05 Aug 2019
25 min 29 sec
Audio Overview
Creators:
Tashi Gyel
མདའ་འཐེན་པ་དང་མདའ་རྩེད་འདི་ལ་སྟོན་མོ་བྱེད་པ་ངོ་སྤྲོད་བྱས་ཡོད།
主要介绍了射箭和箭术赛后的节目表。
This speech introduces the festivals around archery competitions and details the show following the competition.
མདའ་རྩེད་འདི་ཁྱད་པར་དུ་ཨ་མདོ་རོང་ཁུལ་དུ་ལྷག་ཏུ་དར་ཁྱབ་ཆེ་བ་འདྲ། སྡེ་བ་གཉིས་ཀྱིས་ཕན་ཚུན་བར་ལ་མདའ་འཐེན་རེས་བྱས་ནས་རྒྱལ་ཕམ་རྩོད། ཁོ་ཚོ་རྩེད་པའི་གོ་རིམ་ཁྲོད་རྒྱལ་ཕམ་དེར་ཧ་ཅང་ཡིད་འཇོག་བྱེད་མོད་ཡིན་ཡང་འདི་ནི་རྩེད་མོ་ཞིག་ལས་ཕམ་སོང་རུང་མཇུག་འབྲས་ངན་པ་ཅི་ཡང་འབྱུང་རྒྱུ་མེད། ཉིན་འགའ་ལ་མདའ་འཐེན་རེས་བྱས་རྗེས་མཐའ་མར་སྡེ་བ་གཉིས་ཀྱིས་གྲོས་བྱས་ཏེ་ཐེངས་དེའི་མཐའ་མཇུག་གི་རྫོགས་ཚིག་གི་ཚབ་ཏུ་སྟོན་མོ་ཞིག་བྱེད་རྒྱུར་ཐག་གཅོད་བྱས་ཚེ་སྟོན་མོ་བྱེད་པ་ཡིན་ལ། དེའི་མིང་ལ་མདའ་སྟོན་ཟེར། དེ་ནི་སྡེ་བ་གཅིག་གི་ནང་གི་སྐྱེས་པ་རྣམས་སྡེ་གཞན་དེར་སོང་ནས་ཉིན་མོར་མདའ་འཐེན་ཚར་རྗེས་དགོང་མོ་སྡེ་བ་དེའི་མ་ཎི་ཁང་དུ་འདུས་ནས་སྡེ་བ་དེའི་སྐྱེས་པོ་མོ་རྣམས་དང་ལྷན་དུ་ཟས་སྣ་ཚོགས་དང་གླུ་ལེན་གར་རྩེད་ལ་རོལ་བ་ཡིན།
“达顿” 或射箭节在安多农区非常流行。通常由两个村庄进行射箭比赛。虽然在比赛过程中人们非常在乎输赢，但是这毕竟只是一场游戏，就算输了也没有任何不好的结果。经过几天的射箭比赛后，两个村庄商量决定为比赛的圆满结束进行设宴庆贺。于是，一个村庄的男人们到另一个村庄,白天进行射箭比赛。比赛结束后，晚上大家聚集在该村的嘛呢房,和村里的男女一起品尝各种美食并欣赏各种歌舞。
Daton, or archery festivals, are very popular in the Amdo farming area. The archery competition is usually held by two villages. People often care deeply about the results of the competition, but see that it is just a game, and so a loss brings no bad consequences. After several days of competition, the two villages decide to hold a banquet to celebrate the successful conclusion of the competition. All the men from one village go to the other village to join the archery competition during the day. After the competition, all of the men and women gather in the prayer hall of the village to enjoy different kinds of food, songs, and dances.
- བློ་གྲོས།བོད་ཀྱིས་མདའ་འཕེན་པ་དང་།
- མདའ་སྟོན་བྱེད་པ་དང་།
- གླུ་ལེན་གར་རྩེད་བྱེད་པ་འདི་བོད་ཀྱི་རིག་གནས་ཤིག་རེད།
- འདིའི་ཕྱོགས་ནས་འགའ་རེ་བཤད་པ་དང་།
- དེ་འདྲ་ཡིན་ན་ཆོག་གི
