དར་དཀར་ན་རྫོང་ཁག་ ཀར་ན་རྒེད་འོག་ བར་ཚྭ་གཡུས་ཚན་ལས་ བཀྲིས་རྒྱལ་མཚན་གྱིས་ གཞུང་སྒྲའི་གླུ་གཞས་ ནམ་མཁའ་སྤྲིན་མེད་དྭངས་བ་ཟེར་མི་འདི་འཐེནམ་ཨིནམ་ད་ འབྲུག་གི་གཞུང་སྒྲའི་གླུ་གཞས་མང་ཤོས་ཅིན་ མདངས་འཕྲོ་མཐུད་དེ་རིངམོ་སྦེ་ཡོདཔ་མ་ཚད་ ཆོས་དང་འབྲེལ་བའི་ཚིག་ཡོདཔ་ཨིན། གླུ་གཞས་འདི་ཚུ་རྐྱབ་པའི་སྐབས་ ཞབས་བྲོ་རྐྱབ་མི་ མི་ལྔ་དང་ཁལ་གཅིག་དེ་རེ་ གྱལ་བསྒྲིག་སྟེ་རྐྱབ་མ་ཚད་ ཁོང་གིས་ ཞབས་བྲོ་འདི་ གཟུགས་དང་ལགཔ་ཚུ་ གོ་ལེ་སྦེ་སྤར་ཐོག་ལས་ ཁོང་གི་སླ་ལས་གཅིགགིས་ རྩིས་དཔོན་སྦེ་ཞབས་བྲོ་འདི་འཁྱིད་དོ་ཡོདཔ་ད་ རྩིས་དཔོན་འདི་ སྦུག་ལུ་སྡོད་དེ་ ཞབས་བྲོ་རྐྱབ་མི་གཞན་མི་ཚུ་གིས་ སྐད་དང་ལེའུ་འདི་ མོ་དང་འཁྲིལ་ཏེ་འབད་དགོཔ་ཨིན་པས། ནམ་མཁའ་སྤྲིན་མེད་དྭངས་བ་ཟེར་བའི་གླུ་གཞས་འདི་ བླམ་དང་སློབ་དཔོན་ཚུ་ལུ་ གུས་བཏུད་ཞུ་ནིའི་དོན་ལུ་བརྩམས་ཡོདཔ་ད་ གླུ་གཞས་འདི་གིས་ ནམ་མཁའ་འདི་སྤྲིན་མེད་པར་ དྭངས་འཕྲོས་འཕྲོས་སྦེ་ཡོད་དོ་བཟུམ་སྦེ་ ཁོ/མོ་ ག་ར་འབད་རུང་ སྤྲིན་མེད་པའི་ནམ་མཁའ་བཟུམ་སྦེ་ དྭངས་འཕྲོས་འཕྲོས་ཀྱི་ རེ་བ་བསྐྱེདཔ་ཨིན་པས། སྤྲིན་མེད་པའི་གནམ་མཁའ་དྭངས་འཕྲོས་འཕྲོས་འདི་ ཞབས་བྲོ་རྩམ་པ་པོའི་ རྩ་བའི་བླམ་དང་གཅིག་ཁར་མཚུངས་དཔེ་སྦྱརཝ་ཨིནམ་ད་ ཞབས་བྲོ་རྙིངམ་ཚུའི་སླ་ལས་གཅིག་ཨིནམ་ལས་ བརྩམས་པ་པོ་དང་ འབྱུང་ཁུངས་ཚུ་མི་ཤེས་པས།