དབྱངས་ཀུན་དགའ་ཚེ་བརྟན་གྱིས་བརྩམས་པ་འེ་རེད།

འདི་ཁོས་དངོས་སུ་བརྩམས་པ་ཞིག་མ་རེད།

དམངས་ཁྲོད་ཀྱི་རེད། དེ་ལ་རྒྱན་བཏགས་པ་ཞིག་རེད།

དེའི་ནང་གི་ཚིག་ཡང་ཕར་ཆེར་ལྷ་སའི་ཕྱོགས་ཀྱི་དམངས་ཁྲོད་ཀྱི་རེད།

དེ་ནས་རང་གིས་ཀྱང་ཐུབ་ཚོད་ཀྱིས་ལེགས་པོ་ཞིག་བླངས།

དེ་ནས་དགེ་རྒན་ཚེ་བརྟན་གྱི་ཁོང་ཁྲི་འདུ་ལ་ཐེངས་ཤིག་འགྲོ་དགོས།

དེ་ནས་དུས་ཚོད་དང་ས་གནས་ཞིག་བཤད་ནས་དེ་ལ་སོང་དང་དེ་ན་སྒྲ་ལེན་མཁན་ཞིག་ཡོད་ཟེར།

ཁ་པར་ཨང་གྲངས་ཞིག་བཤད་ནས་དེ་ལ་སོང་ནས་སྒྲ་ལོངས་ཟེར།

ཁོ་ཁྲི་འདུ་ལ་འགྲོ་དགོས། ཕྱིར་ལ་ཐོན་དུས་འགྲིག་མིན་ལྟ་ཟེར།

གལ་ཏེ་མི་འགྲིག་ན་ཡང་བསྐྱར་སྒྲ་ལེན་ཟེར།

དེ་ནས་ངས་དུས་ཚོད་ལྟར་དུ་སྒྲ་ལེན་པར་སོང་།

སྒྲ་ལེན་དུས་དང་པོར་རང་ཉིད་ལ་དངོས་གནས་སྐྲག་སྣང་ཞིག་འདུག

རྣ་ཉན་མགོ་ལ་གྱོན་དུས་རང་གི་སྐད་གང་ན་ཡོད་པ་ཡང་མི་ཤེས་པའི་སྣང་བ་ཞིག་འདུག

དེ་ནས་བསྐྱར་ཉན་འགའ་བྱས་ནས་གླུ་ཞིག་བླངས།

ཡིན་ཡང་འགྲིག་མིན་རང་གིས་མི་ཤེས། སྒྲ་ལེན་མཁན་དེ་རྒྱ་མི་ཞིག་རེད།

རང་གི་གླུ་ཚིག་གི་ཕྱོགས་ནས་འགྲིག་མིན་མི་ཤེས།

དེ་རྗེས་དགེ་རྒན་ཀུན་དགའ་ཚེ་བརྟན་གྱི་ཁ་པར་ཡོང་ནས། ཁྱོད་སྒྲ་ལེན་དུ་འེ་སོང་ཟེར།

ངས་རང་ཉིད་སྒྲ་ལེན་ས་ན་ཡོད་ཞེས་ལན་བཏབས། དེས་ན་ཁོས་མི་ཞིག་མངགས་ཟེར།

ཁྱོད་ཀྱི་གླུ་དེ་འགྲིག་མིན་ཞིག་བལྟས་ན་བཟང་ཟེར།

སྐར་མ་འགའ་སོང་དུས་དགེ་རྒན་འཇམ་དབྱངས་བསྟན་འཛིན་ཐོན་སོང་།

དེ་ནས་ངས་ནང་ནས་བླངས་ནས་ཁོང་གིས་ཕྱི་ནས་ཉན།

ངས་བླངས་དུས་ཁོང་གིས་ཁྱོད་སྒོ་ལ་ཤོག་ཟེར།

ང་སྒོ་ལ་ཡོང་དུས་ཁྱོད་གང་ནས་ཡིན་ཟེར། རང་ཉིད་དཔའ་རིས་ནས་ཡིན་ཞེས་ལན་བཏབས།

འོ་འོ་ངས་ད་བར་དུ་གླུ་བ་འདི་འདྲའི་སྨྲ་དག་མོ་ཅན་ཞིག་མཐོང་མ་མྱོངས་ཟེར།

ཁྱོད་ཀྱི་གླུ་འདི་འབྲོག་སྐད་དྭངས་མ་ཡིན་ལ་སྨྲ་ཡང་ཧ་ཅང་དག་པ་ཞིག་རེད་ཟེར། གླུ་བླངས་པ་ལ་འདི་འདྲའི་གླུ་ཚིག་དག་པ་ཞིག་ཚོར་མ་མྱོངས་ཟེར།

དེ་དུས་ངས་གླུ་ཚིག་དེ་དག་པ་མང་སོང་ཚོད་རེད། ཁྱོད་གྱི་ཁ་ནས་ཅུང་ཡང་བ་བྱོས་དང་།

ཅུང་ཡང་བ་བྱས་ན་སྐད་ལ་འགུག་པའི་ཕན་པ་ཡོད་ཟེར།

དགེ་རྒན་གྱི་ང་ལ་ཕྱོགས་གང་ཐད་ནས་མཛུབ་སྟོན་རེ་བྱས་ནས་ཡང་གླུ་བླངས།

སྒྲ་བླངས་ཚར་ནས་ངལ་གསོས།

སྒྲ་ལེན་མ་མྱོངས་པའི་རྐྱེན་གྱིས་ཡིན་པ་རེད།

དེ་དུས་རང་ལ་ཡང་དགོད་སྤྲོ་བ་ཞིག་བྱུང་ཡོང་།

ཉིན་དེར་སྒྲ་བླངས་དེ་ཕྱིར་ལ་ཡོང་ནས་ནུབ་ཇ་འཐུང་ནས་གཉིད་དུས།

མཚན་གང་བོར་རྨི་ལམ་དུ་གླུ་དེ་གཅིག་པོ་བླངས་ནས་ནམ་ལངས།

གླུ་དེ་བླངས་ནས་མ་འགྲིག་པར་ཡང་ལེན་བྱས་ནས་ནམ་ལངས།

རེད། གླུ་དེ་ལ་དོན་སྙིང་ཆེན་པོ་འདུག ཁྱོད་ཀྱི་མི་ཚེ་ཐོག་ནས་ཐེངས་དང་པོ་སྒྲར་བླངས་པའི་གླུ་དེ་རེད།

བྱ་བ་དེ་ལ་ད་སྐབས་ཕྱིར་དྲན་བྱས་དུས་བརྗེད་ཐབས་མེད་པའི་བྱ་བ་ཞིག་རེད།

དེའི་ཕྱི་ཉིན་དགེ་རྒན་ཀུན་དགའ་ཚེ་བརྟན་ཁྲི་འདུ་ནས་ཕྱིར་ཟི་ལིང་ལ་ཐོན།

ང་ལ་ཁ་པར་ཡོང་ནས་ཁྱོད་ཀྱི་སྒྲ་བླངས་འེ་ཚར་ཟེར། སྒྲ་བླངས་ཚར་ཞེས་བཤད།

འོ་དེ་ན་ཤོག་དང་གླུ་ལ་ཉན་དུ་འགྲོ་ཟེར།

དགེ་རྒན་ཀུན་དགའ་ཚེ་བརྟན་ཆུང་དུས་མཐོང་མ་མྱོངས་ལ་སྒྲ་བསྡུད་འཕྲུལ་ཆས་ནང་ནས་མང་བོ་གོ་མྱོང་།

