གོ་རེ་ཟངས་སྐྱ་ནི་ཨ་མདོ་ས་ཆ་དང་ལྷག་པར་དུ་གཅན་ཚ་ལྟ་བུའི་ཞིང་ལས་ས་ཆ་ལ་མཚོན་ན་རྒྱུན་ལྡན་དང་ཐ་ན་ཉིན་རེའི་ཟས་ཐུན་རེ་ལ་ཡང་མེད་དུ་མི་རུང་བའི་ཟས་སྣ་གལ་ཆེན་ཞིག་ཡིན་ལ། དེ་བཟོ་བྱེད་ཀྱི་རྒྱུ་ནི་གྲོ་ཕྱེ་ཡིན། གོ་རེ་འདིའི་རིགས་ཀྱི་མིང་ལ་ཟངས་སྐྱ་ཞེས་འདོགས་དོན་ལའང་བཞེད་པ་མི་མཐུན་པ་མང་ལ། ཡོངས་གྲགས་སུ་གོ་རེ་འདིའི་རིགས་སླ་ང་ལེབ་མོ་ཞིག་གི་ནང་དུ་བཅའ་དགོས་པ་དང་། རོང་སྐད་དུ་སླ་ངར་ཟངས་ང་ཞེས་འབོད་པ་དང་། གོ་རེ་འདིའི་རིགས་ཀྱི་ནང་དུ་སྣུམ་སོགས་མེད་པས་གོ་རེའི་ངོས་ཅུང་སྐྱ་བོར་སྣང་བ་དང་གཞན་གོ་རེའི་སྟེང་དུ་སྐྱ་ཕྱེ་ཅུང་མང་བས་མིང་དེ་ལྟར་ཐོགས་པ་ཡིན་སྐད། ད་དུང་བཤད་རྒྱུན་ལ་སླ་ང་ཅུང་མཐུག་པོའི་ནང་དུ་ཟངས་སྐྱ་ཡག་པོ་བཟོ་ཐུབ་པར་བཤད།