༉ འབྲུག་རྒྱལ་ཁབ་ཀྱི་ས་གནས་ག་ཏེ་འབད་རུང་ གནས་བདག་གཞི་བདག་རེ་ཡོདཔ་བཟུམ་སྦེ་ པདྨ་དགའ་ཚལ་ ཤ་ལི་ལས་ སངས་རྒྱས་ཡོངས་གྲུབ་ཀྱིས་བཤད་མི་ནང་ བསྟོད་པ་ལུང་ ཟེར་བའི་ལུངམ་གཅིག་ཡོད་མི་འདི་ གནས་ཀྱི་བདག་པོ་གསང་སྔགས་རྒྱ་མཚོ་ གནས་ཏེ་ཡོདཔ་སྦེ་ཨིན་མས། དེ་ཡང་ གཡས་ཕོ་ཆུ་དང་གཡོན་མོ་ཆུ་གིས་བསྐོར་བའི་སྦུག་ལུ་ རི་གསུམ་བརྩེགས་ཏེ་ཡོད་དོ་བཟུམ་ ཐོག་གསུམ་སྦེ་ཡོདཔ་དང་ ས་གནས་དེ་ཁར་ རྐང་བཞིའི་དུད་འགྲོའི་རིགས་རྣམ་པ་སྣ་ཚོགས་ བྱ་རིགས་རྣམ་པ་སྣ་ཚོགས་དང་ལྡནམ་སྦེ་ཡོདཔ་ཨིན་མས། དང་ཕུགས་འབད་བ་ཅིན་ ནོར་སེམས་ཅན་ཚུ་ རི་དེའི་ཁ་ཐུག་ལུ་བཏང་བཞག་སྦེ་ ཡ་་་་་མེ་མེ་གནས་པོ་ ནོར་འདི་ ཁྱོད་ཀྱིས་བལྟ་སྨ་རེད་ ཟེར་སླབ་སྦེ་བཏང་བཞགཔ་ད་ རྦོབ་རིལ་དང་ གཅན་གཟན་སྟག་དོམ་ལ་སོགས་པ་གིས་ཡང་ གནོད་སྐྱོན་ག་ནི་མེད་པར་ ཕྱི་རུ་ཀྲི་ཀྲི་འབད་ ལོག་ལྷོད་འོང་ཟེར་ ཧེ་མའི་ཨ་རྒས་ཨང་རྒས་ཚུ་གིས་སླབ་ནི་འདུག ད་ལྟོ་ར་འབད་རུང་ དེ་སྦེ་རང་ཨིན་ ཟེར་བཤདཔ་ཨིན་མས།