ཁོང་མིང་གྲགས་ཅན་ཡིན་པས་རང་གི་སེམས་སུ་སྐྲག་སྣང་ཅུང་ཡོད།

ད་ངས་བླངས་པ་མ་འགྲིག་ན་ཅི་ཟེར་བསམ་ནས་ཅུང་སྐྲག་སྣང་འདུག

དེ་ནས་ཉན་དུ་སོང་།

ཁོས་ཚིག་བཞི་ལྔ་ཞིག་ལ་ཉན་ནས་འོ་ད་ཧ་ཅང་འགྲིག་གི

རང་ལ་སྐྲག་སྣང་གི་སེམས་པ་དེ་རིམ་གྱི་བབས་སོང་།

དེ་ནས་ཁོང་གིས་ཧ་ཅང་འགྲིག་གི ངའི་སེམས་ཀྱི་ཚད་ཐིག་གི་ཟིན་ཐོ་ཡང་བརྒལ་འདུག་ཟེར།

དེ་དུས་རང་ལ་ཡང་ཡིད་ཆེས་ཞིག་ཡོད་སོང་།

སྙིང་སྟོབས་ཡང་ཅུང་རྒྱས་པ་འདུག

ངའི་གླུ་འདི་མི་འགྲིག་གི་ཞེས་བཤད་ན་ངས་ཅི་བྱེད།

དེ་འདྲ་མ་ཡིན་པར་བཟང་བ་བརྗོད་དུས་སེམས་ནས་ཅུང་བདེ་བོ་འདུག

དེའི་རྗེས་ནས་མཚོ་སྔོན་གྱི་དཔེར་ན་དགོང་ཚོགས།

ལོ་སར་དགོང་ཚོགས་ལྟ་བུ། དེ་ལས་གཞན་པའི་མཚོ་སྔོན་གྱི་འབྲོག་ས་ནས་དབྱར་དུས་སུ་དགུང་ཚོགས་འཚོགས་ས་མང་བོ་ཡོད།

དེ་ནས་བརྙན་འཕྲིན་ཁང་ལ་སོགས་པའི་རང་ཉིན་གདན་འདྲེན་བྱེད་མཁན་མང་བོ་ཡོད།

དེ་དུས་སུ་ཁོང་ཆོའི་དགོང་ཚོགས་ལ་གླུ་དབྱངས་རེ་དགོས་ཟེར།

དེ་དུས་རང་གི་འགྲོ་སོང་གཏོང་མི་དགོས་པར་གླུ་རེ་བླངས་ན་ཆོག

དེ་ནས་གླུ་༼སྐྱེ་དགུའི་འཕྲིན་བཟང་༽ ༼ཚེ་འགྲོ་མི་ཡི་སྐྱིད་རེད༽

དེ་སོགས་གླུ་དབྱངས་རེ་གཉིས་ཞིག་ལ་རང་ངོས་ནས་འགྲོ་སོང་གཅིག་ཀྱང་མ་བྱས། རང་ཉིད་ལ་ཕན་ཆེན་པོ་ཐོགས་སོང་།

དེ་ང་ལ་མཚོན་ན་ཕ་ཡུལ་མཚོ་སྔོན་རེད།

ངའི་ཡུལ་ཕྱོགས་ནས་ཡང་དེ་ལ་དགའ་བསུ་ཆེན་པོ་ཐོབ་པ་ཞིག་རེད།

ཡིན་ཡང་ང་ཚོ་མང་ཚོགས་ཞིག་ལ་མཚོན་ན་།

ཁྱོད་ཀྱིས་བཤད་པའི་རྒྱལ་ཡོངས་རིམ་པའི་བྱ་དགའ་འདི་འདྲ་རེ་ཐོབས་པ།

དེ་ལ་གཞི་རིམ་ནས་མང་ཚོགས་ཀྱིས་དེ་ལ་ཉམས་ཆེན་པོ་འཇོག་པ་མ་རེད།

རེད་རེད།

གཞན་པའི་དགོང་ཚོགས་ཀྱི་སྐབས་སུ་བླངས་པའི་གླུ་ཡིན་ན་ཧ་ཅང་ཁྱབས་ཆེན་པོ་ཞིག་རེད། དེ་འདྲའི་སྣང་བ་ཞིག་ཡོད།

ཁྱོད་ཀྱི་བལྟས་ན་ཅི་འདྲ་རེད།

དེ་རེད། ང་འགྲན་ཚོགས་སུ་ཞུགས་དུས་ཕར་ཆེར་འབྲོག་ཁུལ་ནས་བརྙན་འཕྲུན་ལ་ལྟ་བ་ཕར་ཆེར་སྟབས་བདེ་མ་རེད།

དེ་དུས་སྤྱི་ལོ༢༠༠༢ ༣ ༤ ཙམ་གྱི་དུས་སྐབས་ཞིག་རེད།

དེ་དུས་འབྲོག་ཁུལ་ས་ཆ་མང་བོ་ཞིག་ནས་ཕར་ཆེར་བརྙན་འཕྲིན་ལ་བལྟ་བ་དེ་འདྲའི་སྟབས་བདེ་ཞིག་མ་རེད།

དེ་ནས་ད་བར་དུ་དགོང་ཚོགས་དང་།

ཡང་གཞན་པའི་འོད་སྡེར་རེ་དཔར་བསྐྲུན་བྱེད་པ་སོགས་སུ་གླུ་རེ་བླངས།

དེ་ནས་རང་ལ་རིམ་གྱིས་གོ་སྐབས་ཇེ་མང་དུ་སོང་ནས།

བྱ་བ་ཡང་མང་བོ་བསྒྲུབས།

དེ་དུས་རང་ལ་ཉམས་མྱོངས་དང་བསམ་བློ་ཡང་ཇེ་ཤེས་རེད།

གླུ་ལེན་པ་དང་། མིའི་བར་གྱི་འབྲེལ་བ་སོགས་ཇེ་ལེགས་སུ་སོང་།

འབྲོག་ས་དང་གྲོང་ཁྱེར་ནང་གི་བྱ་བ་བསྒྲུབས་སྟངས་སོགས་ཀྱང་མི་འདྲ་ལ།

མི་རྣམས་ཀྱི་བསམ་བློ་ཡང་མི་མཚུངས།

ང་ལ་མཚོན་ན་མང་བོ་ཞིག་གི་ཆ་ནས་དཀའ་ངལ་བྱུང་།

དེས་ན་གོང་ནས་ཁྱེད་ཀྱིས་གླུ་དབྱངས་བླངས་པ་དང་།

སྤྱིར་བཏང་གི་མི་ཚེའི་ལོ་རྒྱུས་མདོར་བསྡུས་བ་ཞིག་དང་།

གླུ་དབྱངས་ཀྱི་གོ་རིམ་ལ་ཅི་ལྟར་ཞུགས་པ་སོགས་བཤད་སོང་།

དེས་ན་གོ་རིམ་འདིའི་ཁྲོད་ནས་ང་ཚོས་མདོར་བསྡུས་ཞིག་བཤད་ན།

ཁྱོད་ཀྱིས་སློབ་གྲྭ་སོགས་འདོན་མ་ཐུབ་པར།

སྤྱིར་བཏང་གི་བུ་མོ་ཞིག་གིས་

རིམ་གྱིས་རང་གི་ཕུགས་བསམ་དང་རེ་བ་དེ་བཟུང་ནས།

གང་འདྲ་ཞིག་བྱས་ནས་མི་ཚེའི་ལམ་ལ་ཞུགས་པ་མཐོང་ཐུབ།

དེ་ན་དེ་ལས་གཞན་པའི་ཁྱོད་ཀྱིས་གླུ་དབྱངས་ལེན་པ་དང་གཞན།

ཚོད་ལྟ་དང་སློབ་སྦྱོང་སོགས་ཀྱི་ཕྱོགས་ནས་གྲུབ་འབྲས་དང་རང་གི་མྱོང་ཚོར་རེ། རྒྱ་ཆེའི་མང་ཚོགས་ལ་བཤད་ན། ད་ང་རང་ལ་མཚོན་ན་དང་པོ།

