དྲགོས་ཨོ་རྒྱན་རིན་འཛིན་གྱིས་ ཨོ་རྒྱན་ཆོས་གླིང་འདི་ འགོ་དང་པ་ག་གིས་ གདན་ས་ཨིན་ནའི་ལོ་རྒྱུས་དང་  དེ་ལས་ ཁོ་ར་གིས་ཚོར་བའི་སྐབས་ ནག་ཚང་ནང་ལུ་ ལམ་ལུགས་ཚུ་ག་དེ་སྦེ་ར་སྡོད་ནུག་ག་དང་ ནག་ཚང་གི་ཤག་སྐོར་དང་ དབུ་རྩེ་ལ་སོགས་པ་ཚུ་ ག་དེ་སྦེ་ སྤྱོད་དེ་སྡོད་ནུག་ག་དང་ དེ་ལས་ འགྲེམས་སྟོན་ཁང་བཙུགས་ཡོད་པའི་ ལོ་རྒྱུས་ཚུ་གི་སྐོར་ལས་ ཤེས་ནུག། དྲགོས་ཨོ་རྒྱན་རིན་འཛིན་གྱི་ ལོ་རྒྱུས་དང་འཁྲིལཝ་ད་ ཨོ་རྒྱན་ཆོས་གླིང་འདི་  འགོ་དང་པ་ ཀུན་མཁྱེན་ཀློང་ཆེན་རབ་འབྱམས་ཀྱིས་ གདན་ས་ཨིནམ་སྦེ་ བཤདཔ་ཨིནམ་ད་ དེ་ཡང་ ཀློང་ཆེན་པ་ཁོ་རའི་ གདན་ས་འཚོལ་བྱོན་ཏེ་ ཨོ་རྒྱན་ཆོས་གླིང་ལུ་འཕེབས་ཏེ་ དེ་ཁར་དྲག་ནི་མས་ཟེར་ ཐུགས་བཞེད་གནང་སྟེ་ གདན་ས་དེ་ཁར་ཆགས་ གནང་ནུག་ཟེར་ཨིན་པས།  དེ་འབདཝ་ལས་ ད་ལྟོའི་བར་ན་ ཀློང་ཆེན་པའི་གྲུབ་ཕུག་དང་ ཆོས་གནང་སའི་དབང་ཁང་ཚུ་ མཇལ་ནི་ཡོདཔ་ཨིན་མས། དེ་མ་ཚད་ ཤུལ་ལས་རྡོ་རྗེ་གླིང་པ་གིས་ གདན་ས་ཕྱག་བཏབ་མཛད་པའི་ཤུལ་ལས་ ཆོས་རྗེ་དང་ གདུང་བརྒྱུད་ཚུ་ རིམ་པ་བཞིན་དུ་བྱོན་ཏེ་ ཨོ་རྒྱན་ཆོས་གླིང་ཕོ་བྲང་ཟེར་ ག་ནི་བ་གཟི་བརྗིད་ཆེ་ཏོག་ཏོ་དང་ ཡོངས་གྲགས་ཅན་ཅིག་སྦེ་ སྡོད་ཡོད་པའི་ལོ་རྒྱུས་ཡོདཔ་ཨིན་མས། དེ་མ་ཚད་ དྲགོས་ཁོང་རའི་ ཡབ་མ་བཤགས་ཚུན་ཚོད་ཀྱི་རིང་ལུ་ འོག་ལས་མར་ ཕྱག་ཞུ་མི་ཚུ་ཡང་ བརྒྱ་ལས་བཅད་དེ་ཡོད་པའི་ལོ་རྒྱུས་དང་  དེ་མ་ཚད་ ཁོ་ར་གིས་ཚོར་བའི་སྐབས་ལུ་ འབད་བ་ཅིན་ ནག་ཚང་གི་ནང་ན་ དཔོན་གྱི་གཟིམ་ཅུང་འདི་ ལྡེ་མིག་རྐྱབ་བཞག་སྟེ་ ག་ཡང་ ནང་ན་ར་འཛུལ་མི་བཅུག་པས་ཟེར་ ཨིན་པས། ཨིན་རུང་ད་རེས་ནངས་པ་ ཁོང་ར་སྤུན་ཆ་ཚུ་ བསྟུན་གྲོས་ཀྱི་ཐོག་ལས་ གཞི་ཚོགས་ཅིག་བཟོ་སྟེ་ གཞི་ཚོགས་ཀྱིས་སྦེ་ བདག་འཛིན་གནང་ནི་སྦེ་ བཟོ་ཞིནམ་ལས་ ནག་ཚང་དང་ ལྷ་ཁང་ཚུ་ཡང་ ཕྱིའི་བལྟ་བཤཔ་དང་ གནས་སྐོརཔ་ཚུ་གིས་མཇལ་ནིའི་དོན་ལུ་ ནག་ཚང་འདི་ འགྲེམས་སྟོན་ཁང་ཅིག་སྦེ་ བཟོ་གནང་སྟེ་ཡོདཔ་ཨིན་མས།