- འདི་ཚོད་ལྟ་རང་བཞིན་གྱི་གཏམ་ཞིག་རེད་ཟེར་ན།
- ངོ་མས་ཡིན་པ་མ་རེད།
- ཉན་མཁན་རྣམ་པས།
- མི་འགྲིག་ས་དང་མི་འཕྲོད་ས།
- སྐྱོན་མང་པོ་ཞིག་ཡོད་པ་རེད།
- དེར་ཡང་བཅོས་སྒྱུར་བྱེད་པའི་བསམ་འཆར་བཏོན་ན་ཆོག་པ་རེད།
- ཚོད་ལྟ་རང་བཞིན་གྱིས་སྒོ་ནས་བཤད་པ་དེ་རེད།
- ང་ཚོས་མདའ་སྟོན་བྱས་ན།
- བསྐལ་བ་ཆགས་ཚུལ་བཤད་པ་དེ་འདྲ་ཡང་ཡོད།
- དེ་གཉེན་གྱི་སྟེང་ནས་ཀྱང་བཤད་ན་ཆོག་པ་རེད།
- དེང་མ་ཡིན་ན་བཤད་པ་རེད།
- བསྐལ་བ་ཆགས་ཚུལ་བཤད་ན།
- མཆོད་མ་ཨ་ཧཱུཾ་མཆོད་མ་ཨ་ཧཱུཾ།
- མཆོད་གཅིག་མཆོད་གཉིས་དགོང་སྔོན་མཆོད།
- དགོང་ཨ་སྔོན་མཐོ་བས་བང་རིམ་གྱིས།
- སྟོད་ལྷ་ཆེན་ཚངས་བ་དཀར་པོ་མཆོད།
- འཁོར་གྱི་ལྷ་རིགས་འབུམ་སྡེ་མཆོད།
- དགོང་ཨ་སྔོན་དེ་མ་མཆོད་མ་བཀུར་ན།
- མགོ་བླ་རེ་གཏོད་ས་ཨ་སྔོན་ཡིན།
- མཆོད་གཅིག་མཆོད་གཉིས་བར་སྣང་མཆོད།
- བར་ལྷོ་སྤྲིན་སྨུག་པོའི་གཡང་རིམ་གྱིས།
- མ་ཨ་ནེ་གོང་མ་རྒྱལ་མོ་མཆོད།
- འཁོར་གྱི་མཁའ་འགྲོ་འབུམ་སྡེ་མཆོད།
- བར་སྣང་དེ་མ་མཆོད་མ་བཀུར་ན།
- རྒྱབ་འཁོར་གསུམ་གྱི་གཏོད་ས་བར་སྣང་ཡིན།
- མཆོད་གཅིག་མཆོད་གཉིས་དོག་མོ་མཆོད།
- ས་དོག་མོ་པད་མ་འདབས་བརྒྱད་ཀྱི།
- འོག་རི་རྒྱབ་གཙུག་ན་རིན་ཆེན་མཆོད།
- འཁོར་གྱི་རི་རིགས་འབུམ་སྡེ་མཆོད།
- ས་དོག་མོ་འདི་མ་མཆོད་མ་བཀུར་ན།
- རྐང་སག་ལམ་འདི་རྟེན་ས་དོག་མོ་ཡིན།
- ངས་བསྐལ་བ་ཆགས་པའི་ཆགས་ཚུལ་བཤད་ན།
- ཕྱིའི་སྣོད་ཀྱི་འཇིག་རྟེན་གྱི་ཁམས་ལ།
- ནམ་མཁའ་སྟོང་བ་མཐའ་ལས་འདས་བ་ཞིག་ཡོད་པ་དེ་ལ།
- ཕྱོགས་བཅུ་ནས་རླུང་གཡུགས་ཏེ།
- ཕན་ཚུན་དུ་འཕུར་བས།
- རླུང་བརྒྱ་འདྲ་ཟེར་བའི།
- རླུང་གི་དཀྱིལ་འཁོར་ཁ་དོག་སྔོ་སྐྱ།
- ཤིན་ཏུ་ཟབ་པ་དེ་ལ།
- རྣམ་གསུམ་དཔག་ཚད་ས་ཡ་དྲུག་འབུམ་དང་།
- རྒྱན་དུ་མེད་པ་ཞིག་མཆོད།
- རླུང་གི་དཀྱིལ་འཁོར་དེ་ལ་བརྟེན་ནས་ཆོས་ཀྱི་ཕུང་བོ།
- རྒྱ་མཚོ་ཆེན་པོ་མཐའ་ཡས་པའི་སྟེང་ན།
- གསེར་གྱི་ས་གཞི་ལྟར།
- རྔམ་གསུམ་དཔག་ཚད་སྲིན་བུ་བཞི་བཅུ་ཡོད་པར་བརྟེན་ནས།
- རིན་པོ་ཆེ་སྣ་ཚོགས་ལས་གྲུབ་པའི།
- རི་རྒྱལ་བོ་རི་རབ་ཡིན་ཟེར་གི
- རི་རྒྱལ་བོ་རི་རབ་ལ།
- རང་འཐག་གི་ལྟེ་བ་ལྟ་བུ་ལྷུན་གྱིས་གྲུབ་པ།
- ཤར་དཀར་པོ་དངུལ་གྱིས་གྲུབ་པ།
- ལྷོ་བེེ་ཌྻཱརྱ་ཡིས་གྲུབ་པ།
- ནུབ་པད་མ་རབ་གོས་གྲུབ་པ།
- བྱང་སེར་པོ་གསེར་གྱིས་གྲུབ་པ།
- རི་རབ་དེ་ནས་དཔག་ཚད་བརྒྱད་བཅུ་ཆོས་ཀྱི་ནང་དུ་མཉམ་པ།
- དཔག་ཚད་བརྒྱད་བཅུ་སྟེང་ལ།
- དེ་ལ་ཡང་སུའི་སྐོར་བའི་གསེར་གྱི་རི་བདུན་ཡོད་ཟེར་གི
