མཁའ་འགྲོའི་མཚན་རྟགས་དང་མཛད་བྱ་ཚུ་དང་བསྟུན་ མོ་གིས་ གཉེན་རྐྱབ་ནི་འདི་ ཁ་མ་བཟེད་བར་སྡོདཔ་ཅིག་གི་བར་ན་ ཕ་ཇོ་སྒྲུབ་སྒོམ་བཞི་པོ་མཆོག་ ཝང་དངས་ལོ་གཡུས་ཚན་གི་མདོང་ཕྱོགས་ ཆུའི་ཕར་ཁ་ཡོད་པའི་ ཝང་སྲིན་མོའི་ གཡུས་ཚན་ནང་ཕེབས་ཏེ་ བུམོ་ཅུང་གཞོན་ མཁའ་འགྲོ་བསོད་ནམས་དཔལ་སྒྲོལ་འདི་ ཐགས་འཐག་སྡོད་སར་གཟིགས་ནུག། མཁའ་འགྲོ་བསོད་ནམས་དཔལ་སྒྲོན་དང་ ཇ་ཕོ་གཉིས་ གཅིག་གིས་གཅིག་ལུ་ གླུ་དབྱངས་ཀྱི་ཐོག་ལས་ བློ་ཕར་དང་ཚུར་བརྗེ་སོར་མཛད་ཡོདཔ་ད་ དེ་བསྒང་ ཆུ་གུ་ལས་ཟམ་མེད་པར་ ཕ་ཇོ་འདི་ ཆུའི་གཡས་ཁ་ཐུག་ལས་དང་ མཁའ་འགྲོ་བསོད་ནམས་དཔལ་སྒྲོན་འདི་ ཆུའི་གཡོན་ཁ་ཐུག་ལས་ ལུང་བསྟན་ཟམ་པ་མ་ལྷོད་ཚུན་ཚོད་ ལམ་བྱོན་ཡོདཔ་ད་ ད་རུང་ འདི་ལས་ འཕྲོ་མཐུད་དེ་ རྡོ་སྡེ་ནང་ལྷོདཔ་བྱོན་ཡོདཔ་ཨིན་པས། དེ་ལས་ ཁོང་གཉིས་རྡོ་སྡེའི་ནང་གི་ལྟག་ལུ་ ད་ལྟོ་རྟ་མགོའི་ལྷ་ཁང་ཡོད་སར་བྱོན་ཏེ་ ཕ་ཇོ་རིན་པོ་ཆེ་འདི་ སྐུ་མཚམས་ནང་བྱོན་ཡོདཔ་ཨིན་པས། ཟླཝ་དགུའི་རྒྱབ་ལས་ མཁའ་འགྲོ་བསོད་ནམས་དཔལ་སྒྲོན་གྱིས་ རྡོ་སྡེ་ནང་སྦེ་ སྲསམོ་ཅིག་འཁྲུངས་ཡོདཔ་ད་  ད་རུང་ དེའི་ཤུལ་ལས་ར་ རྡོ་སྡེ་ནང་སྦེ་ ད་རུང་ ངོ་མཚར་བའི་རྟགས་དང་བཅསཔ་སྦེ་ སྲས་བདུན་འཁྲུངས་ནུག། ཏེ་ཕ་ཇོ་རིན་པོ་ཆེ་གིས་ སྲས་བདུནམ་ཆ་ར་བསྣམས་ཏེ་ ཟམ་ཅིག་གུ་བྱོན་ ཆོས་སྐྱོང་སྲུང་མ་ཚུ་ལུ་གསོལཝ་བཏབ་སྦེ་ ང་ར་དང་ ངེའི་བཟའ་ཚང་ནང་ རྒྱབ་སྐྱོར་མཛད་དགོ་ཟེར་ བུ་བདུན་འདི་ ཆུ་ནང་བཀོ་གནངམ་ད་ སྲས་བཞི་འདི་ བྱང་ཆུབ་སེམས་དཔའི་སྤྲུལ་པ་འབད་ནི་འདི་གིས་ འབྲུག་པ་བཀའ་བརྒྱུད་པའི་ ཆོས་སྤེལ་ཐབས་ལུ་ རྐྱེན་ངན་ག་ནི་ཡང་མེདཔ་སྦེ་ ལོག་བྱོན་ཡོདཔ་ད་ གཞས་མི་སྲས་གསུམ་འདི་ བདུད་ཀྱི་སྤུལ་པ་ཨིན་པས། ཏེ་ཕ་ཇོ་རིན་པོ་ཆེ་མཆོག་གིས་ སྲས་བཞིཔ་འདི་ ཕྱོགས་སོ་སོར་ལུ་ འབྲུག་པ་བཀའ་བརྒྱུད་ཀྱི་ བསྟན་པ་སྤེལ་ནིའི་དོན་ལུ་བཏང་བའི་སྐབས་ སྲས་སྒར་སྟོན་འདི་ ཤར་གྱི་ལུང་ཕྱོགས་ནང་བཏང་སྟེ་ ཤར་ཁོ་ཐང་ཁ་དང་ ཝ་ཅེས་རྫོང་བཞེངས་ཡོདཔ་ད་ ཁོ་གི་བརྒྱུད་པ་ལས་སྦེ་ ཝང་ཞལ་ངོའི་བརྒྱུད་འདི་ དར་ཡོདཔ་ཨིན་པས། འདི་ལས་ ཝང་དང་ལྕང་གི་ ལུང་ཕྱོགས་ནང་ སྲས་ཉི་མ་འདི་ བཀོ་བཞག་གནང་སྟེ་ ཁོ་གི་བརྒྱུད་པ་ལས་ ཐིམ་ཕུག་ ལྕང་སྒང་ཁའི་ཞལ་ངོ་དང་ སྲས་དབང་ཕྱུག་འདི་ ཐད་དང་དགོན་གྱི་ལུང་ཕྱོགས་ནང་ བཀོ་བཞག་མཛད་ཡོདཔ་ལས་ དགོན་སྲུང་མའི་བརྒྱུད་པ་ཚུ་བྱུང་ཡོདཔ་ཨིན་པས། ཏེ་བླམ་ཁོ་ར་ ཐིམ་ཕུག་གི་མགུ་ལུ་ རྡོ་སྡེ་ནང་གི་ལྷ་ཁང་ནང་ བཞུགས་གནང་གནངམ་ཨིན་པས།