ངའི་སྐབས་སུ་གླུ་སྦྱངས་པ་དང་འགྲོ་འདུག་སོགས་སུ་དགེ་རྒན་གྱི་ངོ་གདོང་ལ་བལྟ་དགོས།

དེ་དུས་ང་ལ་ཆ་རྐྱེན་ཞན་པ་རེད།

རིན་གོང་བཤད་ན་ཡང་མི་འགྲིག་གི མ་བཤད་ན་ཡང་ཉིན་ལྟར་གཞན་པ་ལ་རོགས་བྱེད་དགོས་ན་ཡང་དཀའ་མོ་རེད།

མཚོ་སྔོན་ལ་སོང་ནས་མཚོ་སྔོན་གྱི་གླུ་གར་ཚོགས་པ་ནས་བསྡད་པ་རེད།

དེ་དུས་འཁྲབ་སྟོན་སོགས་སུ་འགྲོ་མ་དགོས་དུས་རྒྱུན་པར་སྒྱུ་རྩལ་ཕྱོགས་ཀྱི་དཔེ་ཆ་རེ་ལ་བལྟས།

རང་གི་ཐུབ་ཚོད་ཀྱིས་འབད་པ་བྱས་ནས་རྒྱ་ཡིག་དང་བོད་ཡིག་སོགས་ཀྱི་དཔེ་ཆ་ལ་བལྟས།

དེ་ནས་རང་གིས་འདང་བརྒྱབ་ནས། གང་ལྟར་ཆེན་པོ་ཞིག་མ་ཐུབ་ཀྱང་།

གླུ་ཞིག་ལེན་པའི་སྐབས་ཡིན་ཡང་གཞན་པའི་རང་ལ་ཁྲིད་མི་དགོས་པ་ཞིག་ཡིན་ན་རང་ལ་ཡང་སྟབས་བདེ་རེད་བསམ་ནས།

དེའི་ཕྱོགས་ནས་བལྟས།

ད་ཕར་ཆེར་རང་ཉིད་གླུ་ལེན་པའི་རྒྱུ་རྩལ་ལ་དགའ་བའི་རྐྱེན་གྱིས་་ཡིན་པ་རེད།

\

དེ་ནས་དགེ་རྒན་སྨན་བླ་སྐྱབས་དང་དགེ་རྒན་ཀུན་དགའ་ཚེ་བརྟན་སོགས་རང་ལ་དངོས་གནས་བཀའ་དྲིན་ཅན་ཡིན།

ཁོ་ཚོ་ལ་གླུ་ཚིག་འགྲིག་པ་རེ་ཡོད་དུས་ང་ལ་སྦྱིན་ནས་ཚོད་ལྟ་བྱེད་དུ་བཅུག

དེ་དུས་ཡང་དབྱངས་ཀྱི་ཕྱོགས་ནས་གཞན་པ་ཞིག་ལ་རེ་བ་བྱེད་དགོས་པའི་དཀའ་ཁག་འདུག

དེ་ནས་རང་གི་ཚོད་ལྟ་རེ་བྱས་ནས་དགེ་རྒན་ལ་དྲིས།

རང་གི་བྲིས་ནས་ཚོད་ལྟ་རེ་མ་བྱས་ན་དགེ་རྒན་གྱི་ངའི་ཆུ་ཚད་གང་འདྲ་ཡིན་པ་མི་ཤེས། དེ་ནས་རང་གི་ཐེངས་དང་བོ་བྲིས་པ་ཕར་ཆེར།

ངའི་གླུ་དབྱངས་ཆེད་བསྒྲིག་གི་ནང་ན་ཡོད་པའི། བྱ་དཀར་པོ་ཞེས་པ་དེ་རེད། ཐེངས་དང་བོ་གླུ་དེ་བསྒྲིགས་པ་རེད།

དེ་བྲིས་ནས་ཡང་འགྲིག་མིན་མི་ཤེས་པས།

ཨ་ཁུ་སྨ་བླ་ལ་བལྟ་རུ་བཅུག་ནས་ཁྱོད་ཀྱིས་ཉོན་དང་ངས་ལེན་ཞེས་ནས་བླངས།

ཁོས་ཕར་ཆེར་འགྲིག་པ་རེད་ཟེར།

དེ་ནས་རོལ་དབྱངས་ཡང་མ་ལས་པར་དགེ་རྒན་ཞིག་ལ་ཞུ་དག་ཞིག་བྱེད་དུ་འཇུག་དགོས་བསམ་ནས་དེ་འདྲ་ཞིག་བྱས་ནས་བསྐྱུར།

དེའི་ཕྱིར་ལོ་མཚོ་སྔོན་གྱི་ལོ་སར་དགོང་ཚོགས་ལ་ཉེ་དུས།

ཁོང་ཚོའི་ལས་བྱེད་མི་སྣ་རྣམས་ཀྱིས་ཁ་པར་ཡོང་ནས། ཁྱོད་དགོང་ཚོགས་སུ་ཞུགས་པའི་གྲ་སྒྲིག་འེ་ཡོད། ཡོད་ན་གླུ་ཁྱེར་ཤོག་དང་བལྟ་ཟེར།

དེ་དུས་ང་ལ་གླུ་གཏན་ཁེལ་གྱི་གྲ་སྒྲིག་མེད་ཀྱང་།

ངས་ཡོད་ཁུལ་བྱས་ནས་ངས་གྲ་སྒྲིག་བྱེད་བཞིན་ཡོད། གྲ་སྒྲིག་བྱས་ཚར་དུས་ཁྱེར་ཡོང་ཞེས་ལན་བཏབས།

དེ་རྗེས་བྱ་བ་ཞིག་གི་དབང་གིས་དགེ་རྒན་འབྲུག་ལྷ་དང་མཇལ།

དེ་ནས་དགེ་རྒན་འབྲུག་ལྷ་ལ་ཁྱེད་ལ་གླུ་ཚིག་རེ་འེ་ཡོད། ཡོད་ན་ང་ལ་དགོས་ཞེས་བཤད།

དེ་དུས་ཁོང་གིས་གནས་སྐབས་སུ་མེད་ཟེར།

དེའི་ཕྱིར་ཉིན་ཁོང་གི་ཁ་པར་ཡོང་ནས་ཁོས་གཞན་པ་ཞིག་ལ་བྲིས་པའི་གླུ་ཚིག་ཞིག་ཡོད། ཁྱོད་ལ་བྲེལ་བ་ཡོད་ན་ཁྱེད་ལ་སྟེར་ཟེར།

དེ་ནས༼ཁྲི་ཤོར་རྒལ་མོ༽གླུ་ཚིག་ང་ལ་སྦྱིན།

སྔོན་ལ་དགེ་རྒན་ཀུན་དགའ་ཚེ་བརྟན་ལ་ཁ་པར་བཏངས་ནས་ང་ལ་གླུ་ཚིག་དགོས་པ་བཤད་ཀྱང་།

ཁོང་མཚོ་སྔོན་ན་མེད་སྟབས་ཉིན་བཅུ་ཡས་མས་ཞིག་ལ་སྒུག་ཟེར།

དེ་འདྲ་ཞིག་ལ་བརྙན་འཕྲིན་ཁང་གི་དགེ་རྒན་རྣམས་ལ་སྒུག་ཚོད་ཡོད་པ་མ་རེད།

དེ་ནས་གཞན་པ་མང་བོ་ཞིག་ལ་ཁ་པར་བཏང་དུས།

དགུན་དུས་ཡིན་སྟབས་མང་བོ་ཞིག་ཕྱོགས་སོ་སོའི་དགོང་ཚོགས་ལ་བྲེལ་བཞིན་ཡོད།

གོ་སྐབས་འདི་བསྐྱུར་ན་མི་འགྲིག་གི་བསམ།

བརྙན་འཕྲིན་ཁང་གིས་ཡང་རང་ལ་མཐོང་ཆེན་བྱས་ནས། རྒྱུན་པར་རང་གི་བཤད་པ་ལྟར་བཀོད་སྒྲིག་སོགས་བྱས་པ་རེད།