- གསེར་གྱི་རི་བདུན་པོ་བཤད་ན།
- ཉ་ཤིང་གཟན་དཔག་ཚད།
- ཉ་ཤིང་གཟན་དཔག་ཚད་བཞི་ཅན་གྱི་སྐྱེས་བ་ཡིན་ཟེར་གི
- ཤིང་གཟན་དཔག་ཚད་གཉིས་ཅན་གྱི་གཉིས་ཡིན་ཟེར་གི
- ས་སྦྲམ་ལེ་དཔག་ཚད་ཆོས་བཅུ་ཡི་གསུམ་ཡིན་ཟེར་གི
- རྟ་རྔ་སྡིག་ལྔ་སྟོང་གི་རུས་ཡིན་ཟེར་གི
- རྟ་ན་ཉིས་སྟོང་ལྔ་བརྒྱ་ཡི་ལྔ་ཡིན་ཟེར་གི
- དེ་མདུན་སྟོང་ཉིས་བརྒྱ་ལྔ་ཡི་དྲུག་ཡིན་ཟེར་གི
- མི་ཆུད་ཟན་དྲུག་བརྒྱ་ཉི་ཤུ་རྩ་ལྔ་ཡི་བདུན་ཡིན་ཟེར་གི
- དེ་རྣམས་ཀྱི་བར་ལ་རོལ་བའི་མཚོ་བདུན་ཡོད་ཟེར་ལ།
- མཚོ་བདུན་པོ་བཤད་ན་མང་པ་རེད།
- རི་རྒྱལ་བོ་རི་རབ་ཀྱི་གོང་གསེང་ན།
- ལྷ་མ་ཡིན་གྱི་གྲོ་འཆམ་ཡོད་གི
- རི་རྒྱལ་བོ་རི་རབ་ཀྱི་རྩེ་ན།
- སུམ་བཅུ་རྩ་གསུམ་ལྷ་གནས་ཡོད་གི
- རི་རྒྱལ་བོ་རི་རབ་ཀྱི་འོག་ན།
- ཀླུ་རྒྱལ་གཙུག་ན་རིན་ཆེན་གྱི་ཕོ་བྲང་ཡོད་གི
- རི་རྒྱལ་བོ་རི་རབ་ཀྱི་དབུས་ན།
- ལྷ་ཚངས་བ་བརྒྱ་བྱིན་གྱི་ཕོ་བྲང་།
- རྣམ་པར་རྒྱལ་བའི་ཁང་བཟང་དེ།
- རིན་པོ་ཆེ་སྣ་ཚོགས་ལས་གྲུབ་པ་རེད་ཟེར་རྒྱུ།
- དེ་ནས་དཔག་ཚད་བརྒྱད་བཅུ་ཡར་སོང་ན།
- ལྷ་གྲུབ་ཆེན་ལྷ་ཡི་གནས་ཡོད་ཟེར་གི
- དེ་ནས་དཔག་ཚད་ཆིག་འབུམ་དྲུག་ཅུ་སོང་ན།
- དགེ་ལྡན་གྱི་ལྷ་ཡི་གནས་ཡོད་ཟེར་གི
- དེ་ནས་དཔག་ཚད་སུམ་འབུམ་ཉིས་ཁྲི་སོང་ན།
- འཁྲུགས་པའི་ལྷ་ཡི་གནས་ཡོད་ཟེར་གི
- དེ་ནས་དཔག་ཚད་དྲུག་འབུམ་བཞི་བཅུ་སོང་ན།
- གཞན་ཕན་དབང་ཕྱུག་གི་ལྷ་ཡི་གནས་ཡོད་ཟེར་གི
- དེའི་མན་ཆད་ཐམས་ཅད་འདོད་པའི་ཁམས་ཡིན།
- འདོད་པའི་ཁམས་ལ་གཟུགས་ཡོད་དང་།
- གཟུགས་མེད་ཀྱི་ཁམས་ལ་སོགས་པ་གནས་ཐམས་ཅད།
- མཆོད་རྟེན་གྱི་བང་རིམ་ལྟ་བུ་ཡོད་ཟེར།
- རི་རྒྱལ་བོ་རི་རབ་ཀྱི་ཤར་ཕྱོགས་ན།
- ཤར་ལུས་འཕགས་ལ་གླིང་ཕྲན་གཉིས་ཆགས།
- དབྱིབས་ཟླ་གམ་ཙམ་ཡིན།
- ཤར་རྡོ་རྗེ་རིགས་ཀྱི་མཁའ་འགྲོ།
- གནས་བའི་སྐུ་མདོག་དཀར་མོ་དུང་གི་མདངས་ལྡན་པ།
- ནས་ཟན་དཀར་མོ་འབུམ་སྡེ་སྐོར་བ།
- མི་མཐུན་རྒུད་པའི་ཚོགས་རྣམས་ཕྱེ་བར་མཛད་པ།
- རི་རྒྱལ་བོ་རི་རབ་ཀྱི་ལྷོ་ཕྱོགས་ན།
- ལྷོ་འཛམ་བུ་གླིང་ལ་གླིང་ཕྲན་གཉིས་ཆགས་པ།
- དབྱིབས་སོག་ཁ་ལྟ་བུ་ཡོད་ཟེར་རྒྱུ།
- ལྷོ་རིན་ཆེན་རིགས་ཀྱི་མཁའ་འགྲོའི་གནས་བའི།
- སྐུ་མདོག་སེར་མོ་གསེར་གྱི་མདངས་ལྡན་པ།
- རྒྱལ་པོའི་ལུས་ཀྱི་སེན་མོ་འབུམ་སྡེ་སྐོར་བ།
- མཐུན་རྐྱེན་ལེགས་ཚོགས་ཐམས་ཅད་རྒྱས་པར་མཛད་པ།
- རི་རྒྱལ་བོ་རི་རབ་ཀྱི་ནུབ་ཕྱོགས་ན།
- ནུབ་བ་ལང་སྤྱོད་གླིང་ལ་གླིང་ཕྲན་གཉིས་ཆགས་པ།
- དབྱིབས་ཟླུམ་པོ་ཡིན་ཟེར་གི
- ནུབ་པད་མ་རིགས་ཀྱིས་མཁའ་འགྲོར་གནས་པ།
