༉  ཆུ་ཁ་རྫོང་ཁག་ སྦོང་སྒོར་རྒེད་འོག་ གཡུས་སྤང་མེ་ཁ་ལས་བཅོ་ལྔ་ལྷ་མོ་གིས་ ཨ་ཞེ་སྐུ་གཟུགས་འཇའ་བས་ལ་ཤེས་ཤེས་ ཟེར་མི་གླུ་གཞས་ཅིག་འཐེན་ཏེ་འདུག འདི་ནང་དཔེ་དང་དོན་མཐུན་པའི་ཚིགས་བཅད་བཞི་ཡོདཔ་ད་ གླུ་གཞས་འདི་ནང་ ཨ་ཞེ་ཟེར་མི་བུམོ་དེ་དང་ཙཱ་རི་སྨྱུག་མ་གཉིས་ གཅིག་ཁར་ག་བསྡུར་འབདཝ་ཨིན་མས། འབྲུག་རྒྱལ་ཁབ་ནང་ ཧེ་མ་གི་མི་ཚུ་མང་ཆེ་ཤོས་ ཤེས་ཡོན་མ་སྦྱང་མི་འབད་ནི་དེ་གིས་ སྲུང་དང་ལོ་རྒྱུས་ གླུ་དང་གཞས་ཚུ་ ཁ་རྒྱུན་རྣ་རྒྱུན་འབད་དེ་ལྷབ་སྟེ་འོང་ནི་དེ་གིས་ ཚིག་གི་སྒྲ་གདངས་ཚུ་ཨ་ཙི་རེ་མ་དགཔ་སྦེ་ཡོདཔ་ཨིན། དེ་ལུ་བརྟེན་ཏེ་ སྲུང་འབད་རུང་ ལོ་རྒྱུས་འབད་རུང་ གླུ་གཞས་འབད་རུང་ ནང་དོན་ནམ་བཅུད་དོན་ཚུ་ གོ་བ་ལེན་ཚུགས་པར་ལཱ་ཁག་ཡོདཔ་ལས་ བཅོ་ལྔ་ལྷ་མོ་གིས་འཐེན་ཏེ་ཡོད་མི་གླུ་གཞས་འདི་ཡང་ དོན་དག་ཧིང་སང་ས་ཅིག་མིན་འདུག