ད་ཐེངས་རང་གི་གོ་སྐབས་རེད། དམ་འཛིན་མ་བྱས་ན་མི་འགྲིག་གི་བསམས་ནས།

ཡང་རང་གི་ཚོད་ལྟ་ཞིག་བྱེད་དགོས་རྒྱུ་རེད་བསམ།

དེ་ནས་གླུ་ཚིག་དེ་བཟུང་ནས་གཞུང་ལས་ཁང་ལ་སོང་ནས་བྱ་བ་ལས་ཞོར་དུ་དེ་ལ་བལྟ་བ་དང་ལམ་བར་སོགས་ནས་བསམ་བློ་རེ་བཏངས།

གཞུང་ལས་ཁང་ནས་ཆུ་ཚོད་ཕྱེད་ཡས་མས་ཞིག་ནས་ཕར་ཆེར་བསྒྲིགས་ཐུབ།

ཕྱིར་ཉིན་ཁྱིམ་ལ་ཡོང་ནས་རེ་བལྟས་དུས་ཕར་ཆེར་མི་འགྲིག་ས་ཆེན་པོ་མེད་པ་འདྲ།

རང་གི་སྐད་ལ་མི་འགྲིག་ས་མེད་སྣང་ཞིག་རེད།

ད་གང་ལྟར་འགྲིག་མིན་མི་ཤེས། ཡིན་ཡང་ལེན་འཇོག་བསམ།

རོལ་དབྱངས་ལས་ས་ཁྲི་འདུ་རེད། དེ་ལ་དྲ་ཐོག་ནས་ཁྲི་འདུ་ལ་བསྐུར་སོང་།

གཟའ་འཁོར་གཅིག་གི་ནང་ནས་འགྲུབ་པ་བྱས་ནས་བརྙན་འཕྲིན་ཁང་ལ་ཁྱེར་ནས་།

ཁོང་ཚོ་ལ་ཉན་དུ་བཅུག་དུས། ཁོང་ཚོས་ད་ལོའི་གླུ་དབྱངས་ལེགས་པོ་འདུག་ཟེར།

གླུ་དབྱངས་དེ་གང་རེད།

ཁྲི་ཤོར་རྒྱལ་མོ་རེད།

འོ་རེད་ཁྲི་ཤོར་རྒྱལ་མོ།

གླུ་དེ་རང་གིས་ཐེངས་གཉིས་པ་དབྱངས་བརྩམས་པའི་གླུ་རེད།

དེ་ནས་དབྱངས་ཐེངས་གཉིས་ལ་བྲིས་དུས་ཅུང་ཤེས་པ་ཞིག་རེད།

དེ་དུས་གླུ་བ་གཞན་པ་རྣམས་ལ་དབྱངས་འབྲི་མ་མྱོངས། རང་གི་རང་ལ་བྲིས་ནས་ཚོད་ཅུང་ཟིན་པ་ཞིག་རེད།

མཐོ་དམན་དང་རང་གི་སྐད་ཀྱི་ཆ་ནས།

ཅི་འདྲ་བྱས་ནས་རང་གི་ཁྱད་ཆོས་ཐོན་ཐུབ་པ་སོགས་རང་ལ་ཚོད་ཟིན་པ་ཞིག་རེད།

དེའི་རྗེས་ནས་རང་གི་བྲིས་ནས་ཚོད་ལྟ་རེ་བྱས་ནས་ཇེ་མང་ནས་ཇེ་མང་རེད།

དེ་དུས་རང་ལ་ཉམས་མྱོངས་ཡང་ཇེ་མང་རེད།

རེད་ཉམས་མྱོངས་ཡང་ཇེ་མང་རེད།

ད་ལྟ་ཡིན་ན་བོད་ཀྱི་སྤྱི་ཚོགས་སྟེང་ན་བོད་ཀྱི་གླུ་བ་གླུ་མ་མང་བོ་ཞིག་འདུག

དེའི་ནང་ཡིན་ན་རྒྱ་སྐད་ཀྱི་གླུ་དབྱངས་རྡུང་ལེན་མཁན་དང་།

བོད་སྐད་ཀྱི་གླུ་དབྱངས་རྡུང་ལེན་མཁན་དང་སྐད་རིགས་གཞན་གཞན་པ་ལེན་མཁན་ཡང་ཡོད་པ་རེད། དེ་ཡིན་ན།

དཔེར་ན། བོད་སྐད་ཀྱིན་ལེན་མཁན་ལས་རྒྱ་སྐད་ཀྱི་ལེན་མཁན་མང་བའི་སྣང་བ་ཞིག་འདུག

ཁྱོད་རང་ཉིད་ལ་མཚོན་ན་ཐོག་མཐའ་བར་གསུམ་དུ་བོད་སྐད་རྐྱང་བའི་ལེན་པ་ཞིག་རེད།

རང་གི་ཕ་སྐད་གཙང་མའི་ལེན་མཁན་ཞིག་རེད།

དེ་ཡིན་ན་ཁྱད་པར་དུ་གཞི་རིམ་གྱི་དམངས་ཚོགས་མང་བོ་ཞིག་གིས་ཁྱོད་ལ་སྐད་སྙན་མོ་ཞིག་ཡོད་པ་ལས་གཞན།

ཚིག་འབྲུ་གསལ་ཞིང་དག་པའི་ཁྱད་ཆོས་ཞིག་ཡོད་ཟེར་ནས་ཚང་མས་དགའ་བསུ་བྱེད་བཞིན་ཡོད།

ཁྱོད་རང་ཉིད་ཀྱིས་ཐོག་མཐའ་བར་གསུམ་དུ་གླུ་དབྱངས་འདི་བོད་སྐད་ཀྱི་ལམ་ནས་ལེན་བཞིན་པ་འདི་རྒྱུན་འཁྱོངས་བྱེད་པའི་རྒྱུ་མཚན་ཅི་ཡིན།

དེ་ལ་བསམ་ཚུལ་གང་འདྲ་ཞིག་འདུག

དེའི་ཕྱོགས་ཀྱི་བཤད་ན།

ང་ཚོ་བོད་ཀྱི་གླུ་བ་ཚོའི་གྲས་སུ།

རྒྱ་སྐད་དང་བོད་སྐད་སོགས་ཀྱི་ལམ་ནས་ལེན་མཁན་ཧ་ཅང་མང་བོ་རེད།

དེ་མི་རེ་རེ་ནས་དམིགས་ཡུལ་དང་འཁོར་ཡུག་ཡང་མི་མཚུངས་པའི་དབང་གི་རེད།

དཔེར་ན། ལ་ལས་གླུ་རེ་བླངས་ན་རང་གི་མིང་གྲགས་པ་དམིགས་སུ་བཟུང་ནས་ཡོད།

འགའ་རེ་དཔལ་འབྱོར་ལ་བསམ་ནས་རྒྱ་སྐད་བྱས་ན་རྒྱ་སྐད་གོ་མཁན་མང་བ་དང་བོད་སྐད་གོ་མཁན་ཉུང་བ་རེད།

ཉན་མཁན་གྱི་ཁྲོམ་ར་ལྟ་བུ་རེད།

རེད། ཁྲོམ་ར་ཇེ་ཆེ་རེད།

གཙོ་བོ་དམིགས་ཡུལ་ཡིན་པ་རེད།

འགའ་རེ་བོད་སྐད་རྐྱང་བའི་ལེན་མཁན་ཚོ།

དངོས་གནས་བོད་སྐད་རྐྱང་བའི་ལེན་མཁན་སྐོར་ཞིག་ཡོད་པ་རེད།

དེ་ཚོ་ང་རང་གི་བསམ་ཚུལ་ལྟར་བཤད་ན་ཕར་ཆེར།

གཙོ་བོ་རང་གི་སྲོལ་རྒྱུན་གྱི་རིག་གནས་འདི་བསམ་པ་རེད།

ང་རང་གི་བསམ་ཚུལ་ཡིན་ན།

ཆུང་དུས་དངོས་གནས་རྒྱ་སྐད་ཆེན་པོ་ཞིག་བཤད་ཤེས་པ་མ་རེད།

ད་སྐབས་རྒྱ་སྐད་རྐྱང་བའི་ལེན་མཁན་རྣམས་ཀྱིས་ཀྱང་ཆུང་དུས་རྒྱ་སྐད་ཤེས་པ་མ་རེད།

རྗེས་ནས་གྲོང་ཁྱེར་ལ་ཡོང་ནས་རྒྱ་སྐད་རེ་སྦྱངས་ནས་བོད་སྐད་བརྗེད་སོང་བ་རེད།

ང་རང་གི་བསམ་ཚུལ་ཡིན་ན།

ཆུང་དུས་རང་གི་རྒྱ་སྐད་ཀྱི་གླུ་འགའ་རེ་བླངས་པ་རེད། ངའི་སློབ་ཁྲིད་ཀྱི་སྐབས་སུ་ངའི་དགེ་རྒན་རྒྱ་ཡིན་པ་རེད།

