མདའ་རྩེད་འདི་ཁྱད་པར་དུ་ཨ་མདོ་རོང་ཁུལ་དུ་ལྷག་ཏུ་དར་ཁྱབ་ཆེ་བ་འདྲ། སྡེ་བ་གཉིས་ཀྱིས་ཕན་ཚུན་བར་ལ་མདའ་འཐེན་རེས་བྱས་ནས་རྒྱལ་ཕམ་རྩོད། ཁོ་ཚོ་རྩེད་པའི་གོ་རིམ་ཁྲོད་རྒྱལ་ཕམ་དེར་ཧ་ཅང་ཡིད་འཇོག་བྱེད་མོད་ཡིན་ཡང་འདི་ནི་རྩེད་མོ་ཞིག་ལས་ཕམ་སོང་རུང་མཇུག་འབྲས་ངན་པ་ཅི་ཡང་འབྱུང་རྒྱུ་མེད། ཉིན་འགའ་ལ་མདའ་འཐེན་རེས་བྱས་རྗེས་མཐའ་མར་སྡེ་བ་གཉིས་ཀྱིས་གྲོས་བྱས་ཏེ་ཐེངས་དེའི་མཐའ་མཇུག་གི་རྫོགས་ཚིག་གི་ཚབ་ཏུ་སྟོན་མོ་ཞིག་བྱེད་རྒྱུར་ཐག་གཅོད་བྱས་ཚེ་སྟོན་མོ་བྱེད་པ་ཡིན་ལ། དེའི་མིང་ལ་མདའ་སྟོན་ཟེར། དེ་ནི་སྡེ་བ་གཅིག་གི་ནང་གི་སྐྱེས་པ་རྣམས་སྡེ་གཞན་དེར་སོང་ནས་ཉིན་མོར་མདའ་འཐེན་ཚར་རྗེས་དགོང་མོ་སྡེ་བ་དེའི་མ་ཎི་ཁང་དུ་འདུས་ནས་སྡེ་བ་དེའི་སྐྱེས་པོ་མོ་རྣམས་དང་ལྷན་དུ་ཟས་སྣ་ཚོགས་དང་གླུ་ལེན་གར་རྩེད་ལ་རོལ་བ་ཡིན།