༉  སྤྱིར་བཏང་གིས་ ཨ་ལོ་ཟེར་ སྐྱོ་གླུ་ཅིག་ལུ་སླབ་དོ་ཡོདཔ་ཨིན། ཨ་ལོ་ཟེར་མི་འདི་ ང་བཅས་ར་ནུབ་ཕྱོགས་ཁ་ཐུག་ལས་དར་སྲོལ་ཡོད་པའི་ཝང་གཞས་ལོ་ འོ་ཆུ་པའི་གཞས་ལོ་ཟེར་ ཡོད་དོ་བཟུམ་སྦེ་ ཨ་ལོ་དེ་ཤར་ཕྱོགས་ཁ་ཐུག་ལས་བྱུང་བྱུངམ་ཨིནམ་སྦེ་བཤད་དོ་ཡོདཔ་ད་ ཨ་ལོའི་མིང་ཡང་ཤར་ཕྱོགས་པའི་ཨ་ལོ་ཟེར་ སླབ་སྲོལ་ཡོད། འདི་ལུ་ ལུང་ཕྱོགས་ཀྱི་མི་རིགས་དང་ མི་གི་དབུགས་རིང་ཐུང་གི་ཁྱད་པར་མ་གཏོགས་ ཨ་ལོའི་གདངས་དབྱངས་ཀྱི་ཐད་ཁར་ ཅོག་ར་འཐདཔ་སྦེ་ཡོད་པ་གིས་མ་ཚད་ ཚིག་གི་ཐད་ཁར་འབད་རུང་ སྐྱོ་གླུ་གི་རིགས་ཅིག་འབད་ནི་དེ་གིས་ སྐྱོ་བའི་ཚིག་ཙང་ཙ་ར་ཡོདཔ་བཞིན་དུ་ ལྷུན་རྩེ་རྟ་སྦིས་ལས་ བསོད་ནམས་དཔལ་སྒྲོན་དང་ལྷ་མཆོག་བཟང་མོ་གཉིས་ཀྱིས་ ད་ལྟོ་འཐེན་ཏེ་ཡོད་མི་ཨ་ལོའི་གླུ་གཞས་འབད་བ་ཅིན་ ཤར་ས་རི་ལས་ཤར་མཁན། །ཤར་གྱི་དཀར་གསལ་ཟླ་བ། །ཤར་ཞིང་ནུབ་ལུ་མ་གཡོ། །དགུང་མོའི་སྟེང་ལ་བཞུགས་ཤིག་ཟེར་ རང་གི་དགའཝ་མཐུནམ་ཚུ་རང་གི་གདོང་ཁ་ལས་ དཔེར་ན་ ཤར་ལས་ཤར་བའི་དཀར་གསལ་ཟླཝ་དེ་ཤར་ཏེ་ནུབ་ཕྱོགས་ཁ་ཐུག་གཡོ་འགྱོ་དོ་བཟུམ་སྦེ་མ་འགྱོ་ཟེར་ ཤར་གྱི་དཀར་གསལ་ཟླཝ་དེ་ལུ་དཔེ་སྦྱར་ཏེ་འཐེནམ་ཨིན་པས།