A Re-enactment of a Traditional Wedding Celebration | Mandala Collections

བཤད་མཁན་དང་པོ།

ང་རི་དཀར་དམར་གཞུང་ནས་བུད་དེ།

སེར་པོ་བྱུར་དམར་ཐང་ལ་ཡོང་ནས་།

རྟ་འདོ་བའི་ཐོག་ལ་བསྡད་ནས་ཙག་བསེར་བུ་ཐོད་རྩར་བཞག་ནས།

ཁྱེད་ཚང་གི་སྒོ་ཁར་བུད་ནས་གོ་ཁར་བཙོག་དོན།

ཨ་སྒ་བཀྲ་ཤིས་ཚང་གི་བུ་འཇིག་བྱེད་སྐྱབས་ལ།

ཨ་ཞང་ཚེ་རྒྱལ་ཚང་གི་བུ་མོ་སྒྲོལ་མ་སློང་དུ་ཡོང་ནས།

ཁྱེད་ཚང་གི་གསེར་གྱི་ཀ་ལ་འཁེན་དུ་ཡོང་བ་དང་དངུལ་ཐོད་ལ་འཇུ་རུ་ཡོང་ནས།

ཕ་བཟང་བུ་མོ་སློང་དུ་ཡོང་བ་དང་སངས་རྒྱས་སྟོང་སྐུ་བླུ་རུ་ཡོང་བ་ཡིན།

ཨ་སྒ་བཀྲ་ཤིས་ལ་མཚོན་ན་ལོ་ལོན་ནས་ལ་མགོའི་ཉི་མ་རེད་ལ་རྟིང་གི་གྲིབ་མ་རེད།

རི་ཆེན་འགུལ་ན་མིག་གིས་མི་རིག་གི།

དུང་ཆེན་བུས་ན་རྣ་ཡིས་མི་གོ།

རྐང་པས་འོབ་ཆེན་མི་ནོན་གི་ལག་པས་ར་ཆེན་མི་ཐུབ་ཀི།

དེ་བས་ད་ནངས་ཁྱོད་ཀྱིས་ངའི་ཚབ་བྱེད་རོགས་ཞེས་བཤད་དེ།

ང་ཁ་ལག་པ་གཉིས་ཀྱི་ཚབ་བྱས་ནས་གྲི་ཤང་ལང་གཉིས་ཀ་ཚགས་པར་བྱས་ནས།

འཕངས་བའི་མདའ་ཡིན་ལ་བཅོལ་བའི་མི་ཡིན།

དེ་བས་ཁྱེད་ཚང་གིས་ཀྱང་མཐིང་སྨུག་ཁ་རུ་ལྷོ་ལ་བསྐོར་རྒྱུ་དང་།

མ་བུ་མོའི་ཐོད་པ་གནས་ལ་བསྐོར་རྒྱུ་འདི།

ཁྱེད་ཨ་ཞང་དཔོན་གཡོག་རྣམས་ཀྱིས་ཐུགས་ལ་བཟུང་ཞེས་པ་དེ་ཡིན།

བཤད་མཁན་གཉིས་པ།

ཁྱོད་ཡོང་དོན་དེ་འདྲ་ཞིག་ཡིན་འདུག

ངེད་ཚང་གི་བུ་མོ་ཡིན་ན།

མགོ་ལྷ་རིའི་སྟེང་གི་མིག་ཡིན་མིག་ཁྲ་ཆུང་ནང་གི་རྣོ་ཡིན།

ཡར་ཐོད་ཀྱི་མིག་ཡིན་ཡར་ཆུང་གི་སེམས་ཡིན།

བུ་རྣམས་ལ་མཚོན་ན་ར་ཁ་ཕུག་ནས་རུས་ཁ་ནོམ་ནས་བཞག་ཡོད།

བལྟ་ས་རེ་ས་མེད་ཀི་ཞེས་པ་མིན་མོད།

བུ་མོ་གཅིག་པུ་ལ་མཚོན་ན་ལམ་རིང་བོའི་སྟེང་གི་ལག་རྟེན་ཡིན།

ཚེ་ཕྱི་མར་འགྲོ་དུས་ཡུལ་སྲུང་ཡིན།

རྒན་པོ་དད་པོ་ཅན་པོའི་ནང་འཛིན་ཡིན།

སླ་ང་དྲེག་མག་ཅན་གྱི་བདག་པོ་ཡིན།

འདི་ཁྱིམ་ཚང་ནང་གི་གཅེས་མ་ཡིན་ལ་འདི་ཕྱུགས་ཀྱི་ནང་གི་གཡག་ཆགས་ཡིན།

འདི་ལུག་མཚེར་བ་བརྒྱ་ཡིན་ཁ་གཟན་ཡིན།

འདི་འབྲི་མོ་བརྒྱ་ཡི་འོ་འཐུང་ཡིན།

འདི་ལག་ཐོག་ལ་ཆུ་ལྡུག་མཁན་དང་ལག་འོག་ལ་མེ་འབུད་མཁན་ཞིག་ལ་ལེགས་ཞེས།

མི་ལྷག་མི་ལ་སྟེར་རྒྱུ་མེད་པ་དང་ཤ་ལྷག་ཁྱི་ལ་འཕེན་རྒྱུ་མེད་ཟེར་བ་བཞིན།

རྒྱུ་མཚན་དེ་འདྲ་ཞིག་རེད།

བུ་མོ་མ་བྱིན་པའི་རྒྱུ་མཚན་འདིའི་སྟེང་ནས།

ཁྱོད་ལ་མཚོན་ན་ངོ་ལ་བལྟ་ནོར་བྱེད་མི་ཉན་ལ་ཞབས་གཟུར་གནས་བྱེད་མི་ཉན།

ཁྱོད་ཀྱི་ཁ་སེམས་ལ་གནོད་མི་ཉན་ཁ་ངོ་ལ་རྡུལ་ཡོད་མི་ཉན།

[གསལ་བོ་མིན་པ།]

