བུ་ཆུང་ལྕགས་ཀྱི་ཐོཝ་གི་སྲུང་འདི་ ལྷུན་རྩེ་རྫོང་ཁག་ སྨད་མཚོ་རྒེད་འོག་ལས་ ཚེ་དབང་རིག་འཛིན་གྱིས་གཏངམ་ཨིན་པས། དེ་ཡང་ དྭཝ་བུཚ་གསུམ་ལས་ ཆུང་ཤོས་འདི་ སངས་རྒྱས་ཀྱི་སྤྲུལ་པ་འབདཝ་ལས་ གཡུས་ཁ་སྡོད་མི་ཚུ་ལུ་གནོདཔ་བཀལ་མི་ལྷ་སྲིན་འདི་ཚུ་བཏུལ་བའི་སྐོར་ལས་ཨིན་མས། ཁོང་སྤུན་ཆ་གསུམ་འདི་ གཡུས་ཚན་ཅིག་ནང་སོང་སྟེ་ དེ་ཁའི་བུམོ་སྤུན་ཆ་གསུམ་ཡོད་མི་ཚུ་དང་མཉམ་གཉེན་རྐྱབ་ཡོདཔ་ད་ ཁོང་སྤུན་ཆ་གསུམ་ཆ་ར་ གནམ་མེད་ས་མེད་ཁེ་ཀོ་ཡོད་པའི་ནང་ལས་ཆུང་ཤོས་དེ་ ཨ་ཙི་སྤྱང་དྲགས་སྦེ་ཡོདཔ་ལས་ བདུད་བཏུལ་ནི་དང་ མི་ངན་པ་ཚུ་ཚར་བཅད་ནི་ལུ་མཁས་དྲགས་ཡོདཔ་མ་ཚད་ མི་ཤི་ཤིཝ་ཡང་ ལོག་ལྷོང་ཚུགས་པའི་ནུས་པ་ཡོདཔ་ཨིན་མས། སྲུང་གི་གནད་དོན་འདི་ འདི་བཟུམ་གྱི་མི་ཚུའི་སྟོབས་ཤུགས་དང་ དགེ་བའི་བཤེས་གཉེན་གྱི་སྐུ་ཡོན་འདི་ བླ་ན་མེདཔ་ཅིག་ཨིན་པའི་སྐོར་ལས་སླབ་ཨིན་མས།