དཀོན་མཆོག་གྲགས་པའི་འཚོ་བའི་ཉམས་མྱོང་བརྒྱུད་ནས་འབྲོག་པའི་རིག་གནས་དང་ཡུལ་སྲོལ་གོམས་གཤིས་སོགས་གསལ་བོར་མངོན་པར་བྱས་ཡོད། བསྟན་འཛིན་དང་དཀོན་མཆོག་གྲགས་པ་གཉིས་ནི་བཱ་ལངས་སྡེ་བའི་འབྲོག་པ་དཀྱུས་མ་ཞིག་ཡིན་པ་དང་། ཁོང་གཉིས་ནི་འབྲོག་ལས་ལ་བྱང་ཆ་ལྡན་ཞིང་འཚོ་བའི་ཉམས་མྱོང་ཕུན་སུམ་ཚོགས་པས། དངོས་བྲིས་གློག་བརྙན་འདིའི་མི་སྣ་གཙོ་བོར་གྱུར་ཡོད། བཱ་ལངས་སྡེ་བ་ལ་དུད་ཁྱིམ་ཉིས་བརྒྱ་ལྷག་ཡོད་པ་དང་། ཡུལ་འདིར་ཡང་བོད་ཁམས་སྤྱི་དང་འདྲ་བར་དུས་ཚིགས་བཞི་བོ་ཤིན་ཏུ་གསལ། དུས་ཚིགས་བཞི་བོར་ཁོང་ཚོ་གནས་གཅིག་ཏུ་མི་གནས་པར་རུ་སྤོར་བཞིན་ཡོད། བརྙན་འདི་ལེན་དུས་སྟོན་ས་ནས་དགུན་ས་རུ་སྤོ་བའི་དུས་ལ་འཁེལ་ཡོད། དཀོན་མཆོག་གྲགས་པ་ནི་ལོ་ལྔ་བཅུ་ང་དྲུག་ཡིན་པ་དང་བཱ་ལངས་སྡེ་བའི་སྡེ་དཔོན་ཡང་ཡིན། བསྟན་འཛིན་ནི་ལོ་སུམ་ཅུ་སོ་བརྒྱད་ཡིན་པ་དང་། ཁོང་གི་བྱིས་པ་ལྔ་ལས་གསུམ་ནི་སློབ་གྲྭར་འགྲོ་བཞིན་ཡོད། ཁོང་བཟའ་མི་བདུན་ལ་ནོར་གནག་ཉིས་བརྒྱ་ལྷག་ཡོད།