༉  ཀྲོང་གསར་རྫོང་ཁག་ ནུབ་སྦིས་རྒེད་འོག་ལས་ ནུབ་སྦིས་གཞསམོ་གི་འགོ་དཔོན་ ཨམ་གླེ་མོ་ཟེར་མི་གིས་ ནུབ་སྦིས་གཞསམོ་འདི་འཐེན་ཏེ་ཡོདཔ་ཨིན། གཞསམོ་འདི་ ནུབ་སྦིས་རྒེད་འོག་གི་ཨམ་སྲུ་ཚུ་གིས་འཁྲབ་ནི་ཡོདཔ་ཨིན་མས། སྤྱིར་བཏང་གླུ་གཞས་འདི་ལུ་ ནུབ་སྦིས་གཞསམོ་ ཟེར་སླབ་ཨིན་རུང་ གླུ་གཞསམོ་འདི་ ཆོས་དང་འབྲེལ་བའི་གླུ་ཚིག་འབདཝ་ལས་ གདངས་དབྱངས་དང་འཁྲབ་ལུགས་དེ་ཡང་ སྐྱོན་གང་ཡང་མེད་པར་ གནམ་མེད་ས་མེད་འཇའ་ཆི་ཆི་འབད་འཁྲབ་སྟེ་ བྱིན་རླབས་ཅན་སྦེ་བརྩི་འཇོགས་འབདཝ་ཨིན་མས། ཨམ་གླེ་མོ་འདི་ སྐད་ཧོན་ཏོང་ཏོ་ཡོདཔ་མ་ཚད་ ཞབས་ཁྲའི་ལེའུ་ཡང་ལེགས་ཤོམ་སྦེ་རྐྱབ་ཤེསཔ་ལས་ མོ་གཞསམོ་གི་གཙོ་ཅན་ཅིག་སྦེ་བརྩིཝ་ཨིན་མས། གཞསམོ་འདི་གི་མིང་ཡང་ གནས་བསྐལ་པ་བཟང་པོའི་འཛམ་གླིང་ནང་ ཟེར་སླབ་ཨིནམ་ད་ འ་ནཱི་གཞསམོ་འདི་ གུ་རུ་རིན་པོ་ཆེ་ལ་སོགས་པ་ཚུ་གིས་ རྒྱལ་ཁབ་ནང་ནང་པའི་ཆོས་དར་བའི་སྐོར་ལས་ཨིནམ་མ་ཚད་ འགྲོ་བ་རིགས་དྲུག་སེམས་ཅན་ཐམས་ཅད་ཀྱི་དོན་ལུ་སྨོན་ལམ་བཏབ་ནི་དང་ སྔགས་གདངས་དབྱངས་བཟུམ་སྦེ་འཐེན་པའི་སྐོར་ལས་ཨིན་མས།