བླམ་རྡོ་རྗེ་གིས ་བཤད་མི་ལོ་རྒྱུས་འདི་ ཁོ་ར་སྒེར་དང་ ལྕགས་མཁར་གྱི་ ཁོ་རའི་མི་རྒྱུད་ཀྱི་སྐོར་ལས་ བཤདཔ་མ་ཚད་ ཁོ་རའི་ ཕམ་རིམ་ཐེངས་གསུམ་གྱི་སྐོར་ལས་ཡང་ བཤདཔ་ཨིན་རུང་ ཁོ་གིས་ དེའི་ཧེ་མ་གི་ཚུ་ བརྗེད་སོང་ནུག་ཟེར་ཨིན་པས། ཏེ་ཁོ་རའི་མི་བརྒྱུད་འདི་ ཆོས་རྗེའི་བརྒྱུད་པ་ཅིག་འབདཝ་ལས་ མི་ག་འབད་རུང་ཅིག་གིས་ བཟའ་ཚང་གི་འགོ་ཁྲིད་འབད་དོ་ཡོདཔ་ད་ ཕོ་སྐྱེས་ཨིན་པ་ཅིན་ བླམ་གྱི་མཚན་འདི་ཐོབ་དོ་ཡོདཔ་ད་ ཨམ་སྲུའི་རིགས་འབད་བ་ཅིན་ ཨ་ཞེ་ཟེར་ཞུ་དོ་ཡོདཔ་ལས་ རྡོ་རྗེ་འདི་ ཆོས་རྗེ་འདིའི་བླམ་འབད་ཡོདཔ་ཨིན་པས། ཤུལ་ལས་མི་དབང་ཞིང་བཤགས་དམ་པ་ འབྲུག་རྒྱལ་གསུམ་པ་འཇིགས་མེད་རྡོ་རྗེ་དབང་ཕྱུག་གི་སྐབས་སུ་ བླམ་རྡོ་རྗེ་འདི་ མགྲོན་གཉེར་སྦེ་ཕྱག་ཞུ་ཡོདཔ་ད་ ཨ་པའི་ཤུལ་ལས་ མི་དབང་མངའ་བདག་རིན་པོ་ཆེ་མཆོག་གིས་ ཁོ་ཨ་པའི་ཚབ་འབད་དགོཔ་སྦེ་ བཀའ་གནང་ཞིནམ་ལས་ཚུར་ ད་རུང་ དགོངསམ་མ་ཚུན་ཚོད་ཀྱི་བར་ན་ འགན་ཁག་ལེ་ཤ་ཅིག་ར་འབག་སྟེ་ ཕྱག་ཕྱིད་ཞུ་ཡོདཔ་མས།