ཕ་རིའི་རི་དེ་གསེར་གྱི་རི། | Mandala Collections - Audio-Video

30 Dec 2016

36 sec

Audio Overview

Creators:

Gangsol Folk Culture Preservation Project

Gangsol Nomadic Oral Folk Traditions

ཕ་རིའི་རི་དེ་གསེར་གྱི་རི།།
ཚུ་རིའི་རི་འདི་གསེར་གྱི་རི།།
གསེར་རི་གཉིས་ཀྱི་ཁ་བར་ན།།
གསེར་ཆུ་ཞིག་གིས་འཁྱ་མ་འཁྱིལ།།
གསེར་ཟམ་ཞིག་གིས་ལྡ་མ་ལྡེམ།།
བན་ཆོས་ཡོད་ཕ་རོལ་འབུད་ས་རེད།།
ཆོས་ཡོད་མེད་ཤན་དྭངས་ཕྱེ་ས་རེད།།
ཕ་རིའི་རི་དེ་དངུལ་གྱི་རི།།
ཚུ་རིའི་རི་འདི་དངུལ་གྱི་རི།།
དངུལ་རི་གཉིས་ཀྱི་ཁ་བར་ན།།
དངུལ་ཆུ་ཞིག་གིས་འཁྱ་མ་འཁྱིལ།།
དངུལ་ཟམ་ཞིག་གིས་ལྡ་མ་ལྡེམ།།
བུ་དཔའ་ཡོད་ཕ་རོལ་འབུད་ས་རེད།།
དཔའ་མེད་ཚུ་རིར་ལྷག་ས་རེད།།
དཔའ་ཡོད་མེད་ཤན་དྭངས་ཕྱེ་ས་རེད།།
ཕ་རིའི་རི་དེ་དུང་གི་རི།།
ཚུ་རིའི་རི་འདི་དུང་གི་རི།།
དུང་རི་གཉིས་ཀྱི་ཁ་བར་ན།།
དུང་ཆུ་ཞིག་གིས་འཁྱ་མ་འཁྱིལ།།
དུང་ཟམ་ཞིག་གིས་ལྡ་མ་ལྡེམ།།
སྨན་གནས་ཡོད་ཕ་རིར་འབུད་ས་རེད།།
གནས་མེད་ཚུ་རིར་ལྷག་ས་རེད།།
གནས་ཡོད་མེད་ཤན་དྭངས་ཕྱེ་ས་རེད།།