༉  བཀྲ་ཤིས་སྒང་རྫོང་ཁག་སག་སྟེང་རྒེད་འོག་ གཡུས་ཇོན་ཁར་ལས་རིན་ཆེན་སྒྲོལ་མ་གིས་ འབྲོག་པའི་གཞུང་སྒྲ་གནམ་ཁའི་ཡར་ལ་ཟེར་མི་འདི་འཐེན་ཏེ་འདུག གླུ་གཞས་འདི་གི་འབྱུང་ཁུངས་དང་བྱུང་རབས་ བརྩམ་པ་པོ་ཚུ་ངོས་འཛིན་འབད་མ་ཚུགས་རུང་ གཡུས་ཁའི་མི་རྒས་ཤོས་ཚུ་གིས་བརྩམ་བརྩམས་ཨིན་ཟེར་ བཤདཔ་ཨིན་པས། གླུ་གཞས་འདི་ གཡུས་དེ་ནང་ ཡར་རྒྱས་གོང་འཕེལ་གྱི་དོན་ལས་ཁག་ཆེ་བའི་དཔོན་ཁག་ཚུ་འབྱོན་པའི་སྐབས་ ཁོང་ལུ་བཀའ་དྲིན་དགའ་ཚོར་གྱི་ཚུལ་འབད་ཕུལ་དོ་ཡོདཔ་ད་ གདངས་ཀྱི་ཐད་ཁར་ ད་རེས་ནངས་པར་བསྒྱུར་བཅོས་འགྱོ་ཡོདཔ་ཨིན་མས། འ་ནཱི་གླུ་གཞས་དེ་ཡང་ ད་ལྟོ་ཚུན་ཚོད་སྒྲ་པར་བཟུང་བཟུངམ་དང་ཡིག་ཐོག་གུ་ཕབ་ཕབ་མེདཔ་ད་ གླུ་གཞས་འདི་འཐེན་པའི་སྐབས་ལུ་ མི་རྐྱང་དང་ཡང་ན་ སྡེ་ཚན་འབད་འཐེན་དོ་ཡོདཔ་ཨིན་མས། གླུ་གཞས་འདི་གིས་ འཇིག་རྟེན་ཁམས་ལུ་ཡོད་པའི་ཡོངས་གྲགས་ཅན་གྱི་དངོས་པོ་ཚུ་གི་བར་ན་ཁྱད་པར་ཕྱེཝ་ཨིནམ་ད་ དེ་ཡང་ གནམ་ཁའི་སྐར་མའི་ནང་ལས་ ང་ར་ལུ་མཛེས་པ་འདི་སྐར་མ་སྨིན་དྲུག་དང་ ལྡུམ་རའི་མེ་ཏོག་ནང་ལས་ ང་ར་ལུ་མཛེས་པ་པདྨ་སྟོང་ལྡན། དགོན་སྡེའི་མཚན་ལྡན་བླ་མའི་ནང་ལས་ ང་ལ་མཛེས་པ་ཨོ་རྒྱན་གུ་རུ། རྫོང་གི་དབང་ཆེན་དཔོན་པོའི་ནང་ལས་ ང་ལུ་མཛེས་པ་མངའ་བདག་རྒྱལ་པོ། གཡུས་ཀྱི་མི་ཚུ་གི་ནང་ལས་ ང་ལུ་མཛེས་པ་དྲིན་ཅན་ཕ་མ་ཨིན་ཟེར་ རང་ལུ་དགོས་ཧིང་དང་ ཁག་ཆེ་ཧིང་གི་དབང་གིས་ དེ་ཚུ་གི་བར་ན་ཁྱད་པར་ཕྱེཝ་ཨིནམ་ད་ དུས་ཚོད་དང་བསྟུན་ཏེ་ འཐེན་ནི་གི་གླུ་གཞས་ཅིག་ཨིན་པས།