ངའི་བུ་མོ་འདི་ཡིན་གཅིག་མིན་གཉིས་སྟེར་དགོས་ཟེར་མི་ཉན།

དེ་ལྟར་བུ་མོ་མ་གཞི་ནས་གནས་ལ་སྟེར་གྱིན་མེད།

བཤད་མཁན་དང་པོ།

ལོས་ཡིན།

ཨ་ཞང་བཀྲ་ཤིས་ལ་མཚོན་ན་བུ་གཅིག་མ་གཏོགས་མེད་ཀི།

ཨ་ཞང་ཚེ་རྒྱལ་ལ་མཚོན་ན་ཕ་ཤུལ་བུ་ཡིས་འཛིན་མཁན་ཡོད་ཀི།

མ་ཤུལ་བུ་མོས་འཛིན་མཁན་ཡོད་ཀི།

ཁྱེད་ཁ་གཉིས་ལ་ཕྱུགས་དང་མི་ཡི་མང་ཉུང་ཡོད་ཀི།

གང་དང་དོ་ཡི་ཡང་ལྕི་ཡོད་ཀི།

དེ་བས་བྱིས་པ་གཉིས་ཡིན་ན་གཉིས་ཁ་རང་དབང་རང་འཐད་རེད།

བུ་མོས་ཀྱང་རྐང་པ་སྤོ་ས་ལག་པས་བཙལ་བ་རེད།

དེ་བས་འདི་དག་ཐམས་ཅད་ལ་འདང་ཞིག་བརྒྱབ་ནས་བསྡད་དེ།

ཨ་ཞང་བཀྲ་ཤིས་ཡིན་ནའང་རི་རྒྱུད་དེད་ནས་དཔའ་མཁར་བརྩིག་དགོས་ཟེར།

མི་རྒྱུད་དེད་ནས་ཉེ་བོ་བཙལ་དགོས་ཟེར།

ང་རང་ལ་མཚོན་ནའང་སྔོན་ན་མི་རྒན་བལྟ་མཁན་ཡོད་ཀི།

རྗེས་ན་མི་གསུམ་ཉན་མཁན་ཡོད་ཀི།

སྟེང་འདི་ནས་ཁྱེད་འཁོར་རྣམས་ཀྱི་གྲོས་ཤིག་བྱས་ནས།

ང་ཚོས་ཉིན་བཟང་སྐར་བཟང་ཞིག་འདེམ་ནས་བསྡད་དེ་ང་ལ་འཛིན་ཞིག་བྱིན་ན་ཅི་འདྲ་རེད།

བཤད་མཁན་གཉིས་པ།

གོ་ཐལ།

དེ་ངས་རང་དབང་རང་འཐད་ཡིན་པ་མ་ཤེས།

འབངས་མི་ཡི་མ་ཤེས་གླུ་བླངས་ནས།

ཡུལ་ཕ་མས་མ་བྱིན་གཉེན་སྒྲིག་ནས།

སྟག་ཤ་རས་རང་ཞྭ་རང་གིས་བཅོས་ནས།

མ་བུ་མོས་རང་ལམ་རང་གིས་བཙལ་ཟིན་ན།

དེ་ལྟར་འདི་རང་དབང་རང་འཐད་ཀྱི་གཉེན་སྒྲིག་ཡིན་ན།

[གསལ་བོ་མིན་པ།]

མ་བུ་མོ་གནས་ཡུལ་བརྒྱུད་པ་དང་འབྲི་ཐུལ་མས་ཞིང་ཁ་སྙེག་པ་འདི།

མགོ་ནག་དཔེ་བརྒྱ་དཔེ་སྟོང་དང་ས་ནག་ལམ་བརྒྱ་ལམ་སྟོང་ཡོད་མོད།

དེ་རིང་ངས་ཁྱེད་ལ་བུ་མོ་སྟེར་ཞེས་བཤད་རྒྱུ་མེད།

དེ་རིང་ང་ཁ་ཆེན་དབང་ཆེན་བྱེད་མི་ཉན།

དེ་ན་ངེད་ཚང་ལ་མཚོན་ན་ཐམས་ཅན་རི་ན་ཡོད་ལ་དབང་ཆེན་ཡུལ་ན་ཡོད།

འདི་དག་ཐམས་ཅད་ལ་དྲིས་ནས་ཁྱོད་ཡང་བསྐྱར་ཡོང་ན་ཁྱོད་ལ་བཤད།

བཤད་མཁན་དང་པོ།

དེ་ཡིན་དེ་ཡིན།

བཤད་མཁན་དང་པོ།

འདིའི་སྔོན་ལ་ཨ་རྒ་བཀྲ་ཤིས་ཚང་གི་བུ་འཇིགས་བྱེད་སྐྱབས་དང་།

ཨ་ཞང་ཚེ་རྒྱལ་ཚང་གི་བུ་མོ་སྒྲོལ་མ་གཉིས་ཀྱི་དོན་དག་གི་སྟེང་འདི་ནས།

ང་ཚོས་གྲོས་བྱས་པ་དང་དེ་རིང་ཉིན་བཟང་སྐར་བཟང་འདི་བདམས་པ་རེད།

དེ་ན་ཁྱེད་རྣམ་པས་གྲོས་བྱས་པ་ཅི་འདྲ་རེད།

བཤད་མཁན་གཉིས་པ།

ངས་དབང་ཆེན་ཡུལ་ན་ཡོད་ལ་ཐབས་ཅན་རི་ན་ཡོད་ཅེས་བཤད་ཡོད་པ་དེ་རེད།

དེ་དག་ཐམས་ཅད་ལ་བརྡ་ཞིག་བརྒྱབ་ནས་བསྡད་དེ།

ཕ་དང་ཨ་ཁུར་ཤེས་སུ་བཅུག་ནས་མ་དང་སྲུ་མོར་གོ་རུ་བཅུག་ནས།

ང་ཚོས་གྲོས་ཤིག་བྱས་པ་ཅི་རེད་ཟེར་ན།

གཅིག་གི་སྟེང་ནས་ཁྱེད་ཚང་ལ་མཚོན་ན།

ཕ་རྒྱུད་དེད་ན་ཤ་བོ་རྫ་རྒྱུད་འདེད་ས་ཡོད་པ།

[གསལ་བོ་མིན་པ།]

