཁང་དང་ འབྲུག་ལུ་ཡོད་མི་ རྟ་ལོག་དགོན་པ་གཉིས་ཆ་རང་ལུ འབྲེལ་བ་སྦོམསྦེ་ར་འདུག། རྟ་ལོག་གི་ མི་ཚུ་གིས་འབད་བ་ཅིན་ གླུ་གཞས་འདི་ རྟ་ལོག་གི་ གཙུག་ལག་ཁང་བཞེངས་པའི་ནམ་དུས་ལུ་ བརྩམས་བརྩམས་ཨིན་ཟེར་ བདེན་ཁུངས་བསྐྱལ་ནི་འདུག་ དེ་འབདཝ་ད་ གླུ་གཞས་འདི་གིས་ཚིག་ལུ་བལྟ་བ་ཅིན་ བོད་ལུ་ཡོད་མི་ བསམ་ཡས་ཀྱི་གཙུག་ལག་ཁང་ལུ་ ཁ་གསལ་སྦེ་སྟོན་སྟོནམ་བཟུམ་ཅིག་མཐོང་མས། གླུ་གཞས་ཀྱི་གོ་བ་འདི་ ལཱ་འབད་བའི་ ོཚིགས་གིས་རིམ་པ་ ག་དེ་སྦེ་ཨིན་ན་སྟོནམ་ཨིན་པས།