༉  སྤྱིར་བཏང་གིས་ ཨ་ལོ་ཟེར་ སྐྱོ་གླུ་ཅིག་ལུ་སླབ་དོ་ཡོདཔ་ཨིན། ཨ་ལོ་ཟེར་མི་འདི་ ང་བཅས་ར་ནུབ་ཕྱོགས་ཁ་ཐུག་ལས་དར་སྲོལ་ཡོད་པའི་ཝང་གཞས་ལོ་ འོ་ཆུ་པའི་གཞས་ལོ་ཟེར་ ཡོད་དོ་བཟུམ་སྦེ་ ཨ་ལོ་དེ་ཤར་ཕྱོགས་ཁ་ཐུག་ལས་བྱུང་བྱུངམ་ཨིནམ་སྦེ་བཤད་དོ་ཡོདཔ་ད་ ཨ་ལོའི་གདངས་དེ་ཡང་ ལུང་ཕྱོགས་ཀྱི་མི་རིགས་དང་ མི་གི་དབུགས་རིང་ཐུང་གི་ཁྱད་པར་མ་གཏོགས་ ཨ་ལོའི་གདངས་དབྱངས་ཀྱི་ཐད་ཁར་ ཅོག་ར་འཐདཔ་སྦེ་ཡོད་པ་གིས་མ་ཚད་ ཚིག་གི་ཐད་ཁར་འབད་རུང་ སྐྱོ་གླུ་གི་རིགས་ཅིག་འབད་ནི་དེ་གིས་ སྐྱོ་བའི་ཚིག་ཙང་ཙ་ར་འོངམ་ཨིན། དེ་བཟུམ་སྦེ་ར་ ད་ལྟོ་ལྷུན་རྩེ་རྟ་སྦིས་ལས་ བསོད་ནམས་དཔལ་སྒྲོན་དང་ལྷ་མཆོག་བཟང་མོ་གཉིས་ཀྱིས་འཐེན་ཏེ་ཡོད་མི་ཨ་ལོའི་གླུ་གཞས་ཀྱི་ཚིག་འབད་བ་ཅིན་ ཆུ་མོ་འབབ་རེ་འབབ་ཚེ། །དུས་བཟང་མ་གཏོགས་མི་འབབ། །དུབ་བཟང་འབབ་པའི་ཆུ་མོ། །སྐམ་རྒྱུ་མེད་ན་དགའ་སོང་ཟེར་ ཆུ་མོ་དེ་དུས་བཟང་ལུ་རྐྱངམ་ཅིག་མ་གཏོགས་འབབ་ནི་མེདཔ་ད་ འ་ནཱི་བཟུམ་གྱི་རྩ་ཆེ་བའི་ཆུ་མོ་འདི་ སྐམ་འགྱོ་ནི་མེད་རུང་དགའ་ནི་མས་ཟེར་ རྩོམ་པ་པོ་གིས་ ནང་དོན་ག་ཅི་ལུ་བཞག་སྟེ་བརྩམས་བརྩམས་ཨིན་རུང་ དཔེ་དུས་བཟང་ལུ་འབབ་པའི་ཆུ་མོ་ལུ་བཞག་སྟེ་འདུག