བྲག་དམར་པོ་དབུ་རྩེ་མཐོ་ས་རེད།

མ་རྒྱ་མཚོ་མཆེད་སྟངས་དམའ་ས་རེད།

ཁྱེད་ཚང་བྱུ་རུ་དམར་པོ་འཐོར་ཤུལ་རེད་ཙན་དན་སྡོང་བོ་སྐྱེས་ཤུལ་རེད།

གཉེན་བཅའ་ན་མཐོ་སར་བཅའ་དགོས་ཟེར་བ་བཞིན།

དེ་མ་གཏོགས་སྒོ་ལ་འཁེན་ས་དགོས་ཟེར།

ཚོང་རྒྱག་ན་དམར་སར་རྒྱག་དགོས་ཟེར་བ་རེད།

དེ་མ་གཏོགས་སྒོ་ལ་བརྫོག་ས་དགོས་ཟེར།

གཉིས་ཀྱི་སྟེང་ནས།

འུ་ཁ་གཉིས་ལ་ཉེ་བའི་ཉེ་རབས་ཡོད་པ།

ཁའི་ཁ་ཡི་ལབ་ཙེ་ཡིན་པ།

ཉེ་བའི་ཉེ་ཁྲག་ཡོད་པ་དང་ཕྱུག་པའི་བཟང་ཁྲག་ཡོད།

ཉེ་བོར་ཉེ་འདང་རྒྱག་དགོས་ཕྱུག་པོར་བཟང་འདང་རྒྱག་དགོས་ཞེས།

མི་ཚེགས་སྡུག་ལ་མ་བསྟད། རྟ་གོམ་སྡུག་ལ་མ་བསྟད་པར།

རུ་ཁ་ལྷོ་ལ་བསྐོར་བ་དང་མ་བུ་མོའི་ཐོད་པ་གནས་ལ་བསྐོར་ནས།

དེའི་ཕན་ཆད་ནས་ང་ལ་ཆེན་པོ་ཞིག་བཤད་རྒྱུ་མེད།

མང་པོ་ཞིག་འདོན་རྒྱུ་དང་ཆེན་པོ་ཞིག་བཤད་རྒྱུ་མེད།

བཤད་མཁན་གཉིས་པ།

ཁྱེད་ཚང་ལ་བཀའ་དྲིན་དང་སྐུ་དྲིན་ཆེ།

རྟ་རྔུལ་དུ་མ་བཅུག་པ་དང་མི་ཚེགས་སུ་མ་བཅུག་པར།

སླ་མོ་བདེ་མོ་བྱས་ནས།

[གསལ་བོ་མིན་པ།]

