འདིར་ཁྱིམ་ཚང་ཕྱུག་པོ་ཞིག་ལ་ལུག་རྫི་དབུལ་བོ་ཞིག་ཡོད་པ་དང་། རེ་ཞིག་ཁོ་ཚང་ལ་མགྲོན་པོ་གལ་ཆེན་ཞིག་ཕེབས་ནས་བདག་པོས་མ་མོའི་ནང་གི་མ་མོ་འདང་ཆེན་གསེར་གྱི་ཐོ་ལོ་ཟེར་བ་དེ་བཤའ་དགོས་ཟེར། ལུག་རྫིས་ཇི་ལྟར་བཀག་འགོག་བྱས་ཀྱང་མ་ཐུབ་པས་མཐར་མ་མོ་དེའི་རུས་པ་རྣམས་ཁྱེར་ནས་སྟོད་ཉི་མ་ལྷ་ས་རུ་མཇལ་དུ་སོང་། ལམ་ཁ་ནས་སྤྱང་ཀི་ཞིག་ལ་ཐུག་ནས་ཁོ་རང་ཟ་རྩིས་བྱས། ལུག་རྫིས་སྤྱང་ཀི་ལ་ལྷ་སར་མཇལ་ནས་ཕྱིར་ཡོང་སྐབས་ཁྱོད་ཀྱིས་ཟས་ན་ཆོག་ཟེར་ནས་བུད་སོང་། ཕྱིར་ཡོང་སྐབས་རི་བོང་ཞིག་ལ་འཕྲད་པས་བློ་དང་རིག་པས་སྤྱང་ཀི་དེའང་ཐ་མར་བསད། སྲོག་ཆགས་ཀྱི་གཏམ་རྒྱུད་ལས་རྒྱུན་ཏུ་རི་བོང་ནི་བློ་རིག་གི་མཚོན་བྱེད་དང་། ཝ་ནི་གཡོ་སྒྱུའི་མཚོན་བྱེད། སྤྱང་ཀི་ནི་མ་རབས་ཀྱི་མཚོན་བྱེད་དུ་གྱུར་ཡོད་པས་གཏམ་རྒྱུད་འདིའི་ནང་དུའང་རི་བོང་གི་བློ་གྲོས་ལ་བསྟོད་པ་བྱས་ཡོད།