- སྐུ་མདོག་དམར་པོ་བྱུ་རུའི་མདངས་དང་ལྡན་པ།
- དབང་གི་ལས་ཟན་དམར་མོ་འབུམ་སྡེའི་སྐོར་བ།
- ཁམས་གསུམ་རྟེན་གསུམ་ཆོས་རྣམས་དབང་དུ་བསྡུས་པ།
- རི་རྒྱལ་བོ་རི་རབ་ཀྱི་བྱང་ཕྱོགས་ན།
- བྱང་སྒྲ་མི་སྙན་གླིང་ལ་གླིང་ཕྲན་གཉིས་ཆགས་པ།
- བྱང་ལས་ཀྱི་གཟུགས་ཀྱི་མཁའ་འགྲོ་གནས་པ་དང་།
- སྐུ་མདོག་ལྗང་གུ་མུ་མེན་མདངས་དང་ལྡན་པ།
- གྲོགས་པའི་ལས་ཀྱི་རྒྱལ་མོ་བུདྡྡས་སྐོར་བ།
- ཕྱོགས་ཀྱི་མཚན་བུ་འདྲ་བས་མཚན་སྤྱོད་མཛད་པ།
- ཀླུའི་རྒྱལ་བོ་རི་རབ་ཀྱི་རྩེ་ན།
- དབུ་བུདྡྡས་རིགས་ཀྱི་མཁའ་འགྲོ་གནས་པ།
- སྐུ་མདོག་སྔོན་མོ་གཡུ་ཡི་མདངས་དང་ལྡན་པ།
- ཀུན་གྱི་བདེ་འཛིན་སྔོན་མོ་བུདྡྡས་སྐོར་བ།
- མཆོག་དང་ཐུན་མོང་དངོས་གྲུབ་བསྩལ་བ།
- གནམ་འཛོམས་ས་ནས་དཔག་ཚད་བརྒྱད་བཅུ་ཡར་སོང་ན།
- ནམ་མཁའ་ལ་དྭངས་ཤིང་།
- རབ་ཏུ་བརྟན་པའི་རླུང་གིས་དཀྱིལ་འཁོར་ལ་བརྟེན་ནས།
- ཉི་ཟླ་སྐར་གསུམ་ཤར་ཚུལ་ཡག་གི
- ས་པད་མ་འདབས་བརྒྱད་ཀྱི་སྟེང་ན།
- འགྲོ་བ་མི་ཡི་འཇིག་རྟེན་ཆགས་ཚུལ་ཡག་གི
- འཇིག་རྟེན་རང་བྱོན་གཉིས་ཀྱི་ཚོགས་པ་འདི།
- རང་གཞན་མི་ལ་ཐོབ་པས་ལོངས་སྤྱོད་ཡིན།
- རང་གི་གཉེན་ལས་ཆེ་བ་ལ།
- རང་མཆོད་རང་གིས་མཆོད་པའི་རི་མོ་ཡིན་ཟེར་རྒྱུ།
- བཀྲ་ཤིས་བདེ་ལེགས་ཤོག་ཟེར།
- དེ་ནས་མེས་རྒྱལ་གྱི་གངས་ལྗོངས་ཆེན་པོར་བསྟོད་པ་བྱས་ན།
- རྒྱལ་ས་པེ་ཅིན་ཕོ་བྲང་ལྷོ་ཕྱོགས་ན།
- འཛམ་གླིང་ཡང་རྩེ་གནས་པའི་སྤུ་རྒྱལ་བོད་ཡོད།
- བཙལ་གནས་བཙལ་ཁུངས་སྡེ་མཆོག་རང་བྱོན་རེད།
- སྡེ་ཆེན་རིན་པོ་ཆེ་ཡང་དེ་ན་ཡོད་གི
- དེ་སེ་གང་ལ་རྒྱ་ཁྱོན་རྒྱ་ལྔ་བཞུགས་གི
- བདུད་རྩི་ཆང་དཀར་རི་བོ་དེ་ན་ཡོད་གི
- བྱུ་རུ་བྲག་ལ་གནས་འདྲའི་རང་བྱོན་ཡོད་གི
- མཁའ་འགྲོ་ཕྱག་རྒྱན་འདྲ་བོ་དེ་ན་ཡོད་གི
- མཚོ་ལ་ཀླུ་རྒྱལ་བྱང་སེམས་ཆེ་གི
- ཆུ་བོ་ཡོན་ཏན་ཅན་ཡང་དེ་ན་ཡོད་གི
- ཁྲི་ཤོར་རྒྱལ་མོའི་ཀླུ་རྣམས་བྱང་སེམས་ཅན།
- ཆུ་བོ་ཆེན་པོའི་གུར་ན་ཕན་པ་ཅན།
- གནམ་མཚོ་ཕྱུག་མོའི་ནང་ན་བྱང་ཆུབ་སེམས།
- མཐའ་ནས་གྲགས་ན་དགྲ་བཅོམ་ལྔ་བརྒྱ་བཞུགས་གི
- སྦུ་ཚེ་གླིང་ན་ཀླུ་རྒྱལ་ཤར་སེ་ཅན།
- ཁ་བས་བཀང་ན་དགྲ་བཅོམ་ལྔ་བརྒྱ་བཞུགས་གི
- གངས་ཀྱི་རི་བོ་བསྐོར་བ་ནས།
- ར་འཁོར་ཤད་དང་སྡིག་པ་མནའ་བ་དང་།
- གངས་རི་ཆེན་པོ་ཏི་སེ་ཡི་གཅིག་ཡིན་ཟེར་གི
- ཇོ་མོ་གངས་དཀར་གྱི་གཉིས་ཡིན་ཟེར་གི
- གཉེན་གཏམ་ཕ་རོལ་གང་གི་གསུམ་ཡིན་ཟེར་གི
- འགྲོགས་ལ་ཤེས་པའི་གང་གི་བཞི་ཡིན་ཟེར་གི
- ཙ་རེ་དཀར་ཡོལ་གང་གི་ལྔ་ཡིན་ཟེར་གི
- བསམ་བརྟན་ཁང་བཟང་གང་གི་དྲུག་ཡིན་ཟེར་གི