དེའི་ཕན་ཆད་ནས་ཨ་རྒ་བཀྲ་ཤིས་ལ་མཚོན་ན།

བྱིས་པ་གཉིས་ཀྱི་དོན་དག་འདི།

སྔ་དྲོ་ཕྱི་དྲོ་གཉིས་ལས་སྔ་དྲོ་སྒྲུབ་ན།

དེ་རིང་སང་ཉིན་གཉིས་ལས་དེ་རིང་སྒྲུབ་ན་ཞེས།

དེ་ལྟར་བལྟས་ནས་བསྡད་ཡོད་པའི་རྒྱུ་མཚན་འདི་འདྲ་ཞིག་རེད།

དེ་ན་ང་ཚོས་ཉིན་བཟང་སྐར་བཟང་ཞིག་འདེམ་ནས་བསྡད་དེ།

གཉེན་རྟགས་རྒྱག་རྒྱུ་འདིའི་སྟེང་ནས།

རབ་ཡིན་ན་བཞི་བའི་བཅུ་གཅིག་ཉིན་བཟང་སྐར་བཟང་རེད།

འདིའི་སྟེང་དུ་བཞག་ན་ཅི་འདྲ་ཞིག་རེད།

དེར་ཁྱེད་དཔོན་གཡོག་རྣམས་ཀྱིས་ཐམས་བསམ་ཞིག་ཐོངས།

བཤད་མཁན་གཉིས་པ།

ཁྱེད་ཀྱིས་བཤད་པ་ལྟར་བྱེད་དང་ང་ཚོར་གཞན་བཤད་རྒྱུ་མེད།

བཤད་མཁན་དང་པོ།

ཡ་ཡ།

བཤད་མཁན་གསུམ་པ།

ཇ་འཐུང་ཇ་འཐུང་།

བཤད་མཁན་བཞིབ།

ཡ་ཡ།

བཤད་མཁན་ལྔ་བ།

ཁ་ལག་སྲོས།

བཤད་མཁན་དང་པོ།

སྟོན་མོ་བཞི་བའི་བཅུ་གཅིག་གི་སྟེང་ལ་བཞག་ན་ལེགས་སམ།

བཤད་མཁན་དྲུག་པ།

བཤད་རྒྱུ་མེད།

ཁྱེད་ཚོས་ཇ་འཐུང་།

ཆུ་ཚ་བོ་རེད་དམ།

ཚ་བོ་མ་རེད།

རྙེད་ཀྱིན་མེད་པ་འདྲ།

ལྷམ་ཁྱེར་ཤོག་དང་།

ཡ་ཡ་་་་ད་ཤོག།

ཡོད་པ་རེད།

ཐོན་བྱུང་ངམ།

སོང་ནས་ཞྭ་མོ་ཁྱེར་ཤོག

འདི།

ཅུང་ཙམ་མར་ལ་འགྲོ་རུ་བཅུག

ཡར་ལ་སོང།

ད་དུང་འགྲོ་མཁན་ཡོད་དམ།

ད་འགྲོ་མཁན་མེད་ཀི།

གཅིག་གཉིས་གསུམ་བཞི་ལྔ།

ད་དུང་གཅིག་སོང་དང་ཆོག་གི

ཁྱོད་ཚོ་མ་རྒྱུགས་པར་དལ་མོར་སོང།

ཡ་ཡ།

མག་པ་ཐོན་བྱུང་།

ཡ་གཉེན་ཚང་ཞལ་ངོ་དཀར་པོ་ཚང་།

སྐུ་རི་རྒྱལ་ལྷུན་པོ་དལ་ལ་བབས་ནས།

