༉  ཆུ་ཁ་རྫོང་ཁག་ སྦོང་སྒོར་རྒེད་འོག་ལས་ བཀྲ་ཤིས་ལྷ་མོ་གིས་འབད་འཐེན་མི་གླུ་གཞས་ ས་འདི་སྐར་མ་གླིང་ལུ། །མཐོང་རྒྱུ་གནམ་ལས་མིན་འདུག །ཟེར་བའི་གླུ་གཞས་འདི་ ཕམ་དང་སྤུན་ཆ་ ལྟ་ལྟོ་ཚང་ ག་ཡང་མེད་ས་ཅིག་ཁ་ལས་ཕར་ རང་རྐྱངམ་ཅིག་འབད་ ལམ་འགྱོ་བའི་གནས་སྐབས་ཅིག་ནང་འཐེན་འཐེནམ་གི་གླུ་གཞས་ཅིག་ཨིན་པས། འདི་གི་བཅུད་དོན་ སེམས་སྐྱོ་སི་སི་གི་གནས་སྐབས་ རང་རྐྱངམ་ཅིག་འདྲོག་འབྱེལ་འཐབ་པའི་སྐབས་ལུ་ རྐྱེན་བར་ཆད་མི་འབྱུང་ནི་གི་དོན་ལུ་ ས་གནས་ཀྱི་གནས་བདག་གཞི་བདག་ཚུ་ལུ་གསོལཝ་བཏབ་པའི་ཚུལ་དུ་ ལ་ཁར་ལྷོདཔ་ད་ ཨ་མ་ལབ་རྩ་རྒྱལ་མོ། །ལ་དར་བཞེས་པར་བྱོན་ཤོག །ཆུ་ཆེན་བརྒལ་ས་ལྷོདཔ་ད་ ཨ་མ་མཚོ་སྨན་རྒྱལ་མོ། །ཆུ་དར་བཞེས་པ་བྱོན་ཤོག །ཟེར་ གླུ་གཞས་ཀྱི་ཐོག་ལས་འབད་དེ་ གསོལཝ་བཏབ་སྟེ་ དེ་སྦེ་འཐེནམ་ཨིན་པས།