- གཉེན་ཆེན་ཐང་ལ་གང་གི་བདུན་ཡིན་ཟེར་གི
- ཡར་ལ་ཞ་མོ་གང་གི་བརྒྱད་ཡིན་ཟེར་གི
- རྨ་ཆེན་སྦོམ་ར་གང་གི་དགུ་ཡིན་ཟེར་གི
- ཁ་བ་དཀར་པོ་གང་གི་བཅུ་ཡིན་ཟེར་གི
- བདུན་གསུམ་ཉེར་གཅིག་གི་ནང་ནས།
- གནས་རི་བཅུ་བོ་བཤད་ན་དེ་འདྲ་རེད་ཟེར་རྒྱུ།
- སྤང་གི་རི་བོ་བསྐོར་བ་ནས།
- གསེར་གྱི་མཎྜལ་འབུལ་བ་འདྲ།
- མཚོ་དམའ་མོ་ཤེལ་གྱི་མེ་ལོང་ཡོད་གི
- མ་ཕམ་གཡུ་མཚོ་ཡི་གཅིག་ཡིན་ཟེར་གི
- ཨ་མ་སྤྱན་མཚོ་ཡི་གཉིས་ཡིན་ཟེར་གི
- རྣམ་མཚོ་ཕྱུག་མོ་ཡི་གསུམ་ཡིན་ཟེར་གི
- ཡར་འབྲོག་གཡུ་མཚོ་ཡི་བཞི་ཡིན་ཟེར་གི
- འཕགས་མཚོ་ཡི་ལྔ་ཡིན་ཟེར་གི
- མཚོ་སྐྱ་རེངས་ཀྱི་དྲུག་ཡིན་ཟེར་གི
- མཚོ་སྔོ་རེངས་ཀྱི་བདུན་ཡིན་ཟེར་གི
- བར་གྱི་དྲུག་མཚོ་ཡི་བརྒྱད་ཡིན་ཟེར་གི
- སྟོང་རི་མཚོ་ནག་གི་དགུ་ཡིན་ཟེར་གི
- ཁྲི་ཤོར་རྒྱལ་མོའི་བཅུ་ཡིན་ཟེར་གི
- མཐོ་སྒང་གི་རྣམ་མཚོ་བཅུ་བཤད་ན་དེ་འདྲ་རེད་ཟེར་རྒྱུ།
- རིན་ཆེན་རྣམ་རྒྱལ་སྤང་རི་ལྕགས་རི་བསྐོར་བ་ནས།
- ལྕགས་རི་བསྐོར་བ་ནས།
- མ་གཅིག་ལྷུན་གྱིས་འགྲུབ་པའི་ཅོག་རི་འདྲ་བ།
- སྤང་རི་ནོར་བུ་སྤུངས་འདྲ།
- ཆུ་བོ་སྣ་ཚོགས་དར་སྔོན་འཐེན་འདྲ།
- ནགས་ཚལ་གཡུ་འབྲུག་བསིལ་བ་དར་ཚུར་འདྲ་བ།
- རིན་ཆེན་རྣམ་རྒྱལ་སྤུངས་པའི་བྲག་གི་རི་བོ་བསྐོར་བ་ནས།
- དགུང་ཨ་སྔོན་འདེགས་པའི་ཀ་བ་འདྲ།
- རྩི་ཤིང་ནགས་ཚལ་རབ་ཏུ་རྒྱས་ས།
- སྙན་པའི་སྒྲ་སྒྲོག་གི་བྱ་ཚོགས་འདུས་ས།
- མཛེས་པའི་མེ་སོན་མེ་ཏོག་དང་ཆུ་བོ་ཡན་ལག་བརྒྱད་ལྡན་འབབ་ས།
- འདི་དཔྱིད་ཟླ་གསུམ་ལ་ཕྲ་བོ་གཡུ་ཡི་མདོག་རེད།
- དབྱར་ཟླ་གསུམ་ལ་སྔོན་མོ་གཡུ་ཡི་མདོག་རེད།
- སྟོན་ཟླ་གསུམ་ལ་སེར་པོ་གསེར་གྱི་མདོག་རེད།
- དགུན་ཟླ་གསུམ་ལ་དཀར་པོ་དངུལ་གྱི་མདོག་རེད།
- ཉི་མ་ཤར་བའི་གནས་མཆོག་འདི་ནས།
- སུམ་བཅུ་རྩ་གསུམ་ལྷ་གནས་འདྲ་བ།
- ཞིང་ཁམས་འདི་ཡི་ནང་གསེས་ལ་བསྐོར་ན།
- སྟོད་མངའ་རིས་ལ་སྐོར་གསུམ་ཡོད་ཟེར་གི
- སྤང་རི་མང་པོ་སྤང་དཀར་གསུམ་གྱི་གཅིག་ཡོད་ཟེར་གི
- འབྲུ་དང་ནས་སོགས་འབུམ་སྡེ་གསུམ་གྱི་གཉིས་ཡིན་ཟེར་གི
- ཞིང་གཤོང་ཐད་ཀྱི་སྟོད་སྨད་གསུམ་གྱི་གསུམ་ཡིན་ཟེར་གི
- སྟོད་མངའ་རིས་སྐོར་གསུམ་ནས།
- རི་ཆེན་གསེར་གྱི་གཏེར་མཛོད་ཡིན་ཟེར་གི
- བར་དབུས་གཙང་ལ་རུ་བཞི་ཡོད་ཟེར་གི
- གཡས་རུ་ཡི་གཅིག་ཡིན་ཟེར་གི
- གཡོ་རུ་ཡི་གཉིས་ཡིན་ཟེར་གི
- དབུ་རུ་ཡི་གསུམ་ཡིན་ཟེར་གི
- རུ་ལག་གི་བཞི་ཡིན་ཟེར་གི
- བར་དབུས་གཙང་རུ་བཞི་ནས།
- ཤྭ་རྐྱང་འབྲོང་གི་ཕ་ས་ཡིན།
- སྨད་མདོ་ཁམས་ལ་སྒང་དྲུག་ཡོད་ཟེར་གི
