༉  གཞས་ཟེར་ ང་བཅས་ར་འབྲུག་རྒྱལ་ཁབ་ནང་ ཡོངས་གྲགས་ཅན་གྱི་གཞས་ ལྷམ་པ་མ་འདྲཝ་བཞི་དེ་ཅིག་ཡོདཔ་ཨིན། དེ་ཡང་ ཀྲོང་གསར་ནུབ་སྦིས་གཞས་དང་མགར་སའི་དགོན་གཞས། དེ་ལས་ ཐིམ་ཕུ་གི་ཝང་གཞས་དང་སྤ་རོ་འོ་ཆུ་པའི་གཞས་ཚུ་ཨིན། གཞས་དེ་ཚུ་རྐྱངམ་ཅིག་ཨིན་ན་ཟེར་བ་ཅིན་ ད་རུང་ ཡོངས་གྲགས་གནམ་མེད་ས་མེད་ མེད་པའི་གཞས་རྟ་ལོག་གི་གཞས་དང་དཀར་སྦིས་གཞས་ལ་སོགས་པ་ཚུ་ཡོདཔ་ཨིན་པས། དེའི་ནང་ལས་ ད་ལྟོ་ཀྲོང་གསར་རྫོང་ཁག་ནུབ་སྦིས་རྒེད་འོག་ལས་ཨོ་རྒྱན་ལ་གིས་ ནུབ་སྦིས་གཞས་འདི་འཐེནམ་ཨིནམ་ད་ འགྲེལ་བཤད་ཅོག་ར་འཐདཔ་སྦེ་བཞག་མི་འདི་ གློག་བརྙན་གྱི་དུས་ཡུན་རིང་དྲགསཔ་ལས་བརྟེན་ བམ་ཚན་གཉིས་སྦེ་བཟོ་སྟེ་ཡོད་ས་ལས་ གཉིས་པ་དེ་ཨིན་པས། ཁོ་གིས་སླབ་མི་ནང་ ནུབ་སྦིས་གཞས་འདི་ ཞབས་དྲུང་ཞལ་བཞུགས་པའི་སྐབས་ལས་ར་ སྦྱིའི་གཡུས་ཚན་ལས་མི་རྒན་ཤོས་ཅིག་གིས་ གཞས་ཀྱི་ལེའུ་རིངམོ་སྦེ་བརྩམས་གནང་གནངམ་མ་ཚད་ འགོ་དང་པ་ དེ་བསྒང་འཁྲབ་གནང་གནངམ་ཨིན་པས། འ་ནཱི་གཞས་འདི་ གཞས་དཔོན་ཚེ་རིང་འབྲུག་རྒྱལ་དང་དཔལ་འབྱོར་ལ། སྟོབས་རྒྱས་ལ་དང་བསོད་རྣམས་ལ་ཚུ་ལས་ ད་ལྟོ་ཡོད་པའི་གཞས་དཔོན་ ཨྱོན་ལ་ཚུན་བརྒྱུད་དེ་འོང་འོངམ་ཨིན་པས། ཧེ་མ་ ཀྲོང་གསར་ཚེས་བཅུའི་སྐབས་ གཞས་འདི་འཁྲབ་ནི་ཡོདཔ་ཨིན་རུང་ བར་ན་ཁམས་ཅིག་ལས་མཚམས་འཇོག་འབད་དེ་བཞག་དཔ་ལས་ ནུབ་སྦིས་གཞས་འདི་ ཧ་ལམ་ཉམས་ནི་གུ་ལྷོད་ནུག ཨིན་རུང་ གཞས་འདི་ ཁག་ཆེ་བའི་ལམ་སྲོལ་ཅིག་ཨིནམ་གོ་རྟོགས་བྱུང་ཞིནམ་ལས་ཚུར་ ཀྲོང་གསར་རྫོང་ཁག་གིས་ གཞས་འདི་ ད་རེས་ནངས་པར་ ཀྲོང་གསར་ཚེས་བཅུའི་སྐབས་ ལོག་རྐྱབ་དོ་ཡོདཔ་ཨིན་མས། ཧེ་མ་འབད་བ་ཅིན་ གཡུས་ཚན་ནང་ ལྷ་བོན་ཆོ་ག་དང་ཀྲོང་གསར་ཚེས་བཅུ་ དེ་ལས་ རྫོང་ནང་ལུ་གལ་ཆེ་བའི་དགའ་སྟོན་གྱི་སྐབས་ལུ་ སྦྱིས་དང་སེང་སྦྱིས་ཀྱི་ཕོ་སྐྱེས་ཚུ་གིས་རྐྱབ་སྲོལ་ཡོདཔ་ཨིན་མས། འ་ནཱི་ནུབ་སྦིས་གཞས་འདི་ སྐྱེས་བོ་དམ་པ་ཚུ་ལུ་གུས་བཏུད་ཕུལ་བའི་བརྡ་མཚོན་ཨིན་མས།