དེའི་རྐྱེན་གྱི་རྒྱ་སྐད་ཀྱིས་མ་བླངས་ན་འགྲིག་མིན་ཡང་མི་ཤེས་པ་རེད།

མཐའ་གཅིག་ཏུ་རྒྱ་སྐད་ཀྱིས་ལེན་དགོས་པ་རེད། དེ་ཡང་རང་ལ་གྲུབ་འབྲས་ལེགས་པོ་ཐོབ་སོང་།

རྒྱ་སྐད་མ་ཤེས་ཀྱང་རྒྱ་སྐད་ཀྱིས་བླངས་ནས་འབད་པ་བྱས་དུས།

རང་ལ་རྒྱ་སྐད་ཀྱི་ཕྱོགས་ནས་ཕན་པ་ཆེན་པོ་ཐོབ།

སྐབས་སྐབས་སུ་དེ་ཡང་དགོས་མཁོ་ཅན་ཞིག་རེད།

རང་གི་དང་པོ་གོམ་ཁ་དང་བོ་སྤོ་དུས་དངོས་གནས་སྡུག་མང་བོ་མྱངས།

ཆུང་དུས་ནས་ཨ་མ་ནད་པ་ཡིན་པས་རང་གིས་ཞིང་ལས་དང་ཕྱུགས་ལས་སོགས་བྱས།

ལོ་དགུ་ནས་ཕྱུགས་འཚོ་བ་དང་འོ་མ་འཇོ་བ།

ཞིང་འདེབས་པ་དང་རྡོ་ཁུར་བ། ཐ་ན་ཟ་མ་ལས་པ།

ཆུ་ཁུར་བ། ང་ཚོའི་ཕ་ཡུལ་ནས་འཐུང་ཆུ་ཁུར་བ་ཡང་རི་གཟར་བས་ཧ་ཅང་དཀའ་བོ་འདུག

ལས་ཀ་ཆེ་ཆུང་མ་ལས་པ་གཅིག་ཀྱང་མེད།

དེ་ནས་སྒྱུ་རྩལ་གྱི་ལམ་ལ་ཞུགས་པ

རང་གི་འཚོ་བ་འདི་དངོས་གནས་མི་ཞིག་ཡིན་ན།

རང་གིས་རང་ལ་མཐོང་ཆེན་བྱེད་རྒྱུ་མ་རེད། མཐོང་ཆུང་བྱས་པ་ཡིན། རང་གི་མི་ཤེས་པའི།

འགྱུར་ཟློག་ཧ་ཅང་ཆེན་པོ་རེད།

རང་ཉིད་ཆུང་དུས་རྒྱ་སྐད་གཅིག་ཀྱང་མི་ཤེས།

རང་གི་ཕ་ས་འདིའི་ཆགས་ཚུལ་ཙམ་ཞིག་ལས། འཇིག་རྟེན་གྱི་འགྱུར་ཟློག་དེ་ཅི་འདྲ་ཞིག་ཡིན་པ་ཡེ་ནས་མ་ཤེས།

ཕ་ཡུལ་ནས་ཁ་བྲལ་ཏེ་ས་གཞན་ཞིག་ལ་ཐོན་དུས། རྒྱལ་ཁབ་གཞན་པ་ཞིག་ལ་ཐོན་པ་དང་གཅིག་མཚུངས་རེད།

སྐད་ཆ་མི་ཤེས་ལ་འགྲོ་ལུགས་ཡང་མི་ཤེས།

དེར་སོང་ནས་ཕྱོགས་མང་བོ་ཞིག་གི་ཆ་ནས་སྦྱངས་བ་བྱས།

ཡུལ་དེ་ནས་གོམ་པ་ཞིག་བཙུགས་ནས་འགྲོ་དགོས་ན་དངོས་གནས་ལས་སླ་མོ་ཞིག་མ་རེད། གོ་རིམ་དེའི་ལམ་བར་ནས་སྡུག་མང་བོ་མྱངས་སོང་།

རང་གི་གོམ་པ་དེ་སྤར་ནས་བྱ་བ་ཡང་ལམ་འགྲོ་བྱུང་སོང་།

སྤྱི་ཚོགས་ནས་ཡང་མི་མང་བོ་ཞིག་གིས་རོགས་རམ་བྱེད་པའི་ཆ་ནས་ཡང་།

རང་གི་དངོས་གནས་འབད་པ་བྱས་ན་གཞན་པས་ཀྱང་འབད་མཁན་ལ་རོགས་རམ་བྱས་ན་འགྲིག་གི་བསམ་ནས།

རོགས་རམ་བྱེད་མཁན་ཡང་མང་བོ་ཞིག་ཡོད་སོང་།

དེ་ནས་བྱ་བ་ཡང་ལམ་འགྲོ་སོང་ནས། གོ་སྐབས་ཇེ་མང་ནས་ཇེ་མང་དུ་སོང་དུས།

གོམ་ཁ་ཡང་ཇེ་བདེ་ནས་ཇེ་ལེགས་སུ་སོང་། གོམ་ཁ་དེ་རིམ་གྱི་བདེ་ལམ་ལ་ཐོན་དུས།

རང་གི་སེམས་ལ་དངོས་གནས་ལོ་འདི་འདྲ་ཞིག་ལ་རང་གི་འབད་པ་བརྩོན་འགྲུས་བྱས་པའི་གྲུབ་འབྲས་ཐོབ་པ་ཤེས།

སྐྱིད་ཞིག་ཐོབ་དགོས་ན་སྡུག་བསྔལ་ཞིག་བརྒྱུད་དགོས་པ་ཤེས་སོང་།

ངས་བསམ་ན་བོད་ཀྱི་གླུ་བའི་ནང་ན་རྒྱའི་སྐད་ཡིག་དང་བོད་སྐད་ཡིག་ཚང་མ་ཤེས་མཁན་ཡང་ཡོད།

བོད་ཡིན་ལ་བོད་སྐད་མི་ཤེས་མཁན་ཡང་ཡོད།

དེ་ང་གཅིག་པུ་མ་ཡིན་པར་འབྲོག་ས་ནས་ཡོང་ཡང་བོད་སྐད་མི་བཤད་མཁན་ཡང་ཡོད།

ད་ས་ཆ་རེ་རེ་ནས་མི་མི་འདྲ་བ་དང་གཙོ་བོ་ཁོར་ཡུག་གི་དབང་གིས་རེད་འདོད་གི

ཁོར་ཡུག་ན་མཛུབ་སྟོན་བྱེད་མཁན་མེད་ན་རང་ལ་གང་གི་ཕྱོགས་ནས་འགྲིག་མིན་མི་ཤེས་པ་རེད།

དེ་ནས་རང་གིས་གླུ་བླངས་ནས་འདི་འདྲ་བྱས་ན།

ཉན་མཁན་ཡིན་ཡང་ཆོག དུས་དུས་སུ་འབྲེལ་འདྲིས་རེ་བྱས་དུས།

བགྲོ་གླེང་གི་སྐབས་སུ་ཁམས་ཕྱོགས་དང་ས་ཆ་སོ་སོ་ཡིན་ཡང་ང་ཚོ་བོད་ཀྱི་གླུ་བ་རྣམས་ཀྱིས་གླུ་བླངས་ན་འབྲོག་སྐད་དང་རོང་སྐད་སོགས་སུ་ཁྱད་ཆེ་བའི་མི་གོ་ས་མང་བོ་འདུག་ལ།