- ཟལ་མོ་སྒང་གི་གཅིག་ཡིན་ཟེར་གི
- ཚ་བ་སྒང་གི་གཉིས་ཡིན་ཟེར་གི
- སྨར་ཁམས་སྒང་གི་གསུམ་ཡིན་ཟེར་གི
- དམར་རྫ་སྒང་གི་བཞི་ཡིན་ཟེར་གི
- སྤོ་འབོར་སྒང་གི་ལྔ་ཡིན་ཟེར་གི
- མི་ཉག་སྒང་གི་དྲུག་ཡིན་ཟེར་གི
- སྨད་མདོ་ཁམས་སྒང་དྲུག་ནི་འབྲུ་རིགས་སྣ་ལྔའི་ཕ་ས་ཡིན།
- བོད་ཀྱི་ཆོ་ག་རྣམ་གསུམ་བཤད་ན།
- མངའ་རིས་གོང་སྟོད་མན་ཆད་སོག་ལ་སྐྱ་བོ་ཡན་ཆད།
- དབུས་གཙང་ཆོས་ཀྱི་ཆོ་ག་ཡིན།
- སོག་ལ་སྐྱ་བོ་མན་ཆད།
- རྨ་ཆུའི་ཁུག་སོ་དང་པོའི་ཡན་ཆད།
- མདོ་སྨད་རྟ་ཡི་ཆོ་ག་ཡིན།
- ཨ་ཆེན་གངས་རི་མན་ཆད།
- མདོ་ལ་རིང་མོ་ཡན་ཆད།
- ཨ་མདོ་ཟེར་བ་དེ་ནས་ཐོགས་པ་རེད།
- གོས་མང་པོ་ཐང་ལ་བཏིང་འདྲ་བོ།
- དཔེ་བཞག་ན་འབྲོག་པའི་རྩྭ་ཐང་རེད།
- བོད་སྦྲ་གུར་ཅན་གྱི་ཕ་ས་རེད།
- དཀར་གསུམ་མཚོ་མོ་འཁྱིལ་འདྲ།
- ཞོ་འོ་མ་ཁ་ལ་བྲལ་མེད།
- ཟས་ཞིམ་པོ་སེར་པོའི་མཚོ་མོ་འཁྱིལ་འདྲ།
- དཔེ་བཞག་ན་རིང་བའི་ས་ཞིང་རེད།
- བོད་ས་མཁན་ཅན་གྱི་ཕ་ས་རེད།
- འབྲུ་བང་མཛོད་ཤར་ཕྱོགས་རི་ལས་མཐོ་བ།
- ཟས་མངར་མོ་ཁ་ལ་བྲལ་མེད།
- དངུལ་དཀར་པོ་མཆོད་རྟེན་བཞེངས་འདྲ་བོ།
- དཔེ་བཞག་ན་གངས་དཀར་ཏི་སེ་རེད།
- དགྲ་བཅོམ་པ་ལྔ་བརྒྱའི་ཕོ་བྲང་རེད།
- མེ་རྒྱལ་ཆེན་པོའི་ལྷ་རི་རེད།
- ལོ་རེ་རེ་བསྡད་པས་ཇེ་མཐོ་རེད།
- འབངས་དབུ་འཕང་མཐོ་བའི་རྟེན་འབྲེལ་རེད།
- ལྷོ་གཡུ་འབྲུག་སྔོན་མོ་བྱང་གི་ས་ནས་འཁྱིལ་འདྲ་བོ།
- དཔེ་བཞག་ན་རྨ་ཆུ་འབྲི་ཆུ་རེད།
- གདོང་དམར་ཅན་གྱི་འཐུང་ཆུ་རེད།
- མེ་རྒྱལ་ཆེན་པོའི་མ་ཡུམ་རེད།
- འབངས་ལོང་སྤྱོད་རྒྱས་པའི་གཞི་མ་རེད།
- བདུད་ནག་པོ་ཐང་ནས་རྒྱུགས་འདྲ་བོ།
- ཚོང་བའི་བདེ་སྐྱིད་ལྕགས་ལམ་རེད།
- སྤྱིར་འཛམ་གླིང་གི་གོས་ལེགས་པོ་རེད།
- ལྷ་ཇོ་བོར་མཇལ་བའི་རྟེན་འབྲེལ་རེད།
- བོད་ཕྱུག་འགྱུར་འགྲོ་བའི་གཞི་མ་རེད།
- དཔལ་འབྱོར་རྒྱ་མཚོ་བཞིན་དུ་རྒྱས་པ།
- མེས་རྒྱལ་ཕྱུག་འགྱུར་ཡོང་བའི་བཀྲ་ཤིས་ཤོག
- མི་རིགས་མཐུན་སྒྲིལ་ཡོང་བའི་བཀྲ་ཤིས་ཤོག
- རྒྱལ་སྲིད་བརྟན་ཅིང་དམངས་རྣམས་སྐྱིད་པའི།
- བཀྲ་ཤིས་བདེ་ལེགས་ཕུན་སུམ་ཚོགས་པར་ཤོག
- ཡ་་་་ང་རང་གི་ཕ་ས་མདའ་མོ་གཡང་རྫོང་།
- སྒ་གཞུ་མདའ་མོ་གཡང་རྫོང་ལ་བསྟོད་པ་ཞིག་བྱས་ན།
- བྲག་ཡར་ཤར་རྒྱ་མཚོ་ཡི་ཁྱབ་པས།
- རྨ་ཀླུང་སྔོན་མོའི་གཞུ་རྒྱུད་ན་ཡོད་པའི།
- སྲིན་པོ་གདོང་རྒྱུད་རིང་མོའི་འགྲམ་ངོགས་ན།
- སྒ་གཞུ་མདའ་མོ་གཡང་རྫོང་ཆགས་པ་རེད།
- དེ་ནས་བྱང་ཕྱོགས་ན།
- རྗེ་བདག་གཉེར་ཆེན་པོ་མངོན་པའི་འབྱུང་གནས་ལས།
- བྲག་བྱ་ཁྱུང་ཞེས་བྱ་བ།
- བྱང་གི་དགོན་ཆེན་བཞིའི་ཡ་གྱལ།
