༉  ལུག་གི་རྭཝ་ལྷ་ཁང་འདི་ བུམ་ཐང་དུར་ལི་སུ་བི་ལས་ དུས་ཡུན་ཆུ་ཚོད་ ༢ དེ་ཅིག་རྐང་ཐང་སྦེ་འགྱོ་དགོ་པའི་ས་ཁར་ ནགས་ཚལ་གྱི་སྦུག་ལུ་ཆགས་ཏེ་འདུག བཀྲ་ཤིས་དབྱངས་ཅན་གྱིས་འབད་བ་ཅིན་ ལྷ་ཁང་གི་སྐོར་ལས་ལོ་རྒྱུས་དུམ་གྲ་རེ་ཤེས་མི་འདི་ མི་རྒན་ཤོས་ཚུ་ བློ་སླབ་པའི་སྐབས་ལུ་ཉན་སྡོད་ནི་དེ་གིས་ཨིན་ ཟེར་སླབ་ཨིནམ་ད་ མོ་གིས་བཤད་མིའི་ལོ་རྒྱུས་དང་འཁྲིལ་བ་ཅིན་ ལྷ་ཁང་འདི་ གྲུབ་ཐོབ་ཁ་ར་སྒོམ་ཆུང་ཟེར་མི་གིས་ གདན་ས་བཅགས་གནང་གནངམ་ཨིན་པས། དེ་ཡང་ ལྷ་ཁང་གི་ལྟག་ལུ་ གྲུབ་ཐོབ་དེ་ལུག་གུ་ཆིབས་ཏེ་བྱོན་བྱོནམ་ཨིན་ཟེར་ རྡོ་གུ་ལུག་གི་རྭཝ་གི་པར་ཐོན་པའི་གནས་རྡོ་ཚུ་ཡང་མཇལ་ནི་འདུག ཨིན་རུང་ ཁོ་ར་ཚར་གཅིག་ དེ་ནང་བྱོན་བྱོནམ་མ་གཏོགས་ ལྷ་ཁང་འདི་མ་བཞེངས་པས་ཟེར་ཨིན་པས། དེ་འབདཝ་ལས་ ལྷ་ཁང་བཞེངས་གནང་མི་འདི་ ག་ཨིན་ན་ མོ་གིས་ཡང་མི་ཤེས་པས་ ཨིན་རུང་ལྷ་ཁང་དེ་ནང་ བླམ་འབད་བ་ཅིན་ རིམ་ཐེངས་ ༤ དེ་ཅིག་སོར་ད་ནུག དེའི་གྲས་ལས་མཇུག་རང་ད་ལྟོའི་གཏམ་ཞིང་ཆོས་རྗེ་ བླམ་བདེ་ཆེན་ ཟེར་མི་འདི་ཨིན་པས། ད་ལྟོ་ལྷ་ཁང་འདི་ གཏམ་ཞིང་ཆོས་རྗེ་གིས་འབད་ བདག་འཛིན་འཐབ་དོ་ཡོདཔ་ཨིན་པས།