ཁྱོད་ཀྱི་གླུ་ལ་གང་ནས་ཉན་ན་མི་གོ་ས་མེད་པ་རེད་ཟེར།

དེ་དུས་རང་གིས་ཀྱང་བསམ་བློ་བཏང་ནས་དེ་ཅིའི་རྐྱེན་གྱིས་ཡིན་ནམ་བསམ།

རྗེས་ནས་རིམ་གྱིས་བསམ་བློ་བཏང་སྟེ་རང་གི་ཁྱད་ཆོས་གང་ཡིན་པར་བསམ།

རང་ལ་ཁྱད་ཆོས་ཞིག་མེད་ན་སྐད་དང་རྒྱུན་ལྡན་གྱི་བྱ་བ་མང་བོ་ཞིག་གི་ཕྱོགས་ནས་ཁྱད་ཆོས་ཞིག་འབུར་དུ་ཐོན་དགོས་ན་སླ་མོ་ཞིག་མ་རེད།

གླུ་བ་སུ་དང་སུ་ཡིན་ཡང་རང་ལ་ཁྱད་ཆོས་གང་ཡོད་པའི་ཕྱོགས་སུ་བསམ་བློ་གཏོང་བ་ཞིག་རེད།

དེ་ནས་རང་གི་བསམ་བློ་བཏང་ནས་རང་གི་ཁྱད་ཆོས་དེ་ཕར་ཆེར་བོད་སྐད་གྱི་ཕྱོགས་དེ་ཡིན་པར་སེམས།

རྒྱུ་མཚན་ཅི་ཡིན་ཞེ་ན། རང་གིས་བསམ་བློ་བཏང་དུས།

རང་གི་ཕ་ཡུལ་དཔའ་རིས་ཀྱི་ས་ཆ་རེད།

ངའི་འདབས་ལག་རྒྱས་ས་རོང་འབྲོག་འདྲེས་མ་རེད།

འབྲོག་སའི་མང་ཚོགས་ཀྱི་འཚོ་བ་དང་འཁོར་ཡུག་དང་།

རོང་སའི་མང་ཚོགས་ཀྱི་འཚོ་བ་དང་འཁོར་ཡུག་མི་མཚུངས་པ་རེད།

མང་ཚོགས་ཀྱི་འཁོར་ཡུག་གི་འཚོ་བ་མི་མཚུངས་དུས། དམངས་ཁྲོད་ཀྱི་སྒྱུ་རྩལ་གྱི་རྣམ་པ་ཡང་མི་མཚུངས།

དེ་དུས་རོང་འབྲོག་གཉིས་ལ་རང་རང་གི་ཁྱད་ཆོས་མི་འདྲ་བ་ཡོད།

ངའི་ཕ་ཡུལ་ཡིན་ན་རོང་འབྲོག་གཉིས་ཀྱི་ཁྱད་ཆོས་ཡོད།

དཔའ་རིས་ནས་བསྒལ་དུས་ཡང་རྒྱ་ཡུལ་ཡིན་པས་དེ་ལ་ཡང་རྒྱ་བོད་གཉིས་ཀྱི་མཚམས་ཀྱི་རིག་གནས་ཡོད།

རང་གི་ཆུང་དུས་ཀྱི་ཉམས་མྱོང་དང་བག་ཆགས་ཞིག་གིས་རོང་འབྲོག་གང་ལ་སོང་ཡང་ཕྱོགས་གང་གི་ཆ་ནས་ཆ་རྒྱུས་ལྡན་པ་ཞིག་རེད།

དེ་ནས་རང་གི་དལ་གྱིས་བསམ་བློ་བཏང་དུས་རང་གི་ཁྱད་ཆོས་གཙོ་བོ་དེ་ཕར་ཆེར་བོད་སྐད་ཡིན་པ་རེད་བསམ།

དེ་ནས་རང་གིས་ཀྱང་ཉམས་བཞག་དུས་བོད་སྐད་རྐྱང་རྐྱང་གི་གླུ་ལེན་མཁན་ཉུང་ཉུང་རེད།

དེ་རང་ཉིད་ཡང་འབྲོག་ས་མང་བོ་ཞིག་གི་ས་ལ་སོང་ནས།

ཉེ་བའི་ལོ་གཉིས་ཙམ་ཞིག་ལ་འབྲོག་ཁུལ་གྱི་བསམ་བློ་ཡང་ཇེ་བཟང་དུ་འགྱུར་བཞིན་ཡོད།

ལོ་བཞི་ལྔ་ཞིག་གི་སྔོན་ལ་ས་ཆ་དེ།

དཔའ་རིས་དག་མ་ཞིག་རེད།

འབྲོག་ས་གང་ལ་སོང་ན་ས་ཆ་དེ་འདྲ་མཐོང་རྒྱུ་མང་བོ་འདུག བལྟས་ནས་འབྲོག་ལྭ་ཞིག་གྱོན་ནས་འགྲོ་བ་ལས།

སོང་ནས་སྐད་ཆ་རེ་དྲིས་ནས་ཕར་ལ་བོད་སྐད་བཤད་ཀྱང་ཚུར་ལ་རྒྱ་སྐད་བཤད།

རེད། དེ་འདྲ་ཡོད་པ་རེད།

ཕར་བལྟས་ན་འབྲོག་པ་ཡིན་ཡང་བོད་སྐད་ཀྱི་དྲིས་ལན་ལ་རྒྱ་སྐད་ཀྱིས་ལན་བཏབས།

དེ་འདྲ་མཐོང་དུས་རང་གི་སེམས་དངོས་གནས་སྡུག་པ་ཞིག་རེད། དངོས་ནས་སེམས་སྡུག་པ་ཞིག་རེད།

དེ་ལས་གཞན་པའི་བོད་ཀྱི་གླུ་བ་སྐོར་ཞིག་གིས

སྐད་ཆ་དེ་བཤད་ན་འགྲིག་མིན་མི་ཤེས།

ལ་ལས་ལྭ་བ་རེ་གྱོན་ཡང་བོད་ལྭ་ཡང་མིན་ལ་རྒྱ་ལྭ་ཡང་མིན་པའི་ལྭ་བ་རེ་གྱོན།

བོད་ཀྱི་རིག་གནས་མི་ཤེས་མཁན་ཞིག་གིས་བལྟས་ན་བོད་ལྭ་དེ་འདི་འདྲ་ཞིག་ཡིན་པར་སེམས།

གཞན་པ་ཞིག་གིས་བལྟས་ནས་ཁོ་བོད་རེད་ཞེས་བཤད་ན། ཁོས་བོད་སྐད་ཡང་བཤད་མི་ཤེས་པ་ངོ་ཚ་ཞིག་ཡིན་པ་སུས་ཤེས།

མཚམས་མཚམས་སུ་དེ་འདྲ་རེ་མཐོང་དུས་རང་གི་སེམས་སྡུག་པ་ཞིག་རེད།

ལྷག་པར་དུ་རང་གི་ཕ་ཡུལ་དཔའ་རིས་ཀྱི།

རྒན་པ་རྣམས་ཡིན་ན་ངས་བོད་སྐད་བཤད་ནས་བོད་གླུ་བླངས་ན་ཧ་ཅང་དགའ་བོ་འདུག

ལོ་ཆུང་རྣམས་ལ་དོན་མི་གོ་བ་ཡང་ཡོད། ཕར་ཆེར་ཁོར་ཡུག་གི་དབང་གི་ཡིན་པ་རེད།

དེ་ནས་ངས་རྒྱུན་དུ་དམངས་ཁྲོད་ཀྱི་གླུའི་ཕྱོགས་དང་རྟ་རྒྱུགས་དང་རྟ་བཤད་དང་གླུ་བཤད།

དམངས་ཁྲོད་ན་ད་དུང་བཤད་པ་མང་བོ་ཡོད།

རེད། དམངས་ཁྲོད་གྱི་སྒྱུ་རྩལ་ལ་ཕུན་སུམ་ཚོགས་པ་མང་བོ་ཡོད་པ་རེད།

ཕ་ཡུལ་ལ་མི་སུ་ཡིན་ཡང་བརྩེ་སེམས་ཡོད་པ་རེད། ངས་ཕ་ཡུལ་ལ་རང་བསྟོད་མིན།

རང་གི་མཐོང་ལམ་དུ་ངའི་ཕ་ཡུལ་ལྷག་པར་དུ་དཔའ་རིས་ཀྱི་འབྲོག་ཁུལ་རོང་ཁུལ་གྱི་སྒྱུ་རྩལ་ཉམས་འཛོམས་ཡིན་པ་རེད།