- བྱ་སེར་བསྟན་པའི་འབྱུང་ཁུངས་དེ་ནས་ཆགས་པ་རེད།
- བསྟན་པའི་དབུ་འཕང་རྒྱས་པའི།
- རྨ་ཆེན་སྦོམ་རའི་སྲས་གསུམ་པ།
- སྐྱེས་ལྷ་ཆེན་པོའི་ཕོ་བྲང་རིན་ཆེན་རྣམ་རྒྱལ་སྤུངས་འདྲ།
- ཙོང་ཁའི་སྐྱེས་རི་ནས་དེ་ཡི་རྒྱལ་རབས་ཀྱི་ཚུལ་དུ་ཆགས་པ་རེད།
- ཤར་ཕྱོགས་ན་ལེགས་ཚོགས་ཀྱི་བང་མཛོད་ཆེ་བས།
- སྲོལ་ཆེན་པོ་དང་གར་བའི་རི་རྒྱུད་བདུན་པོ་ཁྲིད་པ།
- ལྷོ་ཕྱོགས་ན་གསོན་སྡོང་གིས་ཁྱབ་པར་ལྡན་པ།
- གཡུ་འབྲུག་ཟིལ་བ་ལྟར་ཚར་དུ་མངར་བ།
- ནུབ་ཕྱོགས་ན་ཁམས་རའི་རྫོང་ཆེན་བཅོ་བརྒྱད།
- བྱུ་རུའི་དམར་པོ་འཁྲུ་ཤིང་དགུང་ལ་སྙེགས་འདྲ།
- རྫོང་བཅོ་བརྒྱད་སྐྱེས་པའི་དཀྱིལ་འཁོར་ན།
- གནས་འགངས་ཆེན་ཨ་ཆུང་གནམ་རྫོང་ཆགས་པ་རེད།
- ཆོས་མདོ་བསྔགས་མེ་རོ་སྩོལ་ས།
- ནང་གྲུབ་མཐའ་ཕྱོགས་མེད་སྦྱང་ས།
- གནས་དེ་ལ་བཀྲ་ཤིས་མེ་ཏོག་གཏོར།
- དཀྱིལ་དབུས་ན་ལྷ་ལུང་དཔལ་རྡོར་གྱིས་དེ་ནས།
- རྨ་ལུང་རྡོ་རྗེ་བྲག་ནས།
- པོ་ཏ་ལ་རང་བྱུང་ང་རྒྱལ་དུ་འགྱིངས་པ།
- ནུབ་ཕྱོགས་ན་མི་མཐུན་ཕལ་རྒོལ་བྱུང་བས།
- འཇམ་དཔལ་སྣ་ལྔ་རེག་བྱ་གཟུགས་པས།
- སྲིན་པོའི་ཕོ་བྲང་ང་རྒྱལ་དུ་སྤེལ་བ།
- ལྷན་སྐྱེད་ཀྱི་ས་ཆ་ཕུན་སུམ་ཚོགས་པ་ཡོད།
- ལྷུན་པོ་དེ་ཡི་མཚན་ཉིད་བརྗོད་ན།
- དཔྱིད་ཟླ་གསུམ་ན་ཕྲ་བོ་གཞུ་ཡི་མཎྜལ་འབུལ་འདྲ།
- དབྱར་ཟླ་གསུམ་ན་སྔོན་མོ་གཡུ་ཡི་མཎྜལ་འབུལ་འདྲ།
- སྟོན་ཟླ་གསུམ་ན་སེར་པོ་གསེར་གྱི་མཎྜལ་འབུལ་འདྲ།
- དགུན་ཟླ་གསུམ་ན་གཡང་ཊི་དཀར་པོ་ཡི་མཆོད་རྟེན།
- སུམ་བཅུ་རྩ་གསུམ་གནས་ལ་བསྙེགས་འདྲ།
- གཡས་སྤྱི་ཡི་མཚན་ཉིད་བརྗོད་ན།
- རྩི་ཤིང་ནགས་ཚལ་རབ་ཏུ་རྒྱས་ས།
- སྙན་པའི་སྒྲ་ལྡན་བྱ་ཚོགས་འདུས་ས།
- མཛེས་པའི་གནས་ས་མེ་ཏོག
- ཆུ་བོ་ཡན་ལག་བརྒྱད་ལྡན་འབབ་ས།
- དུག་སེལ་ནད་སེལ་སྨན་བརྒྱད་འབྱུང་།
- ཤིང་སྣ་འཛོམས་པས་བྱ་རྣམས་དགའ་ས།
- ཆུ་སྣ་འཛོམས་ནས་ཀླུ་རྣམས་དགའ་ས།
- རྩྭ་སྣ་འཛོམས་ནས་ཕྱུགས་རྣམས་དགའ་ས།
- འབྲུ་སྣ་འཛོམས་ནས་མི་རྣམས་དགའ་ས།
- སྒ་གཞུ་གསེར་ལྗོངས་རིང་མོ།
- སྦ་རོག་རོག་ཅན་གྱི་སྟོང་ལྡན་ཡོད་པ།
- མི་ཡི་འཕེལ་ཁ་དར་ས།
- དཀར་གསུམ་མཚོ་མོ་འཁྱིལ་འདྲ།
- ཁངས་སྐྱ་ལེབ་ཅན་གྱི་ཁྲི་སྡེ་ཡོད་གི
- འབྲུ་རིགས་སྣ་ལྔའི་ཕ་ས།
- འབྲུ་ལོ་ཡག་བྱུང་བའི་བང་མཛོད་གང་ས།
- རྗེ་བདག་ཉིད་ཆེན་པོས་ཞབས་ཀྱི་པད་མོ་བཅག་སྟེ།
- བྱིན་གྱིས་རླབས་པའི་ཞིང་ཁམས་དེར།
- སྐྱེས་བུ་དམ་པ་མང་པོ་བྱོན་ཚུལ་བཤད་ན།
- ལ་མོ་བྱ་རུང་དཀར་པོ་ཚོགས་གཉིས་རྒྱ་མཚོ་བྱོན་པ་རེད།
- ལ་མོ་གསེར་ཁྲི་བློ་བཟང་བསྟན་པའི་ཉི་མ་བྱོན་པ་རེད།