ཁྱེད་རྣམས་ཀྱིས་མཚམས་ཤིག་བྱོས་དང་།

གནའ་ཡི་བོད་ཀྱི་གཏམ་དཔེ་ལྟར་དུ།

མི་ངན་ཞིག་བཤད་ལ་དགའ་རྟ་ངན་ཞིག་རྒྱུགས་ལ་དགའ་ཟེར་བའི་དཔེ་དེ་བཞིན་དུ།

ང་མི་ངན་ཞིག་བཤད་རྒྱུར་དགའ་བ་མིན་མོད།

ཕ་དང་ཨ་ཁུས་བཀའ་བབས་ནས་མ་དང་སྲུ་མོས་རེ་བཤད་ནས།

ཕུ་ནུ་རྣམས་ཀྱིས་ཚེགས་བཙུག་སྟེ།

ངས་མ་བཤད་ཐམས་མེད་ལས་ལ་བབས།

ང་རྟ་ངན་ཞིག་རྒྱུགས་ལ་དགའ་བ་མིན་མོད།

འདོ་རིགས་རྟ་ཡིས་བཀའ་བབས་ནས།

རྒྱུགས་ཕྱགས་ཕྲ་མོས་ཚེགས་བཙུག་ནས།

ན་ཆུང་རྟེའུ་རེ་བཤད་ནས་མ་རྒྱུགས་ཐབས་མེད་ལས་ལ་བབས།

དེ་རིང་གི་ལྷ་ཉིན་དཀར་པོ་འདིར།

མི་མཁས་ཅན་ཞིག་གིས་བཏམ་ཆེན་བཤད་ན་དོན་ལྷ་འགྲུབ་ཡིན་ལ་ཡང་འགྲུབ་ཡིན་མོད།

ངས་འཆའ་མ་འཆོལ་གྱི་གཏམ་ཞིག་བཤད།

འདའ་མ་འདར་གྱི་རྟ་ཞིག་རྒྱུགས།

ལྡ་མ་ལྡིང་གི་བྲོ་ཞིག་འཁྲབ་ན།

ང་ཨ་ཞང་ཚང་གིས་བཤད་ན་ཁྱོད་མི་ཆུང་ཆུང་མི་བུ་གསལ་བོ་ཞིག་ཡིན་ཟེར།

རྟ་ཆུང་ཆུང་འགྲོ་འོང་གོམས་ཤེས་ཤིག་ཡིན་ཟེར།

ད་ནངས་ཀྱི་ནམ་མཁའ་ཡར་ལངས་ནས་དེ་རིང་གི་ཉི་མའི་རྩེ་ཤར་ཏེ།

དགུང་ཨ་སྔོན་འདྲ་བའི་ཨ་ཞང་ཚོ་དང་འབྲུག་ཕོ་ཆུང་འདྲ་བའི་མག་པ་ལ།

ཐང་དཀར་པོ་འདྲ་བའི་མག་རོགས་ལ།

ངས་ཆར་བསིལ་མ་འདྲ་བའི་མཆོད་ཁ་འབུལ།

ཆུ་རྨ་ཆུ་འདྲ་བའི་གཉེན་ཚང་ལ།

བྱ་རྨ་བྱ་འདྲ་བའི་མག་པ་ལ།

མཚོ་འཁྱིལ་ལོ་འདྲ་བའི་མག་རོགས་ལ།

ངས་ཆུ་ཡར་མོ་འདྲ་བའི་མཆོད་ཁ་འབུལ།

ནགས་རྒྱ་རྫོང་འདྲ་བའི་ཨ་ཞང་ལ།

སྟག་དམར་ཡག་འདྲ་བའི་མག་པ་ལ།

རྟ་རྒན་འདྲ་བའི་མག་རོགས་ལ།

ངས་སིལ་ཏོག་འདྲ་བའི་མཆོད་ཁ་འབུལ།

