༉  ཕམ་རྒས་ཤོས་ཚུ་ལས་བརྒྱུད་དེ་འོང་པའི་ འཇིག་རྟེན་འཛམ་བུ་གླིང་ལ་ཟེར་བའི་གླུ་གཞས་འདི་ བཀྲ་ཤིས་སྒང་རྫོང་ཁག་ ཕོངས་མེད་རྒེད་འོག་ གཡུས་ཕིམ་སོང་ལས་ པདྨ་ལྷ་སྒྲོན་གྱིས་འཐེན་ཏེ་འདུག གླུ་གཞས་འདི་ ད་ལྟོ་ཚུན་ཚོད་ སྒྲ་པར་བཟུང་བཟུངམ་དང་ཡིག་ཐོག་གུ་ཕབ་ཕབ་མེདཔ་ཨིནམ་ད་ གླུ་གཞས་ཀྱི་ཚིག་ནང་ འཇིག་རྟེན་འཛམ་བུ་གླིང་ལ། །སྤྲང་མོ་སྐྱིད་པོ་འདུག་གོ །སྤྲང་མོ་སྐྱིད་པོ་མ་རེད། །ཡབ་ཡུམ་གཉིས་ཀྱི་བཀའ་དྲིན་ཟེར་ རང་དགའ་ཏོག་ཏོ་དང་སྐྱིད་ཏོང་ཏོ་སྦེ་སྡོད་ནི་ཡོད་མི་དེ་ རང་རང་གི་བསོད་བདེ་བསོད་ནམས་ལས་བརྟེན་ཏེ་མེན་པར་ ཡབ་ཡུམ་གཉིས་ཀྱི་བཀའ་དྲིན་ལས་བརྟེན་ཏེ་ཨིན་ཟེར་ ཕམ་གཉིས་ལུ་བཀའ་དྲིན་བསམ་དོ་ཡོདཔ་མས། དེ་ལས་མཇུག་གི་ཚིག་དེ་འབད་བ་ཅིན་ གཅིག་གིས་གཅིག་ལུ་ དམའ་ཕབ་རྐྱབ་པའི་ཚིག་ཅིག་ཡང་ཨིན་པས། དེ་ཡང་ མཚོ་འདི་མཚོ་ཆེན་ནང་ལ། །ཉ་མོ་སྐྱིད་པོ་འདུག་གོ །ཉ་མོ་སྐྱིད་པོ་མ་རེད། །མཚན་ལྡན་སྐྱིད་པོ་འདུག་གོ་ཟེར་ ཁྱོད་སྐྱིད་ཏོང་ཏོ་མེན་ ང་རང་སྐྱིད་པོ་ཨིན་ཟེར་ གཞན་མི་དམའ་ཕབ་རྐྱབ་ད་འཐེན་ནི་གི་ཚིག་ཅིག་ཡང་འདུག