- ཀུན་མཁྱེན་རྗེ་བཙུན་གངས་ལྗོངས་འཇིགས་མེད་དབང་པོ་བྱོན་པ་རེད།
- བྱ་ཁྱུང་མཁན་རྒན་ཀོའུ་བ་ཆོས་ཀྱི་རྒྱ་མཚོ་བྱོན་པ་རེད།
- བྱ་ཁྱུང་མཁན་རྒན་རྐ་ཕུག་པཎྚི་ཏ།
- བློ་བཟང་དོན་འགྲུབ་བྱོན་པ་རེད།
- མག་རྒྱའི་མཁན་ཆེན་ལམ་བཟང་།
- འཇམ་དབྱངས་བློ་བཟང་བསྟན་པ་རྒྱ་མཚོ་བྱོན་པ་རེད།
- བྱོན་མཛང་སྤྲུལ་སྐུ་དགེ་ལྡན་ངག་དབང་བཀྲ་ཤིས་བྱོན་པ་རེད།
- ལྷ་རིས་བློ་བཟང་འབྱུང་གནས་རྫོང་ནང་བྱ་རུང་།
- དགུ་རུང་སྣ་ཚོགས་རང་གྲོལ།
- འདི་རྣམས་སྐྱེས་བུ་དམ་པ་རྣམས་ཀྱིས།
- གསང་བསྔགས་ཟབ་མོའི་ཆོས་འཁོར་མང་དུ།
- བསྐོར་བའི་ཞིང་ཁམས་དེར།
- བཀྲ་ཤིས་སངས་རྒྱས་ནམ་མཁའ་གང་གི།
- དབུ་འཕང་མཐོ་བའི་བཀྲ་ཤིས་ཤོག
- བཀྲ་ཤིས་དམ་ཆེན་བར་སྣང་ཁྱབ་པ་དང་།
- དབང་ཐང་དར་བའི་བཀྲ་ཤིས་ཤོག
- བཀྲ་ཤིས་དགེ་འབྲེལ་ས་གཞིར་རྒྱས་པ།
- བསོད་ནམས་ལྡན་པའི་བཀྲ་ཤིས་ཤོག
- རྒན་པ་ཚེ་ཐག་རིང་ས།
- གཞོན་པ་འདབས་ལག་རྒྱས་ས།
- ལྔ་རིག་གནས་ལ་རྒྱུག་པའི་ན་གཞོན་ཚོ།
- འཆད་པའི་་རིག་པ་རྒྱ་མཚོའི་ཀླུང་ནས་ཐོན།
- རྩོད་པའི་སྙིང་སྟོབས་དཔའ་ལ་དེ་ནས་རྒྱས།
- རྩོད་པའི་སྙིང་སྟོབས་ཀྱི་རྣམ་དཔྱོད་རྒྱ་མཚོའི་མཐའ་ནས་རྒྱས།
- ལེ་ལོ་སྒྲོག་དུ་ཆགས་པའི་ཉམས་དགའ་ལ།
- དྲན་སྐུལ་བློ་གྲོས་བྱང་ཆུབ་སྙན་མོ་ཡོད་གི
- བརྩོན་འགྲུས་ཕུགས་བསམ་ལྡན་པའི་ན་གཞོན་ཚོ།
- རྟ་མཆོག་དེ་ལ་ཁ་ལོ་བསྒྱུར་བཞིན་དུ།
- ཡོན་ཏན་གྱི་ཐང་ཆེན་འཕྲེད་དུ་གཅོད།
- ཡུལ་དེར་རིག་དར་འབྱོར་བ་ལྡན་པར་ཤོག
- མི་རྣམས་ཚེ་རིང་ནད་མེད་བཀྲ་ཤིས་བདེ་ལེགས་ཤོག
- དེ་གཅན་ཚ་རྫོང་གི་བསྟོད་པ་དེ་འདྲ་ཞིག་རེད།
- ངས་མདའ་སྟོན་གྱི་བཤད་པ་ཡིན་ཟེར་ཏེ།
- འདི་གཉིས་ཀྱི་རྔ་མར་དེ་མཐུད་ན།
- བོད་ཀྱི་མདའ་སྟོན་བཤད་ན།
- ཡ་་་་དེ་རིང་གནམ་ལ་ཟླ་སྐར་ཡག་གི
- ས་ལ་དུས་བཟང་རྟེན་འབྲེལ་འཛོམས་པའི་ཉི་མ།
- དེ་རིང་གནམ་ལ་ཟླ་སྐར་ཡག་གི
Loading ... Collection:
Subcollection
- Northeastern Tibet (Amdo) Collections
Subject
- Games in Tibet
- Local Festival
Recording Location
- Amdo
Language
- Amdo Group
Time Period:
Creator:
Tashi Gyel
Contributing Author:
ཀླུ་འབུམ་མཚོ།
Contributing Author:
Drolma Tso
Publisher:
Tibetan & Himalayan Library
Data Entry:
Copyright Owner:
Tibetan & Himalayan Library
Year Published:
2019
Visibility:
Public (group default)
Shanti AV Id:
39921
Digital Format:
audio mpeg
Media Type:
Sound