ཁྱེད་གཉེན་ཚང་ཚང་གི་ཕེབས་སྲོལ་ཡག་གི།

གཡུ་འབྲུག་འཁྱིལ་འདྲ་བ་ཞིག་ཕེབས་སོང་།

ངེད་ཨ་ཞང་ཚང་གིས་བསུ་སྲོལ་ཡག་གི།

གསེར་གྱི་བང་རིམ་སྒྲིག་འདྲ་ཞིག་བསུས་སོང་།

ད་ནངས་ཀྱི་ནམ་མཁའ་ཡར་ལངས་ནས།

དེ་རིང་གི་ཉི་མའི་རྩེ་ཤར་ནས།

[གསལ་བོ་མིན་པ།]

ཡིན་ཡིན།

དེ་རིང་གནམ་ལ་བལྟས་ན་སྐར་མ་བཟང་གི།

ས་ལ་བལྟས་ན་དུས་ཚིགས་བཟང་གི།

བར་ནས་གཟའ་སྐར་གྱི་ཉི་མ་བཟང་གི།

བཀྲ་ཤིས་པའི་ཉི་མ་ཕུན་སུམ་ཚོགས་པའི་ཉི་མ།

[གསལ་བོ་མིན་པ།]

བུ་དཔའ་བོས་དཔུང་ལྡིང་སྦྲེལ་ས་རྟ་འདོ་བས་བང་རྩལ་འགྲན་ས།

[གསལ་བོ་མིན་པ།]

ས་པདྨ་འདབ་བརྒྱད་ཀྱི་སྟེང་ནས།

གངས་རི་དཀར་པོ་ལ་ཉི་མ་ཤར་འདྲ།

བཀྲ་ཤིས་འདྲ་བའི་གྲོས་ཚོགས་བྱས་ནས།

བྱ་ཁུ་བྱུག་ཡག་གི་གཏམ་བཤད་ནས།

རྒྱ་གར་རྒྱ་བཟའ་ཀོང་ཇོ་འདི་བོད་སྲོང་བཙན་སྒམ་པོ་ལ་མནའ་མར་བྱོན་ནས།

བློན་པོ་མགར་བར་བ་བྱས་ནས།

[གསལ་བོ་མིན་པ།]

ལྷ་ཀླུ་གཉིས་ཀྱི་གཉེན་དར་ནས་གཡུ་བྱུར་གཉིས་ཀྱི་ཁྲ་བརྒྱན་ནས།

དར་མཚོན་སྣ་ལྔའི་གོས་གོན་ནས།

ཁྱེད་ཚང་ཡང་དེ་རིང་ཕེབས་སྲོལ་ཡག་གི།

ངེད་ཚང་སྐར་ཚོགས་བརྒྱ་གྱིས་བསུ་སྲོལ་ཡག་གི།

ངས་བདུད་རྩི་ཆང་གིས་མཆོད་ཁ་ཞིག་མཆོད།

མཆོད་གཅིག་མཆོད་ལ་དགུང་སྔོན་མཆོད་དགུང་ཨ་སྔོན་མཐོན་པའི་ཞིང་རིམ་མཆོད།

མཆོད་གཅིག་མཆོད་ལ་ས་གཞིར་མཆོད་ས་དོག་མོ་པདྨ་འདབ་བརྒྱད་མཆོད།

ལྷོ་རི་རྒྱལ་གཙུག་ན་རིན་ཆེན་མཆོད།

སྟོད་ལྷ་ཆེན་ཚངས་པ་དཀར་པོ་མཆོད།

[གསལ་བོ་མིན་པ།]

ཁྱེད་ཚོ་ཚང་མ་ཐོན་བྱུང་ངམ།

ཡ།

ཡ་་་ཤོག

ཁྱེད་ཚོ་ཨེ་གྲང་ཐལ།

མ་གྲང་ཐལ།

མཆོད་་་མཆོད།

ཆོས་སྐྱོང་སྲུང་མ།

ཡ་ཡ།

འདི་ཡར་ལ་ཞོག་ཡར་ལ་ཞོག

ད་ལོངས་དང་།

ད་ཆོག་གམ།

དཔའ་བོ་མཁའ་འགྲོ་ཆོས་སྐྱོང་སྲུང་མ།

ས་འདིའི་ས་བདག་ཡུལ་འདིའི་གཞི་བདག

ད་བཙོག་དང་ཆོག

ཁྱོད་ཚོ་ཕྱིར་བཙོག་དང་།

ཁྱོད་ཚོ་དེ་རིང་ཨེ་ངར་གཅིག་བལྟ།

གླུ་ཞིག་ལེན་མཁན་མེད་ཀི

ལེན་ཤེས་མཁན་ཞིག་མེད།

བྱིས་པ་ཚོ་གླུ་ཞིག་ལོངས་དང་།

གླུ་ལེན་ཤེས་མཁན་མེད་ཀི།

ངོ་མས་མེད་ཀི།

དངོས་གནས་མེད་པ་མ་གཏོགས་ལངས་འཇོག་པ་རེད།

བུ་མོ་ཚོས་ཆུ་ལྡུག་རྒྱུ་ཟེར་བཞིན་འདུག་པས་ང་ཚོས་གླུ་ཞིག་ལེན་དང་།

རེ་མ་མ་ལངས་ན་ཆུ་ལྡུག་རྒྱུ་ཟེར་བཞིན་འདུག

ཡེ་་་་གླུ་བ་ལོ་ལོ་དལ་མོར་ཉོན་དང་།

དགུང་ཨ་སྔོན་ཤར་ཕྱོགས་ནམ་མཁའ་ནས།

གླུ་བ་ལོ་ལོ་དལ་མོར་ཉོན་དང་།

དང་པོ་ཤར་དང་གླུ་བ་ལོ་ལོ་དལ་མོར་ཉོན་དང་།

དགུང་ཉི་མ་ཤར་བའི་བསུ་མ་ཡིན།

གླུ་བ་ལོ་ལོ་དལ་མོར་ཉོན་དང་།

རྟེན་འབྲེལ་ཡིན་ཡ་གླུ་བ་ལོ་ལོ་དལ་མོར་ཉོན་དང་།

རེད་་་རེད།

ད་བུད་མེད་ཚོས་ལོངས་དང་།

ལོ་ཆང་ལོ་ཆང་།

ལོ་ཆང་ཁྱེར་ཤོག

ཐང་ལ་རྒྱག་པར་སེམས་ཆུང་བྱོས།

སེམས་ཆུང་བྱས་ནས་སོང།

ཕ་རོལ་གྱི་ཁོ་ཚོ་ལ་ཇ་ལྡུག་དགོས་སམ།

ཁོ་ཚོར་ཇ་ལྡུག་དང་།

ཇ་འཐུང་།

ཁྱེད་རྣམ་པ་བདེ་མོ་ཡིན་ནམ།

དེ་རིང་གི་ནམ་མཁའ་ཡར་ལངས་ནས་དེ་རིང་གི་ཉི་མའི་རྩེ་ཤར་ཏེ།

[གསལ་བོ་མིན་པ།]

ཨ་ཞང་ཚང་བདེ་མོ་ཡིན་ནམ།

མཆོད་མཆོད།

བླ་མ་ཡི་དམ་དཔའ་བོ་མཁའ་འགྲོ་ཆོས་སྐྱོང་སྲུང་མ།

བདེ་མོར་བཙོག་དང་།

སྒོ་ཕྱེ་དང་།

དལ་མོ་བྱོས།

གཞན་དེ་ཨ་ཞང་གི་སྐལ་ཡིན།

ཡ་ཡ།

ཨ་རོགས་ཚོ་གླུ་ཞིག་ལོངས་དང་།

གླུ་ལེན་མི་ཤེས།