ལྷག་པར་དུ་ཁྱད་ཆོས་ལྡན་པ་ཞིག་རེད།

ཁྱེད་ཚོའི་ཕ་ཡུལ་གྱི་གཉེན་སྟོན་གྱི་རིམ་པ་ཆ་ཚང་ཞིག མཚོ་སྔོན་བརྙན་འཕྲིན་ཁང་གི་འགྲེམ་སྟོན་བྱས་ཡོད་སོང་།

ཡོད་པ་རེད།

དེ་ཧ་ཅང་ཕུན་སུམ་ཚོགས་པ་ཞིག་རེད།

རང་གིས་གླུ་རེ་བླངས་ན། དམངས་ཁྲོད་ཀྱི་ཤེས་པ་རེ་བྱས་པའི་ལྷག་ཏུ།

ཆེད་ལས་ཀྱི་ཕྱོགས་ནས་ཅུང་སྦྱངས་བ་བྱས་ནས་ཚོད་ཟིན་པ་ཞིག་བྱས། དམངས་ཁྲོད་ལ་ཡང་ཚོད་ཟིན་པ་བྱས་ནས།

དེ་གཉིས་ཉམས་འབྲེལ་བྱས་ན།

དངོས་གནས་ཕུན་སུམ་ཚོགས་པ། ཆ་ཚང་བ་ཞིག་རེད་འདོད།

ད་དམངས་ཁྲོད་ལ་སོང་ནས་གླུ་རེ་བླངས་པ་དང་གཞན།

སྟོན་བཤད་དང་རྟ་བཤད་སོགས་དམངས་ཁྲོད་ལ་སོང་ནས་བསྡུས།

ང་ཚོའི་ས་ཆ་ན་དངོས་གནས་བཅིངས་འགྲོལ་གྱི་རྗེས་ནས་བོད་ཡིག་གི་སློབ་གྲྭ་ཞིག་ཡོད་མ་མྱོངས།

ཚང་མས་ཤེས་ན་འདོད་ཀྱང་སྦྱངས་ས་མེད་པ་རེད།

དེ་ནས་བསྡུ་བའི་སྐབས་སུ། སོང་ནས་བསྡུ་བའི་དུས་སུ།

ལོ་བཞི་བཅུ་ཡན་ཆད་ཀྱི་མི་ལས་གཞན་པས་མི་ཤེས།

དེ་དུས་ཁོང་ཚོའི་ཡི་གེ་གཅིག་ཀྱང་མི་ཤེས།

ཡོད་ཚད་བློ་བཟུང་ནས་ཡོད།

རེད། དེ་ངག་ཐོག་ནས་རྒྱུད་འཛིན་བྱས་པ་རེད།

དེ་ལས་གཞན་པ།

ཤེས་པ་རྣམས་ཀྱང་ལོ་ཆེ་བ་ལས་རྒན་པ་རྣམས་ཀྱིས་མགོ་ཤེས་ན་མཇུག་མི་ཤེས་པ་ཞིག་རེད།

དེ་དུས་རང་གི་སེམས་སུ་རང་གིས་མཐའ་གཅིག་ཏུ་བོད་སྐད་ཡིག་ལ་འབད་པ་བྱེད་པ་ཡིན།

མི་གཞན་ལ་བོད་སྐད་ཡིག་ཁྱབ་བསྒྲགས་བྱེད་པ་དང་ཤེས་སུ་འཇུག་པ།

སྔོན་ཆད་ཡིན་ན་རང་གིས་ཀྱང་ཉམས་མྱོང་བརྒྱུད་ནས་ཤེས་པ་ཞིག་རེད།

རང་གིས་དེ་འདྲ་མང་བོ་ཞིག་ལ་བསམ་བློ་བཏང་།

རྗེས་སུ་ཅི་འདྲ་ཞིག་ཡིན་པ་ཡང་མི་ཤེས།

ད་ལྟ་རང་ལ་ཉན་མཁན་རེ་གཉིས་འདུག

བོད་ཀྱི་ས་ནས་དགའ་བསུ་བྱེད་མཁན་ཇེ་མང་རེད།

རང་གི་ཡང་དེ་ཚོད་བཟུང་།

རེད། རང་གི་སྒྱུ་རྩལ་གྱི་ལམ་ཕུན་སུམ་ཚོགས་པའི་ལམ་བུ་ནས། རང་གི་མི་རིགས་ཡིན་ན་སྤྱི་ཚོགས་ཀྱི་འགན་ཁྲིའི་འདུ་ཤེས་ཞིག་སྐྱེས་པ་རེད།

རང་གི་ཚོད་དེ་བཟུང་ནས། གོ་སྐབས་དམ་འཛིན་བྱས་ནས་དམངས་ཚོགས་ལ་ཁྱབ་བསྒྲགས་བྱས།

རང་གི་ཕ་སྐད་དེ་གཙོ་བོ་བྱས་ནས།

རང་གི་ཕ་མེས་ཡང་མེས་ཀྱི་མི་རབས་ནས་དར་ནས་ཡོང་བ་རེད།

དམངས་ཁྲོད་ནས་གླུ་རེ་བླངས་ན་ཡག་མིན་མང་བོ་འདུག

ཡིན་ཡང་ཕ་མེས་མི་རབས་ནས་ཡག་དུས།

ང་ཚོའི་སྐབས་སུ་མི་ལེགས་པ་ཞེས་བཤད་ན་ང་ཚོའི་ངོ་ཚ་རེད།

རྒྱུ་མཚན་ང་ཚོ་ལ་སྐྱོན་ཡོད་པ་རེད། ང་ཚོ་ལ་ཡོན་ཏན་མེད་སོང་བ་རེད།

རང་ཉིད་ཆུང་དུས་སུ་རྒན་པ་རྣམས་ཀྱིས་བཤད་པའི་གཏམ་འགའ་རེ་འཚོལ་བསྡུའི་སྐབས་སུ་མ་རྙེད་པ་ཡང་ཡོད།

ཤེས་མཁན་གྱི་རྒན་པ་འགའ་རེ་ཡང་འཇིག་རྟེན་ལས་འདས་ཟིན་པ་རེ་འདུག

འགའ་རེ་ལོ་ན་རྒན་པས་དྲན་པ་ཆེན་པོ་མེད་པ་ཡང་ཡོད།

དེ་དུས་རང་གི་སེམས་སུ། ད་རང་གིས་འབད་རྩོན་བྱེད་དགོས་པ་རེད།

མཐའ་གཅིག་ཏུ་རྒྱ་སྐད་ཀྱི་གླུ་མི་ལེན་པ་ཡང་མིན། དེ་བྱེད་དོན་ཡང་མེད།

སྐད་རིགས་ཅི་འདྲའི་མང་བོ་ཤེས་ན་རང་ལ་བཟང་བོ་འདུག ལམ་གང་གི་ཕྱོགས་ནས་ཡང་བཟང་ཆ་འདུག

དཔེར་ན། རྒྱ་སྐད་ལས་གཞན་དབྱིན་སྐད་ཤེས་ན་ཡང་བཟང་ཆ་མང་བོ་འདུག དེ་བཟང་བོ་ཞིག་འདུག

ངས་རྒྱ་སྐད་ཀྱིས་བླངས་ན་མི་བཟང་གི་ཞེས་པ་ཡང་མིན།

དངོས་གནས་དེ་ཤེས་ཐུབ་ན་ཁྱོད་རང་གི་ནུས་པ་རེད།

ཡིན་ཡང་ཁྱོད་བོད་ཞིག་ཡིན་པའི་ཆ་ནས་ཐོག་མར།

ཁྱོད་རང་གི་སྐད་དང་རིག་གནས་ཤེས་པ་ནས།

གཞན་པའི་རིག་གནས་ཤེས་ན་ཁྱོད་དངོས་གནས་ནུས་ལྡན་རེད།

དེ་མིན་པར་རང་གི་རིག་གནས་བསྐྱུར་ནས།

གཞན་པའི་རིག་གནས་སྦྱངས་ན་མི་འགྲིག་གི

རེད། རང་གི་དམངས་ཁྲོད་ཀྱི་རིག་གནས་ཕུན་སུམ་ཚོག་པ་ཞིག་ཡོད་མ་ཤེས་པར།

གཞན་པའི་དེ་གཏིང་ཟབ་པ་ཞིག་ཤེས་པ་དེ་ཡང་དཀའ་བོ་རེད།

དེ་ཡང་ལེགས་པོ་ཞིག་ཤེས་ཐུབ་པ་མ་རེད།

དཔེར་ན་རང་གི་མི་རིགས་ཀྱི་རྨང་གཞི་མཐུག་པོ་ཞིག་ཡིན་ན་གཞན་པའི་མི་རིགས་ཀྱི་རྨང་གཞི་མཐུག་པོ་ཞིག་ཤེས་བ་དཀའ་བོ་འདུག

མི་རིགས་གཞན་པའི་རིག་གནས་དེ་ཡང་གསལ་བོ་ཞིག་ཤེས་ཐུབ་ཀྱི་མི་འདུག

རང་གི་མི་རིགས་ཀྱི་རིག་གནས་ཡང་མི་ཤེས་པ་ཞིག་རེད།

དེ་ཡིན་ན་གང་གི་ཕྱོགས་ནས་ཡང་ཚད་ལྡན་ཞིག་མ་རེད།

དེ་འདྲ་ཡིན་ན་མི་བཟང་གི་འདོད་ནས།

རང་ཉིད་བོད་ཞིག་རེད། རང་གི་ཕྱོགས་ནས་ད་ལྟ་ཉིད་དུ་ལོ་དུ་མ་ཞིག་ལ་ཆ་རྐྱེན་ཞན་ཡང་ཆོག

དགའ་བསུ་མ་ཐོབ་ཀྱང་ཆོག དེ་དུས་དེ་འདྲ་བྱས་ན་དགའ་བསུ་ཐོབ་མིན་མི་ཤེས།

གཞན་པའི་ཅི་བཤད་རང་གིས་མི་ཤེས།

ཡིན་ཡང་རང་གི་ཕྱོགས་ནས་འབད་པ་བྱས་པ་ཡིན།

མི་ལ་ལས་རང་ལ་གླད་པ་རྗེས་ལུས་རེད་ཟེར་མཁན་ཡོད་ཀྱང་རང་གིས་རང་ཚུགས་ཐུབ་དགོས་པ་རེད་འདོད།

དགའ་བསུ་མ་ཐོབ་པར་རང་ལ་ཐ་ན་ཁ་གསོ་བྱེད་ཀྱི་ཆ་རྐྱེན་མེད་སོང་ཡང་།

རང་གིས་འབད་པ་བྱེད་དགོས་འདོད།

འགྱོད་པ་མེད་པ་ཞིག་བྱེད་དགོས་རྒྱུ་རེད་འདོད་ནས་རང་གིས་སེམས་ཐག་བཅད་པ་ཡིན།

དུས་དུས་སུ་གླུ་དབྱངས་རེ་ལ་སྒྲ་ལེན་པ་སོགས་སུ་འབོད་མཁན་རེ་ཡོད།

དེ་དུས་སུ་རང་གི་ཤེས་ནོ་དེ་འཕྲོ་བརླག་བྱས་ན་མི་འགྲིག་གི

དེ་བཟང་བོ་ཞིག་མ་རེད། རང་གིས་མ་ཤེས་པར་བླངས་ན་མི་འགྲིག་གི

སྐབས་རེ་ལ་འཁྲབ་སྟོན་གྱི་སྐབས་སུ། རྒྱ་སྐད་ཀྱིས་ལེན་དགོས་ས་ལ་རྒྱ་སྐད་ཀྱིས་ལེན་དགོས་པ་རེད།

ཡང་སྐབས་རེ་ལ་རང་གི་གླུ་ཚིག་རེ་བརྩམས་ནས་ཕབ་བསྐྲུན་བྱེད་སྐབས།

རང་གི་སྐད་དང་རིག་གནས། དམངས་ཁྲོད་ཀྱི་སྒྱུ་རྩལ་སོགས་རྒྱུད་འཛིན་གྱི་བསམ་བློ་རེ་འགུག་ཆེད།

དཔེར་ན། བོད་ཀྱི་ངའི་ཉན་མཁན་ཞིག་ཡིན་ན།

མཐའ་གཅིག་ཏུ་ངའི་གླུ་ལ་དགའ་མཁན་ཞིག་ཡིན་ན།

ངའི་བོད་སྐད་ཀྱི་གླུ་ཞིག་བླངས་ན། ཁོས་ལད་མོ་བྱེད་འདོད་ཀྱང་བོད་སྐད་ཀྱིས་མི་ལེན་ཐབས་མེད་རེད།

དེ་ལ་སོགས་པ་ཕན་ཆུང་ཆུང་རེ་ཅི་ཐོགས་བྱས་པ་ཡིན།

རེད། ངས་བལྟས་ན་ཁྱོད་ཀྱི་འདི་མ་བཤད་པ་ཙམ་རེད་མ་གཏོགས།

དཔེར་ན་ཁྱོད་ཀྱི་དུས་རབས་ཀྱི་ཁྱད་ཆོས་དང་མི་རིགས་ཀྱི་ཁྱད་ཆོས་མྱོང་སོགས་མྱོང་པ་ཞིག་ལ། གླུ་གར་གྱི་གླུ་གཅིག་པོ་མ་ཡིན་ལ།

གཞན་པ་ཞིག་བླངས་ནས་རང་གི་རྩ་བ་བོར་ན་ཡང་མི་འགྲིག་གི

དུས་རབས་ཀྱི་ཁྱད་ཆོས་དང་རང་གི་མི་རིགས་ཀྱི་ཁྱད་ཆོས་སོགས་ཉམས་འབྲེལ་བྱེད་པ་ལ། དེངས་རབས་ཀྱི་ན་གཞོན་རྣམས་ཀྱིས་ཀྱང་དགའ་བསུ་ཆེན་པོ་ཡོད་པ་རེད།

ངེད་གཉིས་ཀྱི་ཁ་བརྡའི་གོ་རིམ་ཁྲོད་ནས་ངས་བལྟས་ན། ཁྱོད་རང་གི་བོད་སྐད་ཀྱིས་ལེན་པ་འདི། ཁྱོད་རང་ཉིད་ཀྱི་སྲོལ་རྒྱུན་གྱི

ཕ་མེས་ཡང་མེས་ནས་བརྒྱུད་པའི་སྒྱུ་རྩལ་འདི་ལ་དུངས་བ་ཟབ་པ་རེད།

དུངས་བ་འདིའི་རྐྱེན་གྱིས་ཁྱེད་ལ་འདི་སྲུང་སྐྱོབ་དང་རྒྱུན་འཛིན་གྱི་སྤོབས་པ་དང་ཡིད་ཆེས་ཡོད་པ་རེད། གྲུབ་འབྲས་ཡང་ལེགས་པོ་